ਤੇਹਰਾਨ : ਈਰਾਨ ਵਿੱਚ ਸੱਤਾ ਦਾ ਨਵਾਂ ਚਿਹਰਾ ਸਾਹਮਣੇ ਆ ਗਿਆ ਹੈ। ਅਯਾਤੁੱਲਾ ਅਲੀ ਖਮੇਨੇਈ ਦੀ ਮੌਤ ਤੋਂ ਬਾਅਦ ਉਨ੍ਹਾਂ ਦੇ ਪੁੱਤਰ ਮੋਜਤਬਾ ਖਮੇਨੇਈ ਨੂੰ ਦੇਸ਼ ਦਾ ਨਵਾਂ ਸੁਪਰੀਮ ਲੀਡਰ ਘੋਸ਼ਿਤ ਕਰ ਦਿੱਤਾ ਗਿਆ ਹੈ। ਈਰਾਨੀ ਸਰਕਾਰੀ ਮੀਡੀਆ ਅਨੁਸਾਰ, ਸੁਪਰੀਮ ਲੀਡਰ ਦਾ ਅਹੁਦਾ ਦੇਸ਼ ਵਿੱਚ ਸਭ ਤੋਂ ਸ਼ਕਤੀਸ਼ਾਲੀ ਹੁੰਦਾ ਹੈ, ਜਿਸ ਕੋਲ ਰਾਜਨੀਤੀ ਅਤੇ ਫੌਜ ਨਾਲ ਜੁੜੇ ਸਾਰੇ ਮਾਮਲਿਆਂ ਵਿੱਚ ਆਖਰੀ ਫੈਸਲਾ ਲੈਣ ਦਾ ਅਧਿਕਾਰ ਹੁੰਦਾ ਹੈ।
ਕੌਣ ਹੈ ਮੋਜਤਬਾ ਖਮੇਨੇਈ?
56 ਸਾਲਾ ਮੋਜਤਬਾ ਖਮੇਨੇਈ ਆਪਣੇ ਪਿਤਾ ਵਾਂਗ ਹੀ ਇੱਕ ਕੱਟਰਪੰਥੀ ਧਰਮਗੁਰੂ ਹਨ। ਦੱਸਿਆ ਜਾ ਰਿਹਾ ਹੈ ਕਿ ਉਨ੍ਹਾਂ ਦੀ ਸੱਤਾ 'ਤੇ ਮਜ਼ਬੂਤ ਪਕੜ ਅਤੇ ਸ਼ਕਤੀਸ਼ਾਲੀ ਰਿਵੋਲਿਊਸ਼ਨਰੀ ਗਾਰਡਸ (IRGC) ਦੇ ਸਮਰਥਨ ਕਾਰਨ ਉਨ੍ਹਾਂ ਨੂੰ ਇਹ ਜ਼ਿੰਮੇਵਾਰੀ ਸੌਂਪੀ ਗਈ ਹੈ। ਹਾਲਾਂਕਿ ਈਰਾਨ ਦੀ ਵਿਚਾਰਧਾਰਾ ਵੰਸ਼ਵਾਦ ਦੇ ਵਿਰੁੱਧ ਰਹੀ ਹੈ, ਪਰ IRGC ਅਤੇ ਖਮੇਨੇਈ ਦੇ ਦਫ਼ਤਰ ਵਿੱਚ ਮੋਜਤਬਾ ਦੇ ਪੱਖ ਵਿੱਚ ਇੱਕ ਵੱਡਾ ਪ੍ਰਭਾਵਸ਼ਾਲੀ ਵਰਗ ਮੌਜੂਦ ਸੀ।
ਖਮੇਨੇਈ ਦੇ ਕਤਲ ਤੋਂ ਬਾਅਦ ਬਣੀ ਸੀ ਅੰਤਰਿਮ ਕੌਂਸਲ
ਜ਼ਿਕਰਯੋਗ ਹੈ ਕਿ ਅਯਾਤੁੱਲਾ ਅਲੀ ਖਮੇਨੇਈ ਦੀ ਅਮਰੀਕਾ ਅਤੇ ਇਜ਼ਰਾਈਲ ਵੱਲੋਂ ਕੀਤੇ ਗਏ ਹਵਾਈ ਹਮਲਿਆਂ ਦੌਰਾਨ ਹੱਤਿਆ ਕਰ ਦਿੱਤੀ ਗਈ ਸੀ। ਉਨ੍ਹਾਂ ਦੇ ਨਿਧਨ ਤੋਂ ਬਾਅਦ ਦੇਸ਼ ਦਾ ਕੰਮਕਾਜ ਇੱਕ 3 ਮੈਂਬਰੀ ਅੰਤਰਿਮ ਕੌਂਸਲ ਸੰਭਾਲ ਰਹੀ ਸੀ, ਜਿਸ ਵਿੱਚ ਅੰਤਰਿਮ ਸੁਪਰੀਮ ਲੀਡਰ ਅਲੀਰੇਜ਼ਾ ਅਰਾਫੀ, ਰਾਸ਼ਟਰਪਤੀ ਮਸੂਦ ਪੇਜੇਸ਼ਕੀਅਨ ਅਤੇ ਚੀਫ਼ ਜਸਟਿਸ ਗੁਲਾਮ-ਹੋਸੈਨ ਮੋਹਸੇਨੀ-ਏਜੇਈ ਸ਼ਾਮਲ ਸਨ। ਵਿਧਾਨ ਸਭਾ ਦੇ 88 ਮੈਂਬਰਾਂ ਵਿੱਚੋਂ ਇੱਕ ਨੇ ਪਹਿਲਾਂ ਹੀ ਸੰਕੇਤ ਦਿੱਤਾ ਸੀ ਕਿ ਵੋਟਿੰਗ ਹੋ ਚੁੱਕੀ ਹੈ ਅਤੇ ਨਵੇਂ ਨਾਮ ਦਾ ਐਲਾਨ ਜਲਦ ਕੀਤਾ ਜਾਵੇਗਾ।
ਟਰੰਪ ਅਤੇ ਇਜ਼ਰਾਈਲ ਦੀ ਚੇਤਾਵਨੀ
ਨਵੇਂ ਸੁਪਰੀਮ ਲੀਡਰ ਦੀ ਨਿਯੁਕਤੀ ਤੋਂ ਬਾਅਦ ਤਣਾਅ ਵਧਣ ਦੀ ਸੰਭਾਵਨਾ ਹੈ। ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਅਤੇ ਇਜ਼ਰਾਈਲ ਨੇ ਪਹਿਲਾਂ ਹੀ ਚੇਤਾਵਨੀ ਦਿੱਤੀ ਹੈ ਕਿ ਜੇਕਰ ਲੋੜ ਪਈ ਤਾਂ ਨਵੇਂ ਆਗੂ ਨੂੰ ਵੀ ਨਿਸ਼ਾਨਾ ਬਣਾਇਆ ਜਾ ਸਕਦਾ ਹੈ। ਟਰੰਪ ਨੇ ਮੋਜਤਬਾ ਨੂੰ ਇੱਕ 'ਕਮਜ਼ੋਰ ਨੇਤਾ' ਦੱਸਿਆ ਹੈ ਅਤੇ ਦਾਅਵਾ ਕੀਤਾ ਹੈ ਕਿ ਅਮਰੀਕਾ ਦੀ ਮਨਜ਼ੂਰੀ ਤੋਂ ਬਿਨਾਂ ਈਰਾਨ ਦਾ ਅਗਲਾ ਸੁਪਰੀਮ ਲੀਡਰ ਜ਼ਿਆਦਾ ਦੇਰ ਨਹੀਂ ਟਿਕ ਸਕੇਗਾ।
ਮਿਲਾਨੋ–ਕੋਰਟੀਨਾ ਪੈਰਾਲੰਪਿਕ 'ਚ ਕੈਨੇਡਾ ਨੂੰ ਮਿਲਿਆ ਪਹਿਲਾ ਸੋਨੇ ਦਾ ਤਮਗਾ
NEXT STORY 
