ਚੰਡੀਗੜ੍ਹ (ਰੋਹਾਲ) : ਇੱਥੇ ਪੀ. ਜੀ. ਆਈ. ਵੀ ਹੁਣ ਆਪਣੇ ਸਟਾਫ਼ ਦੀ ਹਾਜ਼ਰੀ ਨੂੰ ਬਾਇਓਮੈਟ੍ਰਿਕ ਸਿਸਟਮ ਰਾਹੀਂ ਲਗਾਉਣ ਦੀ ਸ਼ੁਰੂਆਤ ਕਰਨ ਜਾ ਰਿਹਾ ਹੈ। ਸ਼ਹਿਰ ਦੇ ਹੋਰ ਹਸਪਤਾਲਾਂ ’ਚ ਸਟਾਫ ਦੀ ਹਾਜ਼ਰੀ ਕਾਫੀ ਪਹਿਲਾਂ ਹੀ ਬਾਇਓਮੈਟ੍ਰਿਕ ਸਿਸਟਮ ’ਤੇ ਲੱਗ ਰਹੀ ਹੈ। ਹੁਣ ਸੋਮਵਾਰ ਮਤਲਬ ਕਿ 2 ਮਾਰਚ ਅੱਜ ਤੋਂ ਪੀ. ਜੀ. ਆਈ. ਵੀ ਇਸ ਸਿਸਟਮ ਨੂੰ ਲਾਗੂ ਕਰਨ ਜਾ ਰਿਹਾ ਹੈ। ਪੀ. ਜੀ. ਆਈ. ਦੇ ਐਡਵਾਂਸਡ ਪੀਡੀਆਟ੍ਰਿਕ ਸੈਂਟਰ (ਏ. ਪੀ. ਸੀ.) ਤੋਂ ਇਸ ਸਿਸਟਮ ਰਾਹੀਂ ਹਾਜ਼ਰੀ ਲਗਾਉਣ ਦੀ ਸ਼ੁਰੂਆਤ ਹੋਵੇਗੀ। ਅਸਲ ’ਚ ਐਡਵਾਂਸਡ ਪੀਡੀਆਟ੍ਰਿਕ ਸੈਂਟਰ ਦੇ ਸਟਾਫ ਨੇ ਪੀ. ਜੀ. ਆਈ. ਪ੍ਰਸ਼ਾਸਨ ਨੂੰ ਇਸ ਸਿਸਟਮ ਨੂੰ ਲਾਗੂ ਕਰਨ ਦੀ ਬੇਨਤੀ ਕੀਤੀ ਸੀ। ਇਸੇ ਬੇਨਤੀ ’ਤੇ ਵਿਚਾਰ ਕਰਨ ਤੋਂ ਬਾਅਦ ਇਹ ਫ਼ੈਸਲਾ ਲਿਆ ਗਿਆ। ਪੀ. ਜੀ. ਆਈ. ਡਾਇਰੈਕਟਰ ਪ੍ਰੋ. ਵਿਵੇਕ ਲਾਲ ਵੱਲੋਂ ਜਾਰੀ ਦਫ਼ਤਰੀ ਆਰਡਰ ’ਚ ਕਿਹਾ ਗਿਆ ਹੈ ਕਿ ਏ. ਪੀ. ਸੀ. ਦੇ ਸਾਰੇ ਐਡਮਿਨੀਸਟ੍ਰੇਟਿਵ ਅਤੇ ਟੈਕਨੀਕਲ ਸਟਾਫ਼ ਨੂੰ ਇਸ ਸਬੰਧ ’ਚ ਜਾਰੀ ਨਿਰਦੇਸ਼ਾਂ ਦੀ ਪਾਲਣਾ ਕਰਨੀ ਹੋਵੇਗੀ।
ਇਹ ਵੀ ਪੜ੍ਹੋ : ਚੰਡੀਗੜ੍ਹ ਤੋਂ ਆਬੂਧਾਬੀ ਤੇ ਦੁਬਈ ਜਾਣ ਵਾਲੀਆਂ ਉਡਾਣਾਂ ਰੱਦ, ਯਾਤਰੀਆਂ ਨੂੰ ਸਟੇਟਸ ਚੈੱਕ ਕਰਨ ਦੀ ਸਲਾਹ
ਮਰੀਜ਼ਾਂ ਨੂੰ ਸੀ ਅਸੁਵਿਧਾ, ਇਸ ਲਈ ਲੈਣਾ ਪਿਆ ਫ਼ੈਸਲਾ
ਪੀ. ਜੀ. ਆਈ. ਪ੍ਰਸ਼ਾਸਨ ਦੇ ਅਧਿਕਾਰੀਆਂ ਮੁਤਾਬਕ ਇਹ ਫ਼ੈਸਲਾ ਏ. ਪੀ. ਸੀ. ਵੱਲੋਂ ਆਈ ਬੇਨਤੀ ਤੋਂ ਬਾਅਦ ਕੀਤਾ ਗਿਆ। ਇਸ ਬੇਨਤੀ ’ਚ ਓ. ਪੀ. ਡੀ. ਅਤੇ ਦਾਖ਼ਲ ਮਰੀਜ਼ਾਂ ਨੂੰ ਸਮੇਂ ਸਿਰ ਇਲਾਜ ਪ੍ਰਦਾਨ ਕਰਨ ’ਚ ਪੇਸ਼ ਆ ਰਹੀਆਂ ਮੁਸ਼ਕਲਾਂ ਦਾ ਹਵਾਲਾ ਦਿੱਤਾ ਗਿਆ ਸੀ। ਇਸ ਦਾ ਕਾਰਨ ਇਹ ਸੀ ਕਿ ਮਰੀਜ਼ਾਂ ਨੂੰ ਲਿਖੇ ਗਏ ਟੈਸਟ ਜਾਂ ਹੋਰ ਪ੍ਰਬੰਧਕੀ ਰਸਮੀ ਕਾਰਵਾਈਆਂ ਕਰਨ ਵਾਲੇ ਆਪਣੇ ਸਥਾਨਾਂ ’ਤੇ ਨਹੀਂ ਮਿਲਦੇ ਸਨ। ਟੈਸਟ ਜਾਂ ਕਈ ਤਰ੍ਹਾਂ ਦੀਆਂ ਪ੍ਰਬੰਧਕੀ ਰਸਮੀ ਕਾਰਵਾਈਆਂ ਕਾਰਨ ਓ. ਪੀ. ਡੀ. ਤੇ ਵਾਰਡਾਂ ’ਚ ਦਿਕੱਤਾਂ ਆ ਰਹੀਆਂ ਸਨ। ਕਈ ਵਾਰ ਦੁਪਹਿਰ ਤੋਂ ਬਾਅਦ ਡਾਕਟਰਾਂ ਵਲੋਂ ਲਿਖੇ ਗਏ ਟੈਸਟ ਸਾਰੇ ਮਰੀਜ਼ਾਂ ਦੇ ਨਹੀਂ ਹੋ ਪਾਉਂਦੇ ਸੀ। ਇਸ ਦਾ ਕਾਰਨ ਇਹ ਸਾਹਮਣੇ ਆਇਆ ਕਿ ਟੈਸਟ ਕਰਨ ਵਾਲਾ ਪੂਰਾ ਸਟਾਫ਼ ਦੁਪਹਿਰ ਤਿੰਨ ਵਜੇ ਤੋਂ ਬਾਅਦ ਘੱਟ ਹੀ ਮਿਲਦਾ ਸੀ। ਜਿਸ ਕਾਰਨ ਓ. ਪੀ. ਡੀ. ’ਚ ਆਏ ਬੱਚਿਆਂ ਨੂੰ ਅਗਲੇ ਦਿਨ ਫਿਰ ਆਉਣਾ ਪੈਂਦਾ ਹੈ। ਮਰੀਜ਼ਾਂ ਦੇ ਅਗਲੇ ਦਿਨ ਦੁਬਾਰਾ ਆਉਣ ਨਾਲ ਓ. ਪੀ. ਡੀ. ’ਚ ਦਬਾਅ ਵੱਧ ਜਾਂਦਾ ਸੀ। ਹੁਣ ਪੀ. ਜੀ. ਆਈ. ਡਾਇਰੈਕਟਰ ਦੇ ਇਸ ਅਧਿਕਾਰਤ ਹੁਕਮ ਦੇ ਬਾਅਦ ਸਟਾਫ਼ਨੂੰ ਸਵੇਰ ਤੋਂ ਸ਼ਾਮ ਤੱਕ ਤੈਅ ਸਮੇਂ ਦੀ ਪੂਰੀ ਡਿਊਟੀ ਦੇ ਕੇ ਬਾਇਓਮੈਟ੍ਰਿਕ ਸਿਸਟਮ ’ਤੇ ਹਾਜ਼ਰੀ ਲਗਾ ਕੇ ਹੀ ਏ. ਪੀ. ਸੀ. ਛੱਡਣਾ ਹੋਵੇਗਾ।
ਇਹ ਵੀ ਪੜ੍ਹੋ : ਪੰਜਾਬ 'ਚ ਪਵੇਗੀ ਭਿਆਨਕ ਗਰਮੀ! ਟੁੱਟਿਆ 14 ਸਾਲਾਂ ਦਾ ਰਿਕਾਰਡ, ਮੌਸਮ ਵਿਭਾਗ ਨੇ ਜਾਰੀ ਕੀਤਾ ALERT
10 ਮਿੰਟ ਦੀ ਦੇਰੀ ’ਤੇ ਅੱਧੇ ਦਿਨ ਦੀ ਛੁੱਟੀ ਕੱਟੀ ਜਾਵੇਗੀ
ਇਸ ਦਫ਼ਤਰੀ ਆਰਡਰ ਮੁਤਾਬਕ ਏ. ਪੀ. ਸੀ. ਦੇ ਸਟਾਫ਼ ਨੂੰ ਡਿਊਟੀ ਚਾਰਟ ਮੁਤਾਬਕ ਸਵੇਰੇ ਸਾਢੇ 9 ਵਜੇ ਇਸ ਸਿਸਟਮ ’ਤੇ ਆਪਣੀ ਹਾਜ਼ਰੀ ਲਗਾਉਣੀ ਹੋਵੇਗੀ। ਅਚਨਚੇਤ ਮਜ਼ਬੂਰੀਆਂ ਕਾਰਨ ਦੇਰੀ ਨਾਲ ਆਉਣ ’ਤੇ ਸਟਾਫ਼ ਨੂੰ ਵੱਧ ਤੋਂ ਵੱਧ 10 ਮਿੰਟ ਦੀ ਛੋਟ ਦਿੱਤੀ ਗਈ ਹੈ ਪਰ ਲਗਾਤਾਰ ਅਜਿਹਾ ਕਰਨ ਵਾਲਿਆਂ ਨੂੰ ਇਹ ਛੋਟ ਵੀ ਨਹੀਂ ਦਿੱਤੀ ਜਾਏਗੀ। 10 ਮਿੰਟ ਦੀ ਦੇਰ ਨਾਲ ਆਉਣ ਵਾਲੇ ਸਟਾਫ਼ ਦੀ ਕੈਜ਼ੂਅਲ ਲੀਵ ’ਚੋਂ ਅੱਧੇ ਦਿਨ ਦੀ ਛੁੱਟੀ ਘੱਟ ਕੀਤੀ ਜਾਵੇਗੀ ਪਰ ਜੇਕਰ ਕੋਈ ਸਟਾਫ਼ ਮੈਂਬਰ ਮਹੀਨੇ ’ਚ ਦੋ ਵਾਰ ਇੱਕ ਘੰਟਾ ਦੇਰੀ ਨਾਲ ਆਉਂਦਾ ਹੈ ਪਰ ਦੇਰੀ ਲਈ ਅਚਨਚੇਤ ਵਾਪਰੀ ਘਟਨਾ ਦੱਸਦਾ ਹੈ, ਤਾਂ ਏ. ਪੀ. ਸੀ. ਦੇ ਵਧੀਕ ਮੈਡੀਕਲ ਸੁਪਰਡੈਂਟ ਮੁਆਫ਼ ਵੀ ਕਰ ਸਕਦੇ ਹਨ। ਜੇਕਰ ਕਿਸੇ ਨੂੰ ਕਿਸੇ ਜ਼ਰੂਰੀ ਕਾਰਨ ਕਰਕੇ ਛੁੱਟੀ ਲੈਣੀ ਪੈਂਦੀ ਹੈ ਤਾਂ ਉਸ ਨੂੰ ਉਸੇ ਦਿਨ ਆਪਣੇ ਕੰਟਰੋਲਿੰਗ ਅਧਿਕਾਰੀ ਅਤੇ ਫਿਰ ਐਡਮਿਨੀਸਟ੍ਰੇਟਿਵ ਈ. ਮੇਲ ’ਤੇ ਸੂਚਨਾ ਦੇ ਕੇ ਅਗਲੇ ਦਿਨ ਅਰਜ਼ੀ ਦੇਣੀ ਹੋਵੇਗੀ। ਪੂਰਾ ਮਹੀਨੇ ਬਾਇਓਮੈਟ੍ਰਿਕ ਸਿਸਟਮ ਨੂੰ ਮਾਨੀਟਰ ਕੀਤਾ ਜਾਵੇਗਾ ਅਤੇ ਫਿਰ ਹਰ ਮਹੀਨੇ ਦੇ ਆਖ਼ਰ ’ਚ ਆਦਤਨ ਲੇਟ ਆਉਣ ਵਾਲਿਆਂ ਦੀ ਸੂਚੀ ਅਸਟੈਬਲਿਸ਼ਮੈਂਟ ਬ੍ਰਾਂਚ ਨੂੰ ਦੇਣੀ ਹੋਵੇਗੀ, ਤਾਂ ਜੋ ਜ਼ਰੂਰੀ ਪ੍ਰਸ਼ਾਸਕੀ ਕਾਰਵਾਈ ਲਈ ਕੀਤੀ ਜਾ ਸਕੇ। ਇਸ ਸਿਸਟਮ ਵਿਚ ਕਿਸੇ ਵੀ ਤਰ੍ਹਾਂ ਦੀ ਤਕਨੀਕੀ ਸਮੱਸਿਆ ਆਉਣ ’ਤੇ ਰਜਿਸਟਰ ’ਚ ਹਾਜ਼ਰੀ ਲਗਾਉਣੀ ਹੋਵੇਗੀ।
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
ਜਲੰਧਰ ਦੇ ਸਕੂਲਾਂ ਨੂੰ ਬੰਬ ਨਾਲ ਉਡਾਉਣ ਦੀ ਧਮਕੀ, ਪੁਲਸ ਅਤੇ ਬੰਬ ਸਕੁਐਡ ਦਸਤੇ ਪਹੁੰਚੇ
NEXT STORY 
