ਇੰਟਰਨੈਸ਼ਨਲ ਡੈਸਕ: ਭਾਰਤੀ ਕੈਪਟਨ ਸਮਿਤ ਮਛਾਰ ਘਟਨਾ ਦੇ ਲਗਭਗ ਇੱਕ ਮਹੀਨੇ ਬਾਅਦ ਸਨਮਾਨ ਸਮਾਰੋਹ ਵਿਚ ਨਜ਼ਰ ਆਏ। ਇਸ ਦੌਰਾਨ ਉਨ੍ਹਾਂ ਦੇ ਸਿਰ ਦੇ ਪਿਛਲੇ ਹਿੱਸੇ 'ਤੇ ਲੱਗੇ ਡੂੰਘੇ ਜ਼ਖ਼ਮਾਂ ਦੇ ਨਿਸ਼ਾਨ ਅਤੇ ਖੱਬੀ ਬਾਂਹ 'ਚ ਪਾਈ ਸਲਿੰਗ ਸਾਫ਼ ਨਜ਼ਰ ਆ ਰਹੀ ਸੀ। ਅੱਤਵਾਦੀ ਹਮਲੇ 'ਚ ਜ਼ਖ਼ਮੀ ਹੋਣ ਦੇ ਬਾਵਜੂਦ ਸੂਝ-ਬੂਝ ਦਿਖਾ ਕੇ 170 ਤੋਂ ਵੱਧ ਯਾਤਰੀਆਂ ਦੀ ਜਾਨ ਬਚਾਉਣ ਵਾਲੇ ਭਾਰਤੀ ਕਪਤਾਨ ਸਮਿਤ ਮਛਾਰ ਦੀਆਂ ਅਬੂ ਧਾਬੀ 'ਚ ਹੋਏ ਸਨਮਾਨ ਸਮਾਰੋਹ ਦੌਰਾਨ ਸਾਹਮਣੇ ਆਈਆਂ ਤਸਵੀਰਾਂ ਤੋਂ ਬਾਅਦ ਡਾਕਟਰਾਂ ਨੇ ਉਨ੍ਹਾਂ ਦੀ ਗੰਭੀਰ ਸੱਟ ਅਤੇ ਸਰਜਰੀ ਬਾਰੇ ਹੈਰਾਨੀਜਨਕ ਖੁਲਾਸੇ ਕੀਤੇ ਹਨ।। ਨਿਊਰੋਸਰਜਨਾਂ ਅਨੁਸਾਰ ਕਪਤਾਨ ਸਮਿਤ ਮਛਾਰ ਦੇ ਸਿਰ 'ਚ ਡੂੰਘੇ ਖੱਡ ਪੈਣ ਅਤੇ 40 ਫੀਸਦੀ ਤੋਂ ਵੱਧ ਮੌਤ ਜਾਂ ਅਪਾਹਜਤਾ ਦੇ ਖ਼ਤਰੇ ਦੇ ਬਾਵਜੂਦ ਦੋ ਵੱਡੇ ਆਪ੍ਰੇਸ਼ਨਾਂ ਤੋਂ ਬਾਅਦ ਜ਼ਿੰਦਗੀ ਦੀ ਜੰਗ ਜਿੱਤ ਕੇ ਮੌਤ ਨੂੰ ਮਾਤ ਦਿੱਤੀ ਹੈ।
30 ਸਤੰਬਰ ਨੂੰ 'ਫਲਾਈਦੁਬਈ' ਦੀ ਫਲਾਈਟ FZ1073 ਦੁਬਈ ਤੋਂ ਤੇਲ ਅਵੀਵ ਜਾ ਰਹੀ ਸੀ, ਜਦੋਂ ਓਮਾਨੀ ਸਹਿ-ਪਾਇਲਟ ਹਮਾਮ ਅਲ-ਹੰਮਾਮੀ ਨੇ ਕੋਕਪਿਟ ਵਿੱਚ ਮੌਜੂਦ ਐਮਰਜੈਂਸੀ ਕੁਹਾੜੀ ਨਾਲ ਕਪਤਾਨ ਸਮਿਤ ਮਛਾਰ ਦੇ ਸਿਰ 'ਤੇ ਵਾਰ-ਵਾਰ ਹਮਲਾ ਕੀਤਾ ਸੀ। ਗੰਭੀਰ ਰੂਪ ਵਿੱਚ ਜ਼ਖ਼ਮੀ ਹੋਣ, ਧੁੰਦਲਾ ਦਿਖਾਈ ਦੇਣ ਅਤੇ ਬੇਹੋਸ਼ੀ ਦੀ ਹਾਲਤ ਵਿੱਚ ਵੀ ਕਪਤਾਨ ਮਛਾਰ ਨੇ ਕੋਕਪਿਟ ਦਾ ਦਰਵਾਜ਼ਾ ਖੋਲ੍ਹ ਦਿੱਤਾ, ਜਿਸ ਨਾਲ ਯਾਤਰੀਆਂ ਅਤੇ ਕਰੂ ਮੈਂਬਰਾਂ ਨੇ ਅੱਤਵਾਦੀ ਸਹਿ-ਪਾਇਲਟ ਨੂੰ ਕਾਬੂ ਕਰ ਲਿਆ ਅਤੇ ਇੱਕ ਵੱਡਾ ਹਾਦਸਾ ਟਲ ਗਿਆ। ਹਵਾਈ ਜਹਾਜ਼ ਵਿੱਚ ਸਵਾਰ ਡੈਂਟਿਸਟ ਡਾ. ਸ਼ੋਟਾ ਮੁਸਾਏਵ ਨੇ ਸਾਊਦੀ ਅਰਬ ਦੇ ਤਬੂਕ ਵਿਖੇ ਜਹਾਜ਼ ਦੀ ਲੈਂਡਿੰਗ ਹੋਣ ਤੱਕ ਲਗਭਗ 45 ਮਿੰਟ ਤੱਕ ਉਨ੍ਹਾਂ ਦੇ ਜ਼ਖ਼ਮਾਂ 'ਤੇ ਦਬਾਅ ਪਾ ਕੇ ਖੂਨ ਵਹਿਣ ਤੋਂ ਰੋਕਿਆ।
ਅਮਰੀਕਾ ਦੇ ਮੰਨੇ-ਪ੍ਰਮੰਨੇ ਨਿਊਰੋਸਰਜਨ ਡਾ. ਸਨਤ ਦੀਕਸ਼ਿਤ ਅਨੁਸਾਰ ਕਪਤਾਨ ਮਛਾਰ ਦੇ ਸਿਰ 'ਚ 'ਓਸੀਪੀਟਲ ਕੰਪਾਊਂਡ ਡਿਪ੍ਰੈਸਡ ਸਕੱਲ ਫ੍ਰੈਕਚਰ' ਹੋਇਆ ਸੀ, ਜਿਸ ਦੇ ਇਲਾਜ ਲਈ ਵਿਸ਼ਾਲ ਕ੍ਰੇਨੀਓਟੋਮੀ ਸਰਜਰੀ ਕਰਨੀ ਪਈ। ਉਨ੍ਹਾਂ ਦੱਸਿਆ ਕਿ ਸਿਰ ਦੀਆਂ ਪ੍ਰਮੁੱਖ ਨਾੜਾਂ ਨਾਲ ਜੁੜੀਆਂ ਅਜਿਹੀਆਂ ਗੰਭੀਰ ਸੱਟਾਂ 'ਚ ਅਪਾਹਜਤਾ ਜਾਂ ਮੌਤ ਦਾ ਖ਼ਤਰਾ 40 ਫੀਸਦੀ ਤੋਂ ਵੱਧ ਹੁੰਦਾ ਹੈ। ਡਾ. ਦੀਕਸ਼ਿਤ ਨੇ ਦੱਸਿਆ ਕਿ ਟੁੱਟੀ ਹੋਈ ਖੋਪੜੀ ਦੀ ਹੱਡੀ ਨੂੰ ਚੁੱਕਣ ਦੌਰਾਨ ਜੇਕਰ ਖੂਨ ਦੀ ਨਾੜ ਖੁੱਲ੍ਹ ਜਾਂਦੀ ਤਾਂ ਇੱਕ ਮਿੰਟ ਵਿੱਚ 2 ਲੀਟਰ ਤੱਕ ਖੂਨ ਵਹਿ ਸਕਦਾ ਸੀ, ਪਰ ਡਾਕਟਰਾਂ ਦੀ ਟੀਮ ਨੇ ਬਹੁਤ ਹੀ ਬਾਰੀਕੀ ਨਾਲ ਇਹ ਸਫ਼ਲ ਆਪ੍ਰੇਸ਼ਨ ਕੀਤਾ।
ਸਿਡਨੀ ਦੇ ਡਾ. ਸੋਨੂ ਭਾਸਕਰ ਨੇ ਕਪਤਾਨ ਮਛਾਰ ਦੇ ਸਿਰ 'ਤੇ ਲੱਗੇ ਵੱਡੇ ਕ੍ਰਾਸ-ਸ਼ੇਪ ਦੇ ਨਿਸ਼ਾਨਾਂ ਅਤੇ ਸਟੈਪਲਜ਼ ਦਾ ਵਿਸ਼ਲੇਸ਼ਣ ਕਰਦਿਆਂ ਦੱਸਿਆ ਕਿ ਉਨ੍ਹਾਂ ਦੀਆਂ ਘੱਟੋ-ਘੱਟ ਦੋ ਵੱਡੀਆਂ ਸਰਜਰੀਆਂ ਹੋਈਆਂ ਹਨ। ਪਹਿਲੀ ਸਰਜਰੀ ਦੌਰਾਨ ਦਿਮਾਗ ਦੀ ਸੋਜ ਅਤੇ ਦਬਾਅ ਨੂੰ ਘੱਟ ਕਰਨ ਲਈ ਖੋਪੜੀ ਦਾ ਇੱਕ ਵੱਡਾ ਹਿੱਸਾ ਹਟਾਇਆ ਗਿਆ ਸੀ। ਇਸ ਤੋਂ ਬਾਅਦ ਦੂਜੀ ਸਰਜਰੀ ਰਾਹੀਂ ਹੱਡੀ ਨੂੰ ਵਾਪਸ ਸਹੀ ਜਗ੍ਹਾ ਲਗਾਇਆ ਗਿਆ। ਗੁਰੂਗ੍ਰਾਮ ਦੇ ਮਾਰੇਂਗੋ ਏਸ਼ੀਆ ਹਸਪਤਾਲ ਦੇ ਨਿਊਰੋਸਰਜਨ ਡਾ. ਕ੍ਰਿਸ਼ਨ ਕੁਮਾਰ ਯਾਦਵ ਨੇ ਦੱਸਿਆ ਕਿ ਹੱਡੀ ਦਾ ਹਿੱਸਾ ਦਿਮਾਗ ਦੇ ਅੰਦਰ ਵੱਲ ਧੱਸ ਜਾਣ ਕਾਰਨ ਇਹ ਸਰਜਰੀ ਬਹੁਤ ਨਾਜ਼ੁਕ ਸੀ।
ਕਪਤਾਨ ਮਛਾਰ ਨੂੰ ਪਹਿਲਾਂ ਸਾਊਦੀ ਅਰਬ ਵਿੱਚ ਐਮਰਜੈਂਸੀ ਇਲਾਜ ਦਿੱਤਾ ਗਿਆ ਅਤੇ ਬਾਅਦ ਵਿੱਚ ਅੱਗੇ ਦੇ ਇਲਾਜ ਲਈ ਯੂ.ਏ.ਈ. ਲਿਆਇਆ ਗਿਆ। 27 ਅਕਤੂਬਰ ਨੂੰ ਅਬੂ ਧਾਬੀ ਵਿਖੇ ਇੱਕ ਵਿਸ਼ੇਸ਼ ਸਮਾਰੋਹ ਦੌਰਾਨ ਯੂ.ਏ.ਈ. ਦੇ ਰਾਸ਼ਟਰਪਤੀ ਸ਼ੇਖ ਮੁਹੰਮਦ ਬਿਨ ਜਾਏਦ ਅਲ ਨਾਹਯਾਨ ਦੁਆਰਾ ਕਪਤਾਨ ਮਛਾਰ ਅਤੇ ਉਨ੍ਹਾਂ ਦੀ ਟੀਮ ਨੂੰ 'ਫਰਸਟ ਕਲਾਸ ਆਰਡਰ ਆਫ਼ ਜਾਏਦ II' ਪੁਰਸਕਾਰ ਨਾਲ ਨਵਾਜ਼ਿਆ ਗਿਆ। ਸਨਮਾਨ ਸਮਾਰੋਹ ਦੌਰਾਨ ਵਰਦੀ ਪਹਿਨੇ ਕਪਤਾਨ ਮਛਾਰ ਦੇ ਸਿਰ 'ਤੇ ਸਰਜੀਕਲ ਸਟੈਪਲਜ਼ ਦੇ ਨਿਸ਼ਾਨ ਸਾਫ਼ ਦਿਖਾਈ ਦੇ ਰਹੇ ਸਨ, ਜਿਨ੍ਹਾਂ ਨੂੰ ਦੇਖ ਕੇ ਡਾਕਟਰਾਂ ਨੇ ਉਨ੍ਹਾਂ ਦੇ ਬਚਣ ਅਤੇ ਸਰਜਨਾਂ ਦੇ ਸ਼ਾਨਦਾਰ ਕੰਮ ਦੀ ਸ਼ਲਾਘਾ ਕੀਤੀ ਹੈ।
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।
‘Star Trek’ ਫੇਮ ਪੈਟ੍ਰਿਕ ਸਟੀਵਰਟ ਦਾ ਦੇਹਾਂਤ, ਡਿਮੈਂਸ਼ੀਆ ਨਾਲ ਜੂਝਦਿਆਂ 86 ਸਾਲ ਦੀ ਉਮਰ 'ਚ ਲਏ ਆਖ਼ਰੀ ਸਾਹ
NEXT STORY 
