ਖਰੜ (ਰਣਬੀਰ) : ਚੰਡੀਗੜ੍ਹ ਤੋਂ ਖਰੜ ਆਉਂਦੇ ਸਮੇਂ ਨਿਜ਼ਰ ਚੌਂਕ ਦੇ ਨੇੜੇ ਹਾਈਵੇ 'ਤੇ ਉਸ ਵੇਲੇ ਦਹਿਸ਼ਤ ਦਾ ਮਾਹੌਲ ਬਣ ਗਿਆ, ਜਦੋਂ ਇੱਕ ਸਫੈਦ ਰੰਗ ਦੀ ਟੈਕਸੀ ਨੰਬਰ ਕਾਰ ਦੇ ਡਰਾਈਵਰ ਨੇ ਉਸਦਾ ਪਿੱਛਾ ਕਰ ਰਹੀ ਹਿਮਾਚਲ ਪ੍ਰਦੇਸ਼ ਪੁਲਸ ਦੀ ਟੀਮ 'ਤੇ ਤਲਵਾਰ ਨਾਲ ਹਮਲਾ ਕਰ ਦਿੱਤਾ। ਉਕਤ ਡਰਾਈਵਰ ਨਿਹੰਗ ਦੇ ਬਾਣੇ 'ਚ ਸੀ। ਜਿਵੇਂ ਹੀ ਪੁਲਸ ਵਲੋਂ ਉਸ ਨੂੰ ਕਾਬੂ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ, ਉਸ ਨੇ ਤਲਵਾਰ ਕੱਢ ਕੇ ਪੁਲਸ ਵੱਲ ਲਹਿਰਾਉਣੀ ਸ਼ੁਰੂ ਕਰ ਦਿੱਤੀ। ਕਾਫੀ ਦੇਰ ਤੱਕ ਉਕਤ ਵਿਅਕਤੀ ਨੇ ਕਿਸੇ ਮੁਲਾਜ਼ਮ ਨੂੰ ਆਪਣੇ ਨੇੜੇ ਨਹੀ ਲੱਗਣ ਦਿੱਤਾ। ਇਸ ਸਭ ਦੌਰਾਨ ਕਾਰ 'ਚ ਸਵਾਰ ਦੋ ਹੋਰ ਔਰਤਾਂ ਨੇ ਵੀ ਪੁਲਸ 'ਤੇ ਹਮਲਾ ਕੀਤਾ।
ਕੀ ਹੈ ਪੂਰਾ ਮਾਮਲਾ?
ਥਾਣਾ ਡਮਟਾਲ (ਜ਼ਿਲ੍ਹਾ ਕਾਂਗੜਾ, ਹਿਮਾਚਲ ਪ੍ਰਦੇਸ਼) 'ਚ ਤਾਇਨਾਤ ਪੁਲਸ ਮੁਲਾਜ਼ਮ ਰਾਜਪਾਲ ਠਾਕੁਰ ਮੁਤਾਬਕ ਮਾਮਲਾ ਗੰਭੀਰ ਹੁੰਦਿਆਂ ਦੇਖ ਉਨ੍ਹਾਂ ਵਲੋਂ ਇਸਦੀ ਇਤਲਾਹ ਫੌਰੀ ਖਰੜ ਸਿਟੀ ਪੁਲਸ ਨੂੰ ਦਿੱਤੀ ਗਈ। ਇਸ 'ਤੇ ਸਿਟੀ ਸਣੇ ਸੰਨੀ ਇਨਕਲੇਵ ਚੌਂਕੀ ਤੋਂ ਪੁਲਸ ਟੀਮ ਮੌਕੇ 'ਤੇ ਪੁੱਜ ਗਈ। ਮੌਕੇ ਦੀ ਨਜ਼ਾਕਤ ਨੂੰ ਵੇਖਦਿਆਂ ਕਿਸੇ ਆਮ ਰਾਹਗੀਰ ਨੂੰ ਕੋਈ ਨੁਕਸਾਨ ਨਾ ਪਹੁੰਚੇ, ਪੁਲਸ ਵਲੋਂ ਸਲਿੱਪ ਰੋਡ 'ਤੇ ਆਪਣੀ ਗੱਡੀ ਵਿਚਕਾਰ ਖੜ੍ਹੀ ਕਰ ਆਵਾਜਾਈ ਰੋਕ ਦਿੱਤੀ ਗਈ। ਇਸ ਤਰ੍ਹਾਂ ਕਰੀਬ 40 ਤੋਂ 45 ਮਿੰਟ ਤੱਕ ਚੱਲੇ ਇਸ ਹੰਗਾਮੇ ਕਾਰਨ ਚੰਡੀਗੜ੍ਹ-ਖਰੜ ਹਾਈਵੇ 'ਤੇ ਜਾਮ ਵਰਗਾ ਮਾਹੌਲ ਬਣ ਗਿਆ। ਆਖ਼ਰਕਾਰ ਇੱਕ ਦਰਜਨ ਦੇ ਕਰੀਬ ਪੁਲਸ ਮੁਲਾਜ਼ਮਾਂ ਨੇ ਇਕੱਠੇ ਹੋ ਉਕਤ ਵਿਅਕਤੀ ਨੂੰ ਕਾਬੂ ਕਰ ਹੀ ਲਿਆ। ਉਸ ਦੀ ਪਛਾਣ ਅਮਨਦੀਪ ਸਿੰਘ ਵਜੋਂ ਹੋਈ, ਜੋ ਨਿਹੰਗ ਦੇ ਭੇਸ 'ਚ ਸੀ ਅਤੇ ਮੂਲ ਰੂਪ 'ਚ ਮਹਾਰਾਸ਼ਟਰ ਦਾ ਨਿਵਾਸੀ ਦੱਸਿਆ ਜਾ ਰਿਹਾ ਹੈ। ਉਸ 'ਤੇ ਦੋਸ਼ ਹੈ ਕਿ ਬੀਤੀ 26 ਜੂਨ ਦੀ ਰਾਤ ਨੂੰ ਆਪਣੇ 2 ਹੋਰ ਸਾਥੀਆਂ ਨਾਲ ਮਿਲ ਕੇ ਪਠਾਨਕੋਟ ਤੋਂ ਆਉਂਦੀਆਂ ਭਦਰੌਆ ਟੋਲ ਟੈਕਸ 'ਤੇ ਤਾਇਨਾਤ ਨਾਈਟ ਡਿਊਟੀ ਕਰਮਚਾਰੀ ਮੋਹਨ ਸਿੰਘ ਅਤੇ ਉਸਦੇ ਸਾਥੀ ਤੋਂ ਤਲਵਾਰ ਦੀ ਨੋਕ 'ਤੇ 55 ਹਜ਼ਾਰ ਰੁਪਏ ਲੁੱਟੇ ਸਨ।
ਮੋਹਾਲੀ ਤੋਂ ਫਰਾਰ, ਨਿੱਜਰ ਚੌਂਕ 'ਤੇ ਘੇਰਾਬੰਦੀ
ਹਿਮਾਚਲ ਪੁਲਸ ਮੁਤਾਬਕ ਅਮਨਦੀਪ ਸਿੰਘ ਮੋਹਾਲੀ ਦੇ ਵਾਈ. ਪੀ. ਐੱਸ. ਚੌਂਕ ਨੇੜੇ ਚੱਲ ਰਹੇ ਇੱਕ ਧਰਨੇ ਦੌਰਾਨ ਉੱਥੇ ਲੁਕਿਆ ਹੋਇਆ ਸੀ। ਪੁਲਸ ਨੂੰ ਪਤਾ ਲੱਗਣ 'ਤੇ ਉਹ 2 ਔਰਤਾਂ ਨਾਲ ਕਾਰ ਰਾਹੀਂ ਫ਼ਰਾਰ ਹੋ ਗਿਆ। ਹਿਮਾਚਲ ਪੁਲਸ ਨੇ ਉਸ ਦੀ ਕਾਰ ਦਾ ਪਿੱਛਾ ਕਰਦਿਆਂ ਇੱਥੇ ਨਿੱਜਰ ਚੌਂਕ 'ਤੇ ਘੇਰ ਲਿਆ।
2 ਪੁਲਸ ਕਰਮਚਾਰੀ ਜ਼ਖ਼ਮੀ
ਕਾਰ ਤੋਂ ਉਤਰਨ ਦੇ ਨਾਲ ਹੀ ਅਮਨਦੀਪ ਨੇ ਤਲਵਾਰ ਲਹਿਰਾਉਣੀ ਸ਼ੁਰੂ ਕਰ ਦਿੱਤੀ। ਉਸਦੇ ਨਾਲ ਸਵਾਰ 2 ਔਰਤਾਂ ਨੇ ਵੀ ਪੁਲਸ ਨਾਲ ਧੱਕਾ-ਮੁੱਕੀ ਕੀਤੀ। ਝੜਪ ਦੌਰਾਨ ਖਰੜ ਸਿਟੀ ਪੁਲਸ ਦੇ ਮੁਲਾਜ਼ਮ ਹੈੱਡ ਕਾਂਸਟੇਬਲ ਸੁਖਮਿੰਦਰ ਸਿੰਘ ਅਤੇ ਕਾਂਸਟੇਬਲ ਦਵਿੰਦਰ ਸਿੰਘ ਜ਼ਖ਼ਮੀ ਹੋ ਗਏ। ਸੁਖਮਿੰਦਰ ਸਿੰਘ ਦੀ ਬਾਂਹ 'ਤੇ ਤਲਵਾਰ ਦਾ ਗੰਭੀਰ ਜ਼ਖ਼ਮ ਹੋਇਆ, ਜਿਸ ਲਈ 9 ਟਾਂਕੇ ਲਗੇ ਹਨ। ਦੋਵੇਂ ਮੁਲਾਜ਼ਮ ਸਿਵਲ ਹਸਪਤਾਲ ਖਰੜ ਵਿੱਚ ਜ਼ੇਰੇ ਇਲਾਜ ਹਨ। ਅਮਨਦੀਪ ਨਾਲ ਮੌਜੂਦ ਔਰਤਾਂ
ਨੇ ਪੁਲਸ 'ਤੇ ਅਮਨਦੀਪ ਨੂੰ ਝੂਠੇ ਮਾਮਲੇ 'ਚ ਫਸਾਉਣ ਦੇ ਦੋਸ਼ ਲਾਏ ਹਨ। ਉਸ ਨਾਲ ਕੀਤੀ ਗਈ ਧੱਕੇਸ਼ਾਹੀ ਦੀ ਵੀਡੀਓ ਵੀ ਵਾਇਰਲ ਹੋਈ ਹੈ। ਜਦੋਂ ਪੁਲਸ ਨੇ ਉਸ ਨੂੰ ਗ੍ਰਿਫ਼ਤਾਰ ਕਰਕੇ ਥਾਣੇ ਲਿਜਾਣ ਦੀ ਕੋਸ਼ਿਸ਼ ਕੀਤੀ ਤਾਂ ਔਰਤਾਂ ਵਲੋਂ ਪੁਲਸ ਦੀ ਗੱਡੀ ਨੂੰ ਰੋਕਣ ਦੀ ਵੀ ਕੋਸ਼ਿਸ਼ ਕੀਤੀ।
ਕੇਸ ਦਰਜ, ਹਿਮਾਚਲ ਪੁਲਸ ਵਲੋਂ ਦੋਸ਼ੀ ਨੂੰ ਲਿਆ ਹਿਰਾਸਤ 'ਚ
ਸਿਟੀ ਥਾਣੇ ਖਰੜ 'ਚ ਡਮਟਾਲ ਥਾਣੇ ਦੇ ਮੁਲਾਜ਼ਮ ਰਾਜਪਾਲ ਠਾਕੁਰ ਦੇ ਬਿਆਨ 'ਤੇ ਅਮਨਦੀਪ ਅਤੇ ਦੋ ਹੋਰ ਅਣਪਛਾਤੀਆਂ ਔਰਤਾਂ ਖ਼ਿਲਾਫ਼ ਸਰਕਾਰੀ ਕੰਮ 'ਚ ਰੁਕਾਵਟ ਪੈਦਾ ਕਰਨ ਅਤੇ ਕਤਲ ਦੀ ਕੋਸ਼ਿਸ਼ ਦੀ ਧਾਰਾਵਾਂ ਅਧੀਨ ਮਾਮਲਾ ਦਰਜ ਕੀਤਾ ਗਿਆ ਹੈ। ਡੀ. ਐੱਸ. ਪੀ. ਖਰੜ ਕਰਨ ਸਿੰਘ ਸੰਧੂ ਨੇ ਦੱਸਿਆ ਕਿ ਹਿਮਾਚਲ ਵਿੱਚ ਦਰਜ ਲੁੱਟ ਦੇ ਕੇਸ ਵਿੱਚ ਅਮਨਦੀਪ ਸਿੰਘ ਨੂੰ ਹਿਮਾਚਲ ਪੁਲਸ ਵਲੋਂ ਹਿਰਾਸਤ 'ਚ ਲੈ ਲਿਆ ਗਿਆ ਹੈ। ਖਰੜ ਥਾਣੇ ਵਿੱਚ ਦਰਜ ਕੇਸ ਸਬੰਧੀ ਖਰੜ ਪੁਲਸ ਦੋਸ਼ੀ ਦਾ ਅਦਾਲਤ ਤੋਂ ਪ੍ਰੋਡਕਸ਼ਨ ਵਾਰੰਟ ਹਾਸਲ ਕਰ ਆਪਣੇ ਵਲੋਂ ਗ੍ਰਿਫ਼ਤਾਰੀ ਪਾਏਗੀ।
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
ਬਾਰਸ਼ ਬਣੀ ਕਹਿਰ, ਗਰੀਬ ਪਰਿਵਾਰ ਦੇ ਮਕਾਨ ਦੀ ਡਿੱਗੀ ਛੱਤ
NEXT STORY 
