ਇੰਟਰਨੈਸ਼ਨਲ ਡੈਸਕ: ਅਮਰੀਕਾ ਵਿੱਚ ਰੁਜ਼ਗਾਰ ਅਤੇ ਪੱਕੇ ਹੋਣ ਦੀ ਇੱਛਾ ਰੱਖਣ ਵਾਲੇ ਭਾਰਤੀਆਂ ਲਈ ਇੱਕ ਬਹੁਤ ਹੀ ਮਹੱਤਵਪੂਰਨ ਖ਼ਬਰ ਹੈ। ਅਮਰੀਕੀ ਹੋਮਲੈਂਡ ਸਕਿਉਰਿਟੀ ਵਿਭਾਗ ਨੇ ਇਮੀਗ੍ਰੇਸ਼ਨ ਅਰਜ਼ੀਆਂ ਲਈ ਦਸਤਖ਼ਤਾਂ ਨਾਲ ਜੁੜਿਆ ਇੱਕ ਸਖ਼ਤ 'ਜ਼ੀਰੋ ਟਾਲਰੈਂਸ' ਨਿਯਮ ਲਾਗੂ ਕਰਨ ਦਾ ਫੈਸਲਾ ਕੀਤਾ ਹੈ। ਇਸ ਨਵੇਂ ਨਿਯਮ ਤਹਿਤ ਹੁਣ ਦਸਤਖ਼ਤਾਂ ਵਿੱਚ ਕੀਤੀ ਇੱਕ ਮਾਮੂਲੀ ਗਲਤੀ ਵੀ ਤੁਹਾਡੇ ਅਮਰੀਕਾ ਜਾਣ ਦੇ ਸੁਪਨੇ ਨੂੰ ਤੋੜ ਸਕਦੀ ਹੈ।
10 ਜੁਲਾਈ 2026 ਤੋਂ ਲਾਗੂ ਹੋਵੇਗਾ ਨਵਾਂ ਨਿਯਮ
ਅਮਰੀਕੀ ਨਾਗਰਿਕਤਾ ਅਤੇ ਇਮੀਗ੍ਰੇਸ਼ਨ ਸੇਵਾਵਾਂ (USCIS) ਦੇ ਨਵੇਂ ਨਿਯਮ ਅਨੁਸਾਰ 10 ਜੁਲਾਈ, 2026 ਤੋਂ ਬਾਅਦ ਜਮ੍ਹਾਂ ਕੀਤੀਆਂ ਗਈਆਂ ਸਾਰੀਆਂ ਅਰਜ਼ੀਆਂ, ਜਿਸ ਵਿੱਚ H-1B ਵੀਜ਼ਾ ਅਤੇ ਗ੍ਰੀਨ ਕਾਰਡ ਫਾਈਲਾਂ ਸ਼ਾਮਲ ਹਨ, ਜੇਕਰ ਉਨ੍ਹਾਂ 'ਤੇ ਦਸਤਖ਼ਤ ਗਲਤ ਜਾਂ ਨਿਯਮਾਂ ਦੇ ਉਲਟ ਪਾਏ ਗਏ ਤਾਂ ਅਰਜ਼ੀ ਨੂੰ ਤੁਰੰਤ ਰੱਦ ਜਾਂ ਨਾਮਨਜ਼ੂਰ ਕਰ ਦਿੱਤਾ ਜਾਵੇਗਾ। ਖਾਸ ਗੱਲ ਇਹ ਹੈ ਕਿ ਜੇਕਰ ਅਰਜ਼ੀ ਸਵੀਕਾਰ ਹੋਣ ਤੋਂ ਬਾਅਦ ਵੀ ਪ੍ਰੋਸੈਸਿੰਗ ਦੌਰਾਨ ਕਿਸੇ ਵੀ ਸਮੇਂ ਦਸਤਖ਼ਤ ਵਿੱਚ ਕੋਈ ਕਮੀ ਪਾਈ ਗਈ ਤਾਂ ਵੀ ਕਾਰਵਾਈ ਕੀਤੀ ਜਾ ਸਕਦੀ ਹੈ।
ਗਲਤੀ ਸੁਧਾਰਨ ਦਾ ਨਹੀਂ ਮਿਲੇਗਾ ਕੋਈ ਮੌਕਾ
ਨਵੇਂ ਨਿਯਮਾਂ ਵਿੱਚ ਸਭ ਤੋਂ ਵੱਡਾ ਝਟਕਾ ਇਹ ਹੈ ਕਿ ਇੱਕ ਵਾਰ ਅਰਜ਼ੀ ਫਾਈਲ ਹੋਣ ਤੋਂ ਬਾਅਦ ਗਲਤ ਦਸਤਖ਼ਤ ਨੂੰ ਸੁਧਾਰਨ ਦਾ ਕੋਈ ਪ੍ਰਬੰਧ ਨਹੀਂ ਹੈ। ਜੇਕਰ ਅਰਜ਼ੀ ਰੱਦ ਹੁੰਦੀ ਹੈ, ਤਾਂ ਬਿਨੈਕਾਰ ਨੂੰ ਪੂਰੀ ਫੀਸ ਦੁਬਾਰਾ ਭਰਨੀ ਪਵੇਗੀ ਅਤੇ ਨਵੀਂ ਤਰੀਕ ਨਾਲ ਨਵੇਂ ਸਿਰੇ ਤੋਂ ਅਪਲਾਈ ਕਰਨਾ ਪਵੇਗਾ। ਕੁਝ ਮਾਮਲਿਆਂ ਵਿੱਚ USCIS ਫੀਸ ਵੀ ਜ਼ਬਤ ਕਰ ਸਕਦਾ ਹੈ।
ਸਰੋਤਾਂ ਅਨੁਸਾਰ USCIS ਨੇ ਸਪੱਸ਼ਟ ਕੀਤਾ ਹੈ ਕਿ ਉਹ ਕਿਸ ਤਰ੍ਹਾਂ ਦੇ ਦਸਤਖਤ ਸਵੀਕਾਰ ਕਰੇਗਾ:
ਹੱਥ ਨਾਲ ਕੀਤੇ ਅਸਲੀ ਦਸਤਖ਼ਤ, ਅਸਲੀ ਦਸਤਖ਼ਤਾਂ ਦੀ ਸਕੈਨ ਕੀਤੀ ਕਾਪੀ, ਫੈਕਸ ਜਾਂ ਫੋਟੋਕਾਪੀ ਅਤੇ USCIS ਵੱਲੋਂ ਅਧਿਕਾਰਤ ਆਨਲਾਈਨ ਸਿਸਟਮ ਵਿੱਚ ਇਲੈਕਟ੍ਰਾਨਿਕ ਦਸਤਖ਼ਤ।
ਡਿਜੀਟਲੀ ਜਨਰੇਟ ਕੀਤੇ ਦਸਤਖ਼ਤ, ਕਾਪੀ-ਪੇਸਟ ਕੀਤੇ ਦਸਤਖ਼ਤ, ਸਿਗਨੇਚਰ ਸਟੈਂਪ ਜਾਂ ਸਾਫਟਵੇਅਰ ਰਾਹੀਂ ਤਿਆਰ ਕੀਤੇ ਦਸਤਖ਼ਤ ਬਿਲਕੁਲ ਨਹੀਂ ਚੱਲਣਗੇ।
ਨਵੇਂ ਨਿਯਮ ਮੁਤਾਬਕ, ਬਹੁਤੇ ਮਾਮਲਿਆਂ ਵਿੱਚ ਬਿਨੈਕਾਰ ਜਾਂ ਪਟੀਸ਼ਨਰ ਤੋਂ ਇਲਾਵਾ ਕੋਈ ਹੋਰ (ਜਿਵੇਂ ਕਿ ਵਕੀਲ ਜਾਂ ਤੀਜੀ ਧਿਰ) ਉਸ ਦੀ ਜਗ੍ਹਾ ਦਸਤਖ਼ਤ ਨਹੀਂ ਕਰ ਸਕਦਾ। ਅਮਰੀਕੀ ਸਰਕਾਰ ਨੇ ਇਹ ਕਦਮ ਇਸ ਲਈ ਚੁੱਕਿਆ ਹੈ ਕਿਉਂਕਿ ਪਿਛਲੇ ਕੁਝ ਸਾਲਾਂ ਵਿੱਚ ਕਾਪੀ-ਪੇਸਟ ਕੀਤੇ ਦਸਤਖ਼ਤਾਂ ਦੇ ਮਾਮਲੇ ਤੇਜ਼ੀ ਨਾਲ ਵਧੇ ਹਨ।
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।
ਘੇਰਾਬੰਦੀ ਤੋਂ ਭੜਕਿਆ ਈਰਾਨ, ਕਿਹਾ – ਓਮਾਨ ਸਾਗਰ 'ਚ ਅਮਰੀਕੀਆਂ ਦੀ ਕਬਰਾਂ ਬਣਾ ਦੇਵਾਂਗੇ
NEXT STORY 
