ਇਸਲਾਮਾਬਾਦ - ਪਾਕਿਸਤਾਨ ਦੇ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਦੀਆਂ ਮੁਸ਼ਕਿਲਾਂ ਲਗਾਤਾਰ ਵਧਦੀਆਂ ਜਾ ਰਹੀਆਂ ਹਨ। ਪੈਸਿਆਂ ਦੀ ਤੰਗੀ ਨਾਲ ਨਜਿੱਠ ਰਹੀ ਪਾਕਿਸਤਾਨੀ ਸਰਕਾਰ ਦੇ ਖਜ਼ਾਨੇ 'ਤੇ ਹੁਣ ਹੋਰ ਬੋਝ ਪੈਣ ਵਾਲਾ ਹੈ। ਦਰਅਸਲ ਪਾਕਿਸਤਾਨ ਇੰਟਰਨੈਸ਼ਨਲ ਕੋਰਟ 'ਚ ਇਕ ਵੱਡਾ ਕੇਸ ਹਾਰ ਗਿਆ ਹੈ। ਇਸ ਦੇ ਤਹਿਤ ਉਸ ਨੂੰ 40 ਹਜ਼ਾਰ ਕਰੋੜ ਰੁਪਏ ਅਦਾ ਕਰਨੇ ਹੋਣਗੇ। ਦੱਸ ਦਈਏ ਕਿ ਜੁਲਾਈ ਮਹੀਨੇ ਦੀ ਸ਼ੁਰੂਆਤ 'ਚ ਹੀ ਆਈ. ਐੱਮ. ਐੱਫ. (ਅੰਤਰਰਾਸ਼ਟਰੀ ਮੁਦਰਾ ਫੰਡ) ਨੇ ਪਾਕਿਸਤਾਨ ਨੂੰ ਕੰਗਾਲੀ ਤੋਂ ਉਭਰਣ ਲਈ 6 ਅਰਬ ਡਾਲਰ ਦਾ ਬੇਲਆਊਟ ਪੈਕੇਜ ਬੇ-ਸ਼ਰਤ ਸਵੀਕਾਰ ਕੀਤਾ ਹੈ। ਉਥੇ ਹੀ ਹੁਣ ਪਾਕਿਸਤਾਨ ਨੂੰ ਵੱਡੀ ਰਕਮ ਕੇਸ ਹਾਰਣ 'ਤੇ ਅਦਾ ਕਰਨੀ ਹੋਵੇਗੀ।
ਕੀ ਹੈ ਮਾਮਲਾ?
ਵਰਲਡ ਬੈਂਕ ਨਾਲ ਜੁੜੀ ਕੋਰਟ ਇੰਟਰਨੈਸ਼ਨਲ ਸੈਂਟਰ ਆਫ ਸੈਟਲਮੈਂਟ ਆਫ ਇੰਵੈਸਟਮੈਂਟ ਡਿਸਪਿਊਟਸ (ਆਈ. ਸੀ. ਐੱਸ. ਆਈ. ਡੀ.) ਨੇ ਬਲੋਚਿਸਤਾਨ 'ਚ ਰੈਕੋ ਡਿਕ ਖਦਾਨ ਸੌਦੇ ਨੂੰ ਰੱਦ ਕਰਨ 'ਤੇ ਪਾਕਿਸਤਾਨ 'ਤੇ 5 ਅਰਬ 97 ਕਰੋੜ ਡਾਲਰ (40 ਡਾਲਰ ਹਜ਼ਾਰ ਕਰੋੜ ਰੁਪਏ) ਦਾ ਜ਼ੁਰਮਾਨਾ ਠੋਕਿਆ। ਇਸ ਮਾਮਲੇ 'ਚ ਪਾਕਿਸਤਾਨ ਕੇਸ ਹਾਰ ਗਿਆ ਹੈ। ਮੀਡੀਆ ਰਿਪੋਰਟਾਂ ਮੁਤਾਬਕ ਇਹ ਜ਼ੁਰਮਾਨਾ ਪਾਕਿਸਤਾਨ ਨੂੰ ਟੇਥਯਾਨ ਕਾਪਰ ਕੰਪਨੀ (ਟੀ. ਸੀ. ਸੀ.) ਨੂੰ ਅਦਾ ਕਰਨਾ ਹੋਵੇਗਾ। ਉਥੇ ਦੁਨੀਆ ਭਰ ਦੇ ਅਰਥ ਸ਼ਾਸ਼ਤਰੀ ਲਗਾਤਾਰ ਇਹ ਆਖ ਰਹੇ ਹਨ ਕਿ ਪਾਕਿਸਤਾਨ ਇਸ ਸਮੇਂ ਵੱਡੇ ਆਰਥਿਕ ਸੰਕਟ 'ਚ ਫਸਿਆ ਹੋਇਆ ਹੈ ਜੇਕਰ ਕੋਈ ਠੋਸ ਕਦਮ ਨਾ ਚੁੱਕੇ ਗਏ ਤਾਂ ਉਸ ਨੂੰ ਬਰਬਾਦ ਹੋਣ ਤੋਂ ਕੋਈ ਨਹੀਂ ਬਚਾ ਪਾਵੇਗਾ।
ਅਜਿਹੇ ਮਾਹੌਲ 'ਚ ਪਾਕਿਸਤਾਨ ਦੇ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਖੁਦ ਵੀ ਇਸ ਗੱਲ ਨੂੰ ਸਵੀਕਾਰ ਕਰ ਚੁੱਕੇ ਹਨ। 10 ਜੂਨ ਨੂੰ ਰਾਸ਼ਟਰ ਦੇ ਨਾਂ ਸੰਬੋਧਨ 'ਚ ਪਾਕਿਸਤਾਨੀ ਪੀ. ਐੱਮ. ਇਮਰਾਨ ਖਾਨ ਨੇ ਸਾਰੇ ਪਾਕਿਸਤਾਨੀਆਂ ਨੂੰ ਕਿਹਾ ਸੀ ਕਿ ਪਿਛਲੇ 10 ਸਾਲ 'ਚ ਪਾਕਿਸਤਾਨ ਦਾ ਕਰਜ਼ 6 ਹਜ਼ਾਰ ਅਰਬ ਤੋਂ 30 ਹਜ਼ਾਰ ਅਰਬ ਰੁਪਏ ਤੱਕ ਪਹੁੰਚ ਗਿਆ ਹੈ। ਜਿਹੜਾ ਅਸੀਂ 4 ਹਜ਼ਾਰ ਅਰਬ ਰੁਪਏ ਦਾ ਸਾਲਾਨਾ ਟੈਕਸ ਇਕੱਠੇ ਕਰਦੇ ਹਾਂ। ਉਸ ਦੀ ਅੱਧੀ ਰਕਮ ਕਰਜ਼ਿਆਂ ਦੀਆਂ ਕਿਸਤਾਂ ਅਦਾ ਕਰਨ 'ਚ ਨਿਕਲ ਜਾਂਦੀ ਹੈ। ਬਾਕੀ ਦਾ ਪੈਸਾ ਜੋ ਬਚਦਾ ਹੈ ਉਸ ਨਾਲ ਮੁਲਕ ਦਾ ਖਰਚ ਨਹੀਂ ਚੱਲ ਸਕਦਾ। ਪਾਕਿਸਤਾਨ ਉਹ ਕੌਮ ਹੈ, ਜੋ ਦੁਨੀਆ ਭਰ 'ਚ ਸਭ ਤੋਂ ਘੱਟ ਟੈਕਸ ਅਦਾ ਕਰਦੀ ਹੈ।
ਇਮਰਾਨ ਸਰਕਾਰ ਨੇ ਪਖਾਨਿਆਂ ਬਾਹਰ ਲਗਵਾਈ ਬਾਇਓਮੈਟ੍ਰਿਕ ਮਸ਼ੀਨ, ਜਾਣੋ ਕਿਉਂ
NEXT STORY 
