ਜਲੰਧਰ (ਰਮਨਦੀਪ ਸਿੰਘ ਸੋਢੀ)- ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਰਾਜਾ ਵੜਿੰਗ ਮੰਨਦੇ ਨੇ ਕਿ 2027 ਵਿਚ ਲੋਕ ਤਖ਼ਤਾ ਪਲਟਣ ਦੀ ਤਿਆਰੀ ਕਰੀ ਬੈਠੇ ਹਨ ਤੇ ਯਕੀਨਨ ਕਾਂਗਰਸ ਦੀ ਸਰਕਾਰ ਬਣਨ ਜਾ ਰਹੀ ਹੈ। ਉਨ੍ਹਾਂ ਮੁਤਾਬਕ ਅਕਾਲੀ ਦਲ ਤੇ ਭਾਜਪਾ ਦੀ ਤਕਰਾਰ ਪੱਕੀ ਹੋ ਗਈ ਹੈ ਤੇ ਭਾਜਪਾ ਨੇ ਅਸਿੱਧੇ ਤਰੀਕੇ ‘ਆਪ’ ਨਾਲ ਸਮਝੌਤਾ ਕਰ ਲਿਆ ਹੈ। ਪੰਜਾਬ ਦੀ ਕਾਨੂੰਨ-ਵਿਵਸਥਾ, ਕਰਜ਼ੇ ਤੇ ਹੋਰ ਵਿਸ਼ਿਆਂ ’ਤੇ ਉਨ੍ਹਾਂ ਵਿਸਥਾਰ ਨਾਲ ਗੱਲਬਾਤ ਕੀਤੀ। ਪੇਸ਼ ਹਨ ਮੁੱਖ ਅੰਸ਼-
• ਪੰਜਾਬ ਦੇ ਮੌਜੂਦਾ ਹਾਲਾਤ ਨੂੰ ਕਿਵੇਂ ਵੇਖਦੇ ਹੋ?
ਪੰਜਾਬ ਅੱਜ ਵੱਡੇ ਆਰਥਿਕ ਸੰਕਟ ਵਿਚ ਜਾ ਰਿਹਾ ਹੈ, ਜਿਸ ਲਈ ਸਾਰੀਆਂ ਸਿਆਸੀ ਜ਼ਮਾਤਾਂ ਹੀ ਜ਼ਿੰਮੇਵਾਰ ਹਨ ਪਰ ਪਿਛਲੇ 5 ਸਾਲਾਂ ਦਰਮਿਆਨ ਜੋ ਕੁਝ ਹੋਇਆ, ਉਹ ਉਮੀਦ ਤੋਂ ਪਰ੍ਹੇ ਹੈ। ਪੰਜਾਬ ਕਾਫ਼ੀ ਦੇਰ ਤੋਂ ਕਰਜ਼ੇ ਥੱਲੇ ਹੈ ਤੇ ਇਹ ਕਰਜ਼ਾ ਲਗਾਤਾਰ ਵਧਦਾ ਜਾ ਰਿਹਾ ਹੈ। ਆਮ ਆਦਮੀ ਪਾਰਟੀ ਨੇ ਬਿਨਾਂ ਲੋੜ ਤੋਂ ਕੁਝ ਸਕੀਮਾਂ ਸ਼ੁਰੂ ਕੀਤੀਆਂ, ਜਿਸ ਨਾਲ ਸਥਿਤੀ ਹੋਰ ਵਿਗੜਦੀ ਗਈ। ਸਰਕਾਰ ਨੇ ਆਮਦਨ ਨਾ ਵਧਾ ਕੇ ਕਰਜ਼ਾ ਵਧਾ ਲਿਆ ਹੈ। ਜਿਸ ਘਰ ਦੀ ਕਮਾਈ ਤੋਂ ਵੱਧ ਵਿਆਜ ਹੋ ਜਾਵੇ, ਉਸ ਦਾ ਡੁੱਬਣਾ ਤੈਅ ਹੈ। ਭਗਵੰਤ ਮਾਨ ਤੋਂ ਨਾ ਕੋਈ ਮੈਡੀਕਲ ਕਾਲਜ, ਨਾ ਕੋਈ ਨਵਾਂ ਸਕੂਲ ਅਤੇ ਨਾ ਹੀ ਕੋਈ ਨਵਾਂ ਹਸਪਤਾਲ ਬਣਿਆ। ਜੇ ਸਾਡੇ ਰਾਜ ਵਿਚ 5 ਸਾਲਾਂ ਦੌਰਾਨ 75 ਹਜ਼ਾਰ ਕਰੋੜ ਰੁਪਏ ਕਰਜ਼ਾ ਚੜ੍ਹਿਆ ਤਾਂ ਉਸ ਨਾਲ ਲੋਕਾਂ ਲਈ ਸਕੂਲ-ਕਾਲਜ, ਹਸਪਤਾਲ ਤੇ ਹੋਰ ਚੀਜ਼ਾਂ ਵੀ ਬਣਾਈਆਂ ਗਈਆਂ। ਅਸੀਂ 15 ਹਜ਼ਾਰ ਕਰੋੜ ਰੁਪਏ ਸਾਲਾਨਾ ਕਰਜ਼ਾ ਲੈਂਦੇ ਸੀ ਪਰ ਇਹ 33 ਹਜ਼ਾਰ ਕਰੋੜ ਰੁਪਏ ਲੈ ਰਹੇ ਹਨ ਪਰ ਇਨਫ੍ਰਾਸਟ੍ਰਕਚਰ ਨਹੀਂ ਬਣਾਇਆ। ਅੱਜ ਕਾਨੂੰਨ-ਵਿਵਸਥਾ ਦਾ ਇੰਨਾ ਮਾੜਾ ਹਾਲ ਹੋ ਗਿਆ ਕਿ ਰੋਜ਼ ਕਤਲ ਹੋ ਰਹੇ ਹਨ ਪਰ ਅਫਸੋਸ ਕਿ ਸਰਕਾਰ ਸਿਰਫ ਝੂਠੇ ਪ੍ਰਚਾਰ ਵਿਚ ਲੱਗੀ ਹੋਈ ਹੈ।
• ਤੁਸੀਂ ਮੁੱਖ ਮੰਤਰੀ ਹੁੰਦੇ ਤਾਂ ਪੰਜਾਬ ਨੂੰ ਕਰਜ਼ੇ ਤੋਂ ਕਿਵੇਂ ਬਚਾਉਂਦੇ?
ਸਰਕਾਰੀ ਪੈਸੇ ਦੀ ਬਰਬਾਦੀ ਰੋਕਣ ਦੀ ਲੋੜ ਹੈ। ਮੁਫ਼ਤ ਸਬਸਿਡੀਆਂ ਨਾਲੋਂ ਜ਼ਰੂਰੀ ਹੈ ਸਹੀ ਨੀਤੀ। ਉਦਾਹਰਣ ਵਜੋਂ, ਜੇਕਰ ਕਿਸਾਨਾਂ ਨੂੰ ਮੁਫ਼ਤ ਬਿਜਲੀ ਦੀ ਬਜਾਏ 24 ਘੰਟੇ ਸਸਤੀ ਬਿਜਲੀ ਦਿੱਤੀ ਜਾਂਦੀ, ਤਾਂ ਨਾ ਤਾਂ ਬਿਜਲੀ ਵਿਭਾਗ ’ਤੇ ਵਾਧੂ ਬੋਝ ਪੈਂਦਾ ਤੇ ਨਾ ਹੀ ਕਿਸਾਨਾਂ ਨੂੰ ਪਾਣੀ ਪੂਰਾ ਕਰਨ ਲਈ ਵਾਧੂ ਮੋਟਰਾਂ ਲਾਉਣ ਲਈ ਕਰਜ਼ਾ ਚੁੱਕਣਾ ਪੈਂਦਾ। ਇਸ ਨਾਲ ਨਾ ਸਿਰਫ਼ ਅੱਜ ਸਾਡਾ 25-26 ਹਜ਼ਾਰ ਕਰੋੜ ਰੁਪਏ ਸਬਸਿਡੀ ਦਾ ਬਚ ਜਾਂਦਾ, ਸਗੋਂ ਉਸ ਤੋਂ ਮਾਲੀਆ ਵੀ ਆਉਂਦਾ ਤੇ ਸਾਡਾ ਪਾਣੀ ਵੀ ਬਚਦਾ। ਇਸ ਤੋਂ ਇਲਾਵਾ ਸਿਆਸੀ ਮੁਫ਼ਾਦਾਂ ਲਈ ਬਣਾਏ ਗਏ ਵਾਧੂ ਜ਼ਿਲੇ, ਵਾਧੂ ਮਾਰਕੀਟ ਕਮੇਟੀਆਂ, ਕਈ ਬੇਲੋੜੀਆਂ ਇਮਾਰਤਾਂ ’ਤੇ ਸਿਰਫ ਸਰਕਾਰੀ ਪੈਸੇ ਨੂੰ ਬਰਬਾਦ ਕੀਤਾ ਗਿਆ। ਇਸੇ ਤਰ੍ਹਾਂ ਆਮ ਆਦਮੀ ਕਲੀਨਿਕ ਬਣਾਉਣ ਦੀ ਬਜਾਏ ਮੌਜੂਦਾ ਹਸਪਤਾਲਾਂ ਨੂੰ ਮਲਟੀਸਪੈਸ਼ਲਿਟੀ ਹਸਪਤਾਲ ਬਣਾਇਆ ਜਾ ਸਕਦਾ ਸੀ। ਪੰਜਾਬ ਨੂੰ ਬਚਾਉਣ ਲਈ ਕੁਝ ਕੌੜੇ ਘੁੱਟ ਭਰਨ ਦੀ ਲੋੜ ਹੈ, ਨਹੀਂ ਤਾਂ ਪੰਜਾਬ ਡੁੱਬ ਜਾਵੇਗਾ। ਸਰਕਾਰਾਂ ਨੂੰ ਗਰੀਬਾਂ ਦੀ ਭਲਾਈ ਜ਼ਰੂਰ ਕਰਨੀ ਚਾਹੀਦੀ ਹੈ ਪਰ ਇਨ੍ਹਾਂ ਸਕੀਮਾਂ ਦੇ ਨਾਂ ’ਤੇ ਹੋਣ ਵਾਲੀ ਪੈਸੇ ਦੀ ਬਰਬਾਦੀ ਨੂੰ ਰੋਕਿਆ ਜਾਣਾ ਬਹੁਤ ਜ਼ਰੂਰੀ ਹੈ। ਆਮ ਆਦਮੀ ਪਾਰਟੀ ਦੀ ਮੁਕਤਸਰ ਰੈਲੀ ਵਿਚ ਤਕਰੀਬਨ ਢਾਈ ਕਰੋੜ ਰੁਪਏ ਸਰਕਾਰੀ ਖਜ਼ਾਨੇ ਵਿਚੋਂ ਵਰਤੇ ਗਏ, ਜਦਕਿ ਇਹ ਸਿਆਸੀ ਰੈਲੀ ਸੀ ਤੇ ਇਸ ਦਾ ਖਰਚਾ ਪਾਰਟੀ ਵੱਲੋਂ ਹੀ ਚੁੱਕਿਆ ਜਾਣਾ ਚਾਹੀਦਾ ਸੀ।
• ਭਾਜਪਾ ਦੀ ਪੰਜਾਬ ਰੈਲੀ ਬਾਰੇ ਕੀ ਕਹੋਗੇ?
ਇਸ ਰੈਲੀ ਦੌਰਾਨ ਉਨ੍ਹਾਂ ਨੇ ਪੰਜਾਬ ਵਿਚ ਇਕੱਲੇ ਚੋਣ ਲੜਨ ਦਾ ਐਲਾਨ ਕੀਤਾ ਪਰ ਇਸ ਬਾਰੇ ਅਜੇ ਤਕ ਸੁਖਬੀਰ ਬਾਦਲ ਦੀ ਕੋਈ ਸਪੱਸ਼ਟ ਟਿੱਪਣੀ ਨਹੀਂ ਆਈ। ਉਹ ਚਾਹੁੰਦੇ ਸਨ ਕਿ ਕਿਸੇ ਤਰ੍ਹਾਂ ਭਾਜਪਾ ਨਾਲ ਗੱਠਜੋੜ ਹੋ ਜਾਵੇ। ਸੁਨੀਲ ਜਾਖੜ ਵੀ ਚਾਹੁੰਦੇ ਸਨ ਕਿ ਅਕਾਲੀ ਦਲ ਨਾਲ ਗੱਠਜੋੜ ਹੋ ਜਾਵੇ ਪਰ ਹੁਣ ਉਹ ਇਸ ਬਾਰੇ ਖੁੱਲ੍ਹ ਕੇ ਨਹੀਂ ਬੋਲਦੇ। ਇਹ ਵੀ ਕਿਆਸਅਰਾਈਆਂ ਹਨ ਕਿ ਅੰਦਰਖਾਤੇ ਭਾਜਪਾ ਤੇ ਆਮ ਆਦਮੀ ਪਾਰਟੀ ਦਾ ਸਮਝੌਤਾ ਹੋ ਗਿਆ ਹੈ ਕਿ ਗੁਜਰਾਤ ਵਿਚ ‘ਆਪ’ ਭਾਜਪਾ ਨੂੰ ਜਿਤਾ ਦੇਵੇ ਤੇ ਪੰਜਾਬ ਵਿਚ ਭਾਰਤੀ ਜਨਤਾ ਪਾਰਟੀ ਇਕੱਲਿਆਂ ਚੋਣ ਲੜ ਕੇ ਆਮ ਆਦਮੀ ਪਾਰਟੀ ਦੀ ਕਾਂਗਰਸ ਨੂੰ ਰੋਕਣ ਵਿਚ ਮਦਦ ਕਰੇਗੀ। ਕੇਜਰੀਵਾਲ ਵੱਲੋਂ ਕੇਸ ਖ਼ਤਮ ਹੋਣ ਮਗਰੋਂ ਸਿਰਫ ਗਾਂਧੀ ਪਰਿਵਾਰ ਖ਼ਿਲਾਫ਼ ਕੀਤੀ ਜਾ ਰਹੀ ਬਿਆਨਬਾਜ਼ੀ ਤੋਂ ਵੀ ਅਜਿਹੇ ਹੀ ਸੰਕੇਤ ਮਿਲਦੇ ਹਨ।
• ਰਾਹੁਲ ਗਾਂਧੀ ਵੱਲੋਂ ‘ਟੀਮ ਪਲੇਅਰ’ ਬਣਨ ਦੀ ਨਸੀਹਤ ਨੇ ਕਾਂਗਰਸ ਦੇ ਕਾਟੋ-ਕਲੇਸ਼ ’ਤੇ ਮੋਹਰ ਨਹੀਂ ਲਾਈ?
ਕਾਂਗਰਸ ਪਾਰਟੀ ਵਿਚ ਕੋਈ ਕਲੇਸ਼ ਨਹੀਂ ਹੈ। ਹਾਂ, ਹਰ ਪਰਿਵਾਰ ਤੇ ਪਾਰਟੀ ਵਿਚ ਵਖਰੇਵੇਂ ਜ਼ਰੂਰ ਹੁੰਦੇ ਹਨ। ਰਾਹੁਲ ਗਾਂਧੀ ਵੱਲੋਂ ਸਾਰਿਆਂ ਨੂੰ ਇਕੱਠੇ ਹੋ ਕੇ ਪੰਜਾਬ ਦੀ ਲੜਾਈ ਲੜਨ ਦੀ ਗੱਲ ਆਖੀ ਗਈ ਹੈ, ਜੋ ਬਹੁਤ ਚੰਗਾ ਹੈ ਤੇ ਸਾਰਿਆਂ ਨੇ ਹੀ ਉਸ ਗੱਲ ਦਾ ਸਵਾਗਤ ਵੀ ਕੀਤਾ ਹੈ। ਉਨ੍ਹਾਂ ਆਖਿਆ ਹੈ ਕਿ ਜੇ ਅਸੀਂ ਇਕ ਟੀਮ ਵਾਂਗ ਲੜਾਂਗੇ ਤਾਂ ਜ਼ਰੂਰ ਜਿੱਤਾਂਗੇ ਤੇ ਪੰਜਾਬ ਦੇ ਲੋਕਾਂ ਦੀ ਭਲਾਈ ਕਰ ਸਕਾਂਗੇ।
• ਸੁਖਪਾਲ ਖਹਿਰਾ ਦੇ ਬਿਆਨ ਅਤੇ ਵਿਧਾਨ ਸਭਾ ਵਿਵਾਦ ਬਾਰੇ ਕੀ ਕਹੋਗੇ?
ਮੈਂ ਇਸ ਬਿਆਨ ਬਾਰੇ ਕੁਝ ਨਹੀਂ ਕਹਿਣਾ ਚਾਹੁੰਦਾ। ਆਮ ਆਦਮੀ ਪਾਰਟੀ ਵੱਲੋਂ ਬੇਵਜ੍ਹਾ ਕੋਈ ਮੁੱਦਾ ਬਣਾ ਲਿਆ ਜਾਂਦਾ ਹੈ, ਤਾਂ ਜੋ ਅਸਲ ਮੁੱਦੇ ’ਤੇ ਗੱਲਬਾਤ ਨਾ ਹੋ ਸਕੇ। ਜਿਸ ਤਰ੍ਹਾਂ ਵਿਧਾਨ ਸਭਾ ਚੱਲਣੀ ਚਾਹੀਦੀ ਸੀ, ਉਸ ਤਰ੍ਹਾਂ ਨਹੀਂ ਚੱਲੀ। ਉਨ੍ਹਾਂ ਨੇ ਬੇਵਜ੍ਹਾ ਮੁੱਦਾ ਖੜ੍ਹਾ ਕਰ ਕੇ ਬਜਟ ਸੈਸ਼ਨ ਦੇ 5 ਦਿਨ ਲੰਘਾ ਲਏ। ਸਾਨੂੰ ਪੰਜਾਬ ਦੀ ਗੱਲ ਕਰਨ ਦਾ ਮੌਕਾ ਹੀ ਨਹੀਂ ਦਿੱਤਾ ਗਿਆ। ਸਰਕਾਰ ਸਾਡੇ ਬਿਆਨਾਂ ਨੂੰ ਤੋੜ-ਮਰੋੜ ਕੇ ਲੋਕਾਂ ਦੇ ਮਨਾਂ ’ਤੇ ਗਲਤ ਪ੍ਰਭਾਵ ਪਾਉਣ ਦੀ ਕੋਸ਼ਿਸ਼ ਕਰਦੀ ਹੈ, ਇਸ ਲਈ ਸਾਨੂੰ ਸੋਚ-ਸਮਝ ਕੇ ਹੀ ਬਿਆਨਬਾਜ਼ੀ ਕਰਨੀ ਚਾਹੀਦੀ ਹੈ ਤਾਂ ਜੋ ਉਨ੍ਹਾਂ ਨੂੰ ਕੋਈ ਮੌਕਾ ਨਾ ਮਿਲੇ। ਇਹ ਬਹੁਤ ਹੇਠਲੇ ਪੱਧਰ ਦੀ ਸਿਆਸਤ ਹੈ। ਜਿਵੇਂ ਮਹਿਲਾ ਵਿਧਾਇਕਾਂ ਵੱਲੋਂ ਸਾਡੇ ਵਿਧਾਇਕ ਨੂੰ ਧੱਕੇ ਮਾਰੇ ਜਾ ਰਹੇ ਹਨ ਜਾਂ ਵਿੱਤ ਮੰਤਰੀ ਵੱਲੋਂ ਵਿਧਾਨ ਸਭਾ ਦੇ ਅੰਦਰ ਬਦਮਾਸ਼ੀ ਕੀਤੀ ਜਾ ਰਹੀ ਹੈ, ਉਹ ਬਹੁਤ ਗਲਤ ਹੈ।
• ਮੁੱਖ ਮੰਤਰੀ ਤੁਹਾਡੇ ਪਹਾੜੇ ਵਾਲੇ ਬਿਆਨ ਦਾ ਮਜ਼ਾਕ ਉਡਾਉਂਦੇ ਹਨ, ਕੀ ਕਹੋਗੇ?
ਭਗਵੰਤ ਮਾਨ ਕਦੋਂ ਕੀ ਕਹਿ ਦੇਣ, ਇਸ ਬਾਰੇ ਰੱਬ ਨੂੰ ਵੀ ਨਹੀਂ ਪਤਾ ਹੁੰਦਾ। ਮੇਰਾ 12x5=48 ਜਾਂ 60 ਹੋਣਾ ਕੋਈ ਮਾਅਨੇ ਨਹੀਂ ਰੱਖਦਾ ਪਰ ਭਗਵੰਤ ਮਾਨ ਦਾ ਪ੍ਰਦਰਸ਼ਨ ਪੰਜਾਬ ਲਈ 100 ਫ਼ੀਸਦੀ ਜ਼ੀਰੋ ਹੈ। ਤੁਸੀਂ ਮੁੱਖ ਮੰਤਰੀ ਹੋਣ ਦੇ ਨਾਤੇ ਪੰਜਾਬ ਲਈ ਕੁਝ ਵੀ ਨਹੀਂ ਕੀਤਾ। ਇਹ ਲੋਕ ਸਭਾ ਚੋਣਾਂ ਵਿਚ 13-0 ਦੇ ਦਾਅਵੇ ਕਰਦੇ ਸੀ ਪਰ ਤਿੰਨ ਸੀਟਾਂ ਹੀ ਜਿੱਤ ਸਕੇ। ਮੈਂ ਸਿਰਫ ਇੰਨਾ ਆਖ ਰਿਹਾ ਹਾਂ ਕਿ ਜੇ ਸਾਡੀ ਸਰਕਾਰ ਆਉਂਦੀ ਹੈ ਤਾਂ ਮੈਂ ਮੁੱਖ ਮੰਤਰੀ ਜਾਂ ਮੰਤਰੀ ਬਣਨ ਦਾ ਦਾਅਵੇਦਾਰ ਨਹੀਂ ਹਾਂ, ਇਹ ਫ਼ੈਸਲਾ ਹਾਈ ਕਮਾਨ ਦੇ ਹੁੰਦਾ ਹੈ। ਇਸ ਗੱਲ ’ਤੇ ਇਨ੍ਹਾਂ ਨੂੰ ਕੀ ਇਤਰਾਜ਼ ਹੈ। ਭਗਵੰਤ ਮਾਨ ਨੂੰ ਗਲਤਫ਼ਹਿਮੀ ਹੈ ਕਿ ਉਹ ਪੱਕੇ ਤੌਰ ’ਤੇ ਮੁੱਖ ਮੰਤਰੀ ਬਣ ਗਿਆ ਹੈ, ਥੋੜ੍ਹਾ ਸਮਾਂ ਰਹਿ ਗਿਆ ਜਨਤਾ ਪਲਟਾ ਮਾਰਨ ਨੂੰ ਤਿਆਰ ਹੈ।
• ਤੁਹਾਡੇ ਬਾਰੇ ਧਾਰਨਾ ਹੈ ਕਿ ਤੁਸੀਂ ਮੁੱਖ ਮੰਤਰੀ ਕੋਲੋਂ ਡਰਦੇ ਹੋ?
ਨਾ ਮੈਂ ਪਹਿਲਾਂ ਸੁਖਬੀਰ ਬਾਦਲ ਜਾਂ ਬਿਕਰਮ ਮਜੀਠੀਆ ਤੋਂ ਡਰਦਾ ਸੀ ਤੇ ਨਾ ਅੱਜ ਭਗਵੰਤ ਮਾਨ ਜਾਂ ਕਿਸੇ ਹੋਰ ਤੋਂ ਡਰਦਾ ਹਾਂ। ਮੁੱਖ ਮੰਤਰੀ ਭਗਵੰਤ ਮਾਨ ਕਾਂਗਰਸ ਸਰਕਾਰ ਵੇਲੇ ਬੱਸਾਂ ਦੀਆਂ ਬਾਡੀਆਂ ਰਾਜਸਥਾਨ ਤੋਂ ਬਣਵਾਏ ਜਾਣ ਦੀ ਗੱਲ ਕਰਦੇ ਸੀ ਤੇ ਕਹਿੰਦੇ ਸੀ ਕਿ ਘਪਲਾ ਹੋਇਆ ਹੈ ਪਰ ਬੱਸਾਂ ਦੀਆਂ ਬਾਡੀਆਂ ਤਾਂ ਅੱਜ ਵੀ ਰਾਜਸਥਾਨ ਤੋਂ ਹੀ ਬਣ ਰਹੀਆਂ ਹਨ। ਦਰਅਸਲ ਹਰ ਮਸਲੇ ਦਾ ਜਵਾਬ ਉਸੇ ਵੇਲੇ ਨਹੀਂ ਦਿੱਤਾ ਜਾ ਸਕਦਾ, ਕੁਝ ਗੱਲਾਂ ਸਮਾਂ ਆਉਣ ’ਤੇ ਆਪੇ ਹੀ ਸਪੱਸ਼ਟ ਹੋ ਜਾਂਦੀਆਂ ਹਨ। ਨਿਯਮਾਂ ਮੁਤਾਬਕ ਇਨ੍ਹਾਂ ਬੱਸਾਂ ਦੀਆਂ ਬਾਡੀਆਂ ਲਈ ਇਕ ਲਾਇਸੈਂਸ ਦੀ ਲੋੜ ਹੁੰਦੀ ਹੈ, ਜੋ ਇੱਥੇ ਕਿਸੇ ਕੋਲ ਨਹੀਂ ਹੈ। ਮੈਂ ਅੱਜ ਵੀ ਕਹਿੰਦਾ ਹਾਂ ਕਿ ਮੈਨੂੰ ਕਿਸੇ ਦਾ ਕੋਈ ਡਰ ਨਹੀਂ ਹੈ ਪਰ ਪੰਜਾਬ ਦੇ ਮਾੜੇ ਹਾਲਾਤ ਦਾ ਫਿਕਰ ਬਹੁਤ ਹੈ।
• ਅੰਮ੍ਰਿਤਾ ਵੜਿੰਗ ਮੁਕਤਸਰ ਤੇ ਰਾਜਾ ਵੜਿੰਗ ਗਿੱਦੜਬਾਹੇ ਤੋਂ ਚੋਣ ਲੜਨਗੇ?
ਗਿੱਦੜਬਾਹਾ ਮੇਰੀ ਕਰਮ ਭੂਮੀ ਹੈ ਤੇ ਮੈਂ ਉੱਥੋਂ ਚੋਣ ਲੜਨੀ ਚਾਹੁੰਦਾ ਹਾਂ ਪਰ ਅੰਤਿਮ ਫ਼ੈਸਲਾ ਹਾਈ ਕਮਾਨ ਦਾ ਹੁੰਦਾ ਹੈ। ਸਾਡੇ ਸ਼ੁੱਭਚਿੰਤਕ ਸਾਡੇ ਬਾਰੇ ਬਹੁਤ ਸਾਰੀਆਂ ਚਰਚਾਵਾਂ ਕਰਦੇ ਹਨ। ਰਹੀ ਗੱਲ ਮੇਰੀ ਜਾਂ ਪਤਨੀ ਦੀ ਤਾਂ ਸਿਆਸਤ ਵਿਚ ਇੱਛਾ ਰੱਖਣੀ ਕੋਈ ਗੁਨਾਹ ਤਾਂ ਹੈ ਨਹੀਂ, ਇੱਛਾ ਹੈ ਪਰ ਆਖ਼ਰੀ ਫ਼ੈਸਲਾ ਹਾਈ ਕਮਾਨ ਦੀ ਮਰਜ਼ੀ ਅਨੁਸਾਰ ਹੋਵੇਗਾ। ਇਸ ਉਪਰੰਤ ਜਦੋਂ ਉਨ੍ਹਾਂ ਕੋਲੋਂ ਲੁਧਿਆਣਾ ਦੇ ਭਵਿੱਖ ਬਾਰੇ ਪੁੱਛਿਆ ਗਿਆ ਤਾਂ ਹੱਸਦੇ ਹੋਏ ਜਵਾਬ ਸੀ ਕਿ ਲੁਧਿਆਣਾ ਤੇ ਗਿੱਦੜਬਾਹਾ ਨਾਲੋ-ਨਾਲ ਚਲਦੇ ਰਹਿਣਗੇ।
ਸੁਖਬੀਰ ਤੇ ਮਜੀਠੀਆ ਨੂੰ ਸੀਰੀਅਸ ਪਾਲਿਟਿਕਸ ਕਰਨ ਦੀ ਲੋੜ
ਅਸੀਂ ਤਾਂ ਚਾਹੁੰਦੇ ਹਾਂ ਕਿ ਅਕਾਲੀ ਦਲ ਮੁੜ ਖੜ੍ਹਾ ਹੋਵੇ, ਜੋ ਇਸ ਵੇਲੇ ਬਿਲਕੁਲ ਹੀ ਡਿੱਗਿਆ ਪਿਆ ਹੈ। ਅਕਾਲੀ ਦਲ ਦਾ ਥੋੜ੍ਹਾ ਉੱਠਣਾ ਫ਼ਾਇਦੇਮੰਦ ਹੈ ਪਰ ਸੁਖਬੀਰ ਬਾਦਲ ਤੇ ਬਿਕਰਮ ਮਜੀਠੀਆ 10 ਸਾਲ ਪਹਿਲਾਂ ਵਾਲਾ ਅੰਦਾਜ਼ ਹੀ ਦਿਖਾ ਰਹੇ ਹਨ। ਉਹ ਭਗਵੰਤ ਮਾਨ ਵਾਂਗ ਮਜ਼ਾਕੀਆ ਲਹਿਜਾ ਅਪਣਾਉਣ ਦੀ ਕੋਸ਼ਿਸ਼ ਕਰ ਰਹੇ ਹਨ। ਜਿਸ ਤਰ੍ਹਾਂ ਮਜੀਠੀਆ ਵੱਲੋਂ ਮੁੱਛਾਂ ਨੂੰ ਵੱਟ ਦਿੱਤੇ ਜਾ ਰਹੇ ਹਨ ਜਾਂ ਮੇਰੇ ਬਾਰੇ ਜੋ ਕੁਝ ਆਖਿਆ ਜਾ ਰਿਹਾ ਹੈ, ਇਨ੍ਹਾਂ ਚੀਜ਼ਾਂ ਨੂੰ ਲੋਕ ਪਸੰਦ ਨਹੀਂ ਕਰਦੇ। ਮੇਰਾ ਮੰਨਣਾ ਕਿ ਮਜੀਠੀਆ ਨੂੰ ਕਾਮੇਡੀ ਛੱਡ ਕੇ ਸੀਰੀਅਸ ਰਾਜਨੀਤੀ ਕਰਨੀ ਚਾਹੀਦੀ ਹੈ। ਇਸ ਸਭ ਨਾਲ ਫ਼ਾਇਦੇ ਦੀ ਜਗ੍ਹਾ ਹੋਰ ਜ਼ਿਆਦਾ ਨੁਕਸਾਨ ਹੋਵੇਗਾ। ਸੁਖਬੀਰ ‘ਸੀਪ ਦੇ 10 ਲੱਖ’ ਦੇਣ ਦੀ ਬਜਾਏ ਲੋਕਾਂ ਨੂੰ ਵਿਜ਼ਨ ਕਿਉਂ ਨਹੀਂ ਦੇ ਰਹੇ ?
ਹੈਦਰਾਬਾਦ ’ਚ ਗੁਰਦੁਆਰਾ ਸਾਹਿਬ ਦੀ ਜਗ੍ਹਾ ’ਤੇ ਜਬਰੀ ਕਬਜ਼ੇ ਦਾ ਸ਼੍ਰੋਮਣੀ ਕਮੇਟੀ ਨੇ ਲਿਆ ਨੋਟਿਸ
NEXT STORY 
