ਚੰਡੀਗੜ੍ਹ (ਰਮਨਜੀਤ)– ਪੰਜਾਬੀ ਗਾਇਕੀ ਨੂੰ ਪਸੰਦ ਕਰਨ ਵਾਲਾ ਹਰ ਸ਼ਖ਼ਸ ਚਮਕੀਲਾ ਤੋਂ ਵਾਕਿਫ਼ ਹੈ। 80 ਤੇ 90 ਦੇ ਦਹਾਕੇ ’ਚ ਦੁਨੀਆ ਭਰ ’ਚ ਵੱਸਣ ਵਾਲੇ ਪੰਜਾਬੀਆਂ ਦੀ ਸੰਗੀਤਕ ਪਿਆਸ ਸ਼ਾਂਤ ਕਰਨ ਵਾਲਾ ਚਮਕੀਲਾ। 28 ਵਰ੍ਹਿਆਂ ਦੀ ਉਮਰ ’ਚ ਇਸ ਸਟਾਰ ਚਮਕੀਲਾ ਦੀ ਗੋਲੀਆਂ ਨਾਲ ਭੁੰਨ ਕੇ ਹੱਤਿਆ ਕਰ ਦਿੱਤੀ ਗਈ ਸੀ। ਨਾਮ ਅੱਤਵਾਦੀਆਂ ਦਾ ਲੱਗਾ ਸੀ ਪਰ ਚਰਚਾਵਾਂ ਹੋਰ ਵੀ ਬਹੁਤ ਸਨ, ਜਿਨ੍ਹਾਂ ’ਚੋਂ ਇਕ ਇਹ ਵੀ ਸੀ ਕਿ ਆਪਣੀ ਗਾਇਕੀ ਦਾ ਧੰਦਾ ਚੌਪਟ ਹੋਣ ਕਾਰਨ ਉਸ ਸਮੇਂ ਦੇ ਹੀ ਕੁਝ ਗਾਇਕਾਂ ਨੇ ਸੁਪਾਰੀ ਦੇ ਕੇ ਇਹ ਕੰਮ ਕਰਵਾਇਆ ਸੀ ਪਰ ਇਹ ਕਤਲ ਦਾ ਮਾਮਲਾ ਕਦੇ ਵੀ ਸੁਲਝਾਇਆ ਨਹੀਂ ਜਾ ਸਕਿਆ।
ਹੁਣ ਚਮਕੀਲਾ ਦੀ ਹੱਤਿਆ ਦੇ ਤਕਰੀਬਨ 34 ਸਾਲਾਂ ਬਾਅਦ ਗਾਇਕੀ ਦੇ ਖੇਤਰ ’ਚ ਠੀਕ ਚਮਕੀਲੇ ਵਾਂਗ ਪ੍ਰਸਿੱਧੀ ਹਾਸਲ ਕਰਨ ਵਾਲੇ ਸ਼ੁਭਦੀਪ ਸਿੰਘ ਉਰਫ਼ ਸਿੱਧੂ ਮੂਸੇ ਵਾਲਾ ਦੀ ਵੀ ਹੱਤਿਆ ਗੋਲੀਆਂ ਦਾ ਮੀਂਹ ਵਰ੍ਹਾ ਕੇ ਕਰ ਦਿੱਤੀ ਗਈ। ਉਹ ਵੀ 28 ਸਾਲ ਦਾ ਸੀ ਤੇ ਆਪਣੇ ਗਾਇਕੀ ਕਰੀਅਰ ਦੀ ਬੁਲੰਦੀ ’ਤੇ ਸੀ। ਹੱਤਿਆ ’ਚ ਕੌਣ-ਕੌਣ ਸ਼ਾਮਲ ਹਨ ਤੇ ਇਸ ਪਿੱਛੇ ਕੀ ਸਾਜ਼ਿਸ਼ ਹੈ, ਪੁਲਸ ਉਸ ਦਾ ਛੇਤੀ ਹੀ ਖ਼ੁਲਾਸਾ ਕਰਨ ਦੀ ਕੋਸ਼ਿਸ਼ ਤੇ ਦਾਅਵਾ ਕਰ ਰਹੀ ਹੈ ਪਰ ਸੋਸ਼ਲ ਮੀਡੀਆ ’ਤੇ ਘੁੰਮ ਰਹੀਆਂ ਪੋਸਟਾਂ ਤੋਂ ਇਹ ਗੱਲ ਇਕ ਵਾਰ ਫਿਰ ਸਪੱਸ਼ਟ ਹੋ ਗਈ ਹੈ ਕਿ ਕਲਾ ਜਗਤ ਦੇ ਅੰਦਰ ਵੀ ਇਕ ‘ਅੰਡਰਵਲਰਡ’ ਕੰਮ ਕਰਦਾ ਹੈ। ਠੀਕ ਉਹੋ-ਜਿਹਾ ਹੀ, ਜਿਹੋ-ਜਿਹਾ ਕਦੇ ਬਾਲੀਵੁੱਡ ’ਚ ਚਰਚਿਤ ਰਿਹਾ ਹੈ।
ਇਹ ਖ਼ਬਰ ਵੀ ਪੜ੍ਹੋ : ਸਿੱਧੂ ਮੂਸੇ ਵਾਲਾ ਦੇ ਸਸਕਾਰ ਤੋਂ ਪਹਿਲਾਂ ਕਰਨ ਔਜਲਾ ਨੇ ਸਾਂਝੀ ਕੀਤੀ ਭਾਵੁਕ ਪੋਸਟ, ਕਿਹਾ- ‘ਸਭ ਕੁਝ ਛੱਡ ਕੇ...’
ਜਿਸ ਤਰ੍ਹਾਂ ਮੂਸੇ ਵਾਲਾ ਦੀ ਹੱਤਿਆ ਤੋਂ ਬਾਅਦ ਸੋਸ਼ਲ ਮੀਡੀਆ ’ਤੇ ਗੈਂਗਸਟਰਾਂ ਦੇ ਇਕ ਪੇਜ ’ਤੇ ਮੂਸੇ ਵਾਲਾ ਦੀ ਹੱਤਿਆ ਦੀ ਜ਼ਿੰਮੇਵਾਰੀ ਲਈ ਗਈ ਤੇ ਮੂਸੇ ਵਾਲਾ ਨੂੰ ਕੁਝ ਲੋਕਾਂ ਦੀ ਹੱਤਿਆ ’ਚ ਭੂਮਿਕਾ ਨਿਭਾਉਣ ਵਾਲਾ ਕਰਾਰ ਦਿੱਤਾ ਗਿਆ, ਠੀਕ ਉਸੇ ਤਰ੍ਹਾਂ ਹੀ ਇਕ ਦੂਜੇ ਗੈਂਗਸਟਰ ਗਰੁੱਪ ਵਲੋਂ ਸੋਸ਼ਲ ਮੀਡੀਆ ਦੇ ਆਪਣੇ ਪੇਜ ’ਤੇ ਪੰਜਾਬੀ ਗਾਇਕ ਮਨਕੀਰਤ ਔਲਖ ਨੂੰ ਸਿੱਧੇ-ਸਿੱਧੇ ਧਮਕਾਉਂਦਿਆਂ ਸਿੱਧੂ ਮੂਸੇ ਵਾਲਾ ਦੀ ਹੱਤਿਆ ਦੀ ਸਾਜ਼ਿਸ਼ ’ਚ ਸ਼ਾਮਲ ਹੋਣ ਦਾ ਦੋਸ਼ ਲਗਾ ਦਿੱਤਾ ਗਿਆ ਹੈ।
ਸੋਸ਼ਲ ਮੀਡੀਆ ਦੀ ਲੜਾਈ ਤੋਂ ਗ੍ਰਿਫ਼ਤਾਰੀ ਤਕ ਵੀ ਪੁੱਜੇ ਗਾਇਕ
2019 ਦੇ ਦੌਰਾਨ ਗਾਇਕ ਐਲੀ ਮਾਂਗਟ ਤੇ ਰੰਮੀ ਰੰਧਾਵਾ ਤੇ ਪ੍ਰਿੰਸ ਰੰਧਾਵਾ ਵਿਚਕਾਰ ਕਈ ਦਿਨਾਂ ਤੱਕ ਸੋਸ਼ਲ ਮੀਡੀਆ ’ਤੇ ਇਕ-ਦੂਜੇ ਨੂੰ ਧਮਕਾਉਣ, ਚੈਲੰਜ ਕਰਨ ਤੇ ਨੀਚਾ ਦਿਖਾਉਣ ਦੀ ਲੜਾਈ ਚੱਲੀ। ਬਾਅਦ ’ਚ ਦੋਵਾਂ ਵਲੋਂ ਇਕ-ਦੂਜੇ ਨੂੰ ਦੇਖ ਲੈਣ ਲਈ ਮੋਹਾਲੀ ’ਚ ਆਹਮੋ-ਸਾਹਮਣਾ ਹੋਣਾ ਤੈਅ ਹੋਇਆ ਤੇ ਆਖਿਰ ਪੁਲਸ ਨੇ ਐਲੀ ਮਾਂਗਟ ਨੂੰ ਗ੍ਰਿਫ਼ਤਾਰ ਕੀਤਾ।
ਧੜਿਆਂ ’ਚ ਵੰਡੇ ਹੋਏ ਨੇ ਕਲਾਕਾਰ
ਕੋਈ ਮੰਨੇ ਜਾਂ ਨਾ ਮੰਨੇ ਪਰ ਜਿਸ ਤਰ੍ਹਾਂ ਕਦੇ ਬਾਲੀਵੁਡ ’ਚ ਸੁਣਿਆ ਕਰਦੇ ਸੀ ਕਿ ਵੱਡੇ ਸਿਤਾਰਿਆਂ ਵਲੋਂ ਆਪਣੇ-ਆਪਣੇ ਧੜੇ ਬਣਾ ਕੇ ਜੂਨੀਅਰ ਕਲਾਕਾਰਾਂ ਨੂੰ ਕੰਟਰੋਲ ਕੀਤਾ ਜਾਂਦਾ ਹੈ ਤੇ ਫ਼ਿਲਮਾਂ ’ਚ ਕੰਮ ਦਿਵਾਉਣ ਲਈ ਧੜੇਬਾਜ਼ੀ ਦਾ ਖਿਆਲ ਰੱਖਿਆ ਜਾਂਦਾ ਹੈ, ਠੀਕ ਉਂਝ ਹੀ ਪੰਜਾਬ ’ਚ ਵੀ ਕਲਾਕਾਰਾਂ, ਖ਼ਾਸ ਕਰਕੇ ਗਾਇਕਾਂ ਦੇ ਧੜੇ ਬਣੇ ਹੋਏ ਹਨ। ਗਾਇਕ ਆਪਣੇ ਵਿਰੋਧੀ ਧੜੇ ਵਾਲੇ ਗਾਇਕਾਂ ਖ਼ਿਲਾਫ਼ ਨਾ ਸਿਰਫ਼ ਸੋਸ਼ਲ ਮੀਡੀਆ ’ਤੇ ਪ੍ਰਚਾਰ ਕਰਦੇ ਹਨ, ਸਗੋਂ ਕਈ ਗਾਣਿਆਂ ਰਾਹੀਂ ਵੀ ਇਕ-ਦੂਜੇ ਨੂੰ ਨੀਵਾਂ ਦਿਖਾਉਣ ਦੀ ਕੋਸ਼ਿਸ਼ ਕਰਦੇ ਰਹਿੰਦੇ ਹਨ।
ਇਹ ਖ਼ਬਰ ਵੀ ਪੜ੍ਹੋ : ਮੌਤ ਤੋਂ ਪਹਿਲਾਂ ਬਿਨਾਂ ਡਰੇ ਸ਼ੇਰ ਵਾਂਗ ਲੜਿਆ ਸਿੱਧੂ ਮੂਸੇ ਵਾਲਾ, ਗੱਡੀ ’ਚ ਸਵਾਰ ਸਾਥੀਆਂ ਨੇ ਕੀਤੇ ਵੱਡੇ ਖ਼ੁਲਾਸੇ
ਇਸ ਸਭ ਦੇ ਪਿੱਛੇ ਹਜ਼ਾਰਾਂ ਕਰੋੜ ਰੁਪਏ ਦੀ ਪੰਜਾਬੀ ਸੰਗੀਤ ਇੰਡਸਟਰੀ ਹੈ, ਜੋ ਕਿ ਪੰਜਾਬ ਤੋਂ ਲੈ ਕੇ ਦੁਨੀਆ ਦੇ ਹਰ ਕੋਨੇ ’ਚ ਵਸੇ ਪੰਜਾਬੀਆਂ ਦੀ ਬਦੌਲਤ ਲਗਾਤਾਰ ਕਾਇਮ ਹੈ ਤੇ ਗਾਇਕਾਂ ਨੂੰ ਉਨ੍ਹਾਂ ਦੀ ਅਤੁਲ ਜਾਇਦਾਦ ਬਣਾਉਣ ਦਾ ਮੌਕਾ ਵੀ ਪ੍ਰਦਾਨ ਕਰਦੀ ਹੈ।
ਚਰਚਾ ਹੈ ਕਿ ਸਿੱਧੂ ਮੂਸੇ ਵਾਲਾ ਪੰਜਾਬ ਦੇ ਗਾਇਕਾਂ ਦੀ ਧੜੇਬਾਜ਼ੀ ਤੋਂ ਵੱਖ ਰਿਹਾ ਤੇ ਆਪਣੇ ਦਮ ’ਤੇ ਸਾਰਿਆਂ ਨੂੰ ਪਿੱਛੇ ਛੱਡਦਾ ਚਲਾ ਗਿਆ। ਉਸ ਦੀ ਦੇਖਾ-ਦੇਖੀ ਕੁਝ ਹੋਰ ਗਾਇਕਾਂ ਵਲੋਂ ਵੀ ਧੜੇਬਾਜ਼ੀ ਤੋਂ ਦੂਰੀ ਬਣਾਉਣ ਦੀ ਕੋਸ਼ਿਸ਼ ਕੀਤੀ ਗਈ, ਜਿਸ ਕਾਰਨ ਧੜਿਆਂ ਨੂੰ ਚਲਾਉਣ ਵਾਲਿਆਂ ਦੀ ਕਮਾਈ ’ਤੇ ਵੀ ਅਸਰ ਪੈਣ ਲੱਗਾ ਸੀ, ਜਿਸ ਕਾਰਨ ਹੀ ਗੈਂਗਸਟਰਾਂ ਨੂੰ ਕੰਮ ’ਤੇ ਲਗਾਇਆ ਗਿਆ।
ਨੋਟ– ਇਸ ਖ਼ਬਰ ’ਤੇ ਤੁਹਾਡੀ ਕੀ ਰਾਏ ਹੈ? ਕੁਮੈਂਟ ਕਰਕੇ ਜ਼ਰੂਰ ਦੱਸੋ।
ਸਿੱਧੂ ਮੂਸੇਵਾਲਾ ਦੇ ਕਤਲ ਦੀ ਵਿਦੇਸ਼ਾਂ ਤੱਕ ਗੂੰਜ, ਲੋਕਾਂ ਕਿਹਾ-ਇਹ ਉਹ ਪੰਜਾਬ ਨਹੀਂ ਜਿਸਨੂੰ ਅਸੀਂ ਜਾਣਦੇ ਹਾਂ
NEXT STORY 
