ਇੰਟਰਨੈਸ਼ਨਲ ਡੈਸਕ- ਅਮਰੀਕਾ ਦੇ ਨਿਊ ਹੈਂਪਸ਼ਾਇਰ ਸੂਬੇ ਤੋਂ ਇਕ ਹੈਰਾਨ ਕਰਨ ਵਾਲੀ ਖ਼ਬਰ ਸਾਹਮਣੇ ਆਈ ਹੈ। ਇੱਥੋਂ ਦੇ 'ਕੌਨਕੋਰਡ ਪਬਲਿਕ ਲਾਇਬ੍ਰੇਰੀ' 'ਚ ਇੱਕ 84 ਸਾਲਾ ਵਿਅਕਤੀ ਜੌਨ ਹੈਨਸਨ ਨੇ ਲਾਇਬ੍ਰੇਰੀ ਤੋਂ 132 ਸਾਲ ਪਹਿਲਾਂ (ਸਤੰਬਰ 1894) ਇਸ਼ੂ ਹੋਈ ਮੈਗਜ਼ੀਨ 'ਦ ਸੈਂਚੁਰੀ ਇਲੱਸਟ੍ਰੇਟਿਡ ਮੰਥਲੀ ਮੈਗਜ਼ੀਨ' ਆਖ਼ਿਰਕਾਰ ਵਾਪਸ ਕਰ ਦਿੱਤੀ ਹੈ। ਇਹ ਮੈਗਜ਼ੀਨ 48,220 ਦਿਨ (ਲਗਭਗ 132 ਸਾਲ) ਲੇਟ ਸੀ। ਲਾਇਬ੍ਰੇਰੀ ਦੇ ਨਿਯਮਾਂ ਮੁਤਾਬਕ ਇਸ ਦਾ ਕੁੱਲ ਜੁਰਮਾਨਾ 12,055 ਡਾਲਰ (ਲਗਭਗ 11.5 ਲੱਖ ਰੁਪਏ) ਬਣਦਾ ਸੀ।
ਅਸਲ 'ਚ ਲਾਇਬ੍ਰੇਰੀ ਨੇ ਹਾਲ ਹੀ 'ਚ ਜੁਰਮਾਨੇ ਮਾਫ਼ ਕਰਨ ਦੀ ਇੱਕ ਵਿਸ਼ੇਸ਼ ਮੁਹਿੰਮ ਸ਼ੁਰੂ ਕੀਤੀ ਸੀ। ਜੁਰਮਾਨਾ ਮੁਆਫ਼ ਹੋਣ ਦੀ ਖ਼ਬਰ ਨੂੰ ਪੜ੍ਹਨ ਤੋਂ ਬਾਅਦ ਜੌਨ ਨੇ ਆਪਣੇ ਘਰ 'ਚ ਕਈ ਸਾਲਾਂ ਤੋਂ ਪਈ ਇਸ 19ਵੀਂ ਸਦੀ ਦੀ ਮੈਗਜ਼ੀਨ ਨੂੰ ਵਾਪਸ ਕਰਨ ਦਾ ਫ਼ੈਸਲਾ ਕੀਤਾ। ਲਾਇਬ੍ਰੇਰੀ ਦੇ 'ਫ਼ਾਈਨ ਫ੍ਰੀਜ਼' ਦੇ ਐਲਾਨ ਕਾਰਨ ਉਸ ਤੋਂ ਕੋਈ ਜੁਰਮਾਨਾ ਨਹੀਂ ਲਿਆ ਗਿਆ।
ਜੌਨ ਹੈਨਸਨ ਅਨੁਸਾਰ, ਉਸ ਨੂੰ ਇਹ ਮੈਗਜ਼ੀਨ 1966 'ਚ ਘਰ ਦੀ ਸ਼ਿਫ਼ਟਿੰਗ ਦੌਰਾਨ ਮਿਲੀ ਸੀ। ਉਸ ਨੂੰ ਇਹ ਨਹੀਂ ਪਤਾ ਕਿ ਇਹ ਉਸ ਦੇ ਘਰ ਤੱਕ ਕਿਵੇਂ ਪਹੁੰਚੀ, ਕਿਉਂਕਿ ਉਸ ਦੇ ਮਾਤਾ-ਪਿਤਾ ਕੋਲ ਵੀ ਲਾਇਬ੍ਰੇਰੀ ਕਾਰਡ ਨਹੀਂ ਸੀ। ਉਸ ਨੇ ਅੰਦਾਜ਼ਾ ਲਗਾਇਆ ਕਿ ਸ਼ਾਇਦ ਇਹ ਉਸ ਨੂੰ ਕਿਸੇ ਨੇ ਤੋਹਫ਼ੇ 'ਚ ਦਿੱਤੀ ਸੀ ਜਾਂ ਉਸ ਨੇ ਸੜਕ ਕਿਨਾਰੇ ਪਈਆਂ ਮੁਫ਼ਤ ਕਿਤਾਬਾਂ 'ਚੋਂ ਚੁੱਕੀ ਸੀ।
ਲਾਇਬ੍ਰੇਰੀ ਨੇ ਸੋਸ਼ਲ ਮੀਡੀਆ 'ਤੇ ਖ਼ੁਸ਼ੀ ਜ਼ਾਹਰ ਕਰਦਿਆਂ ਲਿਖਿਆ ਕਿ ਉਹ ਲੇਟ ਕਿਤਾਬਾਂ ਦੀ ਵਾਪਸੀ ਦੀ ਉਮੀਦ ਕਰ ਰਹੇ ਸਨ, ਪਰ 19ਵੀਂ ਸਦੀ ਦੀ ਕੋਈ ਚੀਜ਼ ਵਾਪਸ ਆਵੇਗੀ, ਇਹ ਉਨ੍ਹਾਂ ਲਈ ਬੇਹੱਦ ਹੈਰਾਨੀਜਨਕ ਸੀ। ਹੁਣ ਲਾਇਬ੍ਰੇਰੀ ਇਸ ਇਤਿਹਾਸਕ ਮੈਗਜ਼ੀਨ ਨੂੰ ਦੁਬਾਰਾ ਸਰਕੂਲੇਸ਼ਨ 'ਚ ਪਾਉਣ ਦੀ ਬਜਾਏ ਇਸ ਨੂੰ ਆਪਣੇ 'ਕੌਨਕੋਰਡ ਰੂਮ' 'ਚ ਡਿਸਪਲੇ 'ਤੇ ਲਗਾਏਗੀ।
ਸੂਡਾਨ 'ਚ ਢਹਿ-ਢੇਰੀ ਹੋਈ ਸੋਨੇ ਦੀ ਖਾਨ, ਘੱਟੋ-ਘੱਟ 67 ਲੋਕਾਂ ਦੀ ਮੌਤ
NEXT STORY 
