ਜਲੰਧਰ (ਰਵਿੰਦਰ ਸ਼ਰਮਾ)— ਸਰਦੀ ਦਾ ਮੌਸਮ, ਛੋਟੇ ਦਿਨ ਅਤੇ ਠੰਡਾ ਦਿਮਾਗ, ਸ਼ਾਇਦ ਇਸੇ ਕਾਰਨ ਹੀ ਪੁਲਸ ਅਧਿਕਾਰੀਆਂ ਕੋਲ ਆਉਣ ਵਾਲੀਆਂ ਸ਼ਿਕਾਇਤਾਂ 'ਚ ਭਾਰੀ ਕਮੀ ਹੋ ਜਾਂਦੀ ਹੈ। ਦਸੰਬਰ, ਜਨਵਰੀ ਅਤੇ ਫਰਵਰੀ ਮਹੀਨੇ ਦੀ ਗੱਲ ਕਰੀਏ ਤਾਂ ਪੁਲਸ ਅਧਿਕਾਰੀਆਂ ਕੋਲ ਆਉਣ ਵਾਲੀਆਂ ਸ਼ਿਕਾਇਤਾਂ 'ਚ 30 ਫੀਸਦੀ ਤੋਂ ਵੀ ਵੱਧ ਕਮੀ ਦਰਜ ਕੀਤੀ ਗਈ ਹੈ। ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਗਰਮੀ ਵੱਧਣ ਦੇ ਨਾਲ-ਨਾਲ ਸ਼ਿਕਾਇਤਾਂ ਦਾ ਵੀ ਢੇਰ ਲੱਗਣ ਲੱਗਦਾ ਹੈ। ਪੁਲਸ ਅਧਿਕਾਰੀ ਇਸ ਦੇ ਪਿੱਛੇ ਮਨੋਵਿਗਿਆਨਕ ਅਸਰ ਵੀ ਮੰਨਦੇ ਹਨ। ਉਹ ਕਹਿੰਦੇ ਹਨ ਕਿ ਜਿਵੇਂ-ਜਿਵੇਂ ਗਰਮੀ ਵੱਧਦੀ ਹੈ, ਇਨਸਾਨ ਦੇ ਦਿਮਾਗ 'ਚ ਵੀ ਗਰਮੀ ਵੱਧਦੀ ਹੈ। ਮਾੜੀ-ਮੋਟੀ ਬਹਿਸਬਾਜ਼ੀ ਨੂੰ ਲੈ ਕੇ ਵੀ ਵਿਅਕਤੀ ਸ਼ਿਕਾਇਤ ਕਰਨ ਤੋਂ ਨਹੀਂ ਟਲਦਾ, ਉਥੇ ਹੀ ਸਰਦੀਆਂ 'ਚ ਇਸ ਦੇ ਉਲਟ ਅਸਰ ਦਿਖਦਾ ਹੈ। ਦਿਮਾਗ ਠੰਡਾ ਹੋਣ ਕਾਰਨ ਛੋਟੀ ਮੋਟੀ ਬਹਿਸਬਾਜ਼ੀ ਵਿਚ ਵਿਅਕਤੀ ਸਮਝੌਤਾ ਕਰ ਲੈਣਾ ਹੀ ਠੀਕ ਸਮਝਦਾ ਹੈ।
ਪੁਲਸ ਕਮਿਸ਼ਨਰੇਟ ਦੀ ਗੱਲ ਕਰੀਏ ਤਾਂ ਮਾਰਚ 2017 ਵਿਚ ਵੱਖ-ਵੱਖ ਅਧਿਕਾਰੀਆਂ ਕੋਲ ਜਨਤਾ ਦੀਆਂ 733 ਸ਼ਿਕਾਇਤਾਂ ਆਈਆਂ। ਅਪ੍ਰੈਲ 2017 'ਚ ਇਹ ਗਿਣਤੀ ਵੱਧ ਕੇ 798 ਹੋ ਗਈ। ਮਈ 2017 ਵਿਚ ਸ਼ਿਕਾਇਤਾਂ ਦੀ ਗਿਣਤੀ 880 ਪਹੁੰਚ ਗਈ। ਗਰਮੀ ਦੇ ਜ਼ੋਰ ਫੜਦਿਆਂ ਹੀ ਜੂਨ ਵਿਚ ਇਹ ਗਿਣਤੀ 1034 ਤੱਕ ਪਹੁੰਚ ਗਈ। ਜੁਲਾਈ ਵਿਚ ਅਧਿਕਾਰੀਆਂ ਕੋਲ ਆਉਣ ਵਾਲੀਆਂ ਸ਼ਿਕਾਇਤਾਂ ਦੀ ਗਿਣਤੀ 994 ਅਤੇ ਅਗਸਤ ਵਿਚ 1023 ਸੀ। ਸਤੰਬਰ 'ਚ ਇਹ ਗਿਣਤੀ 805 ਰਹਿ ਗਈ ਅਤੇ ਅਕਤੂਬਰ ਵਿਚ ਇਹ 778 'ਤੇ ਆ ਗਈ। ਨਵੰਬਰ ਵਿਚ ਸ਼ਿਕਾਇਤਾਂ ਦੀ ਗਿਣਤੀ 724 ਦਰਜ ਕੀਤੀ ਗਈ। ਦਸੰਬਰ ਵਿਚ ਸ਼ਿਕਾਇਤਾਂ ਦੀ ਗਿਣਤੀ 'ਚ ਹੋਰ ਗਿਰਾਵਟ ਨਜ਼ਰ ਆਈ ਅਤੇ ਉਹ 654 ਅਤੇ ਜਨਵਰੀ 'ਚ 613 ਰਹਿ ਗਈਆਂ। ਫਰਵਰੀ ਵਿਚ ਇਹ ਗਿਣਤੀ 650 ਹੋ ਗਈ।
ਗਰਮੀਆਂ 'ਚ ਜਦੋਂ ਦਿਨ ਵੱਡੇ ਹੋ ਜਾਂਦੇ ਹਨ ਤਾਂ ਲੋਕ ਖੁੱਲ੍ਹ ਕੇ ਇਕ-ਦੂਜੇ ਦੇ ਖਿਲਾਫ ਸ਼ਿਕਾਇਤਾਂ ਕਰਨ ਨਿਕਲ ਪੈਂਦੇ ਹਨ। ਉਥੇ ਹੀ ਸਰਦੀਆਂ ਵਿਚ ਲੋਕ ਵਧੇਰੇ ਕਰਕੇ ਘਰਾਂ ਵਿਚ ਵੜੇ ਰਹਿਣਾ ਹੀ ਪਸੰਦ ਕਰਦੇ ਹਨ। ਹੈਰਾਨੀ ਵਾਲੀ ਗੱਲ ਇਹ ਹੈ ਕਿ ਗਰਮੀਆਂ 'ਚ ਜਿੱਥੇ ਕੁੱਟਮਾਰ ਅਤੇ ਜ਼ਮੀਨ-ਜਾਇਦਾਦ ਸਬੰਧੀ ਸ਼ਿਕਾਇਤਾਂ ਵੱਧ ਜਾਂਦੀਆਂ ਹਨ, ਉਥੇ ਹੀ ਸਰਦੀਆਂ ਵਿਚ ਕੁੱਟਮਾਰ ਦੇ ਮਾਮਲਿਆਂ ਦੀਆਂ ਸ਼ਿਕਾਇਤਾਂ ਕਾਫੀ ਘੱਟ ਹੋ ਜਾਂਦੀਆਂ ਹਨ। ਅੰਕੜੇ ਵੀ ਹਕੀਕਤ ਨੂੰ ਬਿਆਨ ਕਰਦੇ ਹਨ।
ਜੂਨ ਮਹੀਨੇ 'ਚ ਸਭ ਤੋਂ ਵੱਧ 1034 ਸ਼ਿਕਾਇਤਾਂ ਦਰਜ ਕੀਤੀਆਂ ਗਈਆਂ ਅਤੇ ਇਨ੍ਹਾਂ 'ਚੋਂ ਲਗਭਗ ਅੱਧੀਆਂ ਸ਼ਿਕਾਇਤਾਂ ਕੁੱਟਮਾਰ ਅਤੇ ਜ਼ਮੀਨ-ਜਾਇਦਾਦ ਸਬੰਧੀ ਸਨ। ਸਭ ਤੋਂ ਘੱਟ ਸ਼ਿਕਾਇਤਾਂ ਜਨਵਰੀ ਵਿਚ 613 ਦਰਜ ਕੀਤੀਆਂ ਗਈਆਂ। ਇਨ੍ਹਾਂ 'ਚੋਂ ਕੁੱਟਮਾਰ ਅਤੇ ਜ਼ਮੀਨੀ ਜਾਇਦਾਦ ਸਬੰਧੀ ਸ਼ਿਕਾਇਤਾਂ ਸਿਰਫ 30 ਫੀਸਦੀ ਸਨ। ਗਰਮੀਆਂ ਵਿਚ ਸ਼ਿਕਾਇਤਾਂ ਵੱਧਣ ਨਾਲ ਏ. ਡੀ. ਸੀ. ਪੀ. ਅਤੇ ਏ. ਸੀ. ਪੀ. ਪੱਧਰ ਦੇ ਅਧਿਕਾਰੀਆਂ ਕੋਲ ਫਾਈਲਾਂ ਦਾ ਢੇਰ ਲੱਗ ਜਾਂਦਾ ਹੈ ਅਤੇ ਇਨ੍ਹਾਂ ਨੂੰ ਨਿਪਟਾਉਣ 'ਚ ਕਾਫੀ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪੈਂਦਾ ਹੈ। ਸਰਦੀਆਂ ਵਿਚ ਸ਼ਿਕਾਇਤਾਂ ਘੱਟ ਹੋਣ ਕਾਰਨ ਅਧਿਕਾਰੀਆਂ ਨੂੰ ਸ਼ਿਕਾਇਤਾਂ ਨਿਬੇੜਨ ਲਈ ਕਾਫੀ ਸਮਾਂ ਮਿਲ ਜਾਂਦਾ ਹੈ ਤੇ ਪੈਂਡਿੰਗ ਪਈਆਂ ਫਾਈਲਾਂ ਵੀ ਘੱਟ ਹੋ ਜਾਂਦੀਆਂ ਹਨ। ਇਹੀ ਕਾਰਨ ਹੈ ਕਿ ਏ. ਡੀ. ਸੀ. ਪੀ. ਸਿਟੀ-1, ਏ. ਡੀ. ਸੀ. ਪੀ. ਸਿਟੀ-2, ਏ. ਸੀ. ਪੀ. ਮਾਡਲ ਟਾਊਨ, ਏ. ਸੀ. ਪੀ. ਕੈਂਟ, ਏ. ਸੀ. ਪੀ. ਨਾਰਥ, ਏ. ਸੀ. ਪੀ. ਸੈਂਟਰਲ ਅਤੇ ਏ. ਸੀ. ਪੀ. ਵੈਸਟ ਅੱਜਕਲ ਆਪਣਾ ਪੂਰਾ ਸਮਾਂ ਪੈਂਡਿੰਗ ਸ਼ਿਕਾਇਤਾਂ ਨੂੰ ਨਿਪਟਾਉਣ ਵਿਚ ਲਗਾ ਰਹੇ ਹਨ ਅਤੇ ਜਨਤਾ ਨੂੰ ਵੀ ਸਮੇਂ 'ਤੇ ਇਨਸਾਫ ਮਿਲ ਰਿਹਾ ਹੈ। ਪੁਲਸ ਅਧਿਕਾਰੀ ਵੀ ਮੰਨਦੇ ਹਨ ਕਿ ਗਰਮੀਆਂ ਵਿਚ ਪੁਲਸ ਵਿਭਾਗ ਕੋਲ ਸ਼ਿਕਾਇਤਾਂ ਦੀ ਗਿਣਤੀ ਵੱਧ ਜਾਂਦੀ ਹੈ।
ਮੌਸਮ ਦਾ ਸਰੀਰ 'ਤੇ ਪੈਂਦਾ ਹੈ ਡੂੰਘਾ ਅਸਰ: ਡਾ. ਕੁਰਦਕਰ
ਮਨੋਵਿਗਿਆਨਕ ਡਾ. ਬੀ. ਐੱਸ. ਕੁਰਦਕਰ ਕਹਿੰਦੇ ਹਨ ਕਿ ਮੌਸਮ ਦਾ ਮਨੁੱਖ ਦੇ ਸਰੀਰ 'ਤੇ ਡੂੰਘਾ ਅਸਰ ਪੈਂਦਾ ਹੈ। ਉਹ ਕਹਿੰਦੇ ਹਨ ਕਿ ਗਰਮੀ ਨਾਲ ਇਨਸਾਨ ਦੇ ਸਰੀਰ ਵਿਚ ਉਤੇਜਨਾ ਵੱਧ ਜਾਂਦੀ ਹੈ ਅਤੇ ਉਹ ਕਿਸੇ ਨਾ ਕਿਸੇ ਰੂਪ ਵਿਚ ਬਾਹਰ ਨਿਕਲਦੀ ਹੈ, ਜਿਸ ਨਾਲ ਸ਼ਿਕਾਇਤਾਂ ਦੀ ਗਿਣਤੀ ਵੀ ਵੱਧਦੀ ਹੈ। ਉਥੇ ਹੀ ਸਰਦੀਆਂ ਵਿਚ ਸਰੀਰ ਵਿਚ ਉਤੇਜਨਾ ਘੱਟ ਅਤੇ ਦਿਮਾਗ ਠੰਡਾ ਰਹਿੰਦਾ ਹੈ, ਜਿਸ ਕਾਰਨ ਸਰਦੀਆਂ 'ਚ ਕੁੱਟਮਾਰ ਦੀਆਂ ਘਟਨਾਵਾਂ ਘੱਟ ਹੋ ਜਾਂਦੀਆਂ ਹਨ।
ਜਲੰਧਰ: ਪਾਣੀ 'ਚੋਂ ਨਿਕਲੀਆਂ ਸੁੰਡੀਆਂ, ਇਲਾਕਾ ਵਾਸੀਆਂ 'ਚ ਭਾਰੀ ਰੋਸ (ਤਸਵੀਰਾਂ)
NEXT STORY