ਜਲੰਧਰ (ਨਰੇਸ਼ ਕੁਮਾਰ)— ਕੰਮ ਦੇ ਰਿਪੋਰਟ ਕਾਰਡ ਦੀ ਗੱਲ ਕਰਨ ਵਾਲੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਪਾਰਟੀ ਭਾਜਪਾ ਦਿੱਲੀ ਚੋਣਾਂ 'ਚ 'ਖੇਡ' ਦੇ ਆਪਣੇ ਹੀ ਨਿਯਮ ਭੁੱਲ ਗਈ। ਇਕ ਪਾਸੇ ਜਿੱਥੇ ਅਰਵਿੰਦ ਕੇਜਰੀਵਾਲ ਨੇ 2018 ਤੋਂ ਹੀ ਆਪਣੇ ਮੁਹੱਲਾ ਕਲੀਨਿਕ ਅਤੇ ਸਿੱਖਿਆ ਨੂੰ ਲੈ ਕੇ ਪ੍ਰਚਾਰ ਕਰਨਾ ਸ਼ੁਰੂ ਕਰ ਦਿੱਤਾ ਸੀ, ਉਥੇ ਹੀ ਦੂਜੇ ਪਾਸੇ ਭਾਜਪਾ ਦਿੱਲੀ 'ਚ ਨਾ ਸਿਰਫ ਕੇਜਰੀਵਾਲ ਦੇ ਮੁਕਾਬਲੇ ਕੰਮ ਦੀ ਵੱਡੀ ਲਾਈਨ ਖਿੱਚਣ 'ਚ ਨਾਕਾਮ ਰਹੀ ਸਗੋਂ ਪਾਰਟੀ ਨੇਤਾਵਾਂ ਨੇ ਅਜਿਹੀਆਂ ਗਲਤੀਆਂ ਕੀਤੀਆਂ, ਜੋ ਸਿਆਸੀ ਰੂਪ 'ਚ ਖਤਰਨਾਕ ਸਾਬਤ ਹੋਈਆਂ। ਮੋਟੇ ਤੌਰ 'ਤੇ ਪਾਰਟੀ ਦਾ ਪ੍ਰਚਾਰ ਨੈਗੇਟਿਵ ਲਾਈਨ 'ਤੇ ਰਿਹਾ ਜੋ ਉਨ੍ਹਾਂ ਦੀ ਹਾਰ ਦਾ ਕਾਰਨ ਬਣਿਆ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਇੰਨਾ ਨੈਗੇਟਿਵ ਪ੍ਰਚਾਰ ਉਸ ਪਾਰਟੀ ਨੇ ਕੀਤਾ, ਜੋ ਖੁਦ ਵਿਰੋਧੀ ਧਿਰ ਦੇ ਨੈਗੇਟਿਵ ਪ੍ਰਚਾਰ ਨੂੰ ਹਥਿਆਰ ਬਣਾ ਕੇ ਕੇਂਦਰ ਦੀ ਸੱਤਾ ਵਿਚ ਆਈ ਹੈ।
ਕਿਉਂ ਨੈਗੇਟਿਵ ਹੋਇਆ ਭਾਜਪਾ ਦਾ ਪ੍ਰਚਾਰ
ਭਾਜਪਾ ਕੋਲ ਇਸ ਚੋਣ ਪ੍ਰਚਾਰ ਦੌਰਾਨ ਜਨਤਾ ਨੂੰ ਦਿਖਾਉਣ ਲਈ ਕੁਝ ਖਾਸ ਨਹੀਂ ਸੀ। ਪਾਰਟੀ ਨੇ ਦਿੱਲੀ ਦੇ ਨੇਤਾਵਾਂ 'ਤੇ ਭਰੋਸਾ ਕਰਨ ਦੀ ਬਜਾਏ ਸਾਰੇ ਸੂਬਿਆਂ ਦੇ ਮੁੱਖ ਮੰਤਰੀਆਂ, ਆਪਣੇ ਸਹਿਯੋਗੀ ਨਿਤੀਸ਼ ਕੁਮਾਰ ਅਤੇ ਸੁਖਬੀਰ ਬਾਦਲ ਤਕ ਦਾ ਸਹਾਰਾ ਲਿਆ ਪਰ ਦਿੱਲੀ ਦਾ ਕੋਈ ਚਿਹਰਾ ਪਾਰਟੀ ਦੇ ਚਿਹਰੇ ਦੇ ਤੌਰ 'ਤੇ ਪੇਸ਼ ਨਹੀਂ ਕੀਤਾ। ਇਕ ਪਾਸੇ ਜਿਥੇ ਅਰਵਿੰਦ ਕੇਜਰੀਵਾਲ ਆਪਣੇ ਕੰਮ 'ਤੇ ਵੋਟ ਮੰਗ ਰਹੇ ਸਨ ਤੇ ਦੂਜੇ ਪਾਸੇ ਭਾਜਪਾ ਇਸ ਨੂੰ ਕਾਊਂਟਰ ਕਰਨ ਲਈ ਕੋਈ ਅਜਿਹਾ ਪਲਾਨ ਪੇਸ਼ ਨਹੀਂ ਕਰ ਸਕੀ, ਜਿਸ 'ਤੇ ਜਨਤਾ ਨੂੰ ਭਰੋਸਾ ਹੋਵੇ, ਪਾਰਟੀ ਨੇ ਦਿੱਲੀ ਚੋਣਾਂ 'ਚ ਵੀ ਰਾਸ਼ਟਰੀ ਮੁੱਦੇ ਕੈਸ਼ ਕਰਨ ਦੀ ਕੋਸ਼ਿਸ਼ ਕੀਤੀ ਤੇ ਨਾਕਾਮ ਰਹੇ। ਮੁੱਦੇ ਅਤੇ ਚਿਹਰੇ ਦੀ ਕਮੀ ਵਾਲੀ ਭਾਜਪਾ ਦਾ ਪੂਰਾ ਪ੍ਰਚਾਰ ਨੈਗੇਟਿਵ ਦਿਸ਼ਾ 'ਚ ਚਲਾ ਗਿਆ।
ਕੇਜਰੀਵਾਲ ਨੂੰ ਅੱਤਵਾਦੀ ਕਹਿਣਾ ਭਾਰੀ ਪਿਆ
ਪ੍ਰਕਾਸ਼ ਜਾਵਡੇਕਰ ਨੇ ਅਰਵਿੰਦ ਕੇਜਰੀਵਾਲ ਨੂੰ ਅੱਤਵਾਦੀ ਕਹਿ ਦਿੱਤਾ ਅਤੇ ਕਿਹਾ ਕਿ ਕੇਜਰੀਵਾਲ ਦੇ ਅੱਤਵਾਦੀ ਹੋਣ ਦੇ ਲੋੜੀਂਦੇ ਸਬੂਤ ਮੌਜੂਦ ਹਨ। ਕੇਜਰੀਵਾਲ ਨੇ ਇਸ ਹਮਲੇ ਦਾ ਜਵਾਬ ਬਿਲਕੁਲ ਉਸੇ ਤਰੀਕੇ ਨਾਲ ਦਿੱਤਾ, ਜਿਸ ਤਰ੍ਹਾਂ ਪ੍ਰਧਾਨ ਮੰਤਰੀ ਮੋਦੀ ਆਪਣੇ ਵਿਰੁੱਧ ਕੀਤੇ ਗਏ ਕਾਂਗਰਸ ਦੇ ਹਮਲਿਆਂ ਦਾ ਦਿੰਦੇ ਆਏ ਹਨ। ਕੇਜਰੀਵਾਲ ਨੇ ਜਾਵਡੇਕਰ ਦੇ ਬਿਆਨ ਨੂੰ ਹਥਿਆਰ ਬਣਾ ਕੇ ਦਿੱਲੀ ਦੀ ਜਨਤਾ ਨੂੰ ਅਪੀਲ ਕੀਤੀ ਕਿ ਹੁਣ ਉਹ ਤੈਅ ਕਰੇ ਕਿ ਮੈਂ ਅੱਤਵਾਦੀ ਹਾਂ ਜਾਂ ਦਿੱਲੀ ਦਾ ਬੇਟਾ ਹਾਂ ਅਤੇ ਜਾਵਡੇਕਰ ਦੇ ਇਸ ਬਿਆਨ ਦਾ ਜਵਾਬ ਭਾਜਪਾ ਨੂੰ ਚੋਣ ਨਤੀਜਿਆਂ ਰਾਹੀਂ ਮਿਲ ਗਿਆ।
ਦੇਸ਼ ਦੇ ਗੱਦਾਰਾਂ ਨੂੰ...ਬਿਆਨ ਵੀ ਰਾਸ ਨਹੀਂ ਆਇਆ
ਵਿੱਤ ਰਾਜ ਮੰਤਰੀ ਅਨੁਰਾਗ ਠਾਕੁਰ ਦਾ 'ਦੇਸ਼ ਦੇ ਗੱਦਾਰਾਂ ਨੂੰ ਗੋਲੀ ਮਾਰੋ' ਵਾਲਾ ਬਿਆਨ ਵੀ ਵੋਟਰਾਂ ਨੂੰ ਰਾਸ ਨਹੀਂ ਆਇਆ ਅਤੇ ਉਨ੍ਹਾਂ ਦੇ ਇਸ ਬਿਆਨ ਨੇ ਕੇਜਰੀਵਾਲ ਦੇ ਪੱਖ 'ਚ ਹੀ ਧਰੁਵੀਕਰਨ ਦਾ ਕੰਮ ਕੀਤਾ। ਦਿੱਲੀ ਦਾ ਘੱਟ ਗਿਣਤੀ ਭਾਈਚਾਰਾ ਇਸ ਬਿਆਨ ਤੋਂ ਬਾਅਦ ਕੇਜਰੀਵਾਲ ਦੇ ਪੱਖ ਵਿਚ ਆ ਗਿਆ ਅਤੇ ਸਾਰੀਆਂ ਘੱਟ ਗਿਣਤੀ ਭਾਈਚਾਰੇ ਦੀਆਂ ਸੀਟਾਂ 'ਤੇ ਆਮ ਆਦਮੀ ਪਾਰਟੀ ਦੀ ਜਿੱਤ ਹੋਈ।
ਪ੍ਰਵੇਸ਼ ਵਰਮਾ ਦਾ ਵਿਵਾਦਤ ਬਿਆਨ, ਸਾਰੀਆਂ ਸੀਟਾਂ ਹਾਰੀ ਭਾਜਪਾ
ਚੋਣ ਪ੍ਰਚਾਰ ਦੌਰਾਨ ਭਾਜਪਾ ਸੰਸਦ ਮੈਂਬਰ ਪ੍ਰਵੇਸ਼ ਵਰਮਾ ਨੇ ਬਿਆਨ ਦਿੱਤਾ ਕਿ ਸ਼ਾਹੀਨ ਬਾਗ ਦੇ ਪ੍ਰਦਰਸ਼ਨਕਾਰੀ ਤੁਹਾਡੇ ਘਰਾਂ 'ਚ ਦਾਖਲ ਹੋਣਗੇ ਅਤੇ ਬਲਾਤਕਾਰ ਅਤੇ ਹੱਤਿਆਵਾਂ ਕਰਨਗੇ। ਉਨ੍ਹਾਂ ਦੇ ਇਸ ਬਿਆਨ ਤੋਂ ਬਾਅਦ ਚੋਣ ਕਮਿਸ਼ਨ ਨੇ ਪ੍ਰਵੇਸ਼ ਵਰਮਾ ਦੇ ਪ੍ਰਚਾਰ ਕਰਨ 'ਤੇ ਰੋਕ ਲਾ ਦਿੱਤੀ ਸੀ। ਬਿਆਨ ਦਾ ਅਸਰ ਇਹ ਹੋਇਆ ਕਿ ਭਾਜਪਾ ਉਨ੍ਹਾਂ ਦੇ ਲੋਕ ਸਭਾ ਹਲਕੇ 'ਚ ਆਉਣ ਵਾਲੀਆਂ ਸਾਰੀਆਂ 10 ਸੀਟਾਂ 'ਤੇ ਚੋਣ ਹਾਰ ਗਈ। ਵੋਟਰਾਂ ਨੂੰ ਉਨ੍ਹਾਂ ਦਾ ਇਹ ਅੰਦਾਜ਼ ਪਸੰਦ ਨਹੀਂ ਆਇਆ। ਹਾਲਾਂਕਿ ਇਨ੍ਹਾਂ ਹੀ ਵੋਟਰਾਂ ਨੇ 2019 ਦੀਆਂ ਲੋਕ ਸਭਾ ਚੋਣਾਂ ਵਿਚ ਉਨ੍ਹਾਂ ਨੂੰ ਚੁਣ ਕੇ ਸੰਸਦ ਵਿਚ ਭੇਜਿਆ ਸੀ।
ਅਮਿਤ ਸ਼ਾਹ ਨੇ ਕਿਹਾ-ਬਟਨ ਇੰਨੀ ਜ਼ੋਰ ਦੀ ਦਬਾਓ ਕਿ ਆਵਾਜ਼ ਸ਼ਾਹੀਨ ਬਾਗ ਤਕ ਜਾਵੇ
ਚੋਣ ਪ੍ਰਚਾਰ ਦੌਰਾਨ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਨੇ ਵੋਟਰਾਂ ਨੂੰ ਕਿਹਾ ਕਿ ਈ. ਵੀ. ਐੱਮ. ਦਾ ਬਟਨ ਇੰਨੀ ਜ਼ੋਰ ਦੀ ਦਬਾਓ ਕਿ ਇਸ ਦਾ ਕਰੰਟ ਸ਼ਾਹੀਨ ਬਾਗ ਤਕ ਪਹੁੰਚੇ। ਸਦਰ ਬਾਜ਼ਾਰ 'ਚ ਇਕ ਚੋਣ ਸਭਾ ਨੂੰ ਸੰਬੋਧਨ ਕਰਦਿਆਂ ਸ਼ਾਹ ਨੇ ਕਿਹਾ ਕਿ ਟੁਕੜੇ-ਟੁਕੜੇ ਗੈਂਗ ਕਨ੍ਹਈਆ ਕੁਮਾਰ ਅਤੇ ਉਮਰ ਖਾਲਿਦ ਵਿਰੁੱਧ ਕਾਰਵਾਈ ਕੀਤੇ ਜਾਣ ਨਾਲ ਇੰਨਾ ਬੌਖਲਾਇਆ ਕਿਉਂ ਹੈ ਪਰ ਅਮਿਤ ਸ਼ਾਹ ਦਾ ਇਹ ਬਿਆਨ ਵੀ ਵੋਟਰਾਂ ਦਾ ਭਾਜਪਾ ਦੇ ਪੱਖ 'ਚ ਰੁਖ ਮੋੜਨ 'ਚ ਨਾਕਾਮ ਰਿਹਾ। ਭਾਜਪਾ ਨੇਤਾਵਾਂ ਨੇ ਚੋਣ ਦੌਰਾਨ ਧਰੁਵੀਕਰਨ ਦੀ ਜਿੰਨੀ ਕੋਸ਼ਿਸ਼ ਕੀਤੀ, ਉਹ ਉਲਟੀ ਪਈ ਅਤੇ ਭਾਜਪਾ ਦੇ ਵਿਰੋਧ ਵਿਚ ਧਰੁਵੀਕਰਨ ਹੁੰਦਾ ਗਿਆ।
ਪੰਜਾਬ ਦੀ ਸਿਆਸਤ ਨਾਲ 'ਦਿੱਲੀ ਚੋਣ ਨਤੀਜਿਆਂ' ਦਾ ਡੂੰਘਾ ਸਬੰਧ
NEXT STORY 
