ਨਵੀਂ ਦਿੱਲੀ— ਪਿਆਜ਼ ਕੀਮਤਾਂ 'ਚ ਜਲਦ ਥੋੜ੍ਹੀ ਕਮੀ ਦੇਖਣ ਨੂੰ ਮਿਲ ਸਕਦੀ ਹੈ। ਇੰਪੋਰਟਡ ਪਿਆਜ਼ ਨਾਲ ਬਾਜ਼ਾਰ 'ਚ ਸਪਲਾਈ ਸੁਧਰਣ ਦੀ ਸੰਭਾਵਨਾ ਹੈ। 790 ਟਨ ਦੀ ਪਹਿਲੀ ਖੇਪ ਭਾਰਤ ਪਹੁੰਚ ਗਈ ਹੈ। ਇਸ 'ਚੋਂ ਕੁੱਝ ਪਿਆਜ਼ ਦਿੱਲੀ ਤੇ ਆਂਧਰਾ ਪ੍ਰਦੇਸ਼ ਭੇਜਿਆ ਗਿਆ ਹੈ। ਇਨ੍ਹਾਂ ਸੂਬਿਆਂ ਨੂੰ ਪਿਆਜ਼ ਦੇ ਬੰਦਰਗਾਹ 'ਤੇ ਪੁੱਜਣ ਦੀ ਲਾਗਤ 57-60 ਰੁਪਏ ਪ੍ਰਤੀ ਕਿਲੋਗ੍ਰਾਮ ਪਈ ਹੈ। 12,000 ਟਨ ਹੋਰ ਪਿਆਜ਼ ਦੀ ਖੇਪ ਦਸੰਬਰ ਅੰਤ ਤੱਕ ਆਉਣ ਦੀ ਉਮੀਦ ਹੈ। ਜਨਤਕ ਖੇਤਰ ਦੀ ਐੱਮ. ਐੱਮ. ਟੀ. ਸੀ. ਨੇ ਹੁਣ ਤੱਕ 49,500 ਟਨ ਪਿਆਜ਼ ਦੀ ਦਰਾਮਦ ਦਾ ਕਰਾਰ ਕੀਤਾ ਹੈ। ਇਸ ਸਮੇਂ ਦੇਸ਼ ਦੇ ਪ੍ਰਮੁੱਖ ਸ਼ਹਿਰਾਂ 'ਚ ਪਿਆਜ਼ ਦੇ ਪ੍ਰਚੂਨ ਮੁੱਲ 100 ਰੁਪਏ ਪ੍ਰਤੀ ਕਿਲੋਗ੍ਰਾਮ 'ਤੇ ਚੱਲ ਰਹੇ ਹਨ।
ਪਿਆਜ਼ ਦੀ ਦਰਾਮਦ ਤੁਰਕੀ, ਮਿਸਰ ਤੇ ਅਫਗਾਨਿਸਤਾਨ ਤੋਂ ਕੀਤੀ ਜਾ ਰਹੀ ਹੈ। ਖਪਤਕਾਰ ਮਾਮਲਿਆਂ ਦੇ ਮੰਤਰਾਲੇ ਦੇ ਇਕ ਅਧਿਕਾਰੀ ਨੇ ਕਿਹਾ ਕਿ ਪਿਆਜ਼ ਦੀਆਂ ਹੋਰ ਖੇਪਾਂ ਵੀ ਰਸਤੇ 'ਚ ਹਨ। ਇਨ੍ਹਾਂ ਨਾਲ ਘਰੇਲੂ ਸਪਲਾਈ ਸੁਧਾਰਣ 'ਚ ਮਦਦ ਮਿਲੇਗੀ।
ਉੱਥੇ ਹੀ, 2019-20 ਦੇ ਫਸਲੀ ਸਾਲ (ਜੁਲਾਈ ਤੋਂ ਜੂਨ) 'ਚ ਸਾਉਣੀ ਉਤਪਾਦਨ 'ਚ 25 ਫੀਸਦੀ ਦੀ ਕਮੀ ਆਉਣ ਦਾ ਅੰਦਾਜ਼ਾ ਹੈ। ਪ੍ਰਮੁੱਖ ਉਤਪਾਦਕ ਸੁਬਿਆਂ 'ਚ ਮਾਨਸੂਨ 'ਚ ਦੇਰੀ ਤੇ ਫਿਰ ਬਹੁਤ ਜ਼ਿਆਦਾ ਮੀਂਹ ਵਰਗੇ ਕਾਰਣਾਂ ਕਰ ਕੇ ਪਿਆਜ਼ ਦਾ ਉਤਪਾਦਨ ਹੇਠਾਂ ਆਇਆ ਹੈ। ਵਪਾਰੀਆਂ ਤੇ ਮਾਹਿਰਾਂ ਦਾ ਮੰਨਣਾ ਹੈ ਕਿ ਜਨਵਰੀ ਅੰਤ ਤੱਕ ਪਿਆਜ਼ ਦੇ ਮੁੱਲ ਉੱਚੇ ਬਣੇ ਰਹਿਣਗੇ। ਉਸ ਤੋਂ ਬਾਅਦ ਬਾਜ਼ਾਰ 'ਚ ਸਾਉਣੀ ਦੀ ਫਸਲ ਆਉਣੀ ਸ਼ੁਰੂ ਹੋਵੇਗੀ। ਇਸ ਤੋਂ ਪਹਿਲਾਂ ਦੇਸ਼ ਨੇ 2015-16 'ਚ 1,987 ਟਨ ਪਿਆਜ਼ ਦੀ ਦਰਾਮਦ ਕੀਤੀ ਸੀ। ਉਸ ਸਮੇਂ ਵੀ ਪਿਆਜ਼ ਕੀਮਤਾਂ 'ਚ ਭਾਰੀ ਉਛਾਲ ਆਇਆ ਸੀ। ਹਾਲਾਂਕਿ, ਇਸ ਵਿਚਕਾਰ ਰਾਹਤ ਦੀ ਗੱਲ ਇਹ ਹੈ ਕਿ ਘਰੇਲੂ ਬਾਜ਼ਾਰ 'ਚ ਪਿਆਜ਼ ਦੀਆਂ ਵਧਦੀਆਂ ਕੀਮਤਾਂ 'ਤੇ ਲਗਾਮ ਲਾਉਣ ਲਈ ਸਰਕਾਰ ਨੇ ਚਾਈਨਾ ਤੋਂ ਪਿਆਜ਼ ਦਰਾਮਦ ਕਰਨ ਦਾ ਵੀ ਫੈਸਲਾ ਕੀਤਾ ਹੈ। ਪਤਾ ਲੱਗਾ ਹੈ ਕਿ ਜਨਤਕ ਟਰੇਡਿੰਗ ਏਜੰਸੀ 'ਮੈਟਲਸ ਐਂਡ ਮਿਨਰਲਸ ਟਰੇਡਿੰਗ ਕਾਰਪੋਰੇਸ਼ਨ (ਐੱਮ. ਐੱਮ. ਟੀ. ਸੀ.)' ਨੇ ਪਿਛਲੇ ਹਫਤੇ 11,000 ਟਨ ਪਿਆਜ਼ ਦਰਾਮਦ ਕਰਨ ਲਈ ਇਕ ਗਲੋਬਲ ਟੈਂਡਰ ਜਾਰੀ ਕੀਤਾ ਹੈ। ਇਹ ਪਿਆਜ਼ 31 ਜਨਵਰੀ 2020 ਤੱਕ ਭਾਰਤ ਆਉਣ ਵਾਲਾ ਹੈ।
ਨਿਵੇਸ਼ ਅਤੇ ਵਿਕਾਸ ਰਫਤਾਰ ਵਧਾਉਣ 'ਤੇ PM ਮੋਦੀ ਦਾ ਮੰਥਨ
NEXT STORY 
