ਚੰਡੀਗੜ੍ਹ: ਸ਼੍ਰੋਮਣੀ ਅਕਾਲੀ ਦਲ ਦੇ ਸੀਨੀਅਰ ਆਗੂ ਤੇ ਸਾਬਕਾ ਕੈਬਨਿਟ ਮੰਤਰੀ ਬਿਕਰਮ ਸਿੰਘ ਮਜੀਠੀਆ ਨੇ ਟਵੀਟ ਕਰ ਆਖਿਆ ਹੈ ਕਿ ਸਰਕਾਰੀ ਠੇਕਿਆਂ ਅਤੇ ਪੰਜਾਬ ਦੇ ਖਜ਼ਾਨੇ ਦੀ ਲੁੱਟ ਪਿੱਛੇ ਲੁਕੇ ਚਿਹਰੇ ਜਲਦੀ ਹੀ ਪੰਜਾਬੀਆਂ ਸਾਹਮਣੇ ਨੰਗੇ ਹੋਣਗੇ। ਮਜੀਠੀਆ ਨੇ ਟਵੀਟ ਵਿਚ ਗੀਤਕਾਰ ਤੇ ਪਰਮੋਟਰ ਬੰਟੀ ਬੈਂਸ ਦੀਆਂ ਮੌਜੂਦਾ ਮੁੱਖ ਮੰਤਰੀ ਦੇ ਓ. ਐੱਸ. ਡੀ. ਅਤੇ ਕੈਬਨਿਟ ਮੰਤਰੀ ਨਾਲ ਤਸਵੀਰਾਂ ਸਾਂਝੀਆਂ ਕਰ ਕੇ ਲਿਖਿਆ ਹੈ ਕਿ “ਤੂੰ ਨਹੀਂ ਬੋਲਦੀ… ਤੇਰੇ 'ਚ ਤੇਰਾ ਯਾਰ ਬੋਲਦਾ। ਮਜੀਠੀਆ ਨੇ ਅੱਗੇ ਲਿਖਿਆ ਹੈ ਕਿ ਸਰਕਾਰ ਅੰਦਰ ਬੈਠੇ ਉਹ “ਯਾਰ” ਜਿਨ੍ਹਾਂ ਦੇ ਇਸ਼ਾਰਿਆਂ ‘ਤੇ ਟਵੀਟਾਂ, ਪ੍ਰਚਾਰ ਅਤੇ ਝੂਠ ਦੀਆਂ ਦੁਕਾਨਾਂ ਚੱਲ ਰਹੀਆਂ ਹਨ, ਉਹ ਸਿੱਧੇ ਹੋ ਕੇ ਗੱਲ ਕਰਨ।
ਮਜੀਠੀਆ ਨੇ ਦੋਸ਼ ਲਗਾਇਆ ਕਿ ਜਿਹੜਾ ਕੰਮ ਇਕ ਰੁਪਏ ਵਿਚ ਹੋਣਾ ਸੀ, ਉਹ 100 ਰੁਪਏ ਵਿਚ ਕਰਕੇ ਪੰਜਾਬ ਦਾ ਖਜ਼ਾਨਾ ਲੁੱਟਿਆ ਗਿਆ। ਇਸ ਲੁੱਟ ਦੇ “ਬੰਟੀ-ਬਬਲੀ”, ਸਰਕਾਰ ਵਿਚ ਬੈਠੇ ਉਨ੍ਹਾਂ ਦੇ ਦੋਸਤ ਅਤੇ ਪਿੱਛੇ ਬੈਠੇ ਚਿਹਰੇ ਬੇਨਕਾਬ ਹੋਣ ਵਾਲੇ ਹਨ। ਉਨ੍ਹਾਂ ਮਰਹੂਮ ਪੰਜਾਬੀ ਗਾਇਕ ਸਿੱਧੂ ਮੂਸੇਵਾਲਾ ਦਾ ਜ਼ਿਕਰ ਕਰਦਿਆਂ ਕਿਹਾ ਕਿ ਉਸ ਦੀ ਮਿਹਨਤ ਦੀ ਕਮਾਈ ਦੱਬਣ ਵਾਲੇ, ਸਰਕਾਰੀ ਸ਼ਹਿ ‘ਤੇ ਬਚਣ ਵਾਲੇ ਅਤੇ ਅੱਜ ਵੀ ਸਿੱਧੂ ਦੇ ਪਰਿਵਾਰ ਨੂੰ ਇਨਸਾਫ ਲਈ ਰੁਲਾਉਣ ਵਾਲੇ ਲੋਕ ਹੁਣ ਫੜੇ ਜਾਣਗੇ। ਮਜੀਠੀਆ ਨੇ ਕਿਹਾ ਕਿ ਕਲਾਕਾਰਾਂ ਨੂੰ ਪਹਿਲਾਂ ਸੁਰੱਖਿਆ ਦੇਣੀ, ਫਿਰ ਵਾਪਸ ਕਰਵਾਉਣੀ ਅਤੇ ਫਿਰ ਉਨ੍ਹਾਂ ਨੂੰ ਤੰਗ-ਪਰੇਸ਼ਾਨ ਕਰਨਾ, ਇਹ ਪੰਜਾਬ ਨੇ ਵੀ ਦੇਖਿਆ ਤੇ ਪੰਜਾਬ ਯਾਦ ਵੀ ਰੱਖੇਗਾ। ਸਿੱਧੂ ਮੂਸੇਵਾਲੇ ਦੀ ਸੁਰੱਖਿਆ ਵਾਪਸ ਲੈ ਕੇ ਉਸ ਦੀ ਮੌਤ ਦੇ ਜ਼ਿਮੇਵਾਰ ਲੋਕ, ਉਸ ਦੀ ਪ੍ਰਸਿੱਧੀ ਦਾ ਸ਼ੋਸ਼ਣ ਕਰਨ ਵਾਲੇ ਲੋਕ ਅਤੇ ਸਰਕਾਰੀ ਛਤਰੀ ਹੇਠ ਬਚਦੇ ਲੋਕ, ਸਭ ਦਾ ਹਿਸਾਬ ਹੋਵੇਗਾ।
ਬਿਕਰਮ ਮਜੀਠੀਆ ਨੇ ਸਪਸ਼ਟ ਤੌਰ 'ਤੇ ਕਿਹਾ ਕਿ ਉਨ੍ਹਾਂ ਦੀ ਲੜਾਈ ਸਰਕਾਰ ਨਾਲ ਹੈ, ਕਿਸੇ ਹੋਰ ਨਾਲ ਨਿੱਜੀ ਲੜਾਈ ਨਹੀਂ ਹੈ। ਉਨ੍ਹਾਂ ਕਿਹਾ ਕਿ ਉਹ ਪੰਜਾਬ ਦੇ ਖਜ਼ਾਨੇ ਨੂੰ ਖੋਰਾ ਲਾਉਣ ਵਾਲੇ ਭ੍ਰਿਸ਼ਟ ਸਿਸਟਮ ਦਾ ਹਮੇਸ਼ਾ ਪਰਦਾਫਾਸ਼ ਕਰਦੇ ਰਹੇ ਹਨ ਤੇ ਅੱਗੇ ਵੀ ਕਰਦੇ ਰਹਿਣਗੇ। ਜਿਹੜਾ ਪੈਸਾ ਪੰਜਾਬ ਦੇ ਬੱਚਿਆਂ ਦੀ ਪੜ੍ਹਾਈ ਅਤੇ ਲੋਕਾਂ ਦੇ ਇਲਾਜ ‘ਤੇ ਲੱਗਣਾ ਸੀ, ਉਹ ਫ਼ਜ਼ੂਲ ਖਰਚੀ ਅਤੇ ਯਾਰਾਂ ਨੂੰ ਖੁਸ਼ ਕਰਨ ਵਿਚ ਉਡਾ ਦਿੱਤਾ ਗਿਆ, ਇਸ ਦਾ ਪਰਦਾਫਾਸ਼ ਵੀ ਜਲਦੀ ਹੋਵੇਗਾ। ਉਨ੍ਹਾਂ ਨੇ ਈ.ਡੀ. ਦੇ ਅਧਿਕਾਰੀਆਂ ਤੋਂ ਮੰਗ ਕੀਤੀ ਕਿ ਜਲਦੀ ਹੀ ਇਨ੍ਹਾਂ ਲੋਕਾਂ ਦੀ LOC ਜਾਰੀ ਕੀਤੀ ਜਾਵੇ, ਜਿਨ੍ਹਾਂ ਨੇ ਪੰਜਾਬ ਦੇ ਖਜ਼ਾਨੇ ਦੀ ਜੰਮ ਕੇ ਲੁੱਟ ਕੀਤੀ ਹੈ, ਕਿਉਂਕਿ ਇਹ ਕਿਸੇ ਸਮੇਂ ਵੀ ਵਿਦੇਸ਼ ਦੀ ਉਡਾਰੀ ਮਾਰ ਸਕਦੇ ਹਨ। ਮਜੀਠੀਆ ਨੇ ਦਾਅਵਾ ਕੀਤਾ ਕਿ ਗੁਲਜ਼ਾਰਇੰਦਰ ਚਾਹਲ ਪਹਿਲਾਂ ਹੀ ਵਿਦੇਸ਼ ਜਾ ਚੁੱਕਿਆ ਹੈ।
ਦੱਸ ਦਈਏ ਕਿ ਇਸ ਤੋਂ ਪਹਿਲਾਂ ਬਿਕਰਮ ਮਜੀਠੀਆ ਨੇ ਬੀਤੇ ਕੱਲ੍ਹ ਇਕ ਟਵੀਟ ਵਿਚ ਦਾਅਵਾ ਕੀਤਾ ਸੀ ਕਿ ਬੰਟੀ ਬੈਂਸ ਅਤੇ ਕੁਝ ਹੋਰ ਰਸੂਖਦਾਰ ਵਿਦੇਸ਼ ਭੱਜਣ ਦੀ ਤਿਆਰੀ ਵਿਚ ਹਨ ਤੇ ਮੰਗ ਕੀਤੀ ਸੀ ਕਿ ਉਨ੍ਹਾਂ ਨੂੰ ਰੋਕਣ ਲਈ ED ਤੁਰੰਤ LOC ਜਾਰੀ ਕਰੇ। ਇਸ ਦੇ ਜਵਾਬ ਵਿਚ ਬੰਟੀ ਬੈਂਸ ਨੇ ਮਜੀਠੀਆ ਨੂੰ ਸਖ਼ਤ ਚੇਤਾਵਨੀ ਦਿੰਦਿਆਂ ਕਿਹਾ ਸੀ ਕਿ ਉਨ੍ਹਾਂ ਨੂੰ ਉਸ ਦਾ ਨਾਂ ਲੈਣ ਤੋਂ ਪਹਿਲਾਂ ਹਜ਼ਾਰ ਵਾਰ ਸੋਚਣਾ ਚਾਹੀਦਾ ਹੈ। ਬੈਂਸ ਨੇ ਸਪੱਸ਼ਟ ਕੀਤਾ ਸੀ ਕਿ ਗੈਰਤਮੰਦ ਲੋਕ ਕਦੇ ਭੱਜਦੇ ਨਹੀਂ ਅਤੇ ਉਹ ਅੱਜ ਵੀ ਮਜ਼ਬੂਤੀ ਨਾਲ ਖੜ੍ਹੇ ਹਨ। ਉਨ੍ਹਾਂ ਇਹ ਵੀ ਸਲਾਹ ਦਿੱਤੀ ਸੀ ਕਿ ਮਜੀਠੀਆ ਨੂੰ ਬਿਨਾਂ ਕਿਸੇ ਤੱਥ ਜਾਂ ਸਬੂਤ ਦੇ ਝੂਠੇ ਇਲਜ਼ਾਮ ਲਗਾਉਣ ਤੋਂ ਗੁਰੇਜ਼ ਕਰਨਾ ਚਾਹੀਦਾ ਹੈ।
ਪੰਜਾਬ 'ਚ ਸਿਆਸੀ ਹਲਚਲ! ਕਾਂਗਰਸ ਨੇ ਭੰਗ ਕੀਤੀਆਂ ਇਹ ਕਮੇਟੀਆਂ, ਬਦਲੇ ਜਾਣਗੇ ਅਹੁਦੇਦਾਰ
NEXT STORY 
