ਮੁੰਬਈ - ਬਾਲੀਵੁੱਡ ਅਦਾਕਾਰਾ ਸੋਨਾਕਸ਼ੀ ਸਿਨ੍ਹਾ ਨੇ ਹਾਲ ਹੀ ਵਿਚ ਸੋਸ਼ਲ ਮੀਡੀਆ ਰਾਹੀਂ ਆਪਣੇ ਪ੍ਰਸ਼ੰਸਕਾਂ ਨਾਲ 10 ਸਾਲ ਪੁਰਾਣੀਆਂ ਯਾਦਾਂ ਸਾਂਝੀਆਂ ਕੀਤੀਆਂ ਹਨ। ਅਦਾਕਾਰਾ ਨੇ '2026 is the new 2016' ਟ੍ਰੈਂਡ ਦੇ ਤਹਿਤ ਸਾਲ 2016 ਦੇ ਆਪਣੇ ਜੀਵਨ ਦੇ ਅਹਿਮ ਪਲਾਂ 'ਤੇ ਰੌਸ਼ਨੀ ਪਾਈ, ਜੋ ਕਿ ਐਕਸ਼ਨ ਅਤੇ ਰੋਮਾਂਚ ਨਾਲ ਭਰਪੂਰ ਸੀ।
ਐਕਸ਼ਨ ਸਟਾਰ ਵਜੋਂ ਉਭਰੀ ਸੋਨਾਕਸ਼ੀ
ਸੋਨਾਕਸ਼ੀ ਨੇ ਦੱਸਿਆ ਕਿ ਸਾਲ 2016 ਉਸ ਲਈ ਇਕ 'ਐਕਸ਼ਨ ਮੂਵੀ ਸਟਾਰ' ਵਾਲਾ ਅਹਿਸਾਸ ਲੈ ਕੇ ਆਇਆ ਸੀ। ਉਨ੍ਹਾਂ ਨੇ ਫਿਲਮ 'ਅਕੀਰਾ' ਲਈ ਸਖ਼ਤ ਮਿਹਨਤ ਕੀਤੀ ਅਤੇ ਇਸ ਫਿਲਮ ਲਈ ਇਕ ਗੀਤ ਵੀ ਗਾਇਆ ਅਤੇ ਉਸ ਦਾ ਮਿਊਜ਼ਿਕ ਵੀਡੀਓ ਸ਼ੂਟ ਕੀਤਾ। ਇਸ ਤੋਂ ਇਲਾਵਾ, ਫਿਲਮ 'ਫੋਰਸ 2' ਵਿਚ ਉਨ੍ਹਾਂ ਨੇ ਇਕ ਸੀਕ੍ਰੇਟ ਏਜੰਟ ਦੀ ਭੂਮਿਕਾ ਨਿਭਾ ਕੇ ਆਪਣੇ ਐਕਸ਼ਨ ਸਫਰ ਨੂੰ ਜਾਰੀ ਰੱਖਿਆ।
ਗਿਨੀਜ਼ ਵਰਲਡ ਰਿਕਾਰਡ ਅਤੇ ਅੰਤਰਰਾਸ਼ਟਰੀ ਮੰਚ
ਇਸ ਸਾਲ ਸੋਨਾਕਸ਼ੀ ਦੇ ਨਾਂ ਇਕ ਵੱਡੀ ਉਪਲਬਧੀ ਵੀ ਜੁੜੀ, ਜਦੋਂ ਉਨ੍ਹਾਂ ਨੇ ਇਕ ਮਿੰਟ ਵਿਚ ਸਭ ਤੋਂ ਵੱਧ ਨਹੁੰ ਪੇਂਟ ਕਰਨ ਦਾ 'ਗਿਨੀਜ਼ ਵਰਲਡ ਰਿਕਾਰਡ' ਬਣਾਇਆ। ਇਸ ਤੋਂ ਇਲਾਵਾ, ਉਨ੍ਹਾਂ ਨੇ ਗਲੋਬਲ ਸਿਟੀਜ਼ਨ ਸਟੇਜ 'ਤੇ ਮਸ਼ਹੂਰ ਬੈਂਡ 'ਕੋਲਡਪਲੇ' ਤੋਂ ਠੀਕ ਪਹਿਲਾਂ ਪਰਫਾਰਮੈਂਸ ਦਿੱਤੀ ਅਤੇ ਆਪਣੇ ਪਸੰਦੀਦਾ ਹਾਲੀਵੁੱਡ ਅਦਾਕਾਰ ਵਿਲ ਸਮਿਥ ਨਾਲ ਵੀ ਮੁਲਾਕਾਤ ਕੀਤੀ।
ਨਿੱਜੀ ਜ਼ਿੰਦਗੀ ਅਤੇ ਵਿਆਹ ਦੀਆਂ ਯਾਦਾਂ
ਅਦਾਕਾਰਾ ਨੇ ਆਪਣੀਆਂ ਨਿੱਜੀ ਯਾਦਾਂ ਸਾਂਝੀਆਂ ਕਰਦੇ ਹੋਏ ਦੱਸਿਆ ਕਿ 2016 ਵਿਚ ਉਹ ਆਪਣੇ ਦੋਸਤਾਂ ਦੇ ਵਿਆਹਾਂ ਵਿਚ ਰੁੱਝੀ ਹੋਈ ਸੀ। ਉਨ੍ਹਾਂ ਨੇ ਮਜ਼ਾਕੀਆ ਲਹਿਜੇ ਵਿਚ ਕਿਹਾ ਕਿ ਉਸ ਸਮੇਂ ਉਨ੍ਹਾਂ ਉਤੇ 'ਕਲੀਰੇ' ਡਿੱਗੇ ਸਨ ਪਰ ਅਸਲ ਵਿਚ ਵਿਆਹ ਕਰਵਾਉਣ ਲਈ ਉਨ੍ਹਾਂ ਨੂੰ 8 ਲੰਬੇ ਸਾਲਾਂ ਦਾ ਇੰਤਜ਼ਾਰ ਕਰਨਾ ਪਿਆ। ਸੋਨਾਕਸ਼ੀ ਨੇ ਇਹ ਵੀ ਸਪੱਸ਼ਟ ਕੀਤਾ ਕਿ ਉਸ ਸਮੇਂ ਉਹ ਆਪਣੇ ਪਤੀ ਜ਼ਹੀਰ ਇਕਬਾਲ ਨੂੰ ਨਹੀਂ ਮਿਲੀ ਸੀ ਅਤੇ ਉਹ ਪੇਂਟਿੰਗ ਕਰਕੇ ਆਪਣੇ ਸੁਪਨਿਆਂ ਦੇ ਰਾਜਕੁਮਾਰ ਦਾ ਇੰਤਜ਼ਾਰ ਕਰ ਰਹੀ ਸੀ।
ਕਰੀਅਰ ਅਤੇ ਪ੍ਰੋਜੈਕਟ
ਸਾਲ 2016 ਵਿਚ ਸੋਨਾਕਸ਼ੀ ਇੰਨੀ ਮਸ਼ਹੂਰ ਸੀ ਕਿ ਉਹ ਲਗਭਗ ਹਰ ਮਹੀਨੇ ਕਿਸੇ ਨਾ ਕਿਸੇ ਮੈਗਜ਼ੀਨ ਦੇ ਕਵਰ ਪੇਜ 'ਤੇ ਨਜ਼ਰ ਆਉਂਦੀ ਸੀ। ਉਨ੍ਹਾਂ ਨੇ ਉਸੇ ਸਾਲ ਆਪਣੀ ਪਸੰਦੀਦਾ ਫਿਲਮ 'ਨੂਰ' ਦੀ ਸ਼ੂਟਿੰਗ ਵੀ ਸ਼ੁਰੂ ਕੀਤੀ ਸੀ। ਜੇਕਰ ਮੌਜੂਦਾ ਸਮੇਂ ਦੀ ਗੱਲ ਕਰੀਏ, ਤਾਂ ਸੋਨਾਕਸ਼ੀ ਹਾਲ ਹੀ ਵਿਚ ਸੁਧੀਰ ਬਾਬੂ ਦੇ ਨਾਲ ਫਿਲਮ 'ਜਟਾਧਾਰਾ' ਵਿਚ ਨਜ਼ਰ ਆਈ ਹੈ, ਜੋ 7 ਨਵੰਬਰ 2025 ਨੂੰ ਹਿੰਦੀ ਅਤੇ ਤੇਲਗੂ ਭਾਸ਼ਾਵਾਂ ਵਿਚ ਰਿਲੀਜ਼ ਹੋਈ ਸੀ।
ਅੰਡਰਵਰਲਡ ਦੇ ਪਿਆਰ 'ਚ ਪਈ 90 ਦੇ ਦਹਾਕੇ ਦੀ ਖੂਬਸੂਰਤ ਹਸੀਨਾ, ਕੱਟੀ ਸੀ 5 ਸਾਲ ਜੇਲ
NEXT STORY 
