ਅੱਖਾਂ ਮਨੁੱਖੀ ਸਰੀਰ ਦਾ ਸਭ ਤੋਂ ਅਹਿਮ ਅਤੇ ਸੰਵੇਦਨਸ਼ੀਲ ਅੰਗ ਹਨ। ਇਨ੍ਹਾਂ ਦੀ ਉਚਿੱਤ ਦੇਖਭਾਲ ਬਹੁਤ ਹੀ ਜ਼ਰੂਰੀ ਹੈ। ਕਈ ਅਜਿਹੇ ਖੁਰਾਕ ਪਦਾਰਥ ਹਨ ਜੋ ਸਾਡੀਆਂ ਅੱਖਾਂ ਨੂੰ ਸਿਹਤਮੰਦ ਬਣਾਉਣ ਵਿਚ ਸਹਾਇਕ ਹੁੰਦੇ ਹਨ। ਆਓ ਜਾਣਦੇ ਹਾਂ ਅਜਿਹੇ ਹੀ ਕੁਝ ਖੁਰਾਕ ਪਦਾਰਥਾਂ ਬਾਰੇ :
ਆਂਡੇ ਦੀ ਜਰਦੀ : ਫਿੱਟਨੈੱਸ ਅਤੇ ਨਿਊਟ੍ਰੀਸ਼ਨ ਮਾਹਿਰ ਡਾ. ਚਿਰਾਗ ਸੇਠੀ ਮੁਤਾਬਕ ਆਂਡੇ ਦੀ ਜਰਦੀ ਵਿਚ ਲਿਊਟੀਨ ਨਾਮਕ ਇਕ ਪੀਲੇ ਰੰਗ ਦਾ ਐਂਟੀਆਕਸੀਡੈਂਟ ਮੌਜੂਦ ਹੁੰਦਾ ਹੈ, ਜਿਸਦਾ ਸੰਬੰਧ ਅੱਖਾਂ ਨੂੰ ਸਿਹਤਮੰਦ ਰੱਖਣ ਵਾਲੇ ਕੈਰੋਟੀਨਾਇਜ ਨਾਮਕ ਯੌਗਿਕਾਂ ਨਾਲ ਹੈ। ਲਿਊਟੀਨ ਅਤੇ ਇਸ ਨਾਲ ਮਿਲਦਾ-ਜੁਲਦਾ ਇਕ ਯੌਗਿਕ ਜੈਕਸੈਨਥਿਨ ਸੰਯੁਕਤ ਰੂਪ ਨਾਲ ਰੈਟੀਨਾ ਦੇ ਮੈਕਯੂਲਾ ਵਿਚ ਇਕੱਠੇ ਹੋ ਜਾਂਦੇ ਹਨ। ਇਹ ਫ੍ਰੀ ਰੈਡੀਕਲਸ ਨੂੰ ਨਸ਼ਟ ਕਰ ਦਿੰਦੇ ਹਨ ਅਤੇ ਅੱਖਾਂ ਨੂੰ ਸਿਹਤਮੰਦ ਰੱਖਦੇ ਹਨ।
ਹਰੀਆਂ ਸਬਜ਼ੀਆਂ : ਤੇਜ਼ ਨਜ਼ਰ ਅਤੇ ਅੱਖਾਂ ਦੀ ਵਧੀਆ ਸਿਹਤ ਲਈ ਲਿਊਟੀਨ ਅਤੇ ਜੈਕਸੈਨਥਿਨ ਦੋਵੇਂ ਹੀ ਬਹੁਤ ਅਹਿਮ ਹਨ। ਇਹ ਮੂਲ ਰੂਪ ਨਾਲ ਹਰੀਆਂ ਪੱਤੇਦਾਰ ਸਬਜ਼ੀਆਂ ਵਿਚ ਪਾਏ ਜਾਂਦੇ ਹਨ। ਪਾਲਕ ਵਿਚ ਲਿਊਟੀਨ ਭਰਪੂਰ ਮਾਤਰਾ ਵਿਚ ਮੌਜੂਦ ਹੁੰਦਾ ਹੈ। ਇਸ ਲਈ ਇਸ ਦਾ ਅੱਖਾਂ 'ਤੇ ਚਮਤਕਾਰੀ ਪ੍ਰਭਾਵ ਪੈਂਦਾ ਹੈ। ਕੱਚੀ ਪਾਲਕ ਦਾ ਸੇਵਨ ਕਰਨਾ ਸਭ ਤੋਂ ਵਧੀਆ ਹੁੰਦਾ ਹੈ, ਕਿਉਂਕਿ ਪਕਾਈ ਗਈ ਪਾਲਕ 'ਚ ਕੁਝ ਐਂਟੀਆਕਸੀਡੈਂਟਸ ਨਸ਼ਟ ਹੋ ਜਾਂਦੇ ਹਨ। ਪਾਲਕ ਤੋਂ ਇਲਾਵਾ ਤੁਸੀਂ ਹਰੀ ਫੁੱਲਗੋਭੀ, ਮਟਰ, ਪੁੰਗਰੇ ਹੋਏ ਖੁਰਾਕ ਪਦਾਰਥ ਆਦਿ ਨੂੰ ਵੀ ਆਪਣੀ ਡਾਈਟ ਵਿਚ ਸ਼ਾਮਲ ਕਰਕੇ ਅੱਖਾਂ ਦੀ ਸਿਹਤ ਵਧੀਆ ਬਣਾਈ ਜਾ ਸਕਦੀ ਹੈ।
ਪਪੀਤਾ : ਇਹ ਸਿਰਫ ਤੁਹਾਡੀ ਚਮੜੀ ਅਤੇ ਪੇਟ ਲਈ ਹੀ ਵਧੀਆ ਨਹੀਂ ਹੁੰਦਾ ਸਗੋਂ ਤੁਹਾਡੀਆਂ ਅੱਖਾਂ ਲਈ ਸ਼ਾਨਦਾਰ ਕੰਮ ਕਰਦਾ ਹੈ। ਤਾਜ਼ਾ ਪਪੀਤੇ ਦਾ ਦਿਨ ਵਿਚ ਤਿੰਨ ਵਾਰ ਸੇਵਨ ਕਰਨ ਨਾਲ ਮੈਕਿਯੂਲਰ ਡੀਜੈਨਰੇਸ਼ਨ ਅਤੇ ਗਲੂਕੋਮਾ ਵਰਗੇ ਰੋਗਾਂ ਨੂੰ ਘੱਟ ਕਰਨ ਵਿਚ ਮਦਦ ਮਿਲਦੀ ਹੈ। ਪਪੀਤਾ ਵਿਟਾਮਿਨ 'ਏ', 'ਸੀ' ਅਤੇ 'ਈ' ਦਾ ਸ਼ਾਨਦਾਰ ਸ੍ਰੋਤ ਹੈ ਜੋ ਵਧਦੀ ਉਮਰ ਦੀਆਂ ਅੱਖਾਂ ਨਾਲ ਸੰਬੰਧਿਤ ਬੀਮਾਰੀਆਂ ਵਿਚ ਬਹੁਤ ਹੀ ਵਧੀਆ ਭੂਮਿਕਾ ਅਦਾ ਕਰਦਾ ਹੈ।
ਬਦਾਮ : ਮੁੱਠੀ ਭਰ ਬਦਾਮਾਂ ਦੇ ਸੇਵਨ ਨਾਲ ਤੁਹਾਨੂੰ ਵਿਟਾਮਿਨ ਈ ਦੀ ਜ਼ਰੂਰੀ ਖੁਰਾਕ ਦਾ ਅੱਧਾ ਹਿੱਸਾ ਮਿਲਦਾ ਹੈ। ਬਦਾਮ ਮੈਕਿਯੂਲਰ ਡੀਜੈਨਰੇਸ਼ਨ ਦੀ ਪ੍ਰਕਿਰਿਆ ਨੂੰ ਹੌਲੀ ਕਰਨ ਵਿਚ ਬਹੁਤ ਸਹਾਇਕ ਹੁੰਦੇ ਹਨ। ਇਕ ਵੱਡਾ ਚਮਚ ਵੱਖ-ਵੱਖ ਤਰ੍ਹਾਂ ਦੇ ਮੇਵਿਆਂ ਨੂੰ ਸਵੇਰ ਦੇ ਸਮੇਂ ਓਟ ਮੀਲ ਨਾਲ ਮਿਕਸ ਕਰੋ ਅਤੇ ਇਸਦਾ ਸੇਵਨ ਕਰੋ। ਤੁਸੀਂ ਬਦਾਮਾਂ ਨੂੰ ਸ਼ਾਮ ਦੇ ਸਨੈਕ ਦੇ ਤੌਰ 'ਤੇ ਵੀ ਖਾ ਸਕਦੇ ਹੋ।
ਸੈਮਨ ਮੱਛੀ : ਸੈਮਨ ਮੱਛੀ ਵਿਚ ਓਮੇਗਾ-3 ਫੈਟਸ ਅਤੇ ਐਸਟਾਜੈਨਥਿਕ ਨਾਮਕ ਅੱਖਾਂ ਲਈ ਬਹੁਤ ਅਹਿਮ ਪੋਸ਼ਕ ਤੱਤ ਹੁੰਦੇ ਹਨ। ਐਸਟਾਜੈਨਥਿਨ ਇਕ ਸ਼ਕਤੀਸ਼ਾਲੀ ਐਂਟੀਆਕਸੀਡੈਂਟ ਹੈ, ਜਿਸਦਾ ਤੁਹਾਡੀਆਂ ਅੱਖਾਂ ਨੂੰ ਇਕ ਵਿਸ਼ੇਸ਼ ਲਾਭ ਮਿਲਦਾ ਹੈ। ਮੱਛੀ ਦਾ ਸੇਵਨ ਕਰਨ ਨਾਲ ਡ੍ਰਾਈ ਆਈ ਸਿਡ੍ਰੋਮ ਵੀ ਘੱਟ ਹੁੰਦਾ ਹੈ, ਕਿਉਂਕਿ ਓਮੇਗਾ ਫੈਟੀ ਐਸਿਡਸ ਤੁਹਾਡੇ ਹੰਝੂਆਂ ਦੀ ਗੁਣਵੱਤਾ ਸੁਧਾਰਨ ਵਿਚ ਮਦਦ ਕਰਦੇ ਹਨ।
ਨਵੀਂ ਤਕਨੀਕ ਵਧਾ ਦੇਵੇਗੀ ਤੁਹਾਡੇ ਚੱਲਣ ਦੀ ਸਮੱਰਥਾ
NEXT STORY 
