ਨਵੀਂ ਦਿੱਲੀ (ਏਜੰਸੀ)- ਕੇਂਦਰੀ ਜਾਂਚ ਬਿਊਰੋ (ਸੀ. ਬੀ. ਆਈ.) ਨੇ ਸੁਪਰੀਮ ਕੋਰਟ ਦੀ ਜਾਅਲੀ ਵੈੱਬਸਾਈਟ ਦੀ ਵਰਤੋਂ ਕਰ ਕੇ ‘ਡਿਜੀਟਲ ਅਰੈਸਟ’ ਰਾਹੀਂ ਠੱਗੀ ਕਰਨ ਵਾਲੇ ਗਿਰੋਹ ਵਿਰੁੱਧ ਬੁੱਧਵਾਰ 16 ਸੂਬਿਆਂ ’ਚ 80 ਥਾਵਾਂ ’ਤੇ ਛਾਪੇ ਮਾਰੇ। ਏਜੰਸੀ ਨੇ ‘ਆਪ੍ਰੇਸ਼ਨ ਚੱਕਰ-6’ ਅਧੀਨ 16 ਸੂਬਿਆਂ ’ਚ 60 ਵਿਸ਼ੇਸ਼ ਟੀਮਾਂ ਤਾਇਨਾਤ ਕੀਤੀਆਂ। ਇਨ੍ਹਾਂ ਟੀਮਾਂ ਨੇ ਪੰਜਾਬ, ਗੁਜਰਾਤ, ਦਿੱਲੀ, ਮਹਾਰਾਸ਼ਟਰ, ਹਰਿਆਣਾ, ਉੱਤਰ ਪ੍ਰਦੇਸ਼, ਮੱਧ ਪ੍ਰਦੇਸ਼, ਰਾਜਸਥਾਨ, ਤਾਮਿਲਨਾਡੂ, ਤੇਲੰਗਾਨਾ, ਆਂਧਰਾ ਪ੍ਰਦੇਸ਼, ਆਸਾਮ, ਪੱਛਮੀ ਬੰਗਾਲ, ਮਣੀਪੁਰ, ਕਰਨਾਟਕ ਤੇ ਓਡਿਸ਼ਾ ’ਚ ਇਕੋ ਸਮੇਂ ਛਾਪੇ ਮਾਰੇ। ਏਜੰਸੀ ਨੇ ਸਾਈਬਰ ਧੋਖਾਦੇਹੀ ਦੇ 200 ਤੋਂ ਵੱਧ ਮਾਮਲਿਆਂ ’ਚ ਸ਼ਾਮਲ ਇਕ ਕਥਿਤ ਗਿਰੋਹ ਵਿਰੁੱਧ ਕਾਰਵਾਈ ਕੀਤੀ।
‘ਡਿਜੀਟਲ ਅਰੈਸਟ’ ਸਾਈਬਰ ਪ੍ਰਣਾਲੀ ਰਾਹੀਂ ਜਬਰੀ ਪੈਸਾ ਵਸੂਲਣ ਦੇ ਅਜਿਹੇ ਸਭ ਤੋਂ ਖਤਰਨਾਕ ਰੂਪਾਂ ’ਚੋਂ ਇਕ ਵਜੋਂ ਉਭਰਿਆ ਹੈ, ਜਿੱਥੇ ਪੀੜਤਾਂ ਸਾਹਮਣੇ ਖੁਦ ਨੂੰ ਪੁਲਸ ਅਧਿਕਾਰੀ, ਕੇਂਦਰੀ ਏਜੰਸੀਆਂ ਦੇ ਜਾਂਚਕਰਤਾ ਜਾਂ ਜੁਡੀਸ਼ੀਅਲ ਅਧਿਕਾਰੀ ਵਜੋਂ ਪੇਸ਼ ਕੀਤਾ ਜਾਂਦਾ ਹੈ ਤੇ ਪੈਸੇ ਵਸੂਲਣ ਲਈ ਡਰਾਇਆ ਜਾਂਦਾ ਹੈ। ਪੀੜਤਾਂ ਨੂੰ ਵੱਖ-ਵੱਖ ਤਰ੍ਹਾਂ ਦੀ ਧਮਕੀ ਦਿੱਤੀ ਜਾਂਦੀ ਹੈ ਤੇ ਗ੍ਰਿਫ਼ਤਾਰੀ ਜਾਂ ਮੁਕੱਦਮੇ ਤੋਂ ਬਚਣ ਲਈ ਭੁਗਤਾਨ ਕਰਨ ਲਈ ਮਜਬੂਰ ਕੀਤਾ ਜਾਂਦਾ ਹੈ।
ਸੀ. ਬੀ. ਆਈ. ਨੇ ਕਿਹਾ ਕਿ ਇਸ ਘਪਲੇ ਦੇ ਕੇਂਦਰ ’ਚ ਇਕ ਵੈੱਬਸਾਈਟ ਹੈ ਜਿਸ ਦਾ ਯੂਨੀਫਾਰਮ ਰਿਸੋਰਸ ਲੋਕੇਟਰ ਭੁਲੇਖਾਪਾਊ ਢੰਗ ਨਾਲ ਭਾਰਤ ਦੀ ਸੁਪਰੀਮ ਕੋਰਟ ਦੀ ਅਧਿਕਾਰਤ ਵੈੱਬਸਾਈਟ ਨਾਲ ਮੇਲ ਖਾਂਦਾ ਹੈ। ਧੋਖਾਦੇਹੀ ਕਰਨ ਵਾਲਿਆਂ ਨੇ ਡਿਜੀਟਲ ਅਰੈਸਟ ਦੀ ਆੜ ’ਚ ਪੀੜਤਾਂ ਨੂੰ ਧੋਖਾ ਦੇਣ ਲਈ ਧੋਖੇ ਨਾਲ ਰਜਿਸਟਰਡ ਹੋਈ ਉਕਤ ਡੋਮੇਨ ਦੀ ਵਰਤੋਂ ਕੀਤੀ।
ਚੇਨਈ ਤੇ ਕੋਲਕਾਤਾ ਤੋਂ 2 ਮੁਲਜ਼ਮ ਗ੍ਰਿਫ਼ਤਾਰ
ਚੇਨਈ ਤੋਂ ਬੀ. ਨਰੇਸ਼ ਤੇ ਕੋਲਕਾਤਾ ਤੋਂ ਸੰਜੀਬ ਸਾਹਾ ਨਾਮੀ 2 ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਉਹ ਇਕ ਅਜਿਹੇ ਗਿਰੋਹ ਦਾ ਹਿੱਸਾ ਹਨ ਜੋ ਧੋਖਾਦੇਹੀ ਕਰਨ, ਧਮਕੀਆਂ ਦੇਣ ਤੇ ਤਕਨੀਕੀ ਚਾਲਾਂ ਰਾਹੀਂ ਨਾਗਰਿਕਾਂ ਨੂੰ ਲੁੱਟਦੇ ਸਨ। ਗ੍ਰਿਫ਼ਤਾਰ ਕੀਤੇ ਗਏ ਸ਼ੱਕੀ ਕਥਿਤ ਤੌਰ ’ਤੇ ਸ਼ੈੱਲ ਕੰਪਨੀਆਂ ਸਥਾਪਤ ਕਰ ਕੇ ਅਤੇ ਮਿਊਲ ਬੈਂਕ ਖਾਤੇ ਖੋਲ੍ਹ ਕੇ ਮਨੀ ਲਾਂਡਰਿੰਗ ਲਈ ਵਿੱਤੀ ਪ੍ਰਣਾਲੀਆਂ ਬਣਾਉਣ ’ਚ ਸ਼ਾਮਲ ਸਨ।
ED ਦੀ ਵੱਡੀ ਕਾਰਵਾਈ! ਸੰਜੀਵ ਅਰੋੜਾ, ਉਨ੍ਹਾਂ ਨਾਲ ਜੁੜੀਆਂ ਸੰਸਥਾਵਾਂ ਦੀਆਂ 55 ਕਰੋੜ ਰੁਪਏ ਦੀਆਂ ਜਾਇਦਾਦਾਂ ਕੁਰਕ
NEXT STORY 
