ਜਲੰਧਰ (ਬੁਲੰਦ)— ਦਿੱਲੀ ਵਿਧਾਨ ਸਭਾ ਚੋਣਾਂ ਨੇ ਇਕ ਵਾਰ ਫਿਰ ਸਾਬਤ ਕਰ ਦਿੱਤਾ ਹੈ ਕਿ ਸਿੱਖ ਵੋਟ ਬੈਂਕ ਪੂਰੀ ਤਰ੍ਹਾਂ ਖਿੱਲਰਿਆ ਹੋਇਆ ਹੈ। ਸ੍ਰੀ ਅਕਾਲ ਤਖਤ ਸਾਹਿਬ ਦੇ ਹੁੰਦੇ ਹੋਏ ਸਿੱਖ ਨੇਤਾਵਾਂ ਦੀਆਂ ਕੁਝ ਕਮੀਆਂ ਕਾਰਨ ਸਿੱਖ ਵੋਟ ਬੈਂਕ ਨੂੰ ਇਕ ਝੰਡੇ ਦੇ ਹੇਠਾਂ ਇਕੱਠਾ ਕਰਨ ਦਾ ਸੁਪਨਾ ਸੱਚ ਹੁੰਦਾ ਨਹੀਂ ਦਿਸ ਰਿਹਾ। ਦਿੱਲੀ 'ਚ ਭਾਜਪਾ ਬਨਾਮ 'ਆਪ' ਦੀ ਟੱਕਰ 'ਚ ਸਿੱਖ ਵੋਟ ਬੈਂਕ ਦਾ ਬੁਰੀ ਤਰ੍ਹਾਂ ਚੀਰਹਰਨ ਹੁੰਦਾ ਦਿਖਾਈ ਦੇ ਰਿਹਾ ਹੈ।
ਮਾਮਲੇ ਬਾਰੇ ਦਿੱਲੀ ਦੇ ਸਿੱਖ ਵਿਦਵਾਨਾਂ ਦੀ ਮੰਨੀਏ ਤਾਂ ਦਿੱਲੀ 'ਚ ਭਾਵੇਂ ਭਾਜਪਾ ਨੇ ਖਰੀਦੋ-ਫਰੋਖਤ ਜਾਂ ਸੈਟਿੰਗਾਂ ਰਾਹੀਂ ਬੀਤੇ ਦਿਨੀਂ ਸਾਰੇ ਸਿੱਖ ਧੜਿਆਂ ਨੂੰ ਭਾਜਪਾ ਦੇ ਸਮਰਥਨ 'ਚ ਖੜ੍ਹਾ ਕਰਕੇ ਸਾਬਤ ਕੀਤਾ ਕਿ ਸਿੱਖ ਭਾਜਪਾ ਦੇ ਨਾਲ ਹਨ। ਅਕਾਲੀ ਦਲ (ਬਾਦਲ), ਮਨਜੀਤ ਸਿੰਘ ਜੀ. ਕੇ., ਪਰਮਜੀਤ ਸਿੰਘ ਸਰਨਾ ਅਤੇ ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵੱਲੋਂ ਉਨ੍ਹਾਂ ਦੇ ਨੇਤਾਵਾਂ ਨੇ ਬੇਸ਼ੱਕ ਭਾਜਪਾ ਨੂੰ ਸਮਰਥਨ ਦਾ ਐਲਾਨ ਕੀਤਾ ਹੋਵੇ ਪਰ ਆਮ ਸਿੱਖ ਇਸ ਸਭ ਤੋਂ ਬੁਰੀ ਤਰ੍ਹਾਂ ਪ੍ਰੇਸ਼ਾਨ ਦਿਖਾਈ ਦੇ ਰਿਹਾ ਹੈ। ਇਸੇ ਦਾ ਨਤੀਜਾ ਹੈ ਕਿ ਹੁਣ ਕਈ ਸਿੱਖ ਨੇਤਾਵਾਂ ਨੇ ਆਪਣੀਆਂ ਪਾਰਟੀਆਂ ਦੇ ਉਲਟ ਜਾ ਕੇ ਆਪਣੇ ਮਨਚਾਹੇ ਨੇਤਾਵਾਂ ਨੂੰ ਸਮਰਥਨ ਦੇਣ ਦਾ ਐਲਾਨ ਕਰਨਾ ਸ਼ੁਰੂ ਕਰ ਦਿੱਤਾ ਹੈ।
ਇਸ ਮਾਮਲੇ ਬਾਰੇ ਦੱਸਦੇ ਹੋਏ ਦਿੱਲੀ ਦੇ ਕੁਝ ਸਿੱਖ ਵਿਦਵਾਨਾਂ ਨੇ ਦੱਸਿਆ ਕਿ ਅਵਤਾਰ ਸਿੰਘ ਹਿੱਤ ਨੇ ਸਿੱਧੇ ਤੌਰ 'ਤੇ ਕਾਂਗਰਸੀ ਉਮੀਦਵਾਰ ਦਾ ਸਾਥ ਦੇਣ ਦਾ ਐਲਾਨ ਕੀਤਾ ਹੈ। ਇਸੇ ਤਰ੍ਹਾਂ ਜੀ. ਕੇ. ਦੇ ਧੜੇ ਦੇ ਕੁਝ ਸਿੱਖ ਨੇਤਾ 'ਆਪ' ਉਮੀਦਵਾਰਾਂ ਵੱਲ, ਕੁਝ ਕਾਂਗਰਸੀ ਉਮੀਦਵਾਰਾਂ ਦਾ ਸਾਥ ਦੇ ਰਹੇ ਹਨ। ਅਕਾਲੀ ਦਲ (ਬਾਦਲ) ਦੇ ਕੁਝ ਨੇਤਾ ਸਿੱਧੇ ਤੌਰ 'ਤੇ 'ਆਪ' ਉਮੀਦਵਾਰਾਂ ਨੂੰ ਜਿਤਾਉਣ 'ਚ ਲੱਗੇ ਹੋਏ ਹਨ, ਜਦਕਿ ਕੁਝ ਭਾਜਪਾ ਨਾਲ ਚੱਲ ਰਹੇ ਹਨ। ਸਰਨਾ ਵੀ ਭਾਜਪਾ ਤੋਂ ਹੱਥ ਪਿੱਛੇ ਖਿੱਚਦੇ ਦਿਖਾਈ ਦੇ ਰਹੇ ਹਨ। ਹੋ ਸਕਦਾ ਹੈ ਕਿ ਉਹ ਜਲਦ ਹੀ ਕਿਸੇ ਹੋਰ ਪਾਰਟੀ ਦੇ ਹੱਕ 'ਚ ਬਿਆਨ ਜਾਰੀ ਕਰ ਦੇਣ।
ਅਜਿਹੇ 'ਚ ਭਾਵੇਂ ਦੇਸ਼ ਭਰ ਦੀ ਭਾਜਪਾਈ ਅਤੇ ਆਰ. ਐੱਸ. ਐੱਸ. ਦੀ ਤਾਕਤ ਭਾਜਪਾ ਨੇ ਦਿੱਲੀ 'ਚ ਝੋਕ ਕੇ ਰੱਖੀ ਹੋਵੇ ਪਰ ਅੱਜ ਵੀ ਹਵਾ 'ਆਪ' ਦੇ ਹੱਕ 'ਚ ਚੱਲ ਰਹੀ ਹੈ। ਮਾਮਲੇ ਬਾਰੇ ਦਿੱਲੀ ਦੇ ਸਿਆਸੀ ਵਿਦਵਾਨਾਂ ਦਾ ਕਹਿਣਾ ਹੈ ਕਿ ਜਿੰਨੀ ਤਾਕਤ ਭਾਜਪਾ ਨੇ ਦਿੱਲੀ 'ਚ ਲਾਈ ਹੈ, ਉਸ ਨਾਲ ਹੋ ਸਕਦਾ ਹੈ ਕਿ ਉਹ 'ਆਪ' ਦੀਆਂ 10-12 ਸੀਟਾਂ 'ਚ ਸੰਨ੍ਹ ਲਾ ਲਵੇ ਪਰ ਸਰਕਾਰ ਬਣਾਉਣਾ ਭਾਜਪਾ ਲਈ ਸੰਭਵ ਨਹੀਂ ਦਿਸ ਰਿਹਾ ਪਰ ਜੇਕਰ ਸਰਨਾ ਜਾਂ ਕਿਸੇ ਹੋਰ ਵੱਡੇ ਸਿੱਖ ਨੇਤਾ ਨੇ ਭਾਜਪਾ ਨੂੰ ਸਮਰਥਨ ਨਾ ਦੇਣ ਦਾ ਐਲਾਨ ਕੀਤਾ ਤਾਂ ਇਸ ਨਾਲ ਭਾਜਪਾ ਨੂੰ ਵੱਡੇ ਸਿੱਖ ਵੋਟ ਬੈਂਕ ਤੋਂ ਹੱਥ ਧੋਣਾ ਪੈ ਸਕਦਾ ਹੈ।
ਸ਼ਰਾਬ ਦੀ ਸਮੱਗਲਿੰਗ ਰੋਕਣ ਲਈ ਪੰਜਾਬ ਸਰਕਾਰ ਚੁੱਕੇਗੀ ਸਖਤ ਕਦਮ
NEXT STORY