ਦੁਬਈ : ਭਾਰਤੀ ਟੈਨਿਸ ਸਟਾਰ ਸਾਨੀਆ ਮਿਰਜ਼ਾ ਨੂੰ ਮੰਗਲਵਾਰ ਨੂੰ ਡਬਲਯੂਟੀਏ ਦੁਬਈ ਡਿਊਟੀ ਫ੍ਰੀ ਚੈਂਪੀਅਨਸ਼ਿਪ ਦੇ ਪਹਿਲੇ ਗੇੜ ਵਿਚ ਆਪਣੀ ਅਮਰੀਕੀ ਜੋੜੀਦਾਰ ਮੈਡੀਸਨ ਕੀਜ਼ ਦੇ ਨਾਲ ਸਿੱਧੇ ਸੈੱਟਾਂ ਵਿਚ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਇਸ ਹਾਰ ਨਾਲ ਉਨ੍ਹਾਂ ਨੇ ਆਪਣੇ ਸ਼ਾਨਦਾਰ ਕਰੀਅਰ ਦਾ ਅੰਤ ਕੀਤਾ।
ਸਾਨੀਆ ਤੇ ਕੀਜ਼ ਦੀ ਜੋੜੀ ਰੂਸ ਦੀ ਵੇਰੋਨਿਕਾ ਕੁਦੇਰਮੇਤੋਵਾ ਤੇ ਲਿਊਡਮਿਲਾ ਸੈਮਸੋਨੋਵਾ ਹੱਥੋਂ ਠੀਕ ਇਕ ਘੰਟੇ ਤਕ ਚੱਲੇ ਮੈਚ ਵਿਚ 4-6, 0-6 ਨਾਲ ਹਾਰ ਗਈ। ਵੇਰੋਨਿਕਾ ਸਿੰਗਲਜ਼ ਵਿਚ 11ਵੇਂ ਤੇ ਡਬਲਜ਼ ਰੈਂਕਿੰਗ ਵਿਚ ਪੰਜਵੇਂ ਨੰਬਰ ’ਤੇ ਹੈ ਜਦਕਿ ਲਿਊਡਮਿਲਾ ਡਬਲਜ਼ ਵਿਚ 13ਵੇਂ ਸਥਾਨ ’ਤੇ ਹੈ। 36 ਸਾਲ ਦੀ ਸਾਨੀਆ 2003 ਵਿਚ ਪੇਸ਼ੇਵਰ ਬਣੀ ਸੀ।
ਇਹ ਵੀ ਪੜ੍ਹੋ : ਲੱਦਾਖ ਨੇ ਜੰਮੀ ਹੋਈ ਝੀਲ ’ਤੇ ਹਾਫ ਮੈਰਾਥਨ ਕਰਵਾ ਕੇ ਬਣਾਇਆ ਗਿਨੀਜ਼ ਵਿਸ਼ਵ ਰਿਕਾਰਡ
ਦੁਬਈ ਓਪਨ ਵਿਚ ਦੋਵਾਂ ਟੀਮਾਂ ਨੇ ਸ਼ੁਰੂ ਵਿਚ ਇਕ ਦੂਜੇ ਦੀ ਸਰਵਿਸ ਤੋੜੀ ਜਿਸ ਨਾਲ ਇਕ ਸਮੇਂ ਸਕੋਰ 4-4 ਨਾਲ ਬਰਾਬਰੀ ’ਤੇ ਸੀ। ਇਸ ਤੋਂ ਬਾਅਦ ਹਾਲਾਂਕਿ ਰੂਸੀ ਜੋੜੀ ਨੇ ਸਾਨੀਆ ਤੇ ਕੀਜ਼ ਦੀ ਸਰਵਿਸ ਤੋੜੀ ਤੇ ਫਿਰ ਆਪਣੀ ਸਰਵਿਸ ਬਚਾਅ ਕੇ ਪਹਿਲਾ ਸੈੱਟ ਆਪਣੇ ਨਾਂ ਕੀਤਾ। ਸਾਨੀਆ ਤੇ ਉਨ੍ਹਾਂ ਦੀ ਜੋੜੀਦਾਰ ਨੇ ਦੂਜੇ ਸੈੱਟ ਦੇ ਸ਼ੁਰੂ ਵਿਚ ਹੀ ਆਪਣੀ ਸਰਵਿਸ ਗੁਆ ਦਿੱਤੀ ਤੇ ਇਸ ਤੋਂ ਬਾਅਦ ਵਾਪਸੀ ਕਰਨ ਵਿਚ ਨਾਕਾਮ ਰਹੀ।
ਸਾਨੀਆ ਮਿਰਜ਼ਾ ਦੀਆਂ ਉਪਲੱਬਧੀਆਂ
ਸਾਨੀਆ ਮਿਰਜਾ ਡਬਲਜ਼ 'ਚ 6 ਗ੍ਰੈਂਡ ਸਲੈਮ ਜਿੱਤ ਚੁੱਕੀ ਹੈ। ਉਹ 2009 'ਚ ਆਸਟ੍ਰੇਲੀਅਨ ਓਪਨ ਮਿਕਸਡ ਡਬਲਜ਼, 2012 'ਚ ਫ੍ਰੈਂਚ ਓਪਨ ਮਿਕਸਡ ਡਬਲਜ਼, 2014 'ਚ ਯੂ. ਐੱਸ. ਓਪਨ ਮਿਕਸਡ ਡਬਲਜ਼, 2015 'ਚ ਵਿੰਬਲਡਨ ਵਿਮੈਂਸ ਡਬਲਜ਼, 2015 'ਚ ਯੂ. ਐੱਸ. ਓਪਨ ਵਿਮੈਂਸ ਡਬਲਜ਼, 2016 'ਚ ਆਸਟ੍ਰੇਲੀਅਨ ਓਪਨ ਵਿਮੈਂਸ ਡਬਲਜ਼ ਦੇ ਖ਼ਿਤਾਬ ਜਿੱਤ ਚੁੱਕੀ ਹੈ। ਇਸ ਤੋਂ ਇਲਾਵਾ ਸਾਨੀਆ ਮਿਰਜ਼ਾ 2004 'ਚ ਅਰਜੁਨ ਐਵਾਰਡ, 2006 'ਚ ਪਦਮਸ਼੍ਰੀ ਐਵਾਰਡ, 2015 'ਚ ਰਾਜੀਵ ਗਾਂਧੀ ਖੇਡ ਰਤਨ ਤੇ 2016 'ਚ ਪਦਮ ਭੂਸ਼ਣ ਐਵਾਰਡ ਵਰਗੇ ਸਨਮਾਨ ਹਾਸਲ ਕਰ ਚੁੱਕੀ ਹੈ।
ਨੋਟ : ਇਸ ਖ਼ਬਰ ਬਾਰੇ ਕੀ ਹੈ ਤੁਹਾਡੀ ਰਾਏ। ਕੁਮੈਂਟ ਕਰਕੇ ਦਿਓ ਜਵਾਬ।
ਲੱਦਾਖ ਨੇ ਜੰਮੀ ਹੋਈ ਝੀਲ ’ਤੇ ਹਾਫ ਮੈਰਾਥਨ ਕਰਵਾ ਕੇ ਬਣਾਇਆ ਗਿਨੀਜ਼ ਵਿਸ਼ਵ ਰਿਕਾਰਡ
NEXT STORY 
