ਨਵੀਂ ਦਿੱਲੀ- ਭਾਰਤ ਨੇ ਆਉਣ ਵਾਲੇ ਸਾਲਾਂ ਵਿੱਚ ਆਟੋਮੋਬਾਈਲ ਖੇਤਰ ਲਈ ਵੱਡਾ ਟੀਚਾ ਨਿਰਧਾਰਤ ਕੀਤਾ ਹੈ। ਨਵੇਂ "ਆਟੋਮੋਟਿਵ ਮਿਸ਼ਨ ਪਲਾਨ 2047" (AMP) ਅਨੁਸਾਰ, ਦੇਸ਼ ਅਗਲੇ ਪੰਜ ਸਾਲਾਂ ਵਿੱਚ ਵਾਹਨ ਉਤਪਾਦਨ ਨੂੰ ਦੁੱਗਣਾ ਕਰਨਾ ਚਾਹੁੰਦਾ ਹੈ ਅਤੇ 2047 ਤੱਕ ਇਸਨੂੰ ਲਗਭਗ ਚਾਰ ਗੁਣਾ ਵਧਾ ਕੇ 200 ਮਿਲੀਅਨ ਯੂਨਿਟ ਤੱਕ ਪਹੁੰਚਾਉਣ ਦਾ ਮਨ ਹੈ। ਇਸ ਨਾਲ ਭਾਰਤ ਦੁਨੀਆ ਦੇ ਸਭ ਤੋਂ ਵੱਡੇ ਦੋ ਆਟੋਮੋਬਾਈਲ ਉਤਪਾਦਕਾਂ ਵਿੱਚ ਸ਼ਾਮਲ ਹੋ ਸਕਦਾ ਹੈ। ਮੌਜੂਦਾ ਸਮੇਂ 'ਚ ਭਾਰਤ ਨੇ 2023-24 ਵਿੱਚ ਤਕਰੀਬਨ 2.5 ਕਰੋੜ ਵਾਹਨ ਤਿਆਰ ਕੀਤੇ ਸਨ।
ਪਲਾਨ ਅਨੁਸਾਰ, 2030 ਤੱਕ ਵਾਹਨ ਉਤਪਾਦਨ ਨੂੰ 5 ਕਰੋੜ ਯੂਨਿਟ ਤੱਕ ਲੈ ਜਾਣਾ ਹੈ, ਜਦਕਿ 2047 ਤੱਕ ਇਹ ਗਿਣਤੀ 20 ਕਰੋੜ ਹੋਣ ਦੀ ਉਮੀਦ ਹੈ। ਯੋਜਨਾ ਵਿੱਚ ਬਿਜਲੀ, ਹਾਈਡਰੋਜਨ, ਕੰਪ੍ਰੈਸਡ ਨੇਚਰਲ ਗੈਸ (CNG) ਅਤੇ ਬਾਇਓ ਗੈਸ ਨਾਲ ਚਲਣ ਵਾਲੇ ਵਾਹਨਾਂ ਨੂੰ ਉਤਸ਼ਾਹਿਤ ਕਰਨ 'ਤੇ ਧਿਆਨ ਦਿੱਤਾ ਜਾਵੇਗਾ। ਹਾਲਾਂਕਿ, ਸਰਕਾਰ ਵੱਲੋਂ ਪੈਟਰੋਲ ਜਾਂ ਡੀਜ਼ਲ ਵਾਹਨਾਂ 'ਤੇ ਰੋਕ ਲਗਾਉਣ ਦਾ ਕੋਈ ਯੋਜਨਾ ਨਹੀਂ ਹੈ, ਪਰ 2047 ਤੱਕ ਉਨ੍ਹਾਂ ਦੀ ਹਿੱਸੇਦਾਰੀ ਘਟਣ ਦੀ ਸੰਭਾਵਨਾ ਹੈ।
ਯੋਜਨਾ ਵਿੱਚ ਨਿਰਯਾਤ ਵਧਾਉਣ ਨੂੰ ਵੀ ਵੱਡੀ ਤਰਜੀਹ ਦਿੱਤੀ ਗਈ ਹੈ। 2030 ਤੱਕ ਲਗਭਗ 30% ਪੈਸੇਂਜਰ ਵਾਹਨਾਂ ਦੇ ਨਿਰਮਾਣ ਨੂੰ ਵਿਦੇਸ਼ ਭੇਜਣ ਦਾ ਟੀਚਾ ਹੈ, ਜਿਹੜਾ 2047 ਤੱਕ 40% ਤੱਕ ਵਧ ਸਕਦਾ ਹੈ। ਇਸ ਲਈ ਗਲੋਬਲ ਕੰਪਨੀਆਂ ਨਾਲ ਸਾਂਝੇਦਾਰੀ, ਤਕਨਾਲੋਜੀ ਟ੍ਰਾਂਸਫਰ ਅਤੇ ਸਥਾਨਕ ਸਪਲਾਈ ਚੇਨ ਮਜ਼ਬੂਤ ਕਰਨ ਦੀ ਰਣਨੀਤੀ ਬਣਾਈ ਜਾ ਰਹੀ ਹੈ।
ਅਧਿਕਾਰੀਆਂ ਅਨੁਸਾਰ, ਇਸ ਪਲਾਨ ਨੂੰ "ਵਿਕਸਿਤ ਭਾਰਤ 2047" ਦੇ ਟੀਚਿਆਂ ਨਾਲ ਜੋੜ ਕੇ ਤਿਆਰ ਕੀਤਾ ਜਾ ਰਿਹਾ ਹੈ। ਇਸ ਵਿੱਚ ਮੰਤ੍ਰਾਲਿਆਂ, ਆਟੋਮੋਬਾਈਲ ਉਦਯੋਗ, ਸਿੱਖਿਆ ਸੰਸਥਾਵਾਂ ਅਤੇ ਟੈਸਟਿੰਗ ਏਜੰਸੀਆਂ ਦੀ ਭੂਮਿਕਾ ਰਹੇਗੀ। ਨਵੰਬਰ ਵਿੱਚ ਉੱਚ ਪੱਧਰੀ ਮੀਟਿੰਗ ਤੈਅ ਕੀਤੀ ਗਈ ਹੈ ਅਤੇ ਅੰਤਿਮ ਖਾਕਾ ਇਸ ਵਿੱਤੀ ਸਾਲ ਦੇ ਅੰਤ ਤੱਕ ਜਾਰੀ ਹੋਣ ਦੀ ਉਮੀਦ ਹੈ।
ਸਟਾਕ ਮਾਰਕੀਟ 'ਚ ਲੱਗੇਗਾ ਲੰਮਾ ਬ੍ਰੇਕ! 1 ਤੋਂ 31 ਅਕਤੂਬਰ ਤੱਕ ਕਈ ਦਿਨਾਂ ਲਈ ਨਹੀਂ ਹੋ ਸਕੇਗੀ ਟ੍ਰੇਡਿੰਗ
NEXT STORY 
