ਇੰਟਰਨੈਸ਼ਨਲ ਡੈਸਕ : ਅੰਤਰਰਾਸ਼ਟਰੀ ਮੁਦਰਾ ਫੰਡ (IMF) ਨੇ ਸਾਲ 2026 ਲਈ ਚੀਨ ਦੀ ਆਰਥਿਕ ਵਿਕਾਸ ਦਰ ਦੇ ਅਨੁਮਾਨ ਵਿੱਚ 0.1 ਫ਼ੀਸਦੀ ਦੀ ਕਟੌਤੀ ਕਰਦਿਆਂ ਇਸ ਨੂੰ 4.5 ਫ਼ੀਸਦੀ ਕਰ ਦਿੱਤਾ ਹੈ। ਸੰਸਥਾ ਨੇ ਚੇਤਾਵਨੀ ਦਿੱਤੀ ਹੈ ਕਿ ਮਜ਼ਬੂਤ ਬਰਾਮਦਾਂ ਹੁਣ ਘਰੇਲੂ ਮੰਗ ਵਿੱਚ ਆਈ ਲਗਾਤਾਰ ਕਮੀ ਦੀ ਭਰਪਾਈ ਕਰਨ ਲਈ ਕਾਫ਼ੀ ਨਹੀਂ ਹਨ।
IMF ਦੀ ਤਾਜ਼ਾ 'ਵਰਲਡ ਇਕਨਾਮਿਕ ਆਊਟਲੁੱਕ' ਰਿਪੋਰਟ ਮੁਤਾਬਕ, ਇਹ ਨਵਾਂ ਅਨੁਮਾਨ ਜੁਲਾਈ ਵਿੱਚ ਲਗਾਏ ਗਏ 4.6 ਫ਼ੀਸਦੀ ਦੇ ਅਨੁਮਾਨ ਤੋਂ ਘੱਟ ਹੈ ਅਤੇ ਇਹ ਬੀਜਿੰਗ ਦੇ ਆਪਣੇ ਸਲਾਨਾ ਵਿਕਾਸ ਟੀਚੇ (4.5 ਤੋਂ 5 ਫ਼ੀਸਦੀ) ਦੇ ਹੇਠਲੇ ਪੱਧਰ 'ਤੇ ਹੈ। ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਰੀਅਲ ਅਸਟੇਟ ਖੇਤਰ ਦੇ ਸੰਕਟ ਅਤੇ ਘਟਦੇ ਨਿਵੇਸ਼ ਕਾਰਨ ਘਰੇਲੂ ਖਪਤ ਵਿੱਚ ਸੁਸਤੀ ਆਈ ਹੈ, ਜਿਸ ਨੂੰ ਮਜ਼ਬੂਤ ਬਰਾਮਦਾਂ ਸਿਰਫ਼ ਅੰਸ਼ਕ ਤੌਰ 'ਤੇ ਹੀ ਸੰਭਾਲ ਸਕੀਆਂ ਹਨ।
ਇਸ ਤੋਂ ਇਲਾਵਾ, ਵਿਸ਼ਵ ਪੱਧਰ 'ਤੇ ਤੇਲ ਦੀਆਂ ਵਧਦੀਆਂ ਕੀਮਤਾਂ ਵੀ ਆਰਥਿਕ ਗਤੀਵਿਧੀਆਂ 'ਤੇ ਬੋਝ ਪਾ ਰਹੀਆਂ ਹਨ। IMF ਅਨੁਸਾਰ 2026 ਦੀ ਚੌਥੀ ਤਿਮਾਹੀ ਤੋਂ 2027 ਦੀ ਪਹਿਲੀ ਤਿਮਾਹੀ ਦਰਮਿਆਨ ਕੱਚੇ ਤੇਲ ਦੀ ਕੀਮਤ 130 ਅਮਰੀਕੀ ਡਾਲਰ ਪ੍ਰਤੀ ਬੈਰਲ ਤੱਕ ਪਹੁੰਚ ਸਕਦੀ ਹੈ। IMF ਦੇ ਇਸ ਅਨੁਮਾਨ 'ਤੇ ਚੀਨੀ ਵਿਦੇਸ਼ ਮੰਤਰਾਲੇ ਦੇ ਬੁਲਾਰੇ ਨੇ ਪ੍ਰਤੀਕਿਰਿਆ ਦਿੰਦਿਆਂ ਕਿਹਾ ਕਿ ਚੀਨ ਦੇ ਆਰਥਿਕ ਆਧਾਰ ਮਜ਼ਬੂਤ ਹਨ ਅਤੇ ਦੇਸ਼ ਨੂੰ ਆਪਣੀਆਂ ਆਰਥਿਕ ਸੰਭਾਵਨਾਵਾਂ 'ਤੇ ਪੂਰਾ ਭਰੋਸਾ ਹੈ। ਹਾਲਾਂਕਿ, ਚੀਨ ਦੀ ਦੂਜੀ ਤਿਮਾਹੀ ਦੀ ਜੀ.ਡੀ.ਪੀ. (GDP) ਵਿਕਾਸ ਦਰ 4.3 ਫ਼ੀਸਦੀ ਰਹੀ ਸੀ, ਜੋ ਬਾਜ਼ਾਰ ਦੀਆਂ ਉਮੀਦਾਂ ਤੋਂ ਘੱਟ ਅਤੇ 2022 ਦੇ ਅੰਤ ਤੋਂ ਬਾਅਦ ਦੀ ਸਭ ਤੋਂ ਘੱਟ ਦਰ ਸੀ।
ਅਗਸਤ ਮਹੀਨੇ ਵਿੱਚ ਚੀਨ ਦੀ ਬਰਾਮਦ ਸਾਲਾਨਾ ਆਧਾਰ 'ਤੇ 25 ਫ਼ੀਸਦੀ ਵਧ ਕੇ 401.44 ਅਰਬ ਅਮਰੀਕੀ ਡਾਲਰ ਹੋ ਗਈ। 2026 ਦੇ ਪਹਿਲੇ ਅੱਠ ਮਹੀਨਿਆਂ ਵਿੱਚ ਚੀਨ ਦਾ ਕੁੱਲ ਵਪਾਰਕ ਸਰਪਲੱਸ (trade surplus) 805.51 ਅਰਬ ਅਮਰੀਕੀ ਡਾਲਰ ਤੱਕ ਪਹੁੰਚ ਗਿਆ, ਜੋ ਪਿਛਲੇ ਸਾਲ ਨਾਲੋਂ 3 ਫ਼ੀਸਦੀ ਜ਼ਿਆਦਾ ਹੈ।
IMF ਅਨੁਸਾਰ, ਪਿਛਲੇ ਸਾਲ ਦੇ 1.2 ਟ੍ਰਿਲੀਅਨ ਅਮਰੀਕੀ ਡਾਲਰ ਦੇ ਰਿਕਾਰਡ ਸਰਪਲੱਸ ਤੋਂ ਬਾਅਦ 2026 ਵਿੱਚ ਇਹ ਹੋਰ ਵਧ ਸਕਦਾ ਹੈ। ਹਾਲਾਂਕਿ, ਮੋਰਗਨ ਸਟੈਨਲੇ (Morgan Stanley) ਦੀ ਇੱਕ ਰਿਪੋਰਟ ਵਿੱਚ ਨਿਸ਼ਾਨਦੇਹੀ ਕੀਤੀ ਗਈ ਹੈ ਕਿ ਬਰਾਮਦਾਂ ਦੀ ਸਰਮਾਇਆ-ਅਧਾਰਿਤ ਪ੍ਰਕਿਰਤੀ ਕਾਰਨ ਰੋਜ਼ਗਾਰ ਅਤੇ ਘਰੇਲੂ ਆਮਦਨ ਵਿੱਚ ਇਸ ਦਾ ਪੂਰਾ ਲਾਭ ਨਹੀਂ ਮਿਲ ਸਕਿਆ ਹੈ।
ਆਰਥਿਕਤਾ ਨੂੰ ਸੰਭਾਲਣ ਲਈ ਬੀਜਿੰਗ ਸਰਕਾਰ ਨੇ ਕਈ ਕਦਮ ਚੁੱਕੇ ਹਨ, ਜਿਨ੍ਹਾਂ ਵਿੱਚ ਨੀਤੀਗਤ ਬੈਂਕਾਂ ਲਈ ਵਿਆਜ ਦਰਾਂ ਘਟਾਉਣਾ, ਘਰ ਖਰੀਦਦਾਰਾਂ ਲਈ ਮੋਰਟਗੇਜ ਵਿਆਜ ਸਬਸਿਡੀ ਦੇਣਾ, ਅਤੇ ਨਿਵੇਸ਼ ਨੂੰ ਹੁਲਾਰਾ ਦੇਣ ਲਈ 550 ਅਰਬ ਯੂਆਨ (82.2 ਅਰਬ ਅਮਰੀਕੀ ਡਾਲਰ) ਦੇ ਸਥਾਨਕ ਕਰਜ਼ੇ ਦੇ ਕੋਟੇ ਖੋਲ੍ਹਣਾ ਸ਼ਾਮਲ ਹੈ। IMF ਦਾ ਅਨੁਮਾਨ ਹੈ ਕਿ 2027 ਵਿੱਚ ਚੀਨ ਦੀ ਆਰਥਿਕ ਵਿਕਾਸ ਦਰ ਹੋਰ ਸੁਸਤ ਹੋ ਕੇ 4.0 ਫ਼ੀਸਦੀ ਤੱਕ ਰਹਿ ਸਕਦੀ ਹੈ, ਜੋ ਪਹਿਲਾਂ ਜੁਲਾਈ ਵਿੱਚ 4.1 ਫ਼ੀਸਦੀ ਅਨੁਮਾਨਿਤ ਸੀ।
ਟਰੰਪ ਨੇ ਮੁੜ ਕੀਤਾ 5,000 ਡਾਲਰ ਦੇਣ ਦਾ ਵਾਅਦਾ
NEXT STORY 
