ਅੰਮ੍ਰਿਤਸਰ (ਦਲਜੀਤ)-ਗੁਰੂ ਨਾਨਕ ਦੇਵ ਹਸਪਤਾਲ 'ਚ ਨਵਜੰਮੇ ਬੱਚੇ ਦੀ ਅਦਲਾ-ਬਦਲੀ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਪਰਿਵਾਰਕ ਮੈਂਬਰਾ ਨੇ ਦੋਸ਼ ਲਾਇਆ ਹੈ ਕਿ ਉਨ੍ਹਾਂਂ ਦੇ ਮਰੀਜ਼ ਦਾ ਜਣੇਪਾ ਹੋਣ ਤੋਂ ਬਾਅਦ ਮੁੰਡਾ ਦੱਸ ਕੇ ਜਿਥੇ ਲੇਬਰ ਰੂਮ ਦੀ ਇਕ ਮਹਿਲਾ ਕਰਮਚਾਰੀ ਨੇ ਵਧਾਈ ਵੀ ਲਈ, ਉਥੇ ਹੀ ਜਦੋਂ ਉਨ੍ਹਾਂਂ ਨੂੰ ਬੱਚਾ ਸੌਂਪਿਆ ਗਿਆ ਤਾਂ ਉਹ ਕੁੜੀ ਨਿਕਲੀ। ਹਸਪਤਾਲ ਪ੍ਰਸ਼ਾਸਨ ਨੇ ਮਾਮਲੇ ਨੂੰ ਗੰਭੀਰਤਾ ਨਾਲ ਲੈਂਦਿਆਂ ਜਾਂਚ ਦੇ ਹੁਕਮ ਦੇ ਦਿੱਤੇ ਹਨ। ਉਧਰ ਦੂਜੇ ਪਾਸੇ ਪੀੜਤ ਪਰਿਵਾਰ ਨੇ ਬੱਚੇ ਦਾ ਡੀ. ਐੱਨ. ਏ. ਟੈਸਟ ਕਰਵਾਉਣ ਦੀ ਮੰਗ ਕੀਤੀ ਹੈ। ਜਾਣਕਾਰੀ ਅਨੁਸਾਰ ਕਿਲਾ ਦਰਸ਼ਨ ਸਿੰਘ ਬਟਾਲਾ ਵਾਸੀ ਗਰਭਵਤੀ ਨੀਲਮ ਪਤਨੀ ਗੁਰਪ੍ਰੀਤ ਚੰਦ ਨੂੰ ਸ਼ਨੀਵਾਰ ਜਣੇਪੇ ਲਈ ਗੁਰੂ ਨਾਨਕ ਦੇਵ ਹਸਪਤਾਲ ਅਧੀਨ ਚੱਲਣ ਵਾਲੇ ਮਦਰ ਐਂਡ ਚਾਈਲਡ ਕੇਅਰ ਸੈਂਟਰ 'ਚ ਦਾਖਲ ਕਰਵਾਇਆ ਗਿਆ ਸੀ, ਸ਼ਨੀਵਾਰ ਨੂੰ ਬਾਅਦ ਦੁਪਹਿਰ 3:20 ਵਜੇ ਉਸ ਦੇ ਬੱਚਾ ਪੈਦਾ ਹੋਇਆ। ਗੁਰਪ੍ਰੀਤ ਚੰਦ ਨੇ ਦੱਸਿਆ ਕਿ ਲੇਬਰ ਰੂਮ ਤੋਂ ਬਾਹਰ ਆਈ ਇਕ ਮਹਿਲਾ ਦਰਜਾ-4 ਕਰਮਚਾਰੀ ਅਤੇ ਨਰਸ ਨੇ ਆ ਕੇ ਦੱਸਿਆ ਕਿ ਉਨ੍ਹਾਂਂ ਦੇ ਘਰ ਪੁੱਤਰ ਹੋਇਆ ਹੈ ਅਤੇ ਉਸ ਦੀ ਵਧਾਈ ਵੀ 500 ਰੁਪਏ ਲੈ ਕੇ ਤੇ ਬੱਚੇ ਨੂੰ ਦਿਖਾ ਕੇ ਉਸ ਨੂੰ ਦੁਬਾਰਾ ਲੇਬਰ ਰੂਮ 'ਚ ਲੈ ਕੇ ਚੱਲੇ ਗਈਆਂ। ਇਸ ਦੌਰਾਨ ਨੀਲਮ ਦੀ ਹਾਲਤ ਗੰਭੀਰ ਹੋ ਗਈ ਅਤੇ ਸਾਰੇ ਪਰਿਵਾਰਕ ਮੈਂਬਰ ਉਸ ਵੱਲ ਧਿਆਨ ਦੇਣ ਲੱਗੇ। ਇਸ ਦੇ ਕੁਝ ਘੰਟਿਆਂ ਬਾਅਦ ਬੱਚੇ ਨੂੰ ਕੱਪੜੇ ਪਾ ਕੇ ਸਟਾਫ ਨੇ ਉਨ੍ਹਾਂਂ ਨੂੰ ਵਾਪਸ ਦੇ ਦਿੱਤਾ। ਇਸ ਦੌਰਾਨ ਬੱਚੇ ਨੇ ਪਿਸ਼ਾਬ ਕੀਤਾ ਤਾਂ ਉਸ ਦੀ ਦਾਦੀ ਬੰਸੀ ਨੇ ਕੱਪੜਾ ਉਤਾਰਿਆ ਤਾਂ ਦੇਖਿਆ ਉਹ ਕੁੜੀ ਸੀ, ਜਿਸ ਤੋਂ ਬਾਅਦ ਉਨ੍ਹਾਂ ਰੌਲਾ ਪਾਉਣਾ ਸ਼ੁਰੂ ਕਰ ਦਿੱਤਾ।
ਸਟਾਫ ਨੇ ਬਦਲਿਆ ਬੱਚਾ
ਨਵਜੰਮੇ ਬੱਚੇ ਦੀ ਦਾਦੀ ਬੰਸੀ ਦਾ ਕਹਿਣਾ ਹੈ ਕਿ ਜਦੋਂ ਬੱਚਾ ਪੈਦਾ ਹੋ ਰਿਹਾ ਸੀ ਤਾਂ ਉਨ੍ਹਾਂਂ ਨੂੰ ਲੇਬਰ ਰੂਮ ਤੋਂ ਬਾਹਰ ਕੱਢ ਦਿੱਤਾ ਗਿਆ, ਜਦੋਂ ਕਿ ਸਰਕਾਰ ਕਹਿੰਦੀ ਹੈ ਕਿ ਜਣੇਪੇ ਦੌਰਾਨ ਲੇਬਰ ਰੂਮ 'ਚ ਪਰਿਵਾਰ ਦੀ ਇਕ ਔਰਤ ਮੈਂਬਰ ਜਾ ਸਕਦੀ ਹੈ। ਉਨ੍ਹਾਂਂ ਦਾ ਦੋਸ਼ ਹੈ ਕਿ ਸਟਾਫ ਨੇ ਬੱਚਾ ਬਦਲ ਦਿੱਤਾ ਹੈ। ਉਨ੍ਹਾਂਂ ਇਹ ਵੀ ਕਿਹਾ ਕਿ ਦਰਜਾ-4 ਕਰਮਚਾਰੀ ਵੱਲੋਂ ਆਪਣੀ ਵਧਾਈ ਲੈਣ ਤੋਂ ਬਾਅਦ ਹਸਪਤਾਲ 'ਚ ਲੱਗੀ ਇਕ ਦਾਨ ਪੇਟੀ ਵਿਚ ਪੈਸੇ ਪਾਉਣ ਲਈ ਕਿਹਾ ਗਿਆ ਅਤੇ ਉਨ੍ਹਾਂ ਨੇ ਆਪਣੇ ਬੇਟੇ ਗੁਰਪ੍ਰੀਤ ਚੰਦ ਤੋਂ ਪੈਸੇ ਲੈ ਕੇ ਉਕਤ ਕਰਮਚਾਰੀ ਨੂੰ ਹੀ ਪੈਸੇ ਦੇ ਦਿੱਤੇ ਅਤੇ ਉਨ੍ਹਾਂ ਨੇ ਉਸ ਸਮੇਂ ਤਾਂ ਉਨ੍ਹਾਂਂ ਦੇ ਸਾਹਮਣੇ ਪੇਟੀ ਵਿਚ ਪੈਸੇ ਪਾ ਵੀ ਦਿੱਤੇ।
ਮੌਕੇ 'ਤੇ ਪੁੱਜੇ ਮੈਡੀਕਲ ਸੁਪਰਡੈਂਟ ਨੇ ਕੀਤੀ ਗੰਭੀਰਤਾ ਨਾਲ ਜਾਂਚ
ਬੱਚੇ ਦੀ ਅਦਲਾ-ਬਦਲੀ ਦੇ ਮਾਮਲੇ ਨੂੰ ਲੈ ਕੇ ਪੀੜਤ ਪਰਿਵਾਰ ਮੈਡੀਕਲ ਸੁਪਰਡੈਂਟ ਡਾ. ਜੇ. ਐੱਸ. ਕੁਲਾਰ ਨੂੰ ਮਿਲਿਆ, ਜੋ ਖੁਦ ਮੌਕੇ 'ਤੇ ਪੁੱਜੇ ਅਤੇ ਬੇਬੇ ਨਾਨਕੀ ਹਸਪਤਾਲ ਜਿਥੇ ਡਲਿਵਰੀ ਹੋਈ ਸੀ, ਦਾ ਮੁਆਇਨਾ ਕੀਤਾ ਅਤੇ ਇਸ ਤੋਂ ਬਾਅਦ ਆਪਣੇ ਆਫਿਸ 'ਚ ਸਾਰੇ ਸਟਾਫ, ਪਰਿਵਾਰਕ ਮੈਂਬਰਾਂ ਤੇ ਪੁਲਸ ਦੀ ਹਾਜ਼ਰੀ 'ਚ ਸਾਰਿਆਂ ਦਾ ਪੱਖ ਸੁਣਿਆ। ਇਸ ਦੌਰਾਨ ਹਸਪਤਾਲ ਵੱਲੋਂ ਪੇਸ਼ ਰਿਕਾਰਡ ਮੁਤਾਬਕ ਉਕਤ ਸਮੇਂ ਤੋਂ ਪਹਿਲਾਂ 2:35 ਮਿੰਟ 'ਤੇ ਇਕ ਮੁੰਡਾ ਪੈਦਾ ਹੋਇਆ ਸੀ, ਜਿਸ ਤੋਂ ਬਾਅਦ 3:20 ਵਜੇ ਇਕ ਕੁੜੀ (ਜਿਸ ਨੂੰ ਬਦਲੇ ਜਾਣ ਦਾ ਦੋਸ਼ ਹੈ) ਅਤੇ ਫਿਰ 3:23 ਵਜੇ ਇਕ ਕੁੜੀ ਪੈਦਾ ਹੋਈ। ਸਟਾਫ ਦਾ ਕਹਿਣਾ ਸੀ ਕਿ ਜਦੋਂ ਮੁੰਡਾ ਪੈਦਾ ਹੀ ਨਹੀਂ ਹੋਇਆ ਤਾਂ ਬਦਲਣ ਦਾ ਸਵਾਲ ਹੀ ਨਹੀਂ ਪੈਦਾ ਹੁੰਦਾ।
ਸਟਾਫ ਨੇ ਦਿੱਤਾ ਆਪਣੇ ਦਸਤਾਵੇਜ਼ਾਂ ਦਾ ਸਬੂਤ
ਪਰਿਵਾਰ ਦੇ ਲੋਕ ਵਾਰ-ਵਾਰ ਬੱਚਾ ਬਦਲਣ ਦਾ ਦੋਸ਼ ਲਾਉਂਦੇ ਰਹੇ, ਜਦੋਂ ਕਿ ਸਟਾਫ ਆਪਣੇ ਦਸਤਾਵੇਜ਼ਾਂ ਨਾਲ ਸਬੂਤ ਦਿੰਦਾ ਰਿਹਾ। ਹਾਲਾਂਕਿ ਇਸ ਦੌਰਾਨ ਐੱਮ. ਐੱਸ. ਦੇ ਹੁਕਮ 'ਤੇ ਡਲਿਵਰੀ ਕਰਵਾਉਣ ਵਾਲੀ ਦਰਜਾ-4 ਮਹਿਲਾ ਮੁਲਾਜ਼ਮ ਨੂੰ ਵੀ ਬੁਲਾਇਆ ਗਿਆ। ਮਹਿਲਾ ਮੁਲਾਜ਼ਮ ਪਿੰਦੋ ਦਾ ਕਹਿਣਾ ਸੀ ਕਿ ਕੁੜੀ ਹੀ ਪੈਦਾ ਹੋਈ ਸੀ ਅਤੇ ਉਸ ਨੂੰ ਦਿਖਾ ਕੇ ਪਰਿਵਾਰ ਵਾਲਿਆਂ ਨੂੰ ਦਿੱਤੀ ਗਈ ਸੀ, ਇਹ ਲੋਕ ਜਾਣਬੁੱਝ ਕੇ ਝੂਠ ਬੋਲ ਰਹੇ ਹਨ। ਉਸ ਨੇ ਵਧਾਈ ਲੈਣ ਵਾਲੀ ਗੱਲ ਨੂੰ ਵੀ ਗਲਤ ਕਰਾਰ ਦਿੱਤਾ। ਮਾਮਲਾ ਸੁਲਝਦਾ ਨਾ ਦੇਖ ਐੱਮ. ਐੱਸ. ਨੇ 3 ਮੈਂਬਰੀ ਕਮੇਟੀ ਦਾ ਗਠਨ ਕਰ ਦਿੱਤਾ, ਜੋ ਸਾਰੇ ਮਾਮਲੇ ਦੀ ਪੜਤਾਲ ਕਰੇਗੀ। ਡਾ. ਕੁਲਾਰ ਦਾ ਕਹਿਣਾ ਹੈ ਕਿ ਮਾਮਲੇ ਦੀ ਨਿਰਪੱਖ ਜਾਂਚ ਹੋਵੇਗੀ ਅਤੇ ਜੇਕਰ ਗੱਲ ਠੀਕ ਨਿਕਲੀ ਤਾਂ ਦੋਸ਼ੀ ਨੂੰ ਕਿਸੇ ਕੀਮਤ 'ਤੇ ਬਖਸ਼ਿਆ ਨਹੀਂ ਜਾਵੇਗਾ।
ਡੀ. ਐੱਨ. ਏ. ਟੈਸਟ ਦੀ ਮੰਗ
ਪੀੜਤ ਪਰਿਵਾਰ ਨਾਲ ਮੈਡੀਕਲ ਸੁਪਰਡੈਂਟ ਦਫ਼ਤਰ 'ਚ ਬਟਾਲਾ ਦੇ ਕਈ ਪਿੰਡਾਂ ਦੇ ਸਰਪੰਚ ਵੀ ਆਏ ਹੋਏ ਸਨ। ਇਸ ਦੌਰਾਨ ਪਰਿਵਾਰ ਨੇ ਉੱਚ ਅਧਿਕਾਰੀਆਂ ਤੋਂ ਮੰਗ ਕੀਤੀ ਕਿ ਨਵਜੰਮੇ ਬੱਚੇ ਦਾ ਡੀ. ਐੱਨ. ਏ. ਟੈਸਟ ਕਰਵਾਇਆ ਜਾਵੇ ਤਾਂ ਕਿ ਸਥਿਤੀ ਸਪੱਸ਼ਟ ਹੋ ਸਕੇ। ਉਨ੍ਹਾਂਂ ਕਿਹਾ ਕਿ ਜਿਸ ਦਰਜਾ-4 ਕਰਮਚਾਰੀ ਨੇ ਉਨ੍ਹਾਂਂ ਦੇ ਬੱਚੇ ਬਾਰੇ ਸੂਚਨਾ ਦਿੱਤੀ ਸੀ, ਉਸ 'ਤੇ ਵੀ ਸਖ਼ਤ ਕਾਰਵਾਈ ਹੋਣੀ ਚਾਹੀਦੀ ਹੈ।
ਕੀ ਕਹਿੰਦੇ ਨੇ ਮੈਡੀਕਲ ਸੁਪਰਡੈਂਟ
ਮੈਡੀਕਲ ਸੁਪਰਡੈਂਟ ਡਾ. ਜੇ. ਐੱਸ. ਕੁਲਾਰ ਨੇ ਕਿਹਾ ਕਿ ਹੁਣ ਤੱਕ ਪਰਿਵਾਰ ਵੱਲੋਂ ਲਿਖਤੀ ਸ਼ਿਕਾਇਤ ਉਨ੍ਹਾਂਂ ਨੂੰ ਨਹੀਂ ਦਿੱਤੀ ਗਈ, ਲਿਖਤੀ ਸ਼ਿਕਾਇਤ ਆਉਣ ਤੋਂ ਬਾਅਦ ਹੀ ਮਾਮਲੇ ਦੀ ਬਾਰੀਕੀ ਨਾਲ ਜਾਂਚ ਕੀਤੀ ਜਾਵੇਗੀ ਅਤੇ ਜੋ ਵੀ ਸੱਚਾਈ ਸਾਹਮਣੇ ਆਵੇਗੀ, ਉਸ ਉਪਰੰਤ ਬਣਦੀ ਕਾਰਵਾਈ ਕੀਤੀ ਜਾਵੇਗੀ।
ਨਸ਼ਿਆਂ ਨੇ ਮਾਰ ਮੁਕਾਏ ਪੰਜਾਬ 3 ਹੋਰ ਗੱਭਰੂ
NEXT STORY 
