ਜਲੰਧਰ (ਰਮਨਦੀਪ ਸਿੰਘ ਸੋਢੀ): ਆਮ ਆਦਮੀ ਪਾਰਟੀ ਦੀ ਸਰਕਾਰ 99% ਫ਼ੀਸਦੀ ਵਾਅਦਿਆਂ 'ਚ ਫ਼ੇਲ੍ਹ ਰਹੀ ਹੈ। ਅੱਜ ਪੰਜਾਬ ਵਿਚ 'ਜ਼ੋਮੈਟੋ' ਦੇ ਆਰਡਰ ਵਾਂਗ ਨਸ਼ੇ ਦੀ ਡਿਲੀਵਰੀ ਹੋ ਰਹੀ ਹੈ। ਇਹ ਗੱਲਾਂ ਕਾਂਗਰਸ ਦੇ ਸੀਨੀਅਰ ਆਗੂ ਤੇ ਵਿਧਾਨ ਸਭਾ ਵਿਚ ਵਿਰੋਧੀ ਧਿਰ ਦੇ ਲੀਡਰ ਪ੍ਰਤਾਪ ਸਿੰਘ ਬਾਜਵਾ ਨੇ 'ਜਗ ਬਾਣੀ' ਨਾਲ ਵਿਸ਼ੇਸ਼ ਇੰਟਰਵਿਊ ਦੌਰਾਨ ਕਹੀਆਂ। ਬਾਜਵਾ ਭਗਵੰਤ ਮਾਨ ਨੂੰ 'ਕੰਪ੍ਰੋਮਾਈਜ਼ਡ ਸੀ. ਐੱਮ.' ਕਰਾਰ ਦਿੰਦਿਆਂ ਇਹ ਦਾਅਵਾ ਕੀਤਾ ਕਿ ਉਸ ਨੇ ਵਿਦੇਸ਼ਾਂ ਵਿਚ ਕਾਫ਼ੀ ਜਾਇਦਾਦ ਬਣਾਈ ਹੈ ਤੇ ਕੇਂਦਰ ਇਸੇ ਗੱਲ ਦਾ ਡਰਾਵਾ ਦੇ ਕੇ ਉਸ ਨੂੰ ਆਪਣੇ ਇਸ਼ਾਰਿਆਂ 'ਤੇ ਚਲਾ ਰਹੀ ਹੈ। ਇਸ ਦੇ ਨਾਲ ਹੀ ਉਨ੍ਹਾਂ ਆਮ ਆਦਮੀ ਪਾਰਟੀ ਦੇ ਹੀ ਸੰਸਦ ਮੈਂਬਰ ਦੇ ਬਿਆਨ ਦੇ ਹਵਾਲੇ ਨਾਲ ਕਿਹਾ ਕਿ 'ਆਪ' ਦੇ ਕਈ ਲੀਡਰ ਨਸ਼ੇ ਤੇ ਮਾਈਨਿੰਗ ਨਾਲ ਜੁੜੇ ਹੋਏ ਹਨ। ਪੇਸ਼ ਹੈ ਪੂਰੀ ਗੱਲਬਾਤ-
ਪੰਜਾਬ ਦੇ ਮੌਜੂਦਾ ਹਾਲਾਤ ਨੂੰ ਕਿਵੇਂ ਵੇਖਦੇ ਹੋ?
- ਪੰਜਾਬ ਬੜੇ ਨਾਜ਼ੁਕ ਮੋੜ 'ਤੇ ਖੜ੍ਹਾ ਹੈ। ਮੌਜੂਦਾ ਸਰਕਾਰ ਦਾ ਅਖ਼ੀਰਲਾ ਸਾਲ ਹੈ ਤੇ ਇਸ ਸਰਕਾਰ ਦੇ ਕਾਰਜਕਾਲ ਦਾ ਆਖਰੀ ਬਜਟ ਆਉਣ ਵਾਲਾ ਹੈ। ਇਸ ਸਰਕਾਰ ਨੇ ਜਿੰਨੇ ਵਾਅਦੇ ਕੀਤੇ ਸੀ, ਉਸ ਵਿਚੋਂ 99 ਫ਼ੀਸਦੀ ਵਾਅਦਿਆਂ 'ਚ ਫ਼ੇਲ੍ਹ ਸਾਬਿਤ ਹੋਈ ਹੈ। ਕਿਸੇ ਵੀ ਦੇਸ਼ ਜਾਂ ਸੂਬੇ ਦਾ ਨਾਗਰਿਕ ਸਭ ਤੋਂ ਪਹਿਲਾਂ ਆਪਣੀ, ਆਪਣੇ ਪਰਿਵਾਰ ਤੇ ਆਪਣੇ ਕਿੱਤੇ ਦੀ ਸੁਰੱਖਿਆ ਚਾਹੁੰਦਾ ਹੈ, ਪਰ ਇਸ ਵੇਲੇ ਇਹ ਸੁਰੱਖਿਆ ਬਿਲਕੁਲ ਨਹੀਂ ਮਿਲ ਰਹੀ। ਪੰਜਾਬ ਬਹੁਤ ਵੱਡੀਆਂ ਕੁਰਬਾਨੀਆਂ ਤੇ ਬੜੀ ਵੱਡੀ ਕੀਮਤ ਅਦਾ ਕਰ ਕੇ ਕੇ 1970-80 ਦੇ ਦਹਾਕੇ ਵਾਲੇ ਦੌਰ 'ਚੋਂ ਬਾਹਰ ਨਿਕਲਿਆ ਤੇ ਮੁੜ ਤੋਂ ਖੁਸ਼ਹਾਲ ਹੋਇਆ ਸੀ। ਡਾ. ਮਨਮੋਹਨ ਸਿੰਘ ਜੀ ਦੇ ਸਮੇਂ ਪੰਜਾਬ ਵਿਚ ਬਹੁਤ ਨਿਵੇਸ਼ ਆਇਆ ਤੇ ਪੰਜਾਬ ਦੀ ਤਰੱਕੀ ਦੁਬਾਰਾ ਸ਼ੁਰੂ ਹੋਈ ਸੀ। ਇਸ ਸਰਕਾਰ ਦੇ ਆਉਂਦਿਆਂ ਹੀ ਗੁੰਡਾਗਰਦੀ ਬਹੁਤ ਵੱਧ ਗਈ।
ਗੈਂਗਸਟਰਾਂ ਨੂੰ ਚੋਣਾਂ 'ਚ ਵਰਤ ਰਹੀ ਹੈ ਪੰਜਾਬ ਸਰਕਾਰ
- ਹਾਲ ਹੀ ਵਿਚ ਭਾਰਤ-ਪਾਕਿ ਸਰਹੱਦ ਦੇ ਬਿਲਕੁਲ ਨੇੜੇ ਦੀਨਾਨਗਰ ਦੀ ਇਕ ਚੌਕੀ ਵਿਚ ਇਕ ਏ. ਐੱਸ. ਆਈ. ਤੇ ਇਕ ਹੋਮਗਾਰਡ ਦੇ ਜਵਾਨ ਨੂੰ ਗੋਲ਼ੀ ਮਾਰ ਕੇ ਹਲਾਕ ਕਰ ਦਿੱਤਾ ਗਿਆ। ਘਟਨਾ ਤੋਂ 2 ਦਿਨ ਗੁਜ਼ਰਨ ਤੋਂ ਬਾਅਦ ਵੀ ਪੰਜਾਬ ਪੁਲਸ ਕੋਲ ਕੋਈ ਲੀਡ ਨਹੀਂ ਹੈ। ਪਹਿਲਾਂ ਸਰਕਾਰ ਦਾ ਬਿਆਨ ਆਇਆ ਕਿ ਆਪਸੀ ਰੰਜਿਸ਼ ਵਿਚ ਇਨ੍ਹਾਂ ਨੇ ਇਕ ਦੂਜੇ ਨੂੰ ਗੋਲ਼ੀ ਮਾਰ ਲਈ। ਜਦੋਂ ਲੋਕਾਂ ਨੇ ਮੌਕੇ ਦੇ ਹਾਲਾਤ ਦੇਖੇ ਤਾਂ ਹੁਣ ਅੱਤਵਾਦ ਵਾਲਾ ਐਂਗਲ ਵੀ ਵਿਚ ਆ ਰਿਹਾ ਹੈ। ਜੇ ਇਹ ਰਿਪੋਰਟਾਂ ਸੱਚੀਆਂ ਹੋਣ ਕਿ ਹਮਲਾਵਰ ਸਰਹੱਦ ਪਾਰ ਤੋਂ ਆ ਕੇ ਉਨ੍ਹਾਂ ਨੂੰ ਮਾਰ ਕੇ ਫ਼ਿਰ ਵਾਪਸ ਚਲੇ ਗਏ ਹੋਣ ਤੇ ਪੁਲਸ ਨੂੰ ਕੋਈ ਉੱਘ-ਸੁੱਘ ਵੀ ਨਾ ਹੋਵੇ ਤਾਂ ਪੰਜਾਬ ਵਿਚ ਕੌਣ ਸੁਰੱਖਿਅਤ ਹੈ? ਖ਼ਾਸ ਤੌਰ 'ਤੇ ਸਰਹੱਦੀ ਇਲਾਕਿਆਂ ਵਿਚ ਛੋਟੇ-ਛੋਟੇ ਕਾਰੋਬਾਰੀਆਂ ਨੂੰ ਵੀ ਫ਼ਿਰੌਤੀਆਂ ਲਈ ਧਮਕੀ ਭਰੇ ਫ਼ੋਨ ਆ ਰਹੇ ਹਨ। ਇਨ੍ਹਾਂ ਨੂੰ 'ਆਪ' ਸਰਕਾਰ ਅਤੇ ਪੁਲਸ ਦੀ ਸ਼ਹਿ ਹੈ। ਡੇਰਾ ਬਾਬਾ ਨਾਨਕ, ਜਲੰਧਰ ਵੈਸਟ ਤੇ ਤਰਨਤਾਰਨ ਦੀ ਜ਼ਿਮਨੀ ਚੋਣ ਵਿਚ ਗੈਂਗਸਟਰਾਂ ਨੂੰ ਵਰਤਿਆ ਗਿਆ। ਜਿੱਥੇ ਵਾੜ ਹੀ ਫ਼ਸਲ ਨੂੰ ਖਾਣ ਲੱਗ ਜਾਵੇ ਤਾਂ ਫ਼ਸਲ ਬੱਚ ਨਹੀਂ ਸਕਦੀ।
ਪਰ ਕੋਈ ਵੀ ਸਰਕਾਰ ਸੂਬੇ ਨੂੰ ਇਸ ਤਰ੍ਹਾਂ ਬਰਬਾਦ ਕਿਉਂ ਹੋਣ ਦੇਵੇਗੀ ?
- ਇਨ੍ਹਾਂ ਨੂੰ ਪਹਿਲੇ ਦੋ-ਤਿੰਨ ਸਾਲ ਤਾਂ ਇਹ ਵਿਸ਼ਵਾਸ ਹੀ ਨਹੀਂ ਹੋਇਆ ਕਿ ਅਸੀਂ ਤਾਕਤ ਵਿਚ ਆ ਗਏ ਹਾਂ। ਸ਼ੇਰ ਦੀ ਸਵਾਰੀ ਕਰਨਾ ਹਰ ਕਿਸੇ ਦੇ ਵੱਸ ਦੀ ਗੱਲ ਨਹੀਂ। ਪੰਜਾਬ ਪੁਲਸ ਕੋਲ 80-90 ਦੇ ਦਹਾਕਿਆਂ ਤੋਂ ਬਾਅਦ ਬਹੁਤ ਤਾਕਤ ਰਹੀ ਹੈ, ਉਸ ਤਾਕਤ ਨੂੰ ਕੰਟਰੋਲ ਕਰਨ ਅਤੇ ਉਨ੍ਹਾਂ ਤੋਂ ਕੰਮ ਲੈਣ ਲਈ ਕਿਸੇ ਤਜ਼ਰਬੇਕਾਰ ਸਿਆਸਤਦਾਨ ਦੀ ਲੋੜ ਹੁੰਦੀ ਹੈ। ਇਨ੍ਹਾਂ ਨੂੰ ਕੋਈ ਤਜ਼ਰਬਾ ਨਹੀਂ ਸੀ ਤੇ ਇਨ੍ਹਾਂ ਨੇ ਸਿਰਫ਼ ਤਿੰਨ-ਚਾਰ ਵੱਡੇ ਅਫ਼ਸਰਾਂ 'ਤੇ ਹੀ ਸਾਰਾ ਕੰਟਰੋਲ ਛੱਡ ਦਿੱਤਾ ਤੇ ਉਨ੍ਹਾਂ ਨੇ ਸਿਸਟਮ ਨੂੰ ਆਪਣੇ ਢੰਗ ਨਾਲ ਚਲਾਇਆ।
'ਯੁੱਧ ਨਸ਼ਿਆਂ ਵਿਰੁੱਧ' ਤੇ 'ਆਪ੍ਰੇਸ਼ਨ ਪ੍ਰਹਾਰ' ਦੇ ਦਾਅਵਿਆਂ ਬਾਰੇ ਕੀ ਕਹੋਗੇ ?
- ਪਿਛਲੇ ਦਿਨੀਂ ਅੰਮ੍ਰਿਤਸਰ ਵਿਚ ਇਕ ਏ. ਐੱਸ. ਆਈ. ਦਾ ਜਵਾਨ ਪੁੱਤ ਨਸ਼ੇ ਕਾਰਨ ਮਾਰਿਆ ਗਿਆ। ਉਸ ਨੇ ਆਪ ਦੱਸਿਆ ਹੈ ਕਿ ਜਿਸ ਰਫ਼ਤਾਰ ਨਾਲ 'ਜ਼ੋਮੈਟੋ ਦਾ ਆਰਡਰ' ਪਹੁੰਚਦਾ ਹੈ, ਉਸੇ ਰਫ਼ਤਾਰ ਨਾਲ ਨਸ਼ਾ ਪਹੁੰਚ ਰਿਹਾ ਹੈ। ਇਨ੍ਹਾਂ ਦੇ ਆਪਣੇ ਲੋਕ ਸਭਾ ਦੇ ਸੰਸਦ ਮੈਂਬਰ ਖ਼ੁਦ ਮੰਨੇ ਹਨ ਕਿ ਨਸ਼ਾ ਅਤੇ ਮਾਈਨਿੰਗ ਵਿਚ ਸਾਡੇ ਬੰਦੇ ਵੀ ਸ਼ਾਮਲ ਹਨ ਤੇ ਪੁਲਸ ਵੀ। ਮੁੱਖ ਮੰਤਰੀ ਦੇ ਆਪਣੇ ਵਿਧਾਨ ਸਭਾ ਹਲਕੇ ਧੂਰੀ ਦੇ ਲੋਕ ਵੀ ਇਹ ਗੱਲ ਆਖ਼ਦੇ ਹਨ ਕਿ ਨਸ਼ੇ ਦੀ 'ਜ਼ੋਮੈਟੋ ਦੇ ਆਰਡਰ' ਵਾਂਗ ਡਿਲੀਵਰੀ ਹੋ ਰਹੀ ਹੈ। ਮੁੱਖ ਮੰਤਰੀ ਭਗਵੰਤ ਮਾਨ ਪੂਰੀ ਤਰ੍ਹਾਂ ਫ਼ੇਲ੍ਹ ਹੈ। ਜਿਹੜਾ ਆਦਮੀ ਹਰ ਛੇਵੇਂ-ਸੱਤਵੇਂ ਦਿਨ ਹਸਪਤਾਲ ਦਾਖ਼ਲ ਹੋ ਜਾਂਦਾ ਹੈ, ਉਹ ਰਾਜ ਸੰਭਾਲਣ ਦੇ ਯੋਗ ਨਹੀਂ ਹੈ। ਇਹ ਦੁਪਹਿਰ ਦੋ-ਢਾਈ ਵਜੇ ਹੀ ਆਪਣਾ ਸਿਰ ਸੁੱਟ ਲੈਂਦਾ ਹੈ ਤੇ ਕਬੂਤਰ ਵਾਂਗ ਅੱਖਾਂ ਬੰਦ ਕਰ ਲੈਂਦਾ ਹੈ, ਪਰ ਕ੍ਰਾਈਮ ਤਾਂ ਹੁੰਦਾ ਹੀ ਸ਼ਾਮ ਨੂੰ ਹੈ। ਗ੍ਰਹਿ ਮੰਤਰੀ ਤੇ ਮੁੱਖ ਮੰਤਰੀ ਅਯੋਗ ਹੋਵੇ ਤਾਂ ਪੁਲਸ ਨੂੰ ਹੋਰ ਕੀ ਚਾਹੀਦਾ ਹੈ?
ਖਹਿਰਾ ਦਾ ਘਰ ਢਾਹੁਣ ਵਾਲੇ ਸੁਖਬੀਰ ਦੇ ਹੋਟਲ ਵੱਲ ਕਿਉਂ ਨਹੀਂ ਜਾਂਦੇ?
- ਇਹੀ ਮੁੱਖ ਮੰਤਰੀ ਪਹਿਲਾਂ ਸੁਖਬੀਰ ਬਾਦਲ ਦੇ ਹੋਟਲ 'ਸੁੱਖ ਵਿਲਾਸ' ਨੂੰ ਢਾਹ ਕੇ ਸਕੂਲ ਖੋਲ੍ਹਣ ਦੀਆਂ ਗੱਲਾਂ ਕਰਦਾ ਸੀ। ਹੁਣ ਸੁਖਬੀਰ ਬਾਦਲ ਤਾਂ ਖ਼ੁਦ ਮੁੱਖ ਮੰਤਰੀ ਨੂੰ ਚੁਣੌਤੀ ਦੇ ਚੁੱਕਿਆ ਹੈ ਕਿ ਉਹ ਅਜਿਹੀ ਕਾਰਵਾਈ ਕਰਕੇ ਦਿਖਾਵੇ। ਕੀ ਸੁਖਪਾਲ ਸਿੰਘ ਖਹਿਰਾ ਖ਼ਿਲਾਫ਼ ਇਹ ਕਾਰਵਾਈ ਕਰਨ ਤੋਂ ਪਹਿਲਾਂ ਨੋਟਿਸ ਦੇਣਾ ਜ਼ਰੂਰੀ ਨਹੀਂ ਸੀ? ਜੋ ਕਾਨੂੰਨੀ ਪ੍ਰਕਿਰਿਆ ਹੈ, ਉਸ ਮੁਤਾਬਕ ਹੀ ਕੰਮ ਕਰਨਾ ਚਾਹੀਦਾ ਹੈ। ਇਹ 'ਜੋਗੀ' ਤੋਂ 'ਯੋਗੀ' ਬਣਨ ਦੀ ਕੋਸ਼ਿਸ਼ ਕਰ ਰਿਹਾ ਹੈ, ਪਰ ਦੋਵਾਂ ਪਾਸਿਓਂ ਹੀ ਪੂਰੀ ਤਰ੍ਹਾਂ ਫ਼ੇਲ੍ਹ ਰਿਹਾ ਹੈ। ਸੁਖਪਾਲ ਖਹਿਰਾ ਦੇ ਕਿਸੇ ਬਿਆਨ ਜਾਂ ਟਵੀਟ ਤੋਂ ਭੜਕ ਕੇ ਇਹ ਕੰਮ ਕਰਵਾਇਆ ਗਿਆ ਹੈ। ਇਨ੍ਹਾਂ ਤੋਂ ਪਹਿਲਾਂ ਕੋਈ ਕਹਿੰਦਾ ਹੁੰਦਾ ਸੀ ਕਿ 'ਮੈਂ 25 ਸਾਲ ਪੰਜਾਬ 'ਤੇ ਰਾਜ ਕਰਾਂਗਾ', ਉਹ 10 ਸਾਲ ਤੋਂ ਸੱਤਾਂ ਤੋਂ ਬਾਹਰ ਹਨ ਤੇ ਹਜੇ ਹੋਰ ਪਤਾ ਨਹੀਂ ਕਿੰਨੇ ਸਾਲ ਬਾਅਦ ਸੱਤਾ ਵਿਚ ਆਉਣਗੇ। ਭਗਵੰਤ ਮਾਨ ਨੂੰ ਵੀ ਇਹੀ ਗਲਤਫ਼ਹਿਮੀ ਹੈ ਕਿ ਮੈਂ ਹਮੇਸ਼ਾ ਹੀ ਮੁੱਖ ਮੰਤਰੀ ਰਹਿਣਾ ਹੈ। ਉਸ ਨੂੰ ਇਹ ਨਹੀਂ ਪਤਾ ਕਿ ਜਦੋਂ ਵੀ ਸੱਤਾ ਬਦਲੀ, ਇਸ ਕੋਲੋਂ ਇਕ ਹਫ਼ਤਾ ਵੀ ਇਹ ਕੁਝ ਝੱਲਿਆ ਨਹੀਂ ਜਾਣਾ।
ਕੀ ਵਿਰੋਧੀ ਧਿਰ ਨੂੰ ਵੀ ਸਰਕਾਰ ਤੋਂ ਕੋਈ ਡਰ ਹੈ ?
- ਸਾਨੂੰ ਕੋਈ ਡਰ ਨਹੀਂ ਪਰ ਲੋਕ ਸਹਿਮੇ ਹਨ। ਪੰਜਾਬ ਵਿਚ ਲੋਕ ਅਕਸਰ ਅਖ਼ਰੀਲੇ ਸਾਲ ਹੀ ਸਰਕਾਰ ਖ਼ਿਲਾਫ਼ ਖੜ੍ਹਦੇ ਹਨ। ਜਦੋਂ ਇਹ ਕਿਸਾਨਾਂ ਦੀਆਂ ਲੱਤਾਂ ਤੋੜਣ ਤਕ ਜਾ ਸਕਦੇ ਹਨ, ਜਦੋਂ ਹਰਿਆਣਾ ਪੁਲਸ ਨੂੰ ਪੰਜਾਬ ਦੀ ਹੱਦ ਵਿਚ ਆ ਕੇ ਸ਼ੁੱਭਕਰਨ ਸਿੰਘ ਵਰਗਿਆਂ 'ਤੇ ਗੋਲ਼ੀਆਂ ਚਲਾਉਣ ਤੇ 200 ਤੋਂ ਵੱਧ ਕਿਸਾਨਾਂ ਨੂੰ ਫੱਟੜ ਕਰਨ ਦਾ ਮੌਕਾ ਦਿੱਤਾ ਜਾਵੇ, ਤਾਂ ਲੋਕ ਡਰਦੇ ਹੀ ਹਨ। ਬਹੁਤ ਸਾਰੇ ਸਿਆਸਤਦਾਨਾਂ, ਆਜ਼ਾਦ ਮੀਡੀਆ ਤੇ ਪੱਤਰਕਾਰਾਂ, ਸੋਸ਼ਲ ਐਕਟਿਵਿਸਟ ਨਾਲ ਵਧੀਕੀਆਂ ਹੋਈਆਂ ਹਨ, ਪਰ ਜਦੋਂ ਅਖ਼ੀਰਲਾ ਸਾਲ ਆਉਂਦਾ ਹੈ, ਪੰਜਾਬ ਦੇ ਲੋਕ ਉਸ ਵੇਲੇ ਖੜ੍ਹੇ ਹੁੰਦੇ ਹਨ। ਹੁਣ ਮੁਲਾਜ਼ਮ, ਕਿਸਾਨ, ਮਜ਼ਦੂਰ ਤੇ ਸਿਆਸਤਦਾਨ ਵੀ ਖੁੱਲ੍ਹ ਕੇ ਇਨ੍ਹਾਂ ਦੇ ਵਿਰੋਧ ਵਿਚ ਸਾਹਮਣੇ ਆਉਣ ਲੱਗ ਪਏ ਹਨ।
'ਕੇਂਦਰ ਤੋਂ ਡਰਦਾ ਹੈ ਮੁੱਖ ਮੰਤਰੀ ਮਾਨ'
- 'ਆਪ' ਦੀ ਲੀਡਰਸ਼ਿਪ ਵੀ ਇਹ ਗੱਲ ਜਾਣਦੀ ਹੈ ਕਿ ਭਗਵੰਤ ਮਾਨ 'ਕੰਪ੍ਰੋਮਾਈਜ਼ਡ ਸੀ. ਐੱਮ.' ਹੈ। ਇਹ ਉਸ ਨੂੰ ਮੁੱਖ ਮੰਤਰੀ ਬਣਾ ਬੈਠੇ ਹਨ, ਪਰ ਹੁਣ ਉਤਾਰ ਨਹੀਂ ਪਾ ਰਹੇ। ਇਹ ਕੈਪਟਨ ਅਮਰਿੰਦਰ ਸਿੰਘ ਤੋਂ ਵੀ ਵੱਧ 'ਕੰਪ੍ਰੋਮਾਈਜ਼ਡ' ਹੈ। ਕੇਂਦਰ ਨੂੰ ਇਸ ਦੀਆਂ ਕਮੀਆਂ ਦਾ ਪਤਾ ਹੈ। ਜਿਹੜੀ ਇਸ ਨੇ ਵਿਦੇਸ਼ਾਂ ਵਿਚ ਜਾਇਦਾਦ ਬਣਾਈ ਹੈ, ਉਸ ਦੀ ਡਿਟੇਲ ਕੇਂਦਰ ਕੋਲ ਪਹੁੰਚ ਚੁੱਕੀ ਹੈ। ਮੈਲਬੌਰਨ, ਐਡਿਲੇਡ, ਲੰਡਨ, ਬ੍ਰੈਂਪਟਨ ਦੀਆਂ ਜਾਇਦਾਦਾਂ ਦਾ ਵੇਰਵਾ ਉਨ੍ਹਾਂ ਦੇ ਕੋਲ ਹੈ। ਇਸੇ ਕਰ ਕੇ ਮੁੱਖ ਮੰਤਰੀ ਉਨ੍ਹਾਂ ਤੋਂ ਡਰਦਾ ਹੈ। ਇਸ ਨੇ ਚੋਣਾਂ ਤੋਂ ਬਾਅਦ ਵਿਦੇਸ਼ ਭੱਜਣ ਦੀ ਯੋਜਨਾ ਬਣਾਈ ਹੋਈ ਹੈ, ਪਰ ਵਿਦੇਸ਼ ਜਾਣ ਲਈ ਵੀ ਗ੍ਰਹਿ ਵਿਭਾਗ ਦੇ ਸਾਥ ਦੀ ਲੋੜ ਪਵੇਗੀ, ਨਹੀਂ ਤਾਂ ਇਸ ਨੂੰ ਏਅਰਪੋਰਟ ਤੋਂ ਹੀ ਡਿਟੇਨ ਕੀਤਾ ਜਾ ਸਕਦਾ ਹੈ।ਇਹ ਗ੍ਰਹਿ ਮੰਤਰਾਲੇ ਦੇ ਇਸ਼ਾਰੇ 'ਤੇ ਚੱਲ ਰਿਹਾ ਹੈ। ਭਾਰਤ-ਅਮਰੀਕਾ ਵਪਾਰ ਸਮਝੌਤੇ ਤੋਂ ਬਾਅਦ ਕਿਸਾਨ-ਮਜ਼ਦੂਰ ਦਿੱਲੀ ਵੱਲ ਕੂਚ ਕਰਨ ਦੀ ਤਿਆਰੀ ਕਰ ਰਹੇ ਹਨ। ਇਸ ਲਈ ਇਸ ਨੂੰ ਕੇਂਦਰ ਸਰਕਾਰ ਤੋਂ ਸਿੱਧੇ ਹੁਕਮ ਹਨ ਕਿ ਪੰਜਾਬ ਦੇ ਕਿਸਾਨਾਂ ਇਕੱਠੇ ਹੋ ਕੇ ਦਿੱਲੀ ਵੱਲ ਕੂਚ ਨਹੀਂ ਕਰਨ ਦੇਣਾ। ਇਨ੍ਹਾਂ ਹੁਕਮਾਂ ਦੀ ਪਾਲਣਾ ਮੁੱਖ ਮੰਤਰੀ ਵੀ ਕਰ ਰਿਹਾ ਹੈ ਤੇ ਪੰਜਾਬ ਪੁਲਸ ਵੀ। ਇਸੇ ਤਹਿਤ ਹੀ ਬਠਿੰਡਾ ਵਿਚ ਕਿਸਾਨਾਂ ਦੀਆਂ ਲੱਤਾਂ-ਬਾਹਾਂ ਤੋੜੀਆਂ ਗਈਆਂ ਹਨ। ਪਹਿਲੇ ਦੋ ਸਾਲ ਤਾਂ ਭਗਵੰਤ ਮਾਨ ਪਾਣੀਆਂ ਦਾ ਰਖਵਾਲਾ ਬਣਦਾ ਰਿਹਾ। ਹੁਣ ਉਨ੍ਹਾਂ ਨੇ ਬੀ. ਬੀ. ਐੱਮ. ਬੀ. 'ਤੇ ਵੀ ਕੰਟਰੋਲ ਕਰ ਲਿਆ, ਉੱਥੇ ਪੁਲਸ ਹਟਾ ਕੇ ਸੀ. ਆਰ. ਪੀ. ਐੱਫ. ਵੀ ਲਗਾ ਲਈ। ਹੁਣ ਇਹ ਹਰਿਆਣਾ ਨੂੰ ਆਪਣਾ ਛੋਟਾ ਭਰਾ ਕਹਿਣ ਲੱਗ ਪਿਆ ਹੈ।
ਕਿਸਾਨੀ ਮੁੱਦਿਆਂ ਅਤੇ ਭਾਰਤ-ਅਮਰੀਕਾ ਡੀਲ ਬਾਰੇ ਤੁਹਾਡੀ ਕੀ ਰਾਏ ਹੈ?
-ਮੋਦੀ ਸਰਕਾਰ ਨੇ ਅਮਰੀਕਾ ਨਾਲ ਜਿਹੜੀ ਡੀਲ ਕੀਤੀ ਹੈ, ਉਹ ਪੰਜਾਬ ਦੀ ਕਿਸਾਨੀ ਲਈ ਘਾਤਕ ਹੈ। ਇਸ ਨਾਲ ਅਮਰੀਕੀ ਖੇਤੀ ਅਤੇ ਡੇਅਰੀ ਉਤਪਾਦ ਭਾਰਤੀ ਬਾਜ਼ਾਰ ਵਿਚ ਆਉਣਗੇ, ਜਿਸ ਨਾਲ ਸਾਡੇ ਛੋਟੇ ਕਿਸਾਨ ਅਤੇ ਵੇਰਕਾ ਵਰਗੀਆਂ ਸੰਸਥਾਵਾਂ ਖਤਮ ਹੋ ਜਾਣਗੀਆਂ। ਜੇ ਇਸ ਵਿਰੁੱਧ ਸੰਘਰਸ਼ ਨਾ ਵਿੱਢਿਆ ਤਾਂ ਇਹ ਬਹੁਤ ਘਾਤਕ ਸਾਬਿਤ ਹੋ ਸਕਦਾ ਹੈ। ਕਿਸਾਨ ਜਥੇਬੰਦੀਆਂ ਨੂੰ ਵੀ ਇਸ ਗੱਲ ਦਾ ਧਿਆਨ ਰੱਖਣਾ ਪਵੇਗਾ ਕਿ ਪੰਜਾਬ ਸਰਕਾਰ ਕਿਸਾਨਾਂ ਦੇ ਹੱਕ ਵਿਚ ਖੜ੍ਹਣ ਦੀ ਬਜਾਏ ਉਨ੍ਹਾਂ 'ਤੇ ਲਾਠੀਆਂ ਅਤੇ ਗੋਲ਼ੀਆਂ ਚਲਾਵੇਗੀ ਤਾਂ ਜੋ ਉਹ ਅੰਬਾਲਾ ਬਾਰਡਰ ਤੋਂ ਅੱਗੇ ਨਾ ਜਾ ਸਕਣ।
ਰਵਨੀਤ ਬਿੱਟੂ ਕਹਿੰਦੇ ਪ੍ਰਿਯੰਕਾ ਗਾਂਧੀ ਨੇ ਉਨ੍ਹਾਂ ਨੂੰ ਸਾਜ਼ਿਸ਼ ਤਹਿਤ ਕਿਸਾਨ ਅੰਦੋਲਨ ਵਿਚ ਭੇਜਿਆ ਸੀ ?
- ਰਵਨੀਤ ਬਿੱਟੂ ਨੂੰ ਕੋਈ 'ਸਿਆਸੀ ਡਾਇਮੈਂਸ਼ੀਆ' ਹੈ? ਜਿਹੜਾ ਉਨ੍ਹਾਂ ਨੂੰ 6 ਸਾਲ ਪੁਰਾਣੀ ਗੱਲ ਅੱਜ ਯਾਦ ਆਈ ਹੈ। ਅਸਲ ਵਿਚ ਉਨ੍ਹਾਂ ਦੀ ਰਾਜ ਸਭਾ ਦੀ ਮਿਆਦ ਖ਼ਤਮ ਹੋਣ ਵਾਲੀ ਹੈ ਅਤੇ ਉਹ ਆਪਣੀ ਮੰਤਰੀ ਦੀ ਕੁਰਸੀ ਬਚਾਉਣ ਲਈ ਹੱਥ-ਪੈਰ ਮਾਰ ਰਹੇ ਹਨ। ਪਹਿਲਾਂ ਉਨ੍ਹਾਂ ਨੇ ਰਾਹੁਲ ਗਾਂਧੀ ਨੂੰ ਦੇਸ਼ ਦਾ ਦੁਸ਼ਮਣ ਕਹਿ ਕੇ ਉਨ੍ਹਾਂ ਨਾਲ ਪੰਗਾ ਲਿਆ ਅਤੇ ਹੁਣ ਉਹ ਪ੍ਰਿਯੰਕਾ ਗਾਂਧੀ ਦਾ ਨਾਂ ਇਸ ਲਈ ਉਛਾਲ ਰਹੇ ਹਨ ਤਾਂ ਜੋ ਭਾਜਪਾ ਵਿਚ ਆਪਣੀ ਅਹਿਮੀਅਤ ਬਣਾ ਕੇ ਅਗਲੀ ਟਰਮ ਯਕੀਨੀ ਬਣਾ ਸਕਣ। ਕੀ ਬਿੱਟੂ ਛੋਟਾ ਜਵਾਕ ਹੈ, ਜੋ ਕਿਸੇ ਦੇ ਕਹਿਣ 'ਤੇ ਕਿਤੇ ਵੀ ਤੁਰ ਪਵੇਗਾ?
ਅਕਾਲੀ ਦਲ ਵੱਲੋਂ ਰੈਲੀਆਂ ਦਾ ਦੌਰ ਸ਼ੁਰੂ ਕਰ ਦਿੱਤਾ ਗਿਆ ਹੈ, ਕੀ ਕਹੋਗੇ?
- ਅਕਾਲੀ ਦਲ ਨੇ ਤਾਂ ਹੁਣ ਰੈਲੀਆਂ ਸ਼ੁਰੂ ਕੀਤੀਆਂ ਹਨ, ਪਰ ਕਾਂਗਰਸ ਦੀਆਂ ਰੈਲੀਆਂ ਤਾਂ ਪਹਿਲਾਂ ਤੋਂ ਹੀ ਜਾਰੀ ਹਨ। ਸ਼੍ਰੋਮਣੀ ਅਕਾਲੀ ਦਲ ਕਦੇ ਵੀ ਆਪਣੇ ਦਮ 'ਤੇ ਸਰਕਾਰ ਨਹੀਂ ਬਣਾ ਸਕਿਆ। ਰਹੀ ਗੱਲ ਭਾਜਪਾ ਨਾਲ ਗੱਠਜੋੜ ਦੀ ਤਾਂ ਕਾਂਗਰਸ ਨੇ ਹਮੇਸ਼ਾ ਗੱਠਜੋੜ ਨੂੰ ਹੀ ਹਰਾਇਆ ਹੈ। ਆਉਣ ਵਾਲੇ ਸਮੇਂ ਵਿਚ ਭਾਜਪਾ ਤੇ ਅਕਾਲੀ ਦਲ ਦੇ ਵੱਡੇ ਲੀਡਰ ਕਾਂਗਰਸ ਵਿਚ ਸ਼ਾਮਲ ਹੋਣਗੇ।
ਸਰਕਾਰ ਮੁਫ਼ਤ ਬਿਜਲੀ, ਸਿਹਤ ਬੀਮਾ ਯੋਜਨਾ ਤੇ ਨੌਕਰੀਆਂ ਦੇਣ ਦੇ ਦਾਅਵੇ ਕਰ ਰਹੀ ਹੈ, ਕੀ ਕਹੋਗੇ ?
- ਜੇ ਕਿਸੇ ਦੀ ਜ਼ਿੰਦਗੀ ਅਤੇ ਕਾਰੋਬਾਰ ਹੀ ਮਹਿਫੂਜ਼ ਨਹੀਂ, ਤਾਂ ਮੁਫ਼ਤ ਬਿਜਲੀ ਦਾ ਕੀ ਫਾਇਦਾ? ਸਰਕਾਰ ਕੋਲ ਪੈਸਾ ਹੀ ਨਹੀਂ ਹੈ, ਇਹ ਹਰ ਹਫ਼ਤੇ 1000 ਕਰੋੜ ਦਾ ਕਰਜ਼ਾ ਚੁੱਕ ਰਹੇ ਹਨ, ਸਰਕਾਰੀ ਜ਼ਮੀਨਾਂ ਵੇਚਣ ਲਈ ਤਰਲੋਮੱਛੀ ਹੋ ਰਹੇ ਹਨ, ਲੋਕਾਂ ਦੇ ਨੀਲੇ ਕਾਰਡ ਕੱਟ ਦਿੱਤੇ ਗਏ ਹਨ। ਇਹ ਸਰਕਾਰ ਸਿਰਫ਼ ਅਖੀਰਲੇ ਮਹੀਨਿਆਂ ਵਿਚ ਜਾਦੂਗਰਾਂ ਵਾਂਗ ਲੋਕਾਂ ਨੂੰ ਭਰਮਾਉਣ ਦੀ ਕੋਸ਼ਿਸ਼ ਕਰ ਰਹੀ ਹੈ, ਪਰ ਲੋਕ ਸਭ ਸਮਝਦੇ ਹਨ। ਜੇ ਅੱਜ ਚੋਣਾਂ ਹੋ ਜਾਣ ਤਾਂ ਇਨ੍ਹਾਂ ਨੂੰ 10 ਸੀਟਾਂ ਵੀ ਨਹੀਂ ਆਉਣਗੀਆਂ। ਆਮ ਆਦਮੀ ਪਾਰਟੀ ਵਾਲਿਆਂ ਨੂੰ ਪਿੰਡਾਂ ਦੇ ਲੋਕ ਪਾਥੀਆਂ ਮਾਰਨਗੇ। ਔਰਤਾਂ ਦਾ 60 ਹਜ਼ਾਰ ਬਣਦਾ ਸੀ, ਜੋ 2-4 ਹਜ਼ਾਰ ਦੇ ਵੀ ਦੇਣਗੇ ਤਾਂ ਕੀ ਲੋਕ ਖੁਸ਼ ਹੋ ਜਾਣਗੇ?
ਸ਼ਹਿਜਾਦ ਭੱਟੀ ਦੀ ਨਜ਼ਰ ਪੰਜਾਬ ’ਤੇ, ਲਾਰੈਂਸ ਗੈਂਗ ਮੁੰਬਈ ਫਿਲਮ ਇੰਡਸਟਰੀ ’ਤੇ ਕਰਨਾ ਚਾਹੁੰਦੈ ਕਬਜ਼ਾ !
NEXT STORY 
