ਅੰਮ੍ਰਿਤਸਰ, (ਵੜੈਚ)- ਦੇਸ਼ ਦੇ ਵੱਖ-ਵੱਖ ਸ਼ਹਿਰਾਂ ਤੋਂ ਬਾਅਦ ਗੁਰੂ ਨਗਰੀ ਅੰਮ੍ਰਿਤਸਰ 'ਚ ਵੀ 2 ਦਿਨਾਂ ਵਿਚ ਵਾਲ ਕੱਟੇ ਜਾਣ ਦੀਆਂ 3 ਘਟਨਾਵਾਂ ਤੋਂ ਬਾਅਦ ਸ਼ਹਿਰਵਾਸੀਆਂ ਵਿਚ ਡਰ ਦਾ ਮਾਹੌਲ ਬਣ ਗਿਆ ਹੈ। ਝਬਾਲ ਰੋਡ ਸਥਿਤ ਸਤਨਾਮ ਨਗਰ ਕਾਲੋਨੀ ਵਿਖੇ 18 ਸਾਲਾ ਸਿਮਰਨਜੀਤ ਕੌਰ ਦੇ ਵਾਲ ਕੱਟੇ ਜਾਣ ਤੋਂ ਬਾਅਦ ਮਜੀਠਾ ਰੋਡ ਦੇ ਵਾਰਡ-14 ਦੇ ਇਲਾਕੇ ਕਰੀਬ ਨਗਰ ਅਤੇ ਤੁੰਗਬਾਲਾ ਵਿਖੇ ਵੀ ਨਵੀਂ ਵਿਆਹੁਤਾ ਤੇ ਇਕ ਨਾਬਾਲਗਾ ਦੇ ਵਾਲ ਕੱਟੇ ਜਾਣ ਕਾਰਨ ਲੋਕਾਂ ਵਿਚ ਭਾਰੀ ਖੌਫ ਪਾਇਆ ਜਾ ਰਿਹਾ ਹੈ।
ਕਬੀਰ ਨਗਰ ਨਿਵਾਸੀ ਨਵੀਂ ਵਿਆਹੀ 19 ਸਾਲਾ ਕੋਮਲ ਦੇ ਸ਼ੁੱਕਰਵਾਰ ਦਿਨ-ਦਿਹਾੜੇ ਵਾਲ ਕੱਟੇ ਜਾਣ ਕਰ ਕੇ ਉਹ ਸਦਮੇ ਵਿਚ ਹੈ। ਕੋਮਲ ਦੇ ਪਤੀ ਅਜੇ ਕੁਮਾਰ ਨੇ ਦੱਸਿਆ ਕਿ ਉਹ ਅਤੇ ਉਸ ਦੀ ਪਤਨੀ ਦੁਪਹਿਰ ਨੂੰ ਕਮਰੇ 'ਚ ਸੁੱਤੇ ਪਏ ਸਨ, ਕੋਮਲ ਨੂੰ ਅਚਾਨਕ ਸਿਰ ਵਿਚ ਕੋਈ ਚੀਜ਼ ਚੱਲਦੀ ਮਹਿਸੂਸ ਹੋਈ, ਜਿਸ ਕਰ ਕੇ ਉਹ ਉਠ ਗਈ। ਬਾਥਰੂਮ ਜਾਣ ਦੌਰਾਨ ਉਸ ਨੇ ਖੁੱਲ੍ਹੇ ਵਾਲ ਬੰਨ੍ਹਣ ਲਈ ਜਿਵੇਂ ਹੀ ਵਾਲਾਂ ਨੂੰ ਹੱਥ ਪਾਇਆ ਤਾਂ ਵਾਲਾਂ ਦਾ ਵੱਡਾ ਗੁੱਛਾ ਹੱਥ ਵਿਚ ਆਉਣ ਨਾਲ ਉਹ ਹੱਕੀ-ਬੱਕੀ ਰਹਿ ਗਈ। ਘਟਨਾ ਦਾ ਪਤਾ ਲੱਗਦਿਆਂ ਹੀ ਏ. ਐੱਸ. ਆਈ. ਨਿਰਮਲ ਸਿੰਘ ਮਹਿਲਾ ਪੁਲਸ ਕਰਮਚਾਰੀਆਂ ਨਾਲ ਪਹੁੰਚ ਗਏ, ਜਿਨ੍ਹਾਂ ਵੱਲੋਂ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ।
ਦੂਸਰੀ ਘਟਨਾ 'ਚ 15 ਸਾਲਾ ਨਵਜੋਤ ਕੌਰ ਘਰ ਦੇ ਕਮਰੇ ਵਿਚ ਟੀ. ਵੀ. ਦੇਖ ਰਹੀ ਸੀ ਅਤੇ ਉਸ ਦੀ ਮਾਂ ਕੁਲਵਿੰਦਰ ਕੌਰ ਘਰ ਦੇ ਦਰਵਾਜ਼ੇ ਵਿਚ ਬੈਠੀ ਹੋਈ ਸੀ, ਅਚਾਨਕ ਬੇਟੀ ਨਵਜੋਤ ਦੀਆਂ ਚੀਕਾਂ ਤੋਂ ਬਾਅਦ ਉਹ ਅੰਦਰ ਗਈ ਤਾਂ ਉਸ ਦੀਆਂ ਦੋਵੇਂ ਗੁੱਤਾਂ ਕੱਟੀਆਂ ਪਈਆਂ ਸਨ ਤੇ ਨਵਜੋਤ ਬੇਹੋਸ਼ ਹੋ ਗਈ ਸੀ। ਹੋਸ਼ ਆਉਣ ਤੋਂ ਬਾਅਦ ਨਵਜੋਤ ਨੇ ਦੱਸਿਆ ਉਸ ਨੇ ਸਿਰਫ ਕਾਲੀ ਬਿੱਲੀ ਦੇਖੀ ਅਤੇ ਬਾਅਦ ਵਿਚ ਉਸ ਨੂੰ ਪੂਰਾ ਨਹੀਂ ਪਤਾ ਕਿ ਉਸ ਨੂੰ ਕੀ ਹੋ ਗਿਆ ਸੀ। ਨਵਜੋਤ ਦੀ ਭੂਆ ਰੁਪਿੰਦਰ ਕੌਰ ਨੇ ਦੱਸਿਆ ਕਿ ਨਵਜੋਤ ਜੇ. ਕੇ. ਪਬਲਿਕ ਸਕੂਲ ਵਿਚ ਪੜ੍ਹਦੀ ਹੈ, ਹੁਣ ਉਸ ਨੂੰ ਬੁਖਾਰ ਹੈ ਪਰ ਉਸ ਦੀ ਹਾਲਤ ਠੀਕ ਹੈ।
ਘੱਗਰ ਦਰਿਆ 'ਚ ਡੁੱਬਣ ਨਾਲ ਨੌਜਵਾਨ ਦੀ ਮੌਤ
NEXT STORY