ਇੰਟਰਨੈਸ਼ਨਲ ਡੈਸਕ- ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਇਰਾਨ ਨੂੰ ‘ਸਟੋਨ ਏਜ’ ਭਾਵ ਪੱਥਰ ਯੁੱਗ ’ਚ ਪਹੁੰਚਾ ਦੇਣ ਵਾਲੇ ਬਿਆਨ ਨੇ ਪੂਰੀ ਦੁਨੀਆ ’ਚ ਹਲਚਲ ਮਚਾ ਦਿੱਤੀ ਹੈ। ਮਾਹਿਰਾਂ ਅਨੁਸਾਰ, ਕਿਸੇ ਦੇਸ਼ ਨੂੰ ‘ਸਟੋਨ ਏਜ’ ’ਚ ਪਹੁੰਚਾਉਣ ਦਾ ਮਤਲਬ ਉਸ ਦੇ ਆਧੁਨਿਕ ਬੁਨਿਆਦੀ ਢਾਂਚੇ ਜਿਵੇਂ ਕਿ ਊਰਜਾ, ਸੰਚਾਰ, ਉਦਯੋਗ ਅਤੇ ਮੈਡੀਕਲ ਸੰਸਥਾਵਾਂ ਨੂੰ ਪੂਰੀ ਤਰ੍ਹਾਂ ਤਬਾਹ ਕਰਨਾ ਹੁੰਦਾ ਹੈ। ਹੁਣ ਵੱਡਾ ਸਵਾਲ ਇਹ ਹੈ ਕਿ ਕੀ ਸੱਚਮੁੱਚ ਅਮਰੀਕਾ ਇਸ ਰਣਨੀਤੀ ਨੂੰ ਅਪਣਾਏਗਾ। ਮਾਹਿਰਾਂ ਮੁਤਾਬਕ ਇਸ ਤਰ੍ਹਾਂ ਦੀ ਬਿਆਨਬਾਜ਼ੀ ਇਹ ਸੰਕੇਤ ਦਿੰਦੀ ਹੈ ਕਿ ਹਮਲਾ ਸਿਰਫ਼ ਸ਼ਾਸਨ ’ਤੇ ਨਹੀਂ, ਸਗੋਂ ਪੂਰੇ ਸਮਾਜ ’ਤੇ ਹੋ ਸਕਦਾ ਹੈ, ਜੋ ਕਿ ਬੇਹੱਦ ਚਿੰਤਾਜਨਕ ਹੈ।
ਕੀ ਨਾਗਰਿਕ ਢਾਂਚੇ ਨੂੰ ਤਬਾਹ ਕਰੇਗਾ ਅਮਰੀਕਾ ?
ਇਹ ਬਿਆਨ ਅਜਿਹੇ ਸਮੇਂ ਆਇਆ ਹੈ, ਜਦੋਂ 28 ਫਰਵਰੀ ਤੋਂ ਸ਼ੁਰੂ ਹੋਈ ਅਮਰੀਕਾ-ਇਜ਼ਰਾਈਲ ਅਤੇ ਇਰਾਨ ਵਿਚਾਲੇ ਜੰਗ ਦੂਜੇ ਮਹੀਨੇ ’ਚ ਦਾਖਲ ਹੋ ਚੁੱਕੀ ਹੈ। ਇਸ ਜੰਗ ਵਿਚ ਹੁਣ ਤੱਕ 2,000 ਤੋਂ ਵੱਧ ਇਰਾਨੀ ਮਾਰੇ ਜਾ ਚੁੱਕੇ ਹਨ ਅਤੇ ਹਸਪਤਾਲ, ਸਕੂਲ, ਯੂਨੀਵਰਸਿਟੀ ਤੇ ਫਾਰਮਾ ਫੈਕਟਰੀਆਂ ਸਮੇਤ ਹਜ਼ਾਰਾਂ ਨਾਗਰਿਕ ਟਿਕਾਣੇ ਪ੍ਰਭਾਵਿਤ ਹੋਏ ਹਨ। ਆਕਸਫੋਰਡ ਯੂਨੀਵਰਸਿਟੀ ਦੀ ਪ੍ਰੋਫੈਸਰ ਜਨੀਨਾ ਡਿਲ ਦੇ ਹਵਾਲੇ ਨਾਲ ਇਕ ਰਿਪੋਰਟ ’ਚ ਕਿਹਾ ਗਿਆ ਹੈ ਕਿ ਜੇ ਇਸ ਤਰ੍ਹਾਂ ਦੇ ਹਮਲੇ ਨਾਗਰਿਕ ਢਾਂਚੇ ਨੂੰ ਨਿਸ਼ਾਨਾ ਬਣਾਉਂਦੇ ਹਨ, ਤਾਂ ਇਹ ਅੰਤਰਰਾਸ਼ਟਰੀ ਮਨੁੱਖੀ ਕਾਨੂੰਨ ਦੀ ਗੰਭੀਰ ਉਲੰਘਣਾ ਹੋਵੇਗੀ। ਅੰਤਰਰਾਸ਼ਟਰੀ ਰੈੱਡ ਕ੍ਰਾਸ ਕਮੇਟੀ (ਆਈ.ਸੀ.ਆਰ.ਸੀ.) ਵੀ ਜੰਗ ਦੌਰਾਨ ਨਾਗਰਿਕ ਟਿਕਾਣਿਆਂ ’ਤੇ ਹਮਲੇ ਨੂੰ ਗਲਤ ਮੰਨਦੀ ਹੈ।
ਅਮਰੀਕਾ ਦੀ ਪੁਰਾਣੀ ਨੀਤੀ ਫਿਰ ਚਰਚਾ ’ਚ
‘ਸਟੋਨ ਏਜ’ ਵਰਗੀ ਭਾਸ਼ਾ ਨਵੀਂ ਨਹੀਂ ਹੈ। ਇਹ ਵਾਕ ਅਮਰੀਕੀ ਹਵਾਈ ਫੌਜ ਦੇ ਅਧਿਕਾਰੀ ਕਰਟਿਸ ਲੇਮੇ ਨਾਲ ਜੁੜਿਆ ਹੋਇਆ ਹੈ, ਜਿਨ੍ਹਾਂ ਨੇ 1965 ’ਚ ਵੀਅਤਨਾਮ ਜੰਗ ਦੌਰਾਨ ਕਿਹਾ ਸੀ ਕਿ ਦੁਸ਼ਮਣ ਨੂੰ ਸਟੋਨ ਏਜ ਵਿਚ ਧੱਕ ਦਿੱਤਾ ਜਾਵੇਗਾ। ਇਤਿਹਾਸ ਵਿਚ ਅਮਰੀਕਾ ਨੇ ਕਈ ਜੰਗਾਂ ਵਿਚ ਵਿਆਪਕ ਬੰਬਾਰੀ ਕੀਤੀ ਹੈ, ਜਿਨ੍ਹਾਂ ’ਚ ਵੀਅਤਨਾਮ ਜੰਗ ਪ੍ਰਮੁੱਖ ਹੈ। 1972 ਵਿਚ ਰਾਸ਼ਟਰਪਤੀ ਰਿਚਰਡ ਨਿਕਸਨ ਨੇ ‘ਕ੍ਰਿਸਮਸ ਬਾਂਬਿੰਗ’ ਮੁਹਿੰਮ ਚਲਾਈ ਸੀ, ਜਿਸ ਵਿਚ ਉੱਤਰੀ ਵੀਅਤਨਾਮ ਦੇ ਸ਼ਹਿਰਾਂ ’ਤੇ ਭਾਰੀ ਹਮਲੇ ਕੀਤੇ ਗਏ ਸਨ। ਇਸ ਜੰਗ ’ਚ ਲੱਖਾਂ ਫੌਜੀਆਂ ਅਤੇ ਨਾਗਰਿਕਾਂ ਦੀ ਜਾਨ ਗਈ ਸੀ।
ਇਹ ਵੀ ਪੜ੍ਹੋੋ- 'ਸਰਪੰਚ ਸਾਬ੍ਹ' 'ਤੇ ਲੱਗੇਗਾ Ban ! ਲਗਾਤਾਰ ਦੋ ਮੈਚਾਂ 'ਚ ਜਿੱਤ ਦੇ ਬਾਵਜੂਦ 'ਪੰਜਾਬ' ਲਈ ਖੜ੍ਹੀ ਹੋਈ ਵੱਡੀ ਮੁਸੀਬਤ
ਗਲਫ਼ ਵਾਰ ਅਤੇ ਹੋਰ ਜੰਗਾਂ
1991 ਦੀ ਗਲਫ਼ ਵਾਰ ਦੇ ਦੌਰਾਨ ਅਮਰੀਕੀ ਵਿਦੇਸ਼ ਮੰਤਰੀ ਜੇਮਸ ਬੇਕਰ ਨੇ ਇਰਾਕ ਨੂੰ ਚਿਤਾਵਨੀ ਦਿੱਤੀ ਸੀ ਕਿ ਜੇ ਉਸ ਨੇ ਕੁਵੈਤ ਤੋਂ ਫ਼ੌਜ ਨਹੀਂ ਹਟਾਈ, ਤਾਂ ਉਸ ਨੂੰ ‘ਸਟੋਨ ਏਜ’ ਵਿਚ ਪਹੁੰਚਾ ਦਿੱਤਾ ਜਾਵੇਗਾ। ਇਸੇ ਤਰ੍ਹਾਂ 11 ਸਤੰਬਰ 2001 ਦੇ ਅੱਤਵਾਦੀ ਹਮਲਿਆਂ ਤੋਂ ਬਾਅਦ ਅਮਰੀਕਾ ਨੇ ‘ਵਾਰ ਆਨ ਟੈਰਰ’ ਸ਼ੁਰੂ ਕੀਤੀ। ਉਸ ਦੌਰਾਨ ਪਾਕਿਸਤਾਨ ਦੇ ਤਤਕਾਲੀ ਰਾਸ਼ਟਰਪਤੀ ਪ੍ਰਵੇਜ਼ ਮੁਸ਼ਰਫ਼ ਨੂੰ ਵੀ ਕਥਿਤ ਤੌਰ ’ਤੇ ਇਸੇ ਤਰ੍ਹਾਂ ਦੀ ਧਮਕੀ ਦਿੱਤੀ ਗਈ ਸੀ।
ਕਾਰਪੇਟ ਬੰਬਾਰੀ ਦਾ ਇਤਿਹਾਸ
ਦੂਜੀ ਵਿਸ਼ਵ ਜੰਗ ਵਿਚ ਅਮਰੀਕਾ ਨੇ ਜਾਪਾਨੀ ਸ਼ਹਿਰਾਂ ’ਤੇ ਵਿਆਪਕ ਕਾਰਪੇਟ ਬੰਬਾਰੀ ਕੀਤੀ, ਜਿਸ ’ਚ ਲੱਖਾਂ ਲੋਕ ਮਾਰੇ ਗਏ। ਕੋਰੀਆਈ ਜੰਗ (1950-53) ਦੇ ਦੌਰਾਨ ਉੱਤਰੀ ਕੋਰੀਆ ਦੇ ਜ਼ਿਆਦਾਤਰ ਸ਼ਹਿਰ ਅਤੇ 80 ਫੀਸਦੀ ਤੋਂ ਵੱਧ ਇਮਾਰਤਾਂ ਤਬਾਹ ਹੋ ਗਈਆਂ, ਜਦਕਿ ਬਿਜਲੀ ਉਤਪਾਦਨ ਦਾ 95 ਫੀਸਦੀ ਹਿੱਸਾ ਖ਼ਤਮ ਹੋ ਗਿਆ ਸੀ। ਹਾਲਾਂਕਿ ਬਾਅਦ ਦੇ ਸਾਲਾਂ ਵਿਚ ਅਮਰੀਕਾ ਨੇ ਸਟੀਕ ਹਥਿਆਰਾਂ ਦੀ ਵਰਤੋਂ ’ਤੇ ਜ਼ੋਰ ਦਿੱਤਾ ਪਰ ਕਈ ਵਿਸ਼ਲੇਸ਼ਕਾਂ ਦਾ ਮੰਨਣਾ ਹੈ ਕਿ ਵੱਡੇ ਪੱਧਰ ’ਤੇ ਕੀਤੀ ਗਈ ਬੰਬਾਰੀ ਨਾਲ ਵਿਆਪਕ ਨੁਕਸਾਨ ਅੱਜ ਵੀ ਹੁੰਦਾ ਹੈ।
ਮੌਜੂਦਾ ਸੰਘਰਸ਼ ਮਾਨਵਤਾ ਲਈ ਗੰਭੀਰ ਚੁਣੌਤੀ
ਇਰਾਨ ਵਿਸ਼ਵ ਦੀਆਂ ਸਭ ਤੋਂ ਪ੍ਰਾਚੀਨ ਸੱਭਿਅਤਾਵਾਂ ’ਚੋਂ ਇਕ ਰਿਹਾ ਹੈ, ਜਿਸ ਨੇ ਹਜ਼ਾਰਾਂ ਸਾਲ ਪਹਿਲਾਂ ਹੀ ਵਿਗਿਆਨ, ਮੈਡੀਕਲ, ਮੁਦਰਾ ਪ੍ਰਣਾਲੀ ਅਤੇ ਫੌਜੀ ਸੰਗਠਨ ਵਿਚ ਮਹੱਤਵਪੂਰਨ ਯੋਗਦਾਨ ਦਿੱਤੇ ਸਨ। ਅਜਿਹੇ ਦੇਸ਼ ਨੂੰ “ਸਟੋਨ ਏਜ” ਵਿਚ ਪਹੁੰਚਾਉਣ ਦੀ ਗੱਲ ਅੰਤਰਰਾਸ਼ਟਰੀ ਪੱਧਰ ’ਤੇ ਆਲੋਚਨਾ ਦਾ ਕਾਰਨ ਬਣ ਰਹੀ ਹੈ। ਇਰਾਨ ਨੂੰ ਲੈ ਕੇ ਟਰੰਪ ਦੀ “ਸਟੋਨ ਏਜ” ਵਾਲੀ ਚਿਤਾਵਨੀ ਨੇ ਨਾ ਸਿਰਫ਼ ਮੌਜੂਦਾ ਸੰਘਰਸ਼ ਨੂੰ ਹੋਰ ਗੰਭੀਰ ਬਣਾ ਦਿੱਤਾ ਹੈ, ਸਗੋਂ ਅਮਰੀਕਾ ਦੀਆਂ ਦਹਾਕਿਆਂ ਪੁਰਾਣੀਆਂ ਫ਼ੌਜੀ ਰਣਨੀਤੀਆਂ ਅਤੇ ਉਨ੍ਹਾਂ ਦੇ ਪ੍ਰਭਾਵ ਨੂੰ ਵੀ ਮੁੜ ਬਹਿਸ ਦੇ ਕੇਂਦਰ ਵਿਚ ਲਿਆ ਦਿੱਤਾ ਹੈ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਅਜਿਹੀ ਭਾਸ਼ਾ ਅਤੇ ਰਣਨੀਤੀ ਅੰਤਰਰਾਸ਼ਟਰੀ ਕਾਨੂੰਨਾਂ ਅਤੇ ਮਾਨਵਤਾ ਦੋਵਾਂ ਲਈ ਗੰਭੀਰ ਚੁਣੌਤੀ ਬਣ ਸਕਦੀ ਹੈ।
ਤਾਜ਼ਾ ਤੇ ਵੱਡੀਆਂ ਖ਼ਬਰਾਂ ਸਭ ਤੋਂ ਪਹਿਲਾਂ ਪੜ੍ਹਨ ਲਈ ਜੁਆਇਨ ਕਰੋ ‘ਜਗ ਬਾਣੀ’ ਦਾ ਵਟਸਐਪ ਚੈਨਲ
👇Join us on Whatsapp channel👇
https://whatsapp.com/channel/0029Va94hsaHAdNVur4L170e
ਈਰਾਨ 'ਚ 'ਤਖ਼ਤਾਪਲਟ' ਦੀ ਗੱਲ ਕਰਨ ਵਾਲੇ ਟਰੰਪ ਦੀ ਕੁਰਸੀ ਖ਼ਤਰੇ 'ਚ! ਵ੍ਹਾਈਟ ਹਾਊਸ 'ਚ ਹਲਚਲ ਸ਼ੁਰੂ
NEXT STORY 
