ਲੰਡਨ (ਬਿਊਰੋ): ਬ੍ਰਿਟੇਨ 47 ਸਾਲ ਬਾਅਦ ਅੱਜ ਮਤਲਬ ਸ਼ੁੱਕਰਵਾਰ ਨੂੰ ਯੂਰਪੀ ਯੂਨੀਅਨ (EU) ਤੋਂ ਵੱਖ ਹੋ ਜਾਵੇਗਾ। ਯੂਰਪੀ ਯੂਨੀਅਨ ਸੰਸਦ ਨੇ ਬ੍ਰੈਗਜ਼ਿਟ ਸਮਝੌਤੇ ਨੂੰ ਆਪਣੀ ਮਨਜ਼ੂਰੀ ਦੇ ਦਿੱਤੀ ਹੈ। ਇਸ ਦੇ ਤਹਿਤ ਬ੍ਰਿਟੇਨ 31 ਜਨਵਰੀ ਨੂੰ ਰਾਤ 11 ਵਜੇ (ਸਥਾਨਕ ਸਮੇਂ ਮੁਤਾਬਕ) ਯੂਰਪੀ ਯੂਨੀਅਨ ਤੋਂ ਵੱਖ ਹੋ ਜਾਵੇਗਾ। 4 ਸਾਲ ਤੱਕ ਚੱਲੀ ਇਸ ਜਦੋਜਹਿਦ ਦੇ ਬਾਅਦ ਈ.ਯੂ. ਸੰਸਦ ਨੇ 49 ਦੇ ਮੁਕਾਬਲੇ 621 ਵੋਟਾਂ ਦੇ ਬਹੁਮਤ ਨਾਲ ਬ੍ਰੈਗਜ਼ਿਟ ਸਮਝੌਤੇ 'ਤੇ ਮੋਹਰ ਲਗਾ ਦਿੱਤੀ। ਇਸ ਸਮਝੌਤੇ ਨੂੰ ਬ੍ਰਿਟਿਸ਼ ਪ੍ਰਧਾਨ ਮੰਤਰੀ ਬੋਰਿਸ ਜਾਨਸਨ ਨੇ 2019 ਦੇ ਅਖੀਰ ਵਿਚ ਈ.ਯੂ. ਦੇ ਨੇਤਾਵਾਂ ਦੇ ਨਾਲ ਗੱਲਬਾਤ ਦੇ ਬਾਅਦ ਆਖਰੀ ਰੂਪ ਦਿੱਤਾ ਸੀ।
ਬ੍ਰਿਟੇਨ ਨੇ ਜੂਨ-2016 ਵਿਚ ਹੋਏ ਜਨਮਤ ਵਿਚ ਬ੍ਰੈਗਜ਼ਿਟ ਨੂੰ ਮਨਜ਼ੂਰੀ ਦਿੱਤੀ ਸੀ। ਵੋਟਿੰਗ ਦੌਰਾਨ ਭਾਵੁਕ ਕਰਨ ਵਾਲਾ ਮਾਹੌਲ ਰਿਹਾ। ਵੋਟਿੰਗ ਦੇ ਬਾਅਦ ਸਾਂਸਦਾਂ ਨੇ ਬ੍ਰਿਟੇਨ ਦਾ ਰਵਾਇਤੀ ਗੀਤ ਗਾਇਆ। ਈ.ਯੂ. ਪ੍ਰਧਾਨ ਉਰਸੁਲਾ ਵਾਨ ਨੇ ਬ੍ਰਿਟੇਨ ਦੇ ਮਸ਼ਹੂਰ ਲੇਖਕ ਜੋਰਜ ਇਲੀਯਚ ਦੀਆਂ ਲਾਈਨਾਂ ਦੁਹਰਾਉਂਦੇ ਹੋਏ ਕਿਹਾ,''ਵੱਖਰੇ ਹੋਣ ਦੇ ਦੁੱਖ ਵਿਚ ਹੀ ਅਸੀਂ ਆਪਣੇ ਪਿਆਰ ਦੀ ਡੂੰਘਾਈ ਨੂੰ ਦੇਖਦੇ ਹਾਂ।'' ਬ੍ਰਿਟਿਸ਼ ਸਾਂਸਦਾਂ ਨੇ ਕਿਹਾ ਕਿ ਅਸੀਂ ਇਸ ਟੀਮ ਵਿਚ ਵਾਪਸ ਆਵਾਂਗੇ, ਲੌਂਗ ਲਿਵ ਯੂਰਪ। ਭਾਵੇਂਕਿ ਬ੍ਰਿਟੇਨ 2020 ਦੇ ਅਖੀਰ ਤੱਕ ਈ.ਯੂ. ਦੀ ਅਰਥ ਵਿਵਸਥਾ ਵਿਚ ਬਣਿਆ ਰਹੇਗਾ ਪਰ ਉਸ ਦਾ ਨੀਤੀਗਤ ਮਾਮਲਿਆਂ ਵਿਚ ਕੋਈ ਦਖਲ ਨਹੀਂ ਹੋਵੇਗਾ। ਉਹ ਈ.ਯੂ. ਦਾ ਮੈਂਬਰ ਵੀ ਨਹੀਂ ਰਹੇਗਾ।
ਇਸ ਲਈ ਵੱਖ ਹੋਇਆ ਬ੍ਰਿਟੇਨ
ਬ੍ਰਿਟੇਨ ਦੀ ਯੂਰਪੀ ਯੂਨੀਅਨ ਵਿਚ ਕਦੇ ਨਹੀ ਚੱਲੀ। ਇਸ ਦੇ ਉਲਟ ਬ੍ਰਿਟੇਨ ਦੇ ਲੋਕਾਂ ਦੀ ਜ਼ਿੰਦਗੀ 'ਤੇ ਯੂਰਪੀ ਯੂਨੀਅਨ ਦਾ ਕੰਟਰੋਲ ਜ਼ਿਆਦਾ ਹੈ। ਇਹ ਵਪਾਰ ਲਈ ਬ੍ਰਿਟੇਨ 'ਤੇ ਕਈ ਸ਼ਰਤਾਂ ਲਗਾਉਂਦਾ ਹੈ। ਬ੍ਰਿਟੇਨ ਦੇ ਰਾਜਨੀਤਕ ਦਲਾਂ ਨੂੰ ਲੱਗਦਾ ਹੈ ਕਿ ਅਰਬਾਂ ਪੌਂਡ ਸਲਾਨਾ ਮੈਂਬਰਸ਼ਿਪ ਫੀਸ ਦੇਣ ਦੇ ਬਾਅਦ ਵੀ ਬ੍ਰਿਟੇਨ ਨੂੰ ਇਸ ਨਾਲ ਜ਼ਿਆਦਾ ਫਾਇਦਾ ਨਹੀਂ ਹੁੰਦਾ। ਇਸ ਲਈ ਬ੍ਰੈਗਜ਼ਿਟ ਦੀ ਮੰਗ ਉਠੀ।
ਜਾਣੋ ਬ੍ਰੈਗਜ਼ਿਟ ਦੇ ਬਾਰੇ ਵਿਚ
ਬ੍ਰਿਟੇਨ ਦੇ ਈ.ਯੂ. ਤੋਂ ਬਾਹਰ ਹੋਣ ਨੂੰ ਹੀ ਬ੍ਰੈਗਜ਼ਿਟ ਕਿਹਾ ਗਿਆ। ਈ.ਯੂ. ਵਿਚ 28 ਯੂਰਪੀ ਦੇਸ਼ਾਂ ਦੀ ਆਰਥਿਕ ਅਤੇ ਰਾਜਨੀਤਕ ਹਿੱਸੇਦਾਰੀ ਹੈ। ਦੂਜੇ ਵਿਸ਼ਵ ਯੁੱਧ ਦੇ ਬਾਅਦ ਆਰਥਿਕ ਸਹਿਯੋਗ ਵਧਾਉਣ ਲਈ ਈ.ਯੂ. ਬਣਿਆ ਸੀ। ਉਦੇਸ਼ ਇਹ ਸੀ ਕਿ ਜਿਹੜੇ ਦੇਸ਼ ਇਕੱਠੇ ਵਪਾਰ ਕਰਨਗੇ ਉਹ ਆਪਸ ਵਿਚ ਯੁੱਧ ਤੋਂ ਬਚਣਗੇ। ਈ.ਯੂ. ਦੀ ਆਪਣੀ ਮੁਦਰਾ ਯੂਰੋ ਹੈ, 19 ਮੈਂਬਰ ਦੇਸ਼ ਇਸ ਦੀ ਵਰਤੋਂ ਕਰਦੇ ਹਨ। ਬ੍ਰਿਟੇਨ 1973 ਵਿਚ ਈ.ਯੂ. ਨਾਲ ਜੁੜਿਆ ਸੀ।
ਬ੍ਰਿਟੇਨ, ਭਾਰਤ ਅਤੇ ਦੁਨੀਆ ਦੀ ਅਰਥਵਿਵਸਥਾ 'ਤੇ ਪਵੇਗਾ ਇਹ ਅਸਰ
ਬ੍ਰਿਟੇਨ 'ਤੇ ਅਸਰ
ਬ੍ਰੈਗਜ਼ਿਟ ਨਾਲ ਬ੍ਰਿਟਿਸ਼ ਅਰਥ ਵਿਵਸਥਾ ਨੂੰ ਹਰੇਕ ਸਾਲ 53 ਹਜ਼ਾਰ ਕਰੋੜ ਰੁਪਏ ਦਾ ਨੁਕਸਾਨ ਹੋਵੇਗਾ। ਥਿੰਕ ਟੈਂਕ ਰੈਂਡ ਯੂਰਪ ਅਤੇ ਜਰਮਨੀ ਦੇ ਬਾਰਟੇਲਸਮੈਨ ਫਾਊਂਡੇਸ਼ਨ ਦੇ ਤਾਜ਼ਾ ਸ਼ੋਧ ਵਿਚ ਦੱਸਿਆ ਗਿਆ ਹੈ ਕਿ ਈ.ਯੂ. ਤੋਂ ਬਾਹਰ ਨਿਕਲਣ 'ਤੇ ਬ੍ਰਿਟੇਨ ਵਿਚ ਵਸਤੂ ਅਤੇ ਸੇਵਾਵਾਂ 'ਤੇ ਟੈਕਸ ਵਧੇਗਾ। ਇਸ ਨਾਲ ਚੀਜ਼ਾਂ ਮਹਿੰਗੀਆਂ ਹੋਣਗੀਆਂ। ਲੋਕਾਂ ਦੇ ਖਰਚ ਵਧਣਗੇ ਅਤੇ ਆਮਦਨ ਘਟੇਗੀ। ਇਸ ਨਾਲ ਲੋਕਾਂ ਨੂੰ 45 ਹਜ਼ਾਰ ਕਰੋੜ ਦਾ ਨੁਕਸਾਨ ਹੋਵੇਗਾ। ਬ੍ਰਿਟੇਨ ਵਿਚ ਪ੍ਰਤੀ ਵਿਅਕਤੀ ਬੋਝ 68 ਹਜ਼ਾਰ ਰੁਪਏ ਆਵੇਗਾ। ਕੁਝ ਦਿਨ ਪਹਿਲਾਂ ਹੀ ਬਲੂਮਬਰਗ ਨੇ ਰਿਪੋਰਟ ਵਿਚ 2016 ਤੋਂ 2020 ਤੱਕ 18.9 ਲੱਕ ਕਰੋੜ ਦੇ ਨੁਕਸਾਨ ਦਾ ਅਨੁਮਾਨ ਜ਼ਾਹਰ ਕੀਤਾ ਸੀ। ਫਿਲਹਾਲ ਇਹ 12 ਲੱਖ ਕਰੋੜ ਤੱਕ ਪਹੁੰਚਿਆ ਹੈ।
ਦੁਨੀਆ ਦੀ ਅਰਥਵਿਵਸਥਾ 'ਤੇ ਅਸਰ
ਬ੍ਰਿਟੇਨ ਦੇ ਈ.ਯੂ. ਤੋਂ ਵੱਖ ਹੋਣ ਦੇ ਬਾਅਦ ਯੂਰਪੀ ਯੂਨੀਅਨ ਦੀ ਅਰਥਵਿਵਸਥਾ 'ਤੇ ਵੀ ਅਸਰ ਪਵੇਗਾ। ਫਿਲਹਾਲ ਗਲੋਬਲ ਅਰਥਵਿਵਸਥਾ ਵਿਚ ਈ.ਯੂ. ਦੀ ਹਿੱਸੇਦਾਰੀ 22 ਫੀਸਦੀ ਹੈ। ਬ੍ਰਿਟੇਨ ਦੇ ਵੱਖ ਹੋਣ ਨਾਲ ਇਹ 18 ਫੀਸਦੀ ਰਹਿ ਜਾਵੇਗੀ। ਈ.ਯੂ. ਦੀ ਆਬਾਦੀ ਵਿਚ ਵੀ 13 ਫੀਸਦੀ ਦੀ ਗਿਰਾਵਟ ਆਵੇਗੀ। ਉੱਥੇ ਈ.ਯੂ. ਵਿਚ ਜਰਮਨੀ ਦੀ ਜੀ.ਡੀ.ਪੀ. 20 ਫੀਸਦੀ ਤੋਂ ਵੱਧ ਕੇ 25 ਫੀਸਦੀ, ਫਰਾਂਸ ਦੀ 15 ਫੀਸਦੀ ਤੋਂ ਵੱਧ ਕੇ 18 ਫੀਸਦੀ ਹੋ ਜਾਵੇਗੀ। ਅਮਰੀਕਾ ਵੀ ਫਾਇਦੇ ਵਿਚ ਰਹੇਗਾ। ਬ੍ਰਿਟੇਨ ਈ.ਯੂ. ਦੀ ਅਰਥਵਿਵਸਥਾ ਵਿਚ 1.50 ਲੱਖ ਕਰੋੜ ਰੁਪਏ ਦਾ ਯੋਗਦਾਨ ਦਿੰਦਾ ਹੈ। ਈ.ਯੂ. ਹੁਣ ਬ੍ਰਿਟੇਨ ਨੂੰ ਰਿਆਇਤਾਂ ਵੀ ਨਹੀਂ ਦੇਵੇਗਾ।
ਭਾਰਤ ਦੀ ਅਰਥਵਿਵਸਥਾ 'ਤੇ ਅਸਰ
- ਬ੍ਰਿਟੇਨ ਵਿਚ ਨਿਵੇਸ਼ ਕਰਨ ਵਾਲਾ ਭਾਰਤ ਤੀਜਾ ਵੱਡਾ ਦੇਸ਼ ਹੈ। ਬ੍ਰਿਟੇਨ ਵਿਚ 800 ਤੋਂ ਜ਼ਿਆਦਾ ਭਾਰਤੀ ਕੰਪਨੀਆਂ ਹਨ ਜੋ 1.10 ਲੱਖ ਲੋਕਾਂ ਨੂੰ ਰੋਜ਼ਗਾਰ ਦਿੰਦੀਆਂ ਹਨ। ਬ੍ਰਿਟਿਸ਼ ਮੁਦਰਾ ਪੌਂਡ ਦੀ ਕੀਮਤ ਘਟਣ ਨਾਲ ਇਸ ਦੇ ਫਾਇਦੇ 'ਤੇ ਅਸਰ ਪਵੇਗਾ।
- ਜੇਕਰ ਯੂਰਪ ਨੇ ਨਵੇਂ ਨਿਯਮ ਬਣਾਏ ਤਾਂ ਭਾਰਤੀ ਕੰਪਨੀਆਂ ਨੂੰ ਨਵੇਂ ਸਮਝੌਤੇ ਕਰਨੇ ਪੈਣਗੇ। ਇਸ ਨਾਲ ਖਰਚ ਵਧੇਗਾ ਅਤੇ ਭਾਰਤ ਨੂੰ ਵੱਖ-ਵੱਖ ਦੇਸ਼ਾਂ ਦੇ ਨਿਯਮ-ਕਾਨੂੰਨਾਂ ਨਾਲ ਜੂਝਣਾ ਪਵੇਗਾ।
- ਬ੍ਰਿਟੇਨ ਨਾਲ ਮੁਕਤ ਵਪਾਰ ਸਮਝੌਤਾ ਹੋ ਸਕਦਾ ਹੈ। ਇਸ ਨਾਲ ਭਾਰਤ ਦਾ ਨਿਰਯਾਤ ਵਧਣ ਦਾ ਅਨੁਮਾਨ ਹੈ।
- ਬ੍ਰਿਟੇਨ ਸੈਂਟਰਲ ਮਾਰਕੀਟ ਹੈ। ਪੁਰਤਗਾਲ,ਗ੍ਰੀਸ ਜਿਹੇ ਕਈ ਦੇਸ਼ ਉੱਥੋ ਸਮਾਨ ਲਿਜਾਂਦੇ ਹਨ। ਬ੍ਰਿਟੇਨ ਦੇ ਨਾਲ ਐੱਫ.ਟੀ.ਏ. ਹੋਣ ਨਾਲ ਭਾਰਤ ਨੂੰ ਵਿਸ਼ਾਲ ਬਾਜ਼ਾਰ ਮਿਲੇਗਾ।
ਵੁਹਾਨ 'ਚ ਸੜਕ 'ਤੇ ਚੱਲ ਰਹੇ ਸ਼ਖਸ ਦੀ ਅਚਾਨਕ ਮੌਤ, ਲੋਕਾਂ 'ਚ ਦਹਿਸ਼ਤ
NEXT STORY 
