ਵੈੱਬ ਡੈਸਕ- ਭਾਰਤੀ ਜਨਤਾ ਪਾਰਟੀ ਪੰਜਾਬ ਦੀ ਧੜਕਣ, ਦਿੱਲੀ ਵਿਚ ਸੰਗਠਨ ਦੀ ਤਾਕਤ, 2027 ਦੀਆਂ ਚੋਣਾਂ ਦੀ ਰਣਨੀਤੀ ਦੀ ਸੂਤਰਧਾਰ ਅਤੇ ਪੰਜਾਬ ਲਈ ਨਵੇਂ ਬਦਲ ਦੀ ਆਵਾਜ਼ ਬਣ ਕੇ ਉੱਭਰ ਰਹੀ ਹੈ। ਪੇਸ਼ ਹਨ ਆਗਾਮੀ ਚੋਣਾਂ ਨੂੰ ਲੈ ਕੇ ਭਾਜਪਾ ਦੇ ਰਾਸ਼ਟਰੀ ਜਨਰਲ ਸਕੱਤਰ ਤਰੁਣ ਚੁੱਘ ਦੀ ‘ਜਗ ਬਾਣੀ’ ਨਾਲ ਖਾਸ ਗੱਲਬਾਤ ਦੇ ਅੰਸ਼ :-
ਪ੍ਰਸ਼ਨ : ਆਉਣ ਵਾਲੀਆਂ ਪੰਜਾਬ ਵਿਧਾਨ ਸਭਾ ਚੋਣਾਂ ਨੂੰ ਲੈ ਕੇ ਤੁਹਾਡੀ ਪਾਰਟੀ ਦੀ ਸਭ ਤੋਂ ਵੱਡੀ ਰਣਨੀਤੀ ਕੀ ਹੈ?
ਉੱਤਰ : ਦੇਖੋ, ਸਾਡੀ ਰਣਨੀਤੀ ਬੜੀ ਸਿੱਧੀ ਅਤੇ ਸਾਫ਼ ਹੈ। ਪੰਜਾਬ ਦੀ ਜਨਤਾ ਨੂੰ ਇਕ ਮਜ਼ਬੂਤ, ਇਮਾਨਦਾਰ ਅਤੇ ਸੁਰੱਖਿਅਤ ਬਦਲ ਦੇਣਾ। ਅੱਜ ਪੰਜਾਬ ਕਿਸ ਹਾਲਤ ਵਿਚ ਹੈ, ਇਹ ਕਿਸੇ ਤੋਂ ਲੁਕਿਆ ਨਹੀਂ ਹੈ। ਨਸ਼ੇ ਨੇ ਇਕ ਪੀੜ੍ਹੀ ਨੂੰ ਤਬਾਹ ਕਰ ਦਿੱਤਾ ਹੈ, ਗੈਂਗਸਟਰ ਸਰਪੰਚਾਂ ਅਤੇ ਆਮ ਨਾਗਰਿਕਾਂ ਨੂੰ ਧਮਕੀਆਂ ਦੇ ਰਹੇ ਹਨ ਅਤੇ ਉਦਯੋਗਪਤੀ ਸੂਬਾ ਛੱਡ ਕੇ ਜਾ ਰਹੇ ਹਨ। ਅਜਿਹੇ ਵਿਚ ਸਾਡੀ ਰਣਨੀਤੀ ਹੈ—ਜ਼ਮੀਨ ’ਤੇ ਜਾਓ, ਲੋਕਾਂ ਨਾਲ ਜੁੜੋ ਅਤੇ ਇਕ ਸਪੱਸ਼ਟ ਰੋਡਮੈਪ ਪੇਸ਼ ਕਰੋ। ਅਸੀਂ 2027 ਦੀਆਂ ਚੋਣਾਂ ਇਕੱਲੇ ਆਪਣੇ ਦਮ ’ਤੇ ਲੜਨ ਅਤੇ ਪੂਰਨ ਬਹੁਮਤ ਨਾਲ ਸਰਕਾਰ ਬਣਾਉਣ ਦੇ ਇਰਾਦੇ ਨਾਲ ਮੈਦਾਨ ਵਿਚ ਹਾਂ।
ਸਾਡੀ ਪਕੜ ਹੁਣ ਸਿਰਫ਼ ਸ਼ਹਿਰਾਂ ਤੱਕ ਸੀਮਤ ਨਹੀਂ ਰਹੀ, ਪਿੰਡ-ਪਿੰਡ ਵਿਚ ਭਾਜਪਾ ਦਾ ਸੰਗਠਨ ਮਜ਼ਬੂਤ ਹੋ ਰਿਹਾ ਹੈ। 2024 ਦੀਆਂ ਲੋਕ ਸਭਾ ਚੋਣਾਂ ਵਿਚ ਸਾਨੂੰ 19 ਫੀਸਦੀ ਵੋਟਾਂ ਮਿਲੀਆਂ। ਇਹ ਅੰਕੜਾ ਬਹੁਤ ਮਾਇਨੇ ਰੱਖਦਾ ਹੈ। ਜਿੱਥੇ ਭਾਜਪਾ 19 ਫੀਸਦੀ ’ਤੇ ਪਹੁੰਚਦੀ ਹੈ, ਉੱਥੇ ਅਗਲੀ ਸਰਕਾਰ ਭਾਜਪਾ ਦੀ ਹੀ ਬਣਦੀ ਹੈ। ਓਡਿਸ਼ਾ, ਅਸਾਮ ਅਤੇ ਤ੍ਰਿਪੁਰਾ ਵਿਚ ਅਜਿਹਾ ਹੀ ਹੋਇਆ। ਹੁਣ ਪੰਜਾਬ ਵਿਚ ਪਰਿਵਰਤਨ ਹੋਵੇਗਾ ਅਤੇ ‘ਡਬਲ ਇੰਜਣ’ ਦੀ ਸਰਕਾਰ ਬਣੇਗੀ।
ਸਾਡੀ ਰਣਨੀਤੀ ਦਾ ਦੂਜਾ ਥੰਮ੍ਹ ਹੈ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਅਗਵਾਈ। ਪੰਜਾਬ ਦੀਆਂ ਮਾਵਾਂ-ਭੈਣਾਂ, ਕਿਸਾਨ ਅਤੇ ਨੌਜਵਾਨ ਜਾਣਦੇ ਹਨ ਕਿ ਮੋਦੀ ਜੀ ਜੋ ਵਾਅਦਾ ਕਰਦੇ ਹਨ, ਉਹ ਨਿਭਾਉਂਦੇ ਹਨ। ਹੁਣ ਪੰਜਾਬ ਵਿਚੋਂ ਨਸ਼ੇ ਦਾ ਸਫਾਇਆ ਕਰਨ ਦਾ ਵਾਅਦਾ ਹੈ। ਪੰਜਾਬ ਦੀ ਜਨਤਾ ਦਾ ਭਾਜਪਾ ’ਤੇ ਭਰੋਸਾ ਹੈ ਅਤੇ ਬਦਲਾਅ ਹੋ ਕੇ ਰਹੇਗਾ।
ਪ੍ਰਸ਼ਨ : ਪਿਛਲੀਆਂ ਚੋਣਾਂ ਵਿਚ ਲੋੜੀਂਦੀ ਸਫ਼ਲਤਾ ਨਹੀਂ ਮਿਲੀ, ਇਸ ਵਾਰ ਕੀ ਵੱਖਰਾ ਕਰਨ ਜਾ ਰਹੇ ਹੋ?
ਉੱਤਰ : 2022 ਵਿਚ ਪੰਜਾਬ ਦੀ ਜਨਤਾ ਨੇ ਬਦਲਾਅ ਦੇ ਨਾਂ ’ਤੇ ਆਮ ਆਦਮੀ ਪਾਰਟੀ ਨੂੰ ਮੌਕਾ ਦਿੱਤਾ ਸੀ। ਉਹ ਮੌਕਾ ਇਕ ਪ੍ਰਯੋਗ ਸੀ, ਜੋ ਬੁਰੀ ਤਰ੍ਹਾਂ ਅਸਫ਼ਲ ਹੋ ਚੁੱਕਾ ਹੈ। ਹੁਣ ਪੰਜਾਬ ਦੀ ਜਨਤਾ ਕਾਂਗਰਸ, ਅਕਾਲੀ ਦਲ ਅਤੇ ‘ਆਪ’ ਨਾਲ ਬਰਾਬਰ ਨਫ਼ਰਤ ਕਰਦੀ ਹੈ। ਪੰਜਾਬ ਅਤੇ ਪੰਜਾਬੀਅਤ ਲਈ ਆਪਣਾ ਸਭ ਕੁਝ ਤਿਆਗ ਕੇ ਅਸੀਂ ਗੱਠਜੋੜ ਦੀ ਰਾਜਨੀਤੀ ਵਿਚ ਫਸੇ ਰਹੇ ਅਤੇ ਆਪਣੀ ਸੁਤੰਤਰ ਪਛਾਣ ਪੂਰੀ ਤਰ੍ਹਾਂ ਨਹੀਂ ਬਣਾ ਸਕੇ। ਹੁਣ ਉਹ ਗਲਤੀ ਨਹੀਂ ਦੁਹਰਾਵਾਂਗੇ, ਭਾਜਪਾ ਇਕੱਲਿਆਂ ਪੂਰੀ ਤਿਆਰੀ ਨਾਲ ਆਪਣੇ ਮਿਸ਼ਨ ’ਚ ਲੱਗੀ ਹੋਈ ਹੈ।
ਇਸ ਵਾਰ ਅਸੀਂ 3 ਪੱਧਰਾਂ ’ਤੇ ਕੰਮ ਕਰ ਰਹੇ ਹਾਂ। ਪਹਿਲਾ ਸੰਗਠਨ ਦਾ ਵਿਸਥਾਰ : ਹਰ ਵਿਧਾਨ ਸਭਾ ਹਲਕੇ ਵਿਚ ਬੂਥ ਪੱਧਰ ਤੱਕ ਭਾਜਪਾ ਦਾ ਨੈੱਟਵਰਕ ਤਿਆਰ ਹੋ ਰਿਹਾ ਹੈ। ਦੂਜਾ ਨੌਜਵਾਨਾਂ ਅਤੇ ਕਿਸਾਨਾਂ ਨਾਲ ਸਿੱਧੀ ਗੱਲਬਾਤ। ਪਿੰਡ-ਪਿੰਡ ਜਾ ਕੇ ਕੇਂਦਰ ਸਰਕਾਰ ਦੀਆਂ ਯੋਜਨਾਵਾਂ ਦੀ ਅਸਲੀਅਤ ਲੋਕਾਂ ਤੱਕ ਪਹੁੰਚਾਉਣਾ, ਜਿਨ੍ਹਾਂ ਨੂੰ ‘ਆਪ’ ਸਰਕਾਰ ਦਬਾ ਕੇ ਰੱਖਦੀ ਹੈ। ਤੀਜਾ ਇਕ ਸਪੱਸ਼ਟ ਅਤੇ ਭਰੋਸੇਯੋਗ ਬਿਰਤਾਂਤ। ਪੰਜਾਬ ਦੀ ਹਰ ਸਮੱਸਿਆ ਦਾ ਇਕ ਹੀ ਹੱਲ—‘ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਡਬਲ ਇੰਜਣ ਵਾਲੀ ਸਰਕਾਰ।’
ਪ੍ਰਸ਼ਨ : ਕੀ ਭਾਜਪਾ ਪੰਜਾਬ ਵਿਚ ਇਕੱਲਿਆਂ ਚੋਣ ਲੜੇਗੀ ਜਾਂ ਕਿਸੇ ਗੱਠਜੋੜ ਦੀ ਸੰਭਾਵਨਾ ਹੈ?
ਉੱਤਰ : ਭਾਜਪਾ ਪੰਜਾਬ ਵਿਚ ਇਕੱਲਿਆਂ ਹੀ ਚੋਣ ਲੜੇਗੀ ਅਤੇ ਆਪਣੇ ਦਮ ’ਤੇ ਸਰਕਾਰ ਬਣਾਏਗੀ। ਇਹ ਸਾਡਾ ਸਪੱਸ਼ਟ ਇਰਾਦਾ ਹੈ। ਗੱਠਜੋੜ ਦੀ ਰਾਜਨੀਤੀ ਪੰਜਾਬ ਦੇ ਲੋਕਾਂ ਨੂੰ ਬਹੁਤ ਭੰਬਲਭੂਸੇ ਵਿਚ ਪਾ ਚੁੱਕੀ ਹੈ। ਅਕਾਲੀ ਦਲ-ਭਾਜਪਾ ਗੱਠਜੋੜ ਦੀ ਸਰਕਾਰ ਦੇ ਦੌਰ ਵਿਚ ਜੋ ਕਮੀਆਂ ਸਨ, ਉਨ੍ਹਾਂ ਦਾ ਭਾਂਡਾ ਵੀ ਸਾਡੇ ਸਿਰ ਭੰਨਿਆ ਜਾਂਦਾ ਰਿਹਾ। ਹੁਣ ਅਸੀਂ ਖੁਦ ਆਪਣੇ ਦਮ ’ਤੇ ਜਨਤਾ ਦੇ ਸਾਹਮਣੇ ਜਾਣਾ ਚਾਹੁੰਦੇ ਹਾਂ। ਸਾਨੂੰ ਗੱਠਜੋੜ ਦੀ ਫਹੁੜੀ ਦੀ ਲੋੜ ਨਹੀਂ ਹੈ। ਮੋਦੀ ਜੀ ਦਾ ਨਾਂ, ਕੇਂਦਰ ਸਰਕਾਰ ਦੀਆਂ ਪ੍ਰਾਪਤੀਆਂ ਅਤੇ ਪੰਜਾਬ ਪ੍ਰਤੀ ਸਾਡੀ ਵਚਨਬੱਧਤਾ ਹੀ ਸਾਡੀ ਤਾਕਤ ਹੈ। ਸੁਨੀਲ ਜਾਖੜ ਅਤੇ ਅਸ਼ਵਨੀ ਸ਼ਰਮਾ ਦੀ ਅਗਵਾਈ ਵਿਚ ਪੰਜਾਬ ਭਾਜਪਾ ਪਹਿਲਾਂ ਨਾਲੋਂ ਕਿਤੇ ਵੱਧ ਸੰਗਠਿਤ ਅਤੇ ਆਤਮ-ਵਿਸ਼ਵਾਸ ਨਾਲ ਭਰੀ ਹੋਈ ਹੈ।
ਪ੍ਰਸ਼ਨ : ਪੰਜਾਬ ਵਿਚ ਬੇਰੁਜ਼ਗਾਰੀ, ਨਸ਼ਾ ਅਤੇ ਕਾਨੂੰਨ-ਵਿਵਸਥਾ ਵੱਡੇ ਮੁੱਦੇ ਹਨ, ਤੁਹਾਡੀ ਪਾਰਟੀ ਦਾ ਠੋਸ ਰੋਡਮੈਪ ਕੀ ਹੈ?
ਉੱਤਰ : ਇਹ ਤਿੰਨੋਂ ਸਮੱਸਿਆਵਾਂ ਵੱਖ-ਵੱਖ ਨਹੀਂ ਹਨ। ਇਹ ਇਕ ਹੀ ਜ਼ਹਿਰੀਲੇ ਰੁੱਖ ਦੀਆਂ ਵੱਖ-ਵੱਖ ਟਾਹਣੀਆਂ ਹਨ। ਜਦੋਂ ਬੇਰੁਜ਼ਗਾਰੀ ਹੁੰਦੀ ਹੈ ਤਾਂ ਨੌਜਵਾਨ ਦਿਸ਼ਾਹੀਣ ਹੋ ਜਾਂਦੇ ਹਨ। ਦਿਸ਼ਾਹੀਣ ਬੇਰੁਜ਼ਗਾਰ ਨੌਜਵਾਨ ਨਸ਼ੇ ਦੀ ਗ੍ਰਿਫ਼ਤ ਵਿਚ ਆਉਂਦੇ ਹਨ ਅਤੇ ਨਸ਼ੇ ਦਾ ਤੰਤਰ ਗੈਂਗਸਟਰਾਂ ਰਾਹੀਂ ਚੱਲਦਾ ਹੈ। ਇਸ ਲਈ ਸਾਡਾ ਰੋਡਮੈਪ ਇਨ੍ਹਾਂ ਤਿੰਨਾਂ ਨੂੰ ਇਕੱਠਿਆਂ ਖ਼ਤਮ ਕਰਨ ਦਾ ਹੈ। ਅਸੀਂ ਦੋ ਸਾਲਾਂ ਦੇ ਅੰਦਰ ਪੰਜਾਬ ਨੂੰ ਨਸ਼ਾ-ਮੁਕਤ ਬਣਾਉਣ ਦਾ ਵਾਅਦਾ ਕਰਦੇ ਹਾਂ। ਜਦੋਂ ਕਾਨੂੰਨ-ਵਿਵਸਥਾ ਠੀਕ ਹੋਵੇਗੀ ਤਾਂ ਉਦਯੋਗ ਵਾਪਸ ਆਉਣਗੇ, ਨਿਵੇਸ਼ ਵਧੇਗਾ ਅਤੇ ਰੁਜ਼ਗਾਰ ਮਿਲਣਗੇ। ਪੰਜਾਬ ਵਿਚ ਕੇਂਦਰ ਦੀਆਂ ‘ਸਕਿੱਲ ਇੰਡੀਆ’ ਅਤੇ ‘ਪੀ. ਐੱਮ. ਕੇ. ਵੀ. ਵਾਈ.’ ਵਰਗੀਆਂ ਯੋਜਨਾਵਾਂ ਪਹਿਲਾਂ ਹੀ ਕੰਮ ਕਰ ਰਹੀਆਂ ਹਨ, ਜਿਨ੍ਹਾਂ ਦਾ ਲਾਭ ਪੂਰੀ ਤਰ੍ਹਾਂ ਜਨਤਾ ਤਕ ਪਹੁੰਚਾਇਆ ਜਾਵੇਗਾ।
ਪ੍ਰਸ਼ਨ : ਕਿਸਾਨਾਂ ਦੇ ਮੁੱਦਿਆਂ ’ਤੇ ਅਜੇ ਵੀ ਅਸੰਤੁਸ਼ਟੀ ਹੈ, ਤੁਸੀਂ ਇਸ ਨੂੰ ਕਿਵੇਂ ਹੱਲ ਕਰੋਗੇ?
ਉੱਤਰ : ਕਿਸਾਨਾਂ ਦਾ ਦਰਦ ਸਾਡਾ ਦਰਦ ਹੈ, ਇਹ ਸਿਰਫ਼ ਨਾਅਰਾ ਨਹੀਂ, ਹਕੀਕਤ ਹੈ। ਪਰ ਮੈਂ ਇਹ ਵੀ ਪੁੱਛਣਾ ਚਾਹੁੰਦਾ ਹਾਂ ਕਿ ਕਿਸਾਨਾਂ ਦੇ ਨਾਂ ’ਤੇ ਰਾਜਨੀਤੀ ਕਰਨ ਵਾਲੀਆਂ ‘ਆਪ’ ਅਤੇ ਕਾਂਗਰਸ ਨੇ ਕੀ ਦਿੱਤਾ? ‘ਆਪ’ ਨੇ ਵਾਅਦਾ ਕੀਤਾ ਸੀ ਕਿ ਸਾਰੀਆਂ ਫ਼ਸਲਾਂ ’ਤੇ ਐੱਮ. ਐੱਸ. ਪੀ. ਦੇਵਾਂਗੇ, ਜਿਸ ਨੂੰ ਅੱਜ ਤੱਕ ਪੂਰਾ ਨਹੀਂ ਕੀਤਾ। ਕਾਂਗਰਸ ਨੇ 2013 ਵਿਚ ਡਬਲਯੂ. ਟੀ. ਓ. ਵਿਚ ਉਹ ਸਮਝੌਤਾ ਕੀਤਾ, ਜੋ ਕਿਸਾਨਾਂ ਦੀ ਐੱਮ. ਐੱਸ. ਪੀ. ਹੀ ਖ਼ਤਮ ਕਰ ਦਿੰਦਾ। 2014 ਵਿਚ ਮੋਦੀ ਸਰਕਾਰ ਨੇ ਉਸ ਸਮਝੌਤੇ ਨੂੰ ਰੱਦ ਕੀਤਾ ਅਤੇ ਕਿਸਾਨਾਂ ਦੇ ਹਿੱਤਾਂ ਦੀ ਰੱਖਿਆ ਕੀਤੀ ਸੀ।
ਅੱਜ ਮੋਦੀ ਸਰਕਾਰ ਦੇ ਰਾਜ ਵਿਚ ਕਿਸਾਨਾਂ ਲਈ ਖੇਤੀਬਾੜੀ ਬਜਟ 22,000 ਕਰੋੜ ਤੋਂ 700 ਫੀਸੀ ਵਧ ਕੇ 1 ਲੱਖ 40 ਹਜ਼ਾਰ ਕਰੋੜ ਰੁਪਏ ਹੋ ਗਿਆ ਹੈ। ਪੰਜਾਬ ਦੇ ਕਿਸਾਨਾਂ ਦੀ ਕਣਕ ਅਤੇ ਝੋਨੇ ਦੀ ਖ਼ਰੀਦ ਸਭ ਤੋਂ ਵੱਧ ਮੋਦੀ ਸਰਕਾਰ ਦੇ ਸਮੇਂ ਹੋ ਰਹੀ ਹੈ। ਐੱਮ. ਐੱਸ. ਪੀ. ਦਾ ਪੈਸਾ ਹੁਣ ਸਿੱਧਾ ਕਿਸਾਨ ਦੇ ਬੈਂਕ ਖਾਤਿਆਂ ਵਿਚ ਜਾਂਦਾ ਹੈ।
ਪ੍ਰਸ਼ਨ : ਸੂਬੇ ਦੀ ਆਰਥਿਕ ਹਾਲਤ ਨੂੰ ਸੁਧਾਰਨ ਲਈ ਤੁਹਾਡੀ ਕੀ ਯੋਜਨਾ ਹੈ?
ਉੱਤਰ : ਪੰਜਾਬ ਅੱਜ 4.7 ਲੱਖ ਕਰੋੜ ਦੇ ਕਰਜ਼ੇ ਵਿਚ ਡੁੱਬਿਆ ਹੋਇਆ ਹੈ ਅਤੇ ‘ਆਪ’ ਸਰਕਾਰ ਉਸ ਕਰਜ਼ੇ ਤੋਂ ਨਾ ਤਾਂ ਘਬਰਾ ਰਹੀ ਹੈ ਅਤੇ ਨਾ ਹੀ ਉਸ ਨੂੰ ਚੁਕਾਉਣ ਦੀ ਕੋਈ ਯੋਜਨਾ ਹੈ। ਉਲਟਾ, ਜੋ ਪੈਸਾ ਵਿਕਾਸ ਵਿਚ ਲੱਗਣਾ ਚਾਹੀਦਾ ਸੀ, ਉਹ 785 ਕਰੋੜ ਰੁਪਏ ਦੇ ਇਸ਼ਤਿਹਾਰਾਂ ਵਿਚ ਫੂਕ ਦਿੱਤਾ ਗਿਆ। ਇਹ ਪੰਜਾਬ ਦੇ ਨਾਲ ਅਪਰਾਧ ਹੈ। ਆਰਥਿਕ ਮੁੜ-ਸੁਰਜੀਤੀ ਲਈ ਸਾਡੀ ਸੋਚ ਸਾਫ਼ ਹੈ।
ਪਹਿਲਾ : ਕਾਨੂੰਨ ਵਿਵਸਥਾ। ਜਦੋਂ ਤੱਕ ਗੈਂਗਸਟਰਾਂ ਦਾ ਡਰ ਰਹੇਗਾ, ਕੋਈ ਉਦਯੋਗਪਤੀ ਪੰਜਾਬ ਵਿਚ ਨਿਵੇਸ਼ ਨਹੀਂ ਕਰੇਗਾ। ਸੁਰੱਖਿਅਤ ਮਾਹੌਲ ਬਣਦਿਆਂ ਹੀ ਉਦਯੋਗ ਖੁਦ ਵਾਪਸ ਆਉਣਗੇ।
ਦੂਜਾ : ਕੇਂਦਰ ਦੀ ਮੋਦੀ ਸਰਕਾਰ ਤੋਂ ਮਿਲ ਰਹੇ ਫੰਡਾਂ ਦੀ ਸਹੀ ਵਰਤੋਂ। ਅੱਜ ‘ਅਮਰੁਤ 2.0’ ਤਹਿਤ ਪੰਜਾਬ ਲਈ 3,600 ਕਰੋੜ ਤੋਂ ਵੱਧ ਦੇ ਪ੍ਰਾਜੈਕਟ ਪ੍ਰਵਾਨਿਤ ਹਨ ਪਰ ‘ਆਪ’ ਸਰਕਾਰ ਉਨ੍ਹਾਂ ਨੂੰ ਠੀਕ ਤਰ੍ਹਾਂ ਲਾਗੂ ਨਹੀਂ ਕਰ ਪਾ ਰਹੀ।
ਤੀਜਾ : ਖੇਤੀਬਾੜੀ, ਉਦਯੋਗ ਅਤੇ ਸੇਵਾ ਖੇਤਰ ਦਾ ਸੰਤੁਲਿਤ ਵਿਕਾਸ। ਪੰਜਾਬ ਵਿਚ ਸਿਰਫ਼ ਖੇਤੀ ’ਤੇ ਨਿਰਭਰਤਾ ਖ਼ਤਮ ਕਰਨੀ ਹੋਵੇਗੀ। ਫੂਡ ਪ੍ਰੋਸੈਸਿੰਗ ਉਦਯੋਗ, ਆਈ. ਟੀ. ਸੈਕਟਰ ਅਤੇ ਸਪੈਸ਼ਲ ਇਕਨਾਮਿਕ ਜ਼ੋਨ ਰਾਹੀਂ ਨੌਜਵਾਨਾਂ ਨੂੰ ਇੱਥੇ ਹੀ ਰੁਜ਼ਗਾਰ ਮਿਲੇਗਾ।
ਪ੍ਰਸ਼ਨ : ‘ਆਪ’ ਅਤੇ ਕਾਂਗਰਸ ਦੀਆਂ ਮੌਜੂਦਾ ਸਰਕਾਰੀ ਨੀਤੀਆਂ ਨੂੰ ਕਿਵੇਂ ਦੇਖਦੇ ਹੋ?
ਉੱਤਰ : ਆਮ ਆਦਮੀ ਪਾਰਟੀ ਨੇ ਪੰਜਾਬ ਨੂੰ ਇਕ ‘ਲੁੱਟ-ਤੰਤਰ’ ਦੀ ਪ੍ਰਯੋਗਸ਼ਾਲਾ ਬਣਾ ਦਿੱਤਾ ਹੈ ਅਤੇ ਉਹ ਪ੍ਰਯੋਗ ਪੂਰੀ ਤਰ੍ਹਾਂ ਅਸਫ਼ਲ ਹੋ ਚੁੱਕਾ ਹੈ। ਜਦੋਂ ‘ਆਪ’ ਸੱਤਾ ਵਿਚ ਆਈ ਸੀ ਤਾਂ ਕਿਹਾ ਸੀ ਕਿ ਨਵੀਂ ਰਾਜਨੀਤੀ ਹੋਵੇਗੀ, ਬਦਲਾਅ ਹੋਵੇਗਾ, ਇਮਾਨਦਾਰੀ ਹੋਵੇਗੀ। ਅੱਜ ਹਕੀਕਤ ਕੀ ਹੈ? ਪੰਜਾਬ ਦੀ ‘ਆਪ’ ਸਰਕਾਰ ਕੇਜਰੀਵਾਲ ਦੀ ਏ. ਟੀ. ਐੱਮ. ਮਸ਼ੀਨ ਬਣ ਚੁੱਕੀ ਹੈ। ਪੰਜਾਬ ਦਾ ਪੈਸਾ ਦਿੱਲੀ ਜਾ ਰਿਹਾ ਹੈ ਅਤੇ ਮੁੱਖ ਮੰਤਰੀ ਕੁਝ ਬੋਲ ਵੀ ਨਹੀਂ ਸਕਦੇ। ਕਈ ਮਾਮਲੇ ਕੋਰਟ ਵਿਚ ਹਨ। ਇਹ ‘ਆਪ’ ਦੀ ‘ਇਮਾਨਦਾਰ’ ਸਰਕਾਰ ਦਾ ਅਸਲੀ ਚਿਹਰਾ ਹੈ। ਉਸ ਦੇ 7 ਵਿਧਾਇਕਾਂ ’ਤੇ ਅਪਰਾਧਿਕ ਮਾਮਲੇ ਹਨ।
ਕਾਂਗਰਸ ਦੀ ਗੱਲ ਕਰੀਏ ਤਾਂ ਉਸ ਦਾ ਇਤਿਹਾਸ ਹੋਰ ਵੀ ਸ਼ਰਮਨਾਕ ਹੈ। 1984 ਵਿਚ ਸਿੱਖਾਂ ਦਾ ਕਤਲੇਆਮ ਕੀਤਾ ਗਿਆ, ਸਿੱਖਾਂ ਨੂੰ ਜ਼ਿੰਦਾ ਸਾੜਿਆ ਗਿਆ, ਸ੍ਰੀ ਅਕਾਲ ਤਖ਼ਤ ਸਾਹਿਬ ’ਤੇ ਟੈਂਕ ਚੜ੍ਹਾਏ ਗਏ। ਇਹ ਦਹਾਕਿਆਂ ਤੱਕ ਪੰਜਾਬ ਨੂੰ ਆਪਣੀ ਜਾਗੀਰ ਸਮਝ ਕੇ ਲੁੱਟਦੇ ਰਹੇ। ਕਿਸਾਨਾਂ ਦੇ ਖ਼ਿਲਾਫ਼ ਡਬਲਯੂ. ਟੀ. ਓ. ਵਿਚ ਸਮਝੌਤਾ ਕੀਤਾ। ਨਾ ਕਾਂਗਰਸ ਪੰਜਾਬ ਦਾ ਭਲਾ ਕਰ ਸਕਦੀ ਹੈ ਤੇ ਨਾ ਹੀ ‘ਆਪ’। ਦੋਵੇਂ ਪੰਜਾਬ ਦੀਆਂ ਜੜ੍ਹਾਂ ਖੋਖਲੀਆਂ ਕਰ ਰਹੀਆਂ ਹਨ।
ਪ੍ਰਸ਼ਨ : ਕੀ ਤੁਹਾਨੂੰ ਲੱਗਦਾ ਹੈ ਕਿ ਪੰਜਾਬ ਵਿਚ ਤੀਜੇ ਬਦਲ ਦੀ ਜਗ੍ਹਾ ਬਣ ਰਹੀ ਹੈ?
ਉੱਤਰ : ਤੀਜਾ ਬਦਲ ਨਹੀਂ, ਪਹਿਲਾ ਅਤੇ ਇਕੋ-ਇਕ ਭਰੋਸੇਯੋਗ ਬਦਲ। ਪੰਜਾਬ ਦੀ ਜਨਤਾ ਪਹਿਲਾਂ ਕਾਂਗਰਸ ਦੇ ਮਾੜੇ ਪ੍ਰਸ਼ਾਸਨ ਨੂੰ ਦੇਖ ਚੁੱਕੀ ਹੈ, ਅਕਾਲੀ ਦਲ ਦੀਆਂ ਬੇਨਿਯਮੀਆਂ ਨੂੰ ਦੇਖ ਚੁੱਕੀ ਹੈ ਅਤੇ ਹੁਣ ‘ਆਪ’ ਦਾ ਵੀ ਅਸਲੀ ਭ੍ਰਿਸ਼ਟਾਚਾਰੀ ਚਿਹਰਾ ਸਾਹਮਣੇ ਆ ਗਿਆ ਹੈ। ਬਾਕੀ ਸਭ ਫੇਲ ਹੋ ਚੁੱਕੇ ਹਨ। ਅਜਿਹੇ ਵਿਚ ਭਾਜਪਾ ਹੀ ਉਹ ਬਦਲ ਹੈ, ਜੋ ਨਾ ਸਿਰਫ਼ ਪੰਜਾਬ ਦੀ ਸੁਰੱਖਿਆ ਅਤੇ ਵਿਕਾਸ ਦੀ ਗੱਲ ਕਰਦੀ ਹੈ, ਸਗੋਂ ਉਸ ਨੂੰ ਕਰਕੇ ਵੀ ਦਿਖਾਉਂਦੀ ਹੈ। ਅਸੀਂ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀਆਂ ਡਬਲ ਇੰਜਣ ਸਰਕਾਰਾਂ ਰਾਹੀਂ ਉੱਤਰ ਪ੍ਰਦੇਸ਼ ਵਿਚ ਮਾਫੀਆ ਰਾਜ ਖ਼ਤਮ ਕੀਤਾ, ਛੱਤੀਸਗੜ੍ਹ ਦੇ ਜੰਗਲਾਂ ਵਿਚੋਂ ਨਕਸਲਵਾਦ ਦਾ ਜੜ੍ਹੋਂ ਨਾਸ਼ ਕੀਤਾ। ਸਾਡੇ ਹਰ ਭਾਜਪਾ ਸ਼ਾਸਿਤ ਰਾਜ ਵਿਚ ਵਿਕਾਸ ਦੇ ਨਵੇਂ ਆਯਾਮ ਸਿਰਜੇ ਜਾ ਰਹੇ ਹਨ।
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
For Whatsapp:- https://whatsapp.com/channel/0029Va94hsaHAdNVur4L170e
ਪਾਵਰਕਾਮ ਦੇ ਮੁਲਾਜ਼ਮਾਂ ਲਈ ਵੱਡੇ ਖ਼ਤਰੇ ਦੀ ਘੰਟੀ! ਡਿਊਟੀ ਕਰਦਿਆਂ ਕਿਸੇ ਵੀ ਵੇਲੇ ਹੋ ਸਕਦੈ...
NEXT STORY 
