ਯੂ. ਪੀ. ਕਾਂਗਰਸ ਦੀ ਨਵੀਂ ਪ੍ਰਦੇਸ਼ ਪ੍ਰਧਾਨ ਆਰਾਧਨਾ ਮਿਸ਼ਰਾ (ਮੋਨਾ) ਦੇ ਅਹੁਦਾ ਸੰਭਾਲਣ ਦੇ ਦਿਨ ਪ੍ਰਦੇਸ਼ ਕਾਂਗਰਸ ਦਫ਼ਤਰ ਮਾਲ ਐਵੇਨਿਊ (ਲਖਨਊ) ’ਚ ਜੁੱਤਮ-ਜੁੱਤੀ ਦਾ ਜੋ ਦ੍ਰਿਸ਼ ਦੇਖਣ ਨੂੰ ਮਿਲਿਆ, ਉਹ ਬਿਲਕੁਲ ਹੈਰਾਨ ਕਰਨ ਵਾਲਾ ਨਹੀਂ ਸੀ। ਹੈਰਾਨੀ ਇਸ ਗੱਲ ਦੀ ਹੈ ਕਿ ਯੂ. ਪੀ. ਕਾਂਗਰਸ ’ਚ ਇਹ ਦ੍ਰਿਸ਼ ਦਹਾਕਿਆਂ ਬਾਅਦ ਦੇਖਣ ਨੂੰ ਮਿਲਿਆ।
ਨਵੰਬਰ 2004 ’ਚ ਵੀ ਕਾਂਗਰਸੀਆਂ ’ਚ ਅਜਿਹੀ ਘਟਨਾ ਦੇਖਣ ਨੂੰ ਮਿਲੀ ਸੀ, ਜਦੋਂ ਵਿਧਾਨ ਸਭਾ ਜ਼ਿਮਨੀ ਚੋਣ ’ਚ ਖ਼ਰਾਬ ਪ੍ਰਦਰਸ਼ਨ ਕਾਰਨ ਤਤਕਾਲੀ ਯੂ. ਪੀ. ਕਾਂਗਰਸ ਪ੍ਰਧਾਨ ਜਗਦੰਬਿਕਾ ਪਾਲ ਨੂੰ ਹਟਾ ਕੇ ਸਲਮਾਨ ਖੁਰਸ਼ੀਦ ਨੂੰ ਕਾਂਗਰਸ ਪ੍ਰਧਾਨ ਬਣਾਉਣ ਦਾ ਫ਼ੈਸਲਾ ਲਿਆ ਗਿਆ ਸੀ। ਇਹ ਘਟਨਾ ਥੋੜ੍ਹੀ ਭਿਆਨਕ ਸੀ। ਘਟਨਾ ਸਥਾਨ ਉਹੀ ਸੀ, ਮਾਲ ਐਵੇਨਿਊ! ਦੋਵਾਂ ਸਮਰਥਕਾਂ ਦੇ ਵਿਚਾਲੇ ਹੋਈ ਜੁੱਤਮ-ਜੁੱਤੀ ਹਜ਼ਰਤਗੰਜ ਤੱਕ ਪਹੁੰਚ ਗਈ ਸੀ ਜਿੱਥੇ ਇੱਟਾਂ-ਪੱਥਰ ਤੱਕ ਚੱਲੇ ਸਨ। ਹਜ਼ਰਤਗੰਜ ’ਚ ਹੀ ਅਸ਼ੋਕ ਮਾਰਗ ’ਤੇ ਜਗਦੰਬਿਕਾ ਪਾਲ ਦੀ ਰਿਹਾਇਸ਼ ਹੈ ਜਿੱਥੇ ਉਨ੍ਹਾਂ ਦੇ ਸਮਰਥਕ ਇਕੱਠੇ ਹੋਏ ਸਨ। ਉਸ ਸਮੇਂ ਦੀ ਇਹ ਘਟਨਾ ਪਹਿਲਾਂ ਤੋਂ ਤੈਅ ਦੱਸੀ ਗਈ ਸੀ। ਭਾਰੀ ਹਫੜਾ-ਦਫੜੀ ਦੇ ਵਿਚਾਲੇ 7 ਨਵੰਬਰ, 2004 ਨੂੰ ਸਲਮਾਨ ਖੁਰਸ਼ੀਦ ਯੂ. ਪੀ. ਕਾਂਗਰਸ ਚੀਫ਼ ਦੀ ਕੁਰਸੀ ਸੰਭਾਲ ਸਕੇ ਸਨ।
ਮੋਨਾ ਮਿਸ਼ਰਾ ਦੀ ਤਾਜਪੋਸ਼ੀ ਦੇ ਵੇਲੇ ਵਾਪਰੀ ਘਟਨਾ ਦੇ ਪਿੱਛੇ ਲਖਨਊ ਦੀ ਮਮਤਾ ਚੌਧਰੀ ਨਾਂ ਦੀ ਕਿਸੇ ਕੌਂਸਲਰ ਦਾ ਨਾਂ ਆਇਆ ਹੈ। ਹਾਲਾਂਕਿ ਬਾਅਦ ’ਚ ਉਨ੍ਹਾਂ ਦਾ ਸੰਖੇਪ ਬਿਆਨ ਆਇਆ ਕਿ ਘਟਨਾ ਕਿਵੇਂ ਹੋਈ, ਉਨ੍ਹਾਂ ਨੂੰ ਨਹੀਂ ਪਤਾ ਪਰ ਉਨ੍ਹਾਂ ਨੇ ਅਹੁਦਾ ਛੱਡ ਰਹੇ/ਮੌਜੂਦਾ ਪ੍ਰਧਾਨ ਅਜੇ ਰਾਏ ’ਤੇ ਦੋਸ਼ ਜ਼ਰੂਰ ਮੜ੍ਹ ਦਿੱਤਾ ਕਿ ਉਨ੍ਹਾਂ ਨੇ ਕਿਹਾ ਕਿ ਤੇਰੀ ਔਕਾਤ ਕੀ ਹੈ, ਆਦਿ-ਆਦਿ! ਜਗਦੰਬਿਕਾ ਪਾਲ ਦੇ ਵੇਲੇ ਦੀ ਘਟਨਾ ’ਤੇ ਕਾਂਗਰਸ ਦੀ ਚੋਟੀ ਦੀ ਲੀਡਰਸ਼ਿਪ ਖਾਮੋਸ਼ ਰਹੀ ਅਤੇ ਇਸ ਤਾਜ਼ਾ ਘਟਨਾ ’ਤੇ ਵੀ ਕਾਂਗਰਸ ਲੀਡਰਸ਼ਿਪ ਅਜੇ ਤੱਕ ਖ਼ਾਮੋਸ਼ ਹੈ। ਅੱਗੇ ਵੀ ਸ਼ਾਇਦ ਖਾਮੋਸ਼ ਹੀ ਰਹੇ। ਯੂ. ਪੀ. ’ਚ ਕਿਉਂਕਿ ਕੁਝ ਮਹੀਨਿਆਂ ਦੇ ਅੰਦਰ ਵਿਧਾਨ ਸਭਾ ਦੀਆਂ ਚੋਣ ਹਨ, ਇਸ ਲਈ ਉਸ ਦੀ ਖਾਮੋਸ਼ੀ ਹੀ ਬਿਹਤਰ ਹੈ। ਪਰ ਇਸ ਘਟਨਾ ਨੇ ਯੂ. ਪੀ. ਦੇ ਜਨ-ਮਾਨਸ ’ਚ, ਖ਼ਾਸ ਕਰਕੇ ਉਨ੍ਹਾਂ ਨੂੰ ਜਿਨ੍ਹਾਂ ਨੂੰ ਕਾਂਗਰਸ ਤੋਂ ਕੁਝ ਉਮੀਦ ਹੈ, ਇਕ ਸਵਾਲ ਪੈਦਾ ਕਰ ਹੀ ਦਿੱਤਾ ਕਿ ਇਹ ਕਾਂਗਰਸੀ ਜਦੋਂ ਆਪਸ ’ਚ ਹੀ ਲੜ ਰਹੇ ਹਨ ਤਾਂ ਭਾਜਪਾ ਨਾਲ ਕੀ ਲੜਨਗੇ।
ਅਜੇ ਰਾਏ ਵਾਰਾਣਸੀ ਦੇ ਕੱਦਾਵਰ ਨੇਤਾ ਹਨ। ਉਹ ਭਾਜਪਾ ਤੋਂ ਕਾਂਗਰਸ ’ਚ ਆਏ ਹਨ। ਵਾਰਾਣਸੀ ਦੇ ਪਿੰਡਰਾ ਵਿਧਾਨ ਸਭਾ ਖੇਤਰ ਤੋਂ ਕਈ ਵਾਰ ਵਿਧਾਇਕ ਰਹੇ ਹਨ। ਰਾਸ਼ਟਰੀ ਪੱਧਰ ’ਤੇ ਉਨ੍ਹਾਂ ਦੀ ਚਰਚਾ ਉਦੋਂ ਹੋਈ, ਜਦੋਂ 2024 ’ਚ ਉਨ੍ਹਾਂ ਨੇ ਪ੍ਰਧਾਨ ਮੰਤਰੀ ਮੋਦੀ ਨੂੰ ਸਖ਼ਤ ਟੱਕਰ ਦਿੱਤੀ ਸੀ। ਕਾਂਗਰਸ ਦੀ ਚੋਟੀ ਦੀ ਲੀਡਰਸ਼ਿਪ ਦੀ ਨਜ਼ਰ ’ਚ ਅਜੇ ਰਾਏ ਦਾ ਕੱਦ ਕਾਫ਼ੀ ਵਧ ਗਿਆ। ਸੰਭਵ ਤੌਰ ’ਤੇ ਉਸ ਤੋਂ ਬਾਅਦ ਹੀ ਉਨ੍ਹਾਂ ਨੂੰ ਪ੍ਰਦੇਸ਼ ਕਾਂਗਰਸ ਪ੍ਰਧਾਨ ਬਣਾਉਣ ਦਾ ਫ਼ੈਸਲਾ ਲਿਆ ਗਿਆ। ਖੈਰ ਉਹ 3 ਸਾਲ ਤੱਕ ਪ੍ਰਦੇਸ਼ ਕਾਂਗਰਸ ਪ੍ਰਧਾਨ ਰਹੇ, ਜੋ ਇਕ ਲੰਬਾ ਕਾਰਜਕਾਲ ਮੰਨਿਆ ਜਾਂਦਾ ਹੈ।
ਸਵਾਲ ਉੱਠਦਾ ਹੈ ਕਿ ਅਜੇ ਰਾਏ ਨੂੰ ਬਦਲ ਕੇ ਮੋਨਾ ਮਿਸ਼ਰਾ ਦੀ ਤਾਜਪੋਸ਼ੀ ਦਾ ਫ਼ੈਸਲਾ ਅਚਾਨਕ ਹੋਇਆ ਜਾਂ ਇਹ ਕਿਸੇ ਸੋਚੀ ਸਮਝੀ ਰਣਨੀਤੀ ਦਾ ਹਿੱਸਾ ਸੀ? ਅਤੇ ਕੀ ਇਸ ਅਦਲਾ-ਬਦਲੀ ’ਚ ਅਜੇ ਰਾਏ ਦੀ ਸਹਿਮਤੀ ਸੀ? ਜੇਕਰ ਕਾਂਗਰਸ ਲੀਡਰਸ਼ਿਪ ਨੇ ਸਹਿਮਤੀ ਅਤੇ ਸੂਝ-ਬੂਝ ਨਾਲ ਇਹ ਫ਼ੈਸਲਾ ਲਿਆ ਹੈ ਤਾਂ ਠੀਕ ਹੈ ਅਤੇ ਜੇਕਰ ਅਜੇ ਰਾਏ ਨੂੰ ਨਾਪਸੰਦ ਕਰਨ ਵਾਲੇ ਪਾਰਟੀ ਦੇ ਕਿਸੇ ਨੇਤਾ ਦੇ ਬਹਿਕਾਵੇ ’ਚ ਅਜਿਹਾ ਕੀਤਾ ਗਿਆ ਹੈ, ਤਾਂ ਯਕੀਨ ਰੱਖੋ, ਕਾਂਗਰਸ ਦੀ ਇਹ ਭਾਰੀ ਭੁੱਲ ਹੈ। ਅਜੇ ਰਾਏ ਦੇ ਬਦਲੇ ਮੋਨਾ ਮਿਸ਼ਰਾ! ਇਹ ਕੋਈ ਜਾਤੀ ਅੰਕ ਗਣਿਤ ਵੀ ਨਹੀਂ ਹੈ। ਬਸ ਇੰਨਾ ਕਿ ਮਰਦ ਦੇ ਬਦਲੇ ਔਰਤ!
ਮੋਨਾ ਮਿਸ਼ਰਾ ਪ੍ਰਤਾਪਗੜ੍ਹ ਜ਼ਿਲੇ ਦੇ ਰਾਮਪੁਰ ਖਾਸ ਵਿਧਾਨ ਸਭਾ ਖੇਤਰ ਤੋਂ 3 ਵਾਰ ਦੀ ਵਿਧਾਇਕਾ ਹੈ। ਇਸ ਤੋਂ ਵੱਡੀ ਗੱਲ ਇਹ ਹੈ ਕਿ ਉਹ ਇਸੇ ਖੇਤਰ ਤੋਂ ਲਗਾਤਾਰ 9 ਵਾਰ ਵਿਧਾਇਕ ਰਹੇ ਮੌਜੂਦਾ ਰਾਜ ਸਭਾ ਮੈਂਬਰ ਪ੍ਰਮੋਦ ਤਿਵਾੜੀ ਦੀ ਧੀ ਹੈ। ਪ੍ਰਮੋਦ ਤਿਵਾੜੀ ਦੇ ਸਪਾ ਮੁਖੀ ਅਖਿਲੇਸ਼ ਯਾਦਵ ਨਾਲ ਗੂੜ੍ਹੇ ਸਬੰਧ ਹਨ। ਯੂ. ਪੀ. ’ਚ ਸਪਾ ਅਤੇ ਕਾਂਗਰਸ ਗੱਠਜੋੜ ਦੇ ਚੋਣ ਲੜਨ ਦੀ ਚਰਚਾ ਦੇ ਵਿਚਾਲੇ ਕਾਂਗਰਸ ਹਾਈਕਮਾਨ ਦੀ ਮੋਨਾ ਮਿਸ਼ਰਾ ਦੀ ਚੋਣ ਨੂੰ ਮਹੱਤਵਪੂਰਨ ਮੰਨਿਆ ਜਾ ਸਕਦਾ ਹੈ। ਇਸ ਤੋਂ ਇਲਾਵਾ ਉਹ ਖ਼ਾਸ ਬ੍ਰਾਹਮਣ ਚਿਹਰੇ ਦੀ ਧੀ ਤਾਂ ਹੈ ਹੀ।
ਮੋਨਾ ਮਿਸ਼ਰਾ ਦੇ ਨਾਲ ਪਾਰਟੀ ਹਾਈਕਮਾਨ ਨੇ ਸਹਾਰਨਪੁਰ ਦੇ ਆਪਣੇ ਬੜਬੋਲੇ ਸੰਸਦ ਮੈਂਬਰ ਇਮਰਾਨ ਮਸੂਦ ਨੂੰ ਕਾਰਜਕਾਰੀ ਪ੍ਰਧਾਨ ਵੀ ਬਣਾਇਆ ਹੈ। ਨਾਲ ਹੀ 2 ਉਪ ਪ੍ਰਧਾਨ ਵੀ ਨਿਯੁਕਤ ਕੀਤੇ ਗਏ ਹਨ, ਦੋਵੇਂ ਹੀ ਗੋਰਖਪੁਰ ਖੇਤਰ ਨਾਲ ਸਬੰਧ ਰੱਖਦੇ ਹਨ। ਇਕ ਨਿਸ਼ਾਦ ਸਮਾਜ ਤੋਂ ਹਨ, ਦੂਜੇ ਦਲਿਤ ਸਮਾਜ ਤੋਂ। ਸਟੇਟ ਸੰਗਠਨ ’ਚ ਅਹੁਦੇਦਾਰਾਂ ਦੀ ਚੋਣ ’ਚ ਜਾਤੀ ਸਮੀਕਰਨ ’ਤੇ ਜ਼ਰੂਰ ਧਿਆਨ ਦਿੱਤਾ ਗਿਆ ਹੈ ਪਰ ਕੀ ਪ੍ਰਧਾਨ ਸਮੇਤ ਇਸ ਕਮੇਟੀ ’ਚ ਨਾਮਜ਼ਦ ਸਾਰੇ ਅਹੁਦੇਦਾਰ ਪਾਰਟੀ ਹਾਈਕਮਾਨ ਦੀ ਉਮੀਦ ’ਤੇ ਖ਼ਰਾ ਉਤਰ ਸਕਣਗੇ?
ਉਪ ਪ੍ਰਧਾਨ ਬਣਾਏ ਗਏ ਗੋਰਖਪੁਰ ਦੇ ਦੇਵੇਂਦਰ ਨਿਸ਼ਾਦ ਦੀ ਨਿਯੁਕਤੀ ਦੇ ਪਿੱਛੇ ਪੂਰਵਾਂਚਲ ਦੀਆਂ ਨਿਸ਼ਾਦ ਵੋਟਾਂ ਨੂੰ ਸਾਧਣਾ ਹੈ, ਜਦੋਂ ਕਿ ਇਸੇ ਮੰਡਲ ਦੇ ਮਹਾਰਾਜਗੰਜ ਜ਼ਿਲੇ ਦੇ ਰਹਿਣ ਵਾਲੇ ਦਲਿਤ ਨੇਤਾ ਆਲੋਕ ਪ੍ਰਸਾਦ ਦੀ ਨਿਯੁਕਤੀ ਦੇ ਪਿੱਛੇ ਦਲਿਤ ਵੋਟਾਂ ਨੂੰ ਆਪਣੇ ਵੱਲ ਆਕਰਸ਼ਿਤ ਕਰਨਾ ਹੈ। ਭਾਜਪਾ ਦੇ ਸਹਿਯੋਗੀ ਨਿਸ਼ਾਦ ਪਾਰਟੀ ਦੇ ਪ੍ਰਧਾਨ ਸੰਜੇ ਨਿਸ਼ਾਦ ਵੀ ਗੋਰਖਪੁਰ ਦੇ ਹਨ। ਉਹ ਇਸ ਸਮੇਂ ਯੋਗੀ ਸਰਕਾਰ ’ਚ ਕੈਬਨਿਟ ਮੰਤਰੀ ਹਨ। ਇੱਥੋਂ་ ਦੇ ਨਿਸ਼ਾਦ ਉਨ੍ਹਾਂ ਨੂੰ ਹੀ ਆਪਣਾ ਨੇਤਾ ਮੰਨਦੇ ਹਨ। ਪੂਰਵਾਂਚਲ ਦੇ ਜ਼ਿਲਿਆਂ ’ਚ ਉਨ੍ਹਾਂ ਦਾ ਸੰਗਠਨ ਕਾਫ਼ੀ ਸਰਗਰਮ ਹੈ। ਅਜਿਹੇ ’ਚ ਕਾਂਗਰਸ ਦੇ ਦੇਵੇਂਦਰ ਨਿਸ਼ਾਦ ਪਾਰਟੀ ਨੂੰ ਕੀ ਫ਼ਾਇਦਾ ਪਹੁੰਚਾ ਪਾਉਣਗੇ, ਇਹ ਦੇਖਣਾ ਹੋਵੇਗਾ।
ਮਹਾਰਾਜਗੰਜ ਜ਼ਿਲੇ ਦੇ ਜਿਸ ਆਲੋਕ ਪ੍ਰਸਾਦ ਨੂੰ ਦੂਜਾ ਉਪ ਪ੍ਰਧਾਨ ਬਣਾਇਆ ਗਿਆ ਹੈ, ਉਨ੍ਹਾਂ ਦੀ ਖ਼ਾਸ ਪਛਾਣ ਇਹ ਹੈ ਕਿ ਉਹ ਕਾਂਗਰਸ ਦੇ ਜ਼ਮਾਨੇ ’ਚ ਰਾਜਪਾਲ ਰਹੇ ਸੁਖਦੇਵ ਪ੍ਰਸਾਦ ਦੇ ਪੁੱਤਰ ਹਨ। ਆਲੋਕ ਪ੍ਰਸਾਦ ਇਸ ਤੋਂ ਪਹਿਲਾਂ ਸੰਗਠਨ ਦੇ ਦਲਿਤ ਵਿਭਾਗ ਦੇ ਚੇਅਰਮੈਨ ਰਹਿ ਚੁੱਕੇ ਹਨ। ਉਹ ਸੁਰੱਖਿਅਤ ਵਿਧਾਨ ਸਭਾ ਖੇਤਰ ਮਹਾਰਾਜਗੰਜ ਸਦਰ ਤੋਂ ਕਾਂਗਰਸ ਉਮੀਦਵਾਰ ਦੇ ਰੂਪ ’ਚ ਚੋਣ ਵੀ ਲੜ ਚੁੱਕੇ ਹਨ ਪਰ ਸਨਮਾਨਜਨਕ ਵੋਟਾਂ ਹਾਸਲ ਕਰਨ ’ਚ ਅਸਫ਼ਲ ਰਹੇ ਹਨ। ਆਲੋਕ ਪ੍ਰਸਾਦ ਨੂੰ ਪਾਰਟੀ ਦਾ ਉਪ ਪ੍ਰਧਾਨ ਬਣਾਉਣ ਨਾਲ ਇਕ ਚਰਚਾ ਇਹ ਵੀ ਹੈ ਕਿ ਜਦੋਂ ਯੂ. ਪੀ. ਇੰਚਾਰਜ ਰਾਜੇਂਦਰ ਪਾਲ ਗੌਤਮ ਦੇ ਰੂਪ ’ਚ ਇਕ ਵੱਡਾ ਦਲਿਤ ਚਿਹਰਾ ਪਹਿਲਾਂ ਤੋਂ ਮੌਜੂਦ ਹੈ, ਤਾਂ ਫਿਰ ਦੂਜੇ ਦਲਿਤ ਨੂੰ ਉਪ ਪ੍ਰਧਾਨ ਬਣਾਉਣ ਦਾ ਕੀ ਮਤਲਬ? ਬਿਹਤਰ ਹੁੰਦਾ ਕਿ ਪੱਛੜੇ ਵਰਗ ਤੋਂ ਕਿਸੇ ਨੂੰ ਇਸ ਅਹੁਦੇ ’ਤੇ ਬਿਠਾਇਆ ਗਿਆ ਹੁੰਦਾ।
ਨਵੀਂ ਪ੍ਰਦੇਸ਼ ਪ੍ਰਧਾਨ ਮੋਨਾ ਮਿਸ਼ਰਾ ਨੂੰ ਉਨ੍ਹਾਂ ਦੇ ਪਿਤਾ ਪ੍ਰਮੋਦ ਤਿਵਾੜੀ ਦੇ ਤਜਰਬਿਆਂ ਦਾ ਲਾਭ ਮਿਲ ਸਕਦਾ ਹੈ। ਜਿੱਥੇ ਤੱਕ ਉਨ੍ਹਾਂ ਦੇ ਬ੍ਰਾਹਮਣ ਸਮਾਜ ’ਚ ਪ੍ਰਭਾਵ ਦੀ ਗੱਲ ਹੈ, ਤਾਂ ਇਹ ਉਨ੍ਹਾਂ ਦੇ ਆਪਣੇ ਵਿਧਾਨ ਸਭਾ ਖੇਤਰ ਤੋਂ ਬਾਹਰ ਦੇਖਣ ਨੂੰ ਨਹੀਂ ਮਿਲਿਆ ਕਿਉਂਕਿ ਪ੍ਰਮੋਦ ਤਿਵਾੜੀ ਦਾ ਸਬੰਧ ਸਪਾ ਮੁਖੀ ਅਖਿਲੇਸ਼ ਨਾਲ ਵੀ ਹੈ, ਇਸ ਲਈ ਮੁਮਕਿਨ ਹੈ ਕਿ ਸੀਟ ਵੰਡ ’ਚ ਉਨ੍ਹਾਂ ਦੀ ਕੋਈ ਭੂਮਿਕਾ ਕੰਮ ਕਰ ਜਾਵੇ। ਸਪਾ ਪਰਿਵਾਰ ਤੋਂ ਵੱਡੀ ਨਹੀਂ ਹੈ। ਸਪਾ ਅਤੇ ਕਾਂਗਰਸ ’ਚ ਨੇੜਤਾ ਵਿਚਾਲੇ ਇਕਰਾ ਹਸਨ ਅਤੇ ਮਸੂਦ ’ਚ ਤਕਰਾਰ ਪਾਰਟੀ ਨੂੰ ਅਸਹਿਜ ਕਰਦੀ ਰਹਿੰਦੀ ਹੈ। ਮੁਮਕਿਨ ਹੈ ਹੁਣ ਕਾਂਗਰਸ ਵੱਲੋਂ ਬੇਲੋੜੀ ਬਿਆਨਬਾਜ਼ੀ ਬੰਦ ਹੋ ਜਾਵੇ।
—ਯਸ਼ੋਦਾ ਸ਼੍ਰੀਵਾਸਤਵ
ਚੰਗੇ ਡਰਾਈਵਰ ਤੁਹਾਡਾ ਧਨ ਬਚਾਉਂਦੇ ਹਨ...!
NEXT STORY 
