ਜਲੰਧਰ (ਮਾਹੀ)-ਸਰਮਸਤਪੁਰ ਨੇੜੇ ਸਥਿਤ ਜੇ. ਐੱਸ. ਫਾਰਮ ਵਿਚ ਰੱਖੀ ਪੰਜਾਬ ਸਰਕਾਰ ਦੀ ਸੈਂਟਰਲ ਪੂਲ ਦੀ ਕਣਕ ਵਿਚ ਵੱਡਾ ਘਪਲਾ ਸਾਹਮਣੇ ਆਇਆ ਹੈ। ਫੂਡ ਸਪਲਾਈ ਵਿਭਾਗ ਵੱਲੋਂ ਕੀਤੀ ਗਈ ਤਾਜ਼ਾ ਗਿਣਤੀ ਵਿਚ 49672 ਜੂਟ ਬੈਗ (ਹਰੇਕ 50 ਕਿਲੋ) ਵਿਚੋਂ ਲੱਗਭਗ 14000 ਬੋਰੀਆਂ ਘੱਟ ਪਾਈਆਂ ਗਈਆਂ ਹਨ। ਸਵੇਰ ਤੋਂ ਹੀ ਵਿਭਾਗ ਦੀ ਟੀਮ ਗੋਦਾਮ ਵਿਚ ਸਟਾਕ ਦਾ ਮਿਲਾਨ ਕਰ ਰਹੀ ਸੀ, ਜਦਕਿ ਪੁਲਸ ਮੁਲਜ਼ਮ ਦੀ ਭਾਲ ਵਿਚ ਜੁਟੀ ਹੋਈ ਹੈ।
ਫੂਡ ਸਪਲਾਈ ਵਿਭਾਗ ਦੇ ਅਧਿਕਾਰੀ ਨਰਿੰਦਰ ਸਿੰਘ ਨੇ ਦੱਸਿਆ ਕਿ ਲੱਗਭਗ 15 ਦਿਨ ਪਹਿਲਾਂ ਜਦੋਂ ਵਿਭਾਗ ਅਤੇ ਪਨਗ੍ਰੇਨ ਦੀ ਸਾਂਝੀ ਟੀਮ ਮੁਆਇਨੇ ਲਈ ਜੇ. ਐੱਸ. ਫਾਰਮ ਪਹੁੰਚੀ ਸੀ, ਉਦੋਂ ਫਾਰਮ ਦੇ ਮਾਲਕ ਉਪਕਾਰ ਸਿੰਘ ਹੋਠੀ ਨੇ ਟੀਮ ਨੂੰ ਅੰਦਰ ਦਾਖਲ ਨਹੀਂ ਹੋਣ ਦਿੱਤਾ ਸੀ। ਇਥੋਂ ਤੱਕ ਕਿ ਸਰਕਾਰੀ ਸੁਰੱਖਿਆ ਗਾਰਡਾਂ ਨੂੰ ਵੀ ਰੋਕ ਦਿੱਤਾ ਗਿਆ ਸੀ। ਇਸ ਤੋਂ ਬਾਅਦ ਵਿਭਾਗ ਨੇ ਕਾਨੂੰਨੀ ਕਾਰਵਾਈ ਸ਼ੁਰੂ ਕੀਤੀ ਅਤੇ ਪੁਲਸ ਸਹਾਇਤਾ ਮੰਗੀ ਗਈ। ਤਾਜ਼ਾ ਗਿਣਤੀ ਵਿਚ ਸਾਹਮਣੇ ਆਇਆ ਕਿ 50-50 ਕਿਲੋ ਦੀਆਂ ਲਗਭਗ 14000 ਬੋਰੀਆਂ ਘੱਟ ਹਨ।
ਇਹ ਵੀ ਪੜ੍ਹੋ: ਪੰਜਾਬ 'ਚ ਕੱਲ੍ਹ ਲੱਗੇਗਾ ਲੰਬਾ Power Cut! ਸਾਵਧਾਨ ਰਹਿਣ ਇਹ ਇਲਾਕੇ, 5 ਘੰਟੇ ਨਹੀਂ ਆਵੇਗੀ ਬਿਜਲੀ
ਵਿਭਾਗ ਹੁਣ ਇਸ ਗੱਲ ਦੀ ਜਾਂਚ ਕਰ ਰਿਹਾ ਹੈ ਕਿ ਇੰਨੀ ਵੱਡੀ ਮਾਤਰਾ ਵਿਚ ਕਣਕ ਕਿੱਥੇ ਅਤੇ ਕਿਵੇਂ ਗਾਇਬ ਹੋਈ? ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਇਹ ਕਣਕ ਮਿਡ-ਡੇ-ਮੀਲ ਯੋਜਨਾ ਲਈ ਰੱਖੀ ਗਈ ਸੀ ਅਤੇ ਇਸ ਨੂੰ ਖੁਦ ਪੰਜਾਬ ਸਰਕਾਰ ਵੱਲੋਂ ਇਥੇ ਸਟੋਰ ਕਰਵਾਇਆ ਗਿਆ ਸੀ। ਮਾਮਲੇ ਦੀ ਜਾਂਚ ਡੀ. ਐੱਸ. ਪੀ. ਕਰਤਾਰਪੁਰ ਨਰਿੰਦਰ ਸਿੰਘ ਔਜਲਾ ਨੂੰ ਸੌਂਪੀ ਗਈ ਹੈ। ਡੀ. ਐੱਸ. ਪੀ. ਨੇ ਕਿਹਾ ਕਿ ਹੋਠੀ ਦੇ ਖਿਲਾਫ਼ 25 ਦੇ ਲੱਗਭਗ ਸ਼ਿਕਾਇਤਾਂ ਆਲੂ ਵਪਾਰੀਆਂ ਨੇ ਦਿੱਤੀਆਂ ਹਨ, ਜਿਨ੍ਹਾਂ ਦੀ ਜਾਂਚ ਚੱਲ ਰਹੀ ਹੈ।
ਐੱਫ਼. ਆਈ. ਆਰ. ’ਚ ਖ਼ੁਲਾਸਾ- ਪਹਿਲਾਂ ਵੀ ਮੁਆਇਨੇ ਦੌਰਾਨ ਦਾਖਲ ਹੋਣ ਤੋਂ ਰੋਕਿਆ ਗਿਆ ਸੀ, ਢਕੇ ਗੋਦਾਮ ਤੋਂ ਖੁੱਲ੍ਹੀ ਸਟੋਰੇਜ ’ਤੇ ਵਧਿਆ ਵਿਵਾਦ
ਐੱਫ਼. ਆਈ. ਆਰ. ਅਨੁਸਾਰ ਸਾਲ 2025-26 ਲਈ ਜੇ. ਐੱਸ. ਫਾਰਮ ਵਿਚ ਪੰਜਾਬ ਸਰਕਾਰ ਦੀ 24836 ਕੁਇੰਟਲ (49672 ਜੂਟ ਬੈਗ) ਸੈਂਟਰਲ ਪੂਲ ਦੀ ਕਣਕ ਸਟੋਰ ਕੀਤੀ ਗਈ ਸੀ। 17 ਫਰਵਰੀ 2026 ਨੂੰ ਫੂਡ ਐਂਡ ਸਪਲਾਈ ਅਫਸਰ ਜਲੰਧਰ ਮਨੀਸ਼ ਕੁਮਾਰ ਆਪਣੀ ਟੀਮ ਨਾਲ ਜਾਂਚ ਲਈ ਪਹੁੰਚੇ ਸਨ ਪਰ ਫਾਰਮ ਦੇ ਗੇਟਕੀਪਰ ਨੇ ਗੇਟ ਖੋਲ੍ਹਣ ਤੋਂ ਮਨ੍ਹਾ ਕਰ ਦਿੱਤਾ। ਮਾਲਕ ਉਪਕਾਰ ਸਿੰਘ ਹੋਠੀ ਨਾਲ ਫੋਨ ਅਤੇ ਵ੍ਹਟਸਐਪ ਕਾਲ ਰਾਹੀਂ ਸੰਪਰਕ ਕੀਤਾ ਗਿਆ ਪਰ ਉਨ੍ਹਾਂ ਗੇਟ ਖੋਲ੍ਹਣ ਤੋਂ ਮਨ੍ਹਾ ਕਰ ਦਿੱਤਾ। ਵਿਭਾਗ ਨੇ ਉਸ ਸਮੇਂ ਹੀ ਸਟਾਕ ਵਿਚ ਚੋਰੀ ਜਾਂ ਨੁਕਸਾਨ ਦਾ ਖਦਸ਼ਾ ਜ਼ਾਹਰ ਕੀਤਾ ਸੀ ਅਤੇ ਮਾਲਕ ਦੇ ਖਿਲਾਫ਼ ਸਰਕਾਰੀ ਹੁਕਮਾਂ ਦੀ ਉਲੰਘਣਾ ਅਤੇ ਸਰਕਾਰੀ ਕੰਮ ਵਿਚ ਵਿਘਨ ਪਾਉਣ ਦਾ ਦੋਸ਼ ਲਾਇਆ ਸੀ। ਸ਼ਿਕਾਇਤ ਦੀ ਕਾਪੀ ਡਿਪਟੀ ਕਮਿਸ਼ਨਰ ਜਲੰਧਰ ਨੂੰ ਵੀ ਭੇਜੀ ਗਈ ਸੀ।
ਰਿਕਾਰਡ ਦੇ ਮੁਤਾਬਕ ਅਪ੍ਰੈਲ-ਮਈ 2025 ਵਿਚ ਪੰਜਾਬ ਸਰਕਾਰ ਵੱਲੋਂ ਕਣਕ ਦੀ ਖਰੀਦ ਕੀਤੀ ਗਈ ਸੀ। ਫੂਡ ਐਂਡ ਸਿਵਲ ਸਪਲਾਈ ਵਿਭਾਗ ਦੇ ਇੰਸਪੈਕਟਰ ਪ੍ਰਵੀਨ ਸੱਲਣ ਨੇ ਮੰਡੀ ਅਲਾਵਲਪੁਰ (ਬਲਾਕ ਆਦਮਪੁਰ) ਤੋਂ 4925 ਕੁਇੰਟਲ ਕਣਕ ਖਰੀਦੀ ਸੀ। ਉੱਥੇ ਹੀ, 24836 ਕੁਇੰਟਲ ਕਣਕ ਸਰਮਸਤਪੁਰ ਸਥਿਤ ਫਾਰਮ ਵਿਚ ਸਟੋਰ ਕੀਤੀ ਗਈ। ਸੁਰੱਖਿਆ ਲਈ ਚਾਰ ਨਿੱਜੀ ਗਾਰਡ ਦਿਨ-ਰਾਤ ਤਾਇਨਾਤ ਕੀਤੇ ਗਏ ਸਨ। 19 ਜੁਲਾਈ 2025 ਨੂੰ ਐੱਫ. ਸੀ. ਆਈ. ਦੀ ਕੇਂਦਰੀ ਟੀਮ ਨੇ ਜੇ. ਐੱਸ. ਫਾਰਮ ਦਾ ਮੁਆਇਨਾ ਕੀਤਾ। ਮੁਆਇਨੇ ਦੌਰਾਨ ਪਾਇਆ ਗਿਆ ਕਿ ਕਣਕ ਢਕੇ ਗੋਦਾਮ ਦੀ ਬਜਾਏ ਖੁੱਲ੍ਹੇ ਸ਼ੈੱਡ ਵਿਚ ਰੱਖੀ ਗਈ ਸੀ। ਇਸ ਤੋਂ ਬਾਅਦ 14 ਫਰਵਰੀ 2026 ਨੂੰ ਫਾਰਮ ਵਿਚ ਤਾਇਨਾਤ ਗਾਰਡ ਨੂੰ ਰੋਕਣ ਅਤੇ 16 ਫਰਵਰੀ ਨੂੰ ਟਰੱਕਾਂ ਨੂੰ ਅੰਦਰ ਦਾਖਲ ਨਾ ਹੋਣ ਦੇਣ ਦੀ ਵੀ ਸ਼ਿਕਾਇਤ ਦਰਜ ਕੀਤੀ ਗਈ। ਐੱਫ. ਸੀ. ਆਈ. ਅਤੇ ਪਨਗ੍ਰੇਨ ਦੇ ਅਧਿਕਾਰੀ ਮੌਕੇ ’ਤੇ ਪਹੁੰਚੇ ਪਰ ਉਨ੍ਹਾਂ ਨੂੰ ਵੀ ਅੰਦਰ ਜਾਣ ਦੀ ਇਜਾਜ਼ਤ ਨਹੀਂ ਮਿਲੀ। ਹੁਣ ਥਾਣਾ ਮਕਸੂਦਾਂ ਵਿਚ ਹੋਠੀ ਦੇ ਖਿਲਾਫ਼ ਮਾਮਲਾ ਦਰਜ ਕਰ ਲਿਆ ਗਿਆ ਹੈ ਅਤੇ ਪੁਲਸ ਹੁਣ ਪੂਰੇ ਘਟਨਾਕ੍ਰਮ ਦੀ ਜਾਂਚ ਕਰ ਰਹੀ ਹੈ। ਫਿਲਹਾਲ ਸਭ ਤੋਂ ਵੱਡਾ ਸਵਾਲ ਇਹੀ ਹੈ ਕਿ 14000 ਬੋਰੀਆਂ ਆਖਿਰ ਕਿੱਥੇ ਗਈਆਂ। ਜੇਕਰ ਹਰੇਕ ਬੋਰੀ 50 ਕਿਲੋ ਦੀ ਮੰਨੀ ਜਾਵੇ ਤਾਂ ਇਹ ਲਗਭਗ 7000 ਕੁਇੰਟਲ ਕਣਕ ਬਣਦੀ ਹੈ, ਜਿਸ ਦੀ ਬਾਜ਼ਾਰੀ ਕੀਮਤ ਕਰੋੜਾਂ ਰੁਪਏ ਵਿਚ ਮੰਨੀ ਜਾ ਰਹੀ ਹੈ।
ਇਹ ਵੀ ਪੜ੍ਹੋ: ਪੰਜਾਬ ਦੇ ਮੌਸਮ ਨੂੰ ਲੈ ਕੇ IMD ਦੀ 6 ਮਾਰਚ ਤੱਕ ਵੱਡੀ ਭਵਿੱਖਬਾਣੀ! ਚੱਲਣਗੀਆਂ ਹਵਾਵਾਂ, ਜਾਣੋ ਤਾਜ਼ਾ ਅਪਡੇਟ
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
For Whatsapp:- https://whatsapp.com/channel/0029Va94hsaHAdNVur4L170e
1 ਕੁਇੰਟਲ ਤੋਂ ਵੱਧ ਗਾਂਜੇ ਸਮੇਤ ਫੜਿਆ ਗਿਆ ਨਸ਼ਾ ਤਸਕਰ
NEXT STORY 
