ਸਪੋਰਟਸ ਡੈਸਕ: ਮਿਜ਼ੋਰਮ ਦੇ ਬੱਲੇਬਾਜ਼ ਚਿਨਮਯ ਸੁਤਾਰ ਨੇ ਰਣਜੀ ਟ੍ਰਾਫੀ ਦੇ ਪਲੇਟ ਡਿਵੀਜ਼ਨ ਮੈਚ ਵਿੱਚ ਨਾਗਾਲੈਂਡ ਖ਼ਿਲਾਫ਼ ਨਾਬਾਦ 400 ਦੌੜਾਂ ਦੀ ਇਤਿਹਾਸਕ ਪਾਰੀ ਖੇਡ ਕੇ ਕ੍ਰਿਕਟ ਜਗਤ ਵਿੱਚ ਧਮਾਲ ਮਚਾ ਦਿੱਤੀ ਹੈ। ਉਹ ਫਰਸਟ ਕਲਾਸ ਕ੍ਰਿਕਟ ਵਿੱਚ 400 ਦੌੜਾਂ ਦਾ ਅੰਕੜਾ ਛੂਹਣ ਵਾਲੇ ਦੁਨੀਆ ਦੇ 10ਵੇਂ ਅਤੇ ਭਾਰਤ ਦੇ ਮਹਿਜ਼ ਦੂਜੇ ਬੱਲੇਬਾਜ਼ ਬਣ ਗਏ ਹਨ। ਉਨ੍ਹਾਂ ਤੋਂ ਪਹਿਲਾਂ 78 ਸਾਲ ਪਹਿਲਾਂ (ਸਾਲ 1948 ਵਿੱਚ) ਭਾਊਸਾਹਿਬ ਨਿੰਬਾਲਕਰ ਨੇ ਕਾਠੀਆਵਾੜ ਖ਼ਿਲਾਫ਼ ਅਜੇਤੂ 443 ਦੌੜਾਂ ਦੀ ਪਾਰੀ ਖੇਡੀ ਸੀ।
ਸਾਬਕਾ ਮੁੰਬਈ ਬੱਲੇਬਾਜ਼ ਚਿਨਮਯ ਸੁਤਾਰ ਨੇ ਆਪਣੀ ਇਸ ਮੈਰਾਥਨ ਪਾਰੀ ਦੌਰਾਨ 517 ਗੇਂਦਾਂ ਦਾ ਸਾਹਮਣਾ ਕੀਤਾ, ਜਿਨ੍ਹਾਂ ਵਿੱਚੋਂ 326 ਗੇਂਦਾਂ 'ਤੇ ਕੋਈ ਦੌੜ ਨਹੀਂ ਬਣੀ। ਉਨ੍ਹਾਂ ਨੇ ਆਪਣੀ ਇਸ ਪਾਰੀ ਵਿੱਚ 46 ਚੌਕੇ ਅਤੇ 7 ਸ਼ਾਨਦਾਰ ਛੱਕੇ ਲਗਾਏ। ਸੁਤਾਰ ਦੀ ਇਸ ਜ਼ਬਰਦਸਤ ਬੱਲੇਬਾਜ਼ੀ ਦੇ ਦਮ 'ਤੇ ਮਿਜ਼ੋਰਮ ਨੇ 154.1 ਓਵਰਾਂ ਵਿੱਚ 581 ਦੌੜਾਂ ਬਣਾ ਕੇ ਆਪਣੀ ਪਾਰੀ ਐਲਾਨੀ।
ਫਰਸਟ ਕਲਾਸ ਕ੍ਰਿਕਟ ਵਿੱਚ ਸਭ ਤੋਂ ਵੱਡੀ ਪਾਰੀ ਖੇਡਣ ਦਾ ਵਿਸ਼ਵ ਰਿਕਾਰਡ ਵੈਸਟਇੰਡੀਜ਼ ਦੇ ਮਹਾਨ ਬੱਲੇਬਾਜ਼ ਬ੍ਰਾਇਨ ਲਾਰਾ ਦੇ ਨਾਂ ਹੈ, ਜਿਨ੍ਹਾਂ ਨੇ 1994 ਵਿੱਚ ਡਰਹਮ ਖ਼ਿਲਾਫ਼ ਅਜੇਤੂ 501 ਦੌੜਾਂ ਬਣਾਈਆਂ ਸਨ। ਲਾਰਾ ਨੇ 2004 ਵਿੱਚ ਇੰਗਲੈਂਡ ਖ਼ਿਲਾਫ਼ ਅੰਤਰਰਾਸ਼ਟਰੀ ਟੈਸਟ ਮੈਚ ਵਿੱਚ ਵੀ ਨਾਬਾਦ 400 ਦੌੜਾਂ ਬਣਾਈਆਂ ਸਨ। ਹੁਣ ਚਿਨਮਯ ਸੁਤਾਰ ਨੇ ਵੀ 400 ਤੋਂ ਵੱਧ ਦੌੜਾਂ ਬਣਾਉਣ ਵਾਲੇ ਸੰਸਾਰ ਦੇ ਚੋਣਵੇਂ ਖਿਡਾਰੀਆਂ ਦੀ ਸੂਚੀ ਵਿੱਚ ਆਪਣਾ ਨਾਂ ਦਰਜ ਕਰਵਾ ਲਿਆ ਹੈ।
ਤਾਜ਼ਾ ਤੇ ਵੱਡੀਆਂ ਖ਼ਬਰਾਂ ਸਭ ਤੋਂ ਪਹਿਲਾਂ ਪੜ੍ਹਨ ਲਈ ਜੁਆਇਨ ਕਰੋ ‘ਜਗ ਬਾਣੀ’ ਦਾ ਵਟਸਐਪ ਚੈਨਲ
👇Join us on Whatsapp channel👇
https://whatsapp.com/channel/0029Va94hsaHAdNVur4L170e
ਪ੍ਰਗਿਆਨ ਓਝਾ ਬਣੇ ਭਾਰਤੀ ਪੁਰਸ਼ ਕ੍ਰਿਕਟ ਟੀਮ ਦੇ ਨਵੇਂ ਚੀਫ ਸਿਲੈਕਟਰ, ਰਮੇਸ਼ ਪੋਵਾਰ ਦੀ ਚੋਣ ਪੈਨਲ 'ਚ ਐਂਟਰੀ
NEXT STORY 
