ਰੂਪਨਗਰ (ਸੱਜਣ ਸਿੰਘ ਸੈਣੀ)-ਕਿਸਾਨਾਂ ਵੱਲੋਂ ਛੇ ਮਹੀਨੇ ਖੂਨ-ਪਸੀਨੇ ਨਾਲ ਪੁੱਤਾਂ ਵਾਂਗ ਪਾਲ਼ੀ ਕਣਕ ਦੀ ਫਸਲ ਸਰਕਾਰ ਦੇ ਮਾੜੇ ਪ੍ਰਬੰਧਾਂ ਕਾਰਨ ਰੂਪਨਗਰ ਦੀ ਅਨਾਜ ਮੰਡੀ ’ਚ ਖੁੱਲ੍ਹੇ ਆਸਮਾਨ ਹੇਠ ਮੀਂਹ ’ਚ ਤਰ ਹੁੰਦੀ ਰਹੀ। ਹਾਲਾਂਕਿ ਆੜ੍ਹਤੀਆਂ ਵੱਲੋਂ ਆਪਣੇ ਤੌਰ ’ਤੇ ਤਰਪਾਲਾਂ ਪਾ ਕੇ ਕਣਕ ਬਚਾਉਣ ਦੀ ਕੋਸ਼ਿਸ਼ ਕੀਤੀ ਗਈ ਪਰ ਫਟੀਆਂ ਤਰਪਾਲਾਂ ਮੀਂਹ ਦੇ ਪਾਣੀ ਤੋਂ ਕਣਕ ਨੂੰ ਬਚਾ ਨਹੀਂ ਸਕੀਆਂ।
ਕਣਕ ਦੀਆਂ ਜ਼ਿਆਦਾਤਰ ਖਰੀਦ ਏਜੰਸੀਆਂ ਵੱਲੋਂ ਲਿਫਟਿੰਗ ਨਾ ਕਰਨ ਕਰਕੇ ਮੰਡੀਆਂ ’ਚ ਕਣਕ ਨਾਲ ਭਰੀਆਂ ਬੋਰੀਆਂ ਮੀਂਹ ’ਚ ਭਿੱਜ ਗਈਆਂ। ਮੀਂਹ ਕਾਰਨ ਖਰਾਬ ਹੋਈ ਕਣਕ ਨੂੰ ਲੈ ਕੇ ਜਦੋਂ ਕਿਸਾਨਾਂ ਨਾਲ ਗੱਲ ਕੀਤੀ ਤਾਂ ਉਨ੍ਹਾਂ ਕਿਹਾ ਕਿ ਰਾਤ ਨੂੰ ਮੀਂਹ ਦੇ ਨਾਲ ਚੱਲੀ ਹਨੇਰੀ ਕਾਰਨ ਕਣਕ ਦੀਆਂ ਬੋਰੀਆਂ ’ਤੇ ਪਾਈਆਂ ਤਰਪਾਲਾਂ ਉੱਡ ਗਈਆਂ। ਸਰਕਾਰ ਵੱਲੋਂ ਲਿਫਟਿੰਗ ’ਚ ਕੀਤੀ ਜਾ ਰਹੀ ਦੇਰੀ ਕਾਰਨ ਵੀ ਕਣਕ ਜ਼ਿਆਦਾ ਮਾਤਰਾ ’ਚ ਖਰਾਬ ਹੋ ਗਈ ਹੈ।
ਮੰਡੀ ਇਕ ਕਿਸਾਨ ਨੇ ਖਰੀਦ ਪ੍ਰਬੰਧਾਂ ਦੀ ਪੋਲ ਖੋਲ੍ਹਦਿਆਂ ਕਿਹਾ ਕਿ ਸਰਕਾਰ ਵੱਲੋਂ ਵੱਡੇ-ਵੱਡੇ ਦਾਅਵੇ ਕੀਤੇ ਜਾਂਦੇ ਹਨ ਕਿ ਮੰਡੀਆਂ ’ਚ ਕਣਕ ਦੇ ਖਰੀਦ ਪ੍ਰਬੰਧ ਬਹੁਤ ਵਧੀਆ ਹਨ ਪਰ ਇਹ ਹਕੀਕਤ ’ਚ ਬਹੁਤ ਮਾੜੇ ਹਨ, ਜਿਸ ਦਾ ਖਮਿਆਜ਼ਾ ਲਿਫਟਿੰਗ ਨਾ ਹੋਣ ਕਾਰਨ ਮੀਂਹ ’ਚ ਭਿੱਜੀ ਕਣਕ ਦੇ ਰੂਪ ’ਚ ਅੱਜ ਕਿਸਾਨਾਂ ਨੂੰ ਭੁਗਤਣਾ ਪੈ ਰਿਹਾ ਹੈ।
ਜ਼ਿਕਰਯੋਗ ਹੈ ਕਿ ਸਰਕਾਰ ਵੱਲੋਂ ਇਹ ਨਿਯਮ ਤੈਅ ਕੀਤਾ ਗਿਆ ਹੈ ਕਿ 12 ਫੀਸਦੀ ਨਮੀ ਤੋਂ ਜ਼ਿਆਦਾ ਕਣਕ ਕਿਸਾਨਾਂ ਵੱਲੋਂ ਨਹੀਂ ਵੇਚੀ ਜਾ ਸਕਦੀ ਤੇ ਜੇ ਕੋਈ ਕਿਸਾਨ ਇਸ ਤੋਂ ਵੱਧ ਨਮੀ ਵਾਲੀ ਕਣਕ ਮੰਡੀ ’ਚ ਲੈ ਕੇ ਆਉਂਦਾ ਹੈ ਤਾਂ ਉਸ ਨੂੰ ਵਾਪਸ ਭੇਜ ਕੇ ਪ੍ਰੇਸ਼ਾਨ ਕੀਤਾ ਜਾਂਦਾ ਹੈ ਪਰ ਜਿਸ ਤਰ੍ਹਾਂ ਖੁੱਲ੍ਹੇ ਆਸਮਾਨ ਹੇਠ ਸਰਕਾਰ ਵੱਲੋਂ ਖਰੀਦੀ ਕਰੋੜਾਂ ਰੁਪਏ ਦੀ ਕਣਕ ਪਾਣੀ ’ਚ ਤਰ ਹੋ ਗਈ ਹੈ, ਇਸ ਨੁਕਸਾਨ ਲਈ ਕੌਣ ਜ਼ਿੰਮੇਵਾਰ ਹੋਵੇਗਾ? ਕੀ ਇਸ ਦੀ ਨਮੀ ਦੇ ਕੋਈ ਮਾਪਦੰਡ ਤੈਅ ਕੀਤੇ ਜਾਣਗੇ? ਕੀ ਸਰਕਾਰ ਕੋਲ ਇਸ ਦਾ ਜਵਾਬ ਹੈ।
ਫਿਰ ਨਜ਼ਰ ਆਈ ਕਾਦਰ ਦੀ ਕੁਦਰਤ, ਦੁਆਬੇ ਦੀ ਧਰਤੀ ਤੋਂ ਦਿਸਣ ਲੱਗੇ ਹਿਮਾਚਲ ਦੇ ਪਹਾੜ
NEXT STORY