ਫਰਿਜ਼ਨੋ, (ਗੁਰਿੰਦਰਜੀਤ ਨੀਟਾ ਮਾਛੀਕੇ)- ਅਮਰੀਕਾ ਵਿਚ ਕੋਰੋਨਾ ਵਾਇਰਸ ਮਹਾਮਾਰੀ ਦੇ ਇਲਾਜ ਲਈ ਫਾਈਜ਼ਰ ਦੇ ਟੀਕੇ ਨੂੰ ਮਨਜ਼ੂਰੀ ਮਿਲਣ ਤੋਂ ਬਾਅਦ ਟੀਕਾਕਰਣ ਦੀ ਪ੍ਰਕਿਰਿਆ ਸ਼ੁਰੂ ਹੋ ਗਈ ਹੈ। ਇਸ ਲਈ ਕੈਲੀਫੋਰਨੀਆ ਸੂਬੇ ਦੀ ਫਰਿਜ਼ਨੋ ਕਾਉਂਟੀ ਵੀ ਕੋਵਿਡ-19 ਟੀਕਿਆਂ ਦੇ ਆਉਣ ਦੀ ਤਿਆਰੀ ਕਰ ਰਹੀ ਹੈ। ਇਸ ਸੰਬੰਧੀ ਜਨਤਕ ਸਿਹਤ ਵਿਭਾਗ ਟੀਕੇ ਵੰਡਣ ਲਈ ਕਮਿਊਨਿਟੀ ਅਧਾਰਤ ਸੰਸਥਾਵਾਂ ਨਾਲ ਮਿਲ ਕੇ ਕੰਮ ਕਰੇਗਾ।
ਫਰਿਜ਼ਨੋ ਦੇ ਸਿਹਤ ਅਧਿਕਾਰੀਆਂ ਦੁਆਰਾ ਕੈਲੀਫੋਰਨੀਆਂ ਦੇ ਜਨ ਸਿਹਤ ਵਿਭਾਗ ਨੂੰ ਦੱਸੀ ਗਈ ਯੋਜਨਾ ਅਨੁਸਾਰ ਪੈਰਾ ਮੈਡੀਕਲ ਅਤੇ ਫਾਇਰ ਏਜੰਸੀਆਂ ਦੇ ਨਾਲ ਕਈ ਪ੍ਰਮੁੱਖ ਹਸਪਤਾਲ ਜਿਵੇਂ ਕਿ ਕਮਿਊਨਿਟੀ ਰੀਜਨਲ ਮੈਡੀਕਲ ਸੈਂਟਰ, ਕਾਇਸਰ, ਸੇਂਟ ਐਗਨੇਸ ਅਤੇ ਐਡਵੈਂਟਿਸਟ ਹੈਲਥ ਵਰਗੇ ਵੱਡੇ ਹਸਪਤਾਲਾਂ ਨੂੰ ਟੀਕੇ ਦੀ ਪਹਿਲੀ ਖੇਪ ਮਿਲੇਗੀ ਜਿਸ ਨਾਲ ਕਿ ਕਈ ਕਮਿਊਨਿਟੀ ਮੈਡੀਕਲ ਪ੍ਰੋਵਾਈਡਰ ਜਿਵੇਂ ਕਿ ਪੀਚਵੁੱਡ ਮੈਡੀਕਲ ਸਮੂਹ, ਯੂਨਾਈਟਿਡ ਹੈਲਥ ਸੈਂਟਰ ਅਤੇ ਹੋਰ ਮੈਡੀਕਲ ਸਹੂਲਤਾਂ ਆਪਣੇ ਕਰਮਚਾਰੀਆਂ ਨੂੰ ਟੀਕਾ ਲਗਾਉਣਗੇ। ਫਰਿਜ਼ਨੋ ਕਾਉਂਟੀ ਨੂੰ 15 ਦਸੰਬਰ ਦੇ ਨੇੜ ਕੋਰੋਨਾ ਟੀਕੇ ਦੀਆਂ ਦੋ ਵਾਰ ਮਿਲਣ ਵਾਲੀਆਂ ਖੁਰਾਕਾਂ ਵਿਚੋਂ 7,800 ਦੀ ਪਹਿਲੀ ਖੇਪ ਮਿਲਣ ਦੀ ਉਮੀਦ ਹੈ ਜਦਕਿ ਦੂਜੀ ਵੱਡੀ ਸਪਲਾਈ ਮਹੀਨੇ ਦੇ ਅੰਤ ਮਿਲਣ ਦੀ ਸੰਭਾਵਨਾ ਹੈ।
ਟੀਕੇ ਸੰਬੰਧੀ ਗਵਰਨਰ ਗੈਵਿਨ ਨਿਊਸਮ ਦੇ ਟਵੀਟ ਅਨੁਸਾਰ ਕੁਝ ਟੀਕੇ ਹਫਤੇ ਦੇ ਅਖੀਰ ਤੱਕ ਰਾਜ ਵਿਚ ਪਹੁੰਚ ਸਕਦੇ ਹਨ। ਫਰਿਜ਼ਨੋ ਦੇ ਜ਼ਿਆਦਾਤਰ ਹਸਪਤਾਲਾਂ ਨੂੰ ਮਿਲਣ ਵਾਲੇ ਟੀਕਿਆਂ ਦੀ ਜਾਣਕਾਰੀ ਨਹੀਂ ਹੈ ਅਤੇ ਟੀਕੇ ਦੀਆਂ ਮਿਲਣ ਵਾਲੀਆਂ ਪਹਿਲੀਆਂ 7,800 ਖੁਰਾਕਾਂ ਹਸਪਤਾਲਾਂ ਦੇ ਸਾਰੇ ਕਰਮਚਾਰੀਆਂ ਲਈ ਕਾਫ਼ੀ ਨਹੀਂ ਹੋਣਗੀਆਂ ਕਿਉਂਕਿ ਇਕੱਲੇ ਕਮਿਊਨਿਟੀ ਮੈਡੀਕਲ ਸੈਂਟਰਾਂ ਦੇ ਹਸਪਤਾਲਾਂ ਵਿੱਚ ਹੀ ਲੱਗਭਗ 8,900 ਲੋਕ ਕੰਮ ਕਰਦੇ ਹਨ ।
ਇਸ ਦੇ ਨਾਲ ਹੀ ਸੇਂਟ ਐਗਨੇਸ ਮੈਡੀਕਲ ਸੈਂਟਰ ਵਿੱਚ ਵੀ ਤਕਰੀਬਨ 2,900 ਕਰਮਚਾਰੀ ਅਤੇ ਲਗਭਗ 800 ਦੇ ਕਰੀਬ ਮੈਡੀਕਲ ਕਾਮੇ ਹਨ। ਇਸ ਵੇਲੇ ਕਾਉਂਟੀ ਦੇ ਸੇਂਟ ਐਗਨੇਸ ਹਸਪਤਾਲ ਵਿਚਲੇ ਸਿਹਤ ਕਾਮੇ ਜੋ ਕਿ ਸ਼ੱਕੀ ਜਾਂ ਪੁਸ਼ਟੀ ਕੀਤੇ ਹੋਏ ਕੋਰੋਨਾ ਦੇ ਮਰੀਜ਼ਾਂ ਨਾਲ ਕੰਮ ਕਰ ਰਹੇ ਹਨ, ਉਹ ਟੀਕਾਕਰਣ ਲਈ ਪਹਿਲ ਵਿਚ ਹਨ। ਸੈਂਟ ਐਗਨੇਸ ਹਸਪਤਾਲ ਦੇ ਲਗਭਗ 145 ਸਟਾਫ਼ ਮੈਂਬਰ ਸ਼ੁੱਕਰਵਾਰ ਨੂੰ ਇਕਾਂਤਵਾਸ ਕੀਤੇ ਗਏ ਹਨ ਕਿਉਂਕਿ ਉਨ੍ਹਾਂ ਵਿਚੋਂ ਲਗਭਗ 90 ਫ਼ੀਸਦੀ ਕਾਮਿਆਂ ਨੇ ਕੋਵਿਡ-19 ਲਈ ਸਕਾਰਾਤਮਕ ਟੈਸਟ ਕੀਤੇ ਹਨ।
ਕੈਨੇਡਾ ਪੁੱਜੀ ਕੋਰੋਨਾ ਟੀਕਿਆਂ ਦੀ ਪਹਿਲੀ ਖੇਪ, ਪੀ. ਐੱਮ. ਨੇ ਸਾਂਝੀ ਕੀਤੀ ਤਸਵੀਰ
NEXT STORY 
