ਅੰਮ੍ਰਿਤਸਰ (ਇੰਦਰਜੀਤ)- ਪੰਜਾਬ ਦੇ ਅੰਮ੍ਰਿਤਸਰ ਜ਼ਿਲੇ ’ਚ ਪਿਛਲੇ ਕੁਝ ਦਿਨਾਂ ਤੋਂ ਸ਼ਰਾਬ ਦੀਆਂ ਕੀਮਤਾਂ ’ਚ ਚੱਲ ਰਹੀ ‘ਪ੍ਰਾਈਸ ਵਾਰ’ ’ਤੇ ਅਚਾਨਕ ਵਿਰਾਮ ਲੱਗ ਗਿਆ ਹੈ। ਸ਼ਰਾਬ ਠੇਕੇਦਾਰਾਂ ਵਿਚਕਾਰ ਕਰੀਬ ਇਕ ਮਹੀਨਾ ਪੁਰਾਣਾ ਵਿਵਾਦ ਸੁਲਝਣ ਅਤੇ ਆਪਸੀ ‘ਪੁਲ’ ਦੁਬਾਰਾ ਜੁੜਨ ਕਾਰਨ ਪਵਿੱਤਰ ਨਗਰੀ ’ਚ ਸ਼ਰਾਬ ਦੀਆਂ ਕੀਮਤਾਂ ਇਕ ਵਾਰ ਫਿਰ ਆਸਮਾਨ ਛੂਹਣ ਲੱਗੀਆਂ ਹਨ। ਇਸ ਸਮਝੌਤੇ ਤੋਂ ਬਾਅਦ ਸ਼ਰਾਬ ਦੀਆਂ ਕੀਮਤਾਂ ’ਚ 30 ਤੋਂ 40 ਫ਼ੀਸਦੀ ਤੱਕ ਦਾ ਭਾਰੀ ਉਛਾਲ ਆਇਆ ਹੈ, ਜਿਸ ਦਾ ਸਿੱਧਾ ਅਸਰ ਆਮ ਖਪਤਕਾਰਾਂ ਦੀ ਜੇਬ ’ਤੇ ਪਿਆ ਹੈ।
ਇਹ ਵੀ ਪੜ੍ਹੋ- ਅੰਮ੍ਰਿਤਸਰ 'ਚ ਵਾਪਰਿਆ ਵੱਡਾ ਹਾਦਸਾ ! ਗੁਰੂਘਰ ਦੇ ਲੰਗਰ ਹਾਲ ਦੀ ਡਿੱਗ ਗਈ ਛੱਤ, 2 ਔਰਤਾਂ ਦੀ ਮੌਤ
ਕੀ ਸੀ ਪੂਰਾ ਵਿਵਾਦ ਅਤੇ ਕਿਉਂ ਘਟੀਆਂ ਸਨ ਕੀਮਤਾਂ?
ਭਰੋਸੇਯੋਗ ਸੂਤਰਾਂ ਮੁਤਾਬਕ ਅੰਮ੍ਰਿਤਸਰ ’ਚ ਸ਼ਰਾਬ ਦੇ ਕੁੱਲ 12 ਗਰੁੱਪ ਹਨ, ਜਿਨ੍ਹਾਂ ’ਤੇ ਮੁੱਖ ਤੌਰ ’ਤੇ ਤਿੰਨ ਵੱਡੇ ਠੇਕੇਦਾਰਾਂ ਦਾ ਏਕਾਧਿਕਾਰ ਹੈ। ਇਨ੍ਹਾਂ ’ਚੋਂ
ਪਹਿਲਾ ਠੇਕੇਦਾਰ : 08 ਗਰੁੱਪਾਂ ’ਤੇ ਕਬਜ਼ਾ
ਦੂਜਾ ਠੇਕੇਦਾਰ : 03 ਗਰੁੱਪਾਂ ’ਤੇ ਕਬਜ਼ਾ
ਤੀਜਾ ਠੇਕੇਦਾਰ : 01 ਗਰੁੱਪ ’ਤੇ ਕਬਜ਼ਾ
ਇਹ ਵੀ ਪੜ੍ਹੋ- ਅੰਮ੍ਰਿਤਸਰ ਏਅਰਪੋਰਟ 'ਤੇ ਹਾਈ ਅਲਰਟ, ਬੁਲਾਈ ਗਈ ਐਮਰਜੈਂਸੀ ਮੀਟਿੰਗ, ਜਾਣੋ ਕਾਰਨ
ਕਰੀਬ ਇਕ ਮਹੀਨਾ ਪਹਿਲਾਂ ਇਨ੍ਹਾਂ ਠੇਕੇਦਾਰਾਂ ਵਿਚਕਾਰ ਆਪਸੀ ਤਾਲਮੇਲ (ਪੁਲ) ਟੁੱਟ ਗਿਆ ਸੀ। ਬਾਜ਼ਾਰ ’ਚ ਹਿੱਸੇਦਾਰੀ ਅਤੇ ਦਬਦਬੇ ਦੀ ਇਸ ਜੰਗ ਕਾਰਨ ਠੇਕੇਦਾਰਾਂ ਨੇ ਗਾਹਕਾਂ ਨੂੰ ਖਿੱਚਣ ਲਈ ਕੀਮਤਾਂ ’ਚ ਭਾਰੀ ਕਟੌਤੀ ਕਰ ਦਿੱਤੀ ਸੀ। ਕੀਮਤਾਂ 40 ਫ਼ੀਸਦੀ ਤੱਕ ਡਿਗ ਜਾਣ ਕਾਰਨ ਠੇਕੇਦਾਰਾਂ ਨੂੰ ਵਿੱਤੀ ਤੌਰ ’ਤੇ ਕਾਫ਼ੀ ਨੁਕਸਾਨ ਉਠਾਉਣਾ ਪੈ ਰਿਹਾ ਸੀ ਪਰ ਇਸ ਦਾ ਸਿੱਧਾ ਲਾਭ ਸ਼ਰਾਬ ਦੇ ਸ਼ੌਕੀਨਾਂ ਨੂੰ ਮਿਲ ਰਿਹਾ ਸੀ। ਸ਼ਰਾਬ ਦੇ ਹਰ ਠੇਕੇ ’ਤੇ ਘੱਟ ਰੇਟਾਂ ਦੀਆਂ ਲਿਸਟਾਂ ਲੱਗ ਗਈਆਂ ਸਨ, ਜਿਸ ਕਾਰਨ ਲੋਕਾਂ ਨੇ ਸਸਤੇ ਰੇਟ ’ਤੇ ਖ਼ੂਬ ਖ਼ਰੀਦਦਾਰੀ ਕੀਤੀ। ਹੁਣ ਆਉਣ ਵਾਲੇ ਸਮੇਂ ’ਚ ਸ਼ਰਾਬ ਦੇ ਠੇਕੇਦਾਰਾਂ ਨੂੰ ਨਵੇਂ ਰੇਟਾਂ ’ਤੇ ਮੰਦੀ ਦਾ ਸਾਹਮਣਾ ਕਰਨਾ ਪਵੇਗਾ ਕਿਉਂਕਿ ਆਮ ਖਪਤਕਾਰਾਂ ਕੋਲ ਅਜੇ ਤੱਕ ਸਸਤੇ ਰੇਟ ਵਾਲਾ ਸਟਾਕ ਬਾਕੀ ਹੈ।
ਇਹ ਵੀ ਪੜ੍ਹੋ- ਪੰਜਾਬ ਪੁਲਸ ਦੇ ASI ਦਾ ਕਤਲ, ਡਿਊਟੀ ’ਤੇ ਜਾਂਦੇ ਨੂੰ ਰਸਤੇ 'ਚ ਘੇਰ ਕੇ ਮਾਰੀਆਂ ਗੋਲੀਆਂ
ਆਬਕਾਰੀ ਵਿਭਾਗ ਦੀ ਵਿਚੋਲਗੀ ਨਾਲ ਹੋਈ ‘ਦੋਸਤੀ’
ਬੀਤੇ 3-4 ਦਿਨਾਂ ਦੇ ਅੰਦਰ ਅੰਮ੍ਰਿਤਸਰ ਦੇ ਇਸ ਸ਼ਰਾਬ ਕਾਰੋਬਾਰ ’ਚ ਇਕ ਵੱਡਾ ਨਾਟਕੀ ਮੋੜ ਆਇਆ। ਆਪਸੀ ਦੁਸ਼ਮਣੀ ਅਚਾਨਕ ‘ਦੋਸਤੀ’ ’ਚ ਬਦਲ ਗਈ। ਸੂਤਰਾਂ ਦਾ ਦਾਅਵਾ ਹੈ ਕਿ ਇਸ ਪੂਰੇ ਗਤੀਰੋਧ ਨੂੰ ਖ਼ਤਮ ਕਰਨ ’ਚ ਆਬਕਾਰੀ ਵਿਭਾਗ ਦੇ ਕੁਝ ਉੱਚ ਅਧਿਕਾਰੀਆਂ ਨੇ ਮੁੱਖ ਭੂਮਿਕਾ ਨਿਭਾਈ ਹੈ। ਅਧਿਕਾਰੀਆਂ ਦੀ ਵਿਚੋਲਗੀ ਨਾਲ ਦੋਵਾਂ ਧਿਰਾਂ ਵਿਚਕਾਰ ਇਕ ਗੁਪਤ ਸਮਝੌਤਾ ਕਰਵਾਇਆ ਗਿਆ, ਜਿਸ ਤੋਂ ਬਾਅਦ ਠੇਕੇਦਾਰਾਂ ਦਾ ਟੁੱਟਿਆ ਹੋਇਆ ਸਿੰਡੀਕੇਟ ਫਿਰ ਬਹਾਲ ਹੋ ਗਿਆ। ਨਤੀਜਾ ਇਹ ਹੋਇਆ ਕਿ ਸ਼ਰਾਬ ਦੀਆਂ ਕੀਮਤਾਂ ਤੁਰੰਤ ਪ੍ਰਭਾਵ ਨਾਲ ਉਸੀ ਦਰ ’ਤੇ ਪਹੁੰਚ ਗਈਆਂ, ਜੋ ਅਪ੍ਰੈਲ ਮਹੀਨੇ ਦੀ ਸ਼ੁਰੂਆਤ ’ਚ ਲਾਗੂ ਸਨ। ਸੂਤਰਾਂ ਦੀ ਮੰਨੀਏ ਤਾਂ ਜੇਕਰ ਇਨ੍ਹਾਂ ਸ਼ਰਾਬ ਠੇਕੇਦਾਰਾਂ ਦਾ ਸਮਝੌਤਾ ਨਾ ਹੁੰਦਾ ਤਾਂ ਸਰਕਾਰ ਦਾ ਰੈਵੇਨਿਊ ਵੀ ਪ੍ਰਭਾਵਿਤ ਹੋ ਸਕਦਾ ਸੀ।
ਖਪਤਕਾਰਾਂ ’ਚ ਭਾਰੀ ਰੋਸ : ਮਹਿੰਗੇ ਭਾਅ ’ਤੇ ਮਿਲ ਰਹੀ ਘਟੀਆ ਸ਼ਰਾਬ
ਇਸ ਅਚਾਨਕ ਹੋਏ ਮੁੱਲ ਵਾਧੇ ਤੋਂ ਬਾਅਦ ਸ਼ਰਾਬ ਦੇ ਖਪਤਕਾਰਾਂ ’ਚ ਭਾਰੀ ਨਿਰਾਸ਼ਾ ਅਤੇ ਗੁੱਸਾ ਦੇਖਿਆ ਜਾ ਰਿਹਾ ਹੈ। ਸਥਾਨਕ ਖ਼ਰੀਦਦਾਰਾਂ ਦਾ ਕਹਿਣਾ ਹੈ ਕਿ ਇਹ ਸਿੱਧਾ-ਸਿੱਧਾ ਖਪਤਕਾਰਾਂ ਦੀ ਜੇਬ ’ਤੇ ਡਾਕਾ ਹੈ।
ਖਪਤਕਾਰਾਂ ਦਾ ਪੱਖ : ਜਦੋਂ ਠੇਕੇਦਾਰਾਂ ’ਚ ਮੁਕਾਬਲਾ ਸੀ, ਉਦੋਂ ਸਾਨੂੰ ਘੱਟ ਅਤੇ ਕਿਫ਼ਾਇਤੀ ਕੀਮਤਾਂ ’ਤੇ ਵਧੀਆ ਅਤੇ ਬ੍ਰਾਂਡਿਡ ਸ਼ਰਾਬ ਮਿਲ ਰਹੀ ਸੀ ਪਰ ਹੁਣ ਸਿੰਡੀਕੇਟ ਬਣਦੇ ਹੀ ਕੀਮਤਾਂ ਇੰਨੀਆਂ ਵਧਾ ਦਿੱਤੀਆਂ ਗਈਆਂ ਹਨ ਕਿ ਜੇਬ ’ਤੇ ਭਾਰੀ ਬੋਝ ਪੈ ਰਿਹਾ ਹੈ। ਸਭ ਤੋਂ ਵੱਡੀ ਤ੍ਰਾਸਦੀ ਇਹ ਹੈ ਕਿ ਹੁਣ ਜ਼ਿਆਦਾ ਪੈਸੇ ਖ਼ਰਚ ਕਰਨ ਤੋਂ ਬਾਅਦ ਵੀ ਗੁਣਵੱਤਾ ਨਾਲ ਸਮਝੌਤਾ ਕਰਨਾ ਪੈ ਰਿਹਾ ਹੈ ਅਤੇ ਘਟੀਆ ਪੱਧਰ ਦੀ ਸ਼ਰਾਬ ਮਿਲ ਰਹੀ ਹੈ।
ਰੈਵੇਨਿਊ ਅਤੇ ਸਿੰਡੀਕੇਟ ਦੀ ਖੇਡ
ਮਾਹਿਰਾਂ ਦਾ ਮੰਨਣਾ ਹੈ ਕਿ ਠੇਕੇਦਾਰਾਂ ਦੀ ਇਸ ਆਪਸੀ ‘ਨੂਰਾਕੁਸ਼ਤੀ’ ਅਤੇ ਫਿਰ ਅਚਾਨਕ ਹੋਏ ਸਮਝੌਤੇ ਦੇ ਪਿੱਛੇ ਕਰੋੜਾਂ ਰੁਪਏ ਦੇ ਰੈਵੇਨਿਊ ਅਤੇ ਮੁਨਾਫ਼ੇ ਦੀ ਖੇਡ ਹੈ। ਆਬਕਾਰੀ ਵਿਭਾਗ ਦੀ ਇਸ ਮਾਮਲੇ ’ਚ ਚੁੱਪ ਵੀ ਕਈ ਗੰਭੀਰ ਸਵਾਲ ਖੜ੍ਹੇ ਕਰਦੀ ਹੈ ਕਿ ਆਖ਼ਰ ਖਪਤਕਾਰਾਂ ਦੇ ਹਿੱਤਾਂ ਨੂੰ ਛਿੱਕੇ ਟੰਗ ਕੇ ਇਸ ਏਕਾਧਿਕਾਰ (ਮੋਨੋਪਲੀ) ਨੂੰ ਦੁਬਾਰਾ ਸ਼ਹਿ ਕਿਉਂ ਦਿੱਤੀ ਗਈ?
ਪੀਣ ਵਾਲਿਆਂ ਨੂੰ ਫਿਲਹਾਲ ਕੋਈ ਰਾਹਤ ਨਹੀਂ
ਫਿਲਹਾਲ ਅੰਮ੍ਰਿਤਸਰ ’ਚ ਸ਼ਰਾਬ ਦੇ ਸ਼ੌਕੀਨਾਂ ਲਈ ‘ਸਸਤੇ ਦਿਨਾਂ’ ਦੀ ਰਾਹਤ ਖ਼ਤਮ ਹੋ ਚੁੱਕੀ ਹੈ ਅਤੇ ਉਨ੍ਹਾਂ ਨੂੰ ਹੁਣ ਅਪ੍ਰੈਲ ਮਹੀਨੇ ਵਾਲੇ ਪੁਰਾਣੇ ਮਹਿੰਗੇ ਰੇਟ ਹੀ ਚੁਕਾਉਣੇ ਪੈਣਗੇ।
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
Whatsapp Channel: https://whatsapp.com/channel/0029Va94hsaHAdNVur4L170e
ਰਿਹਰਸਲ ਦੌਰਾਨ ਗੈਰ-ਹਾਜ਼ਰ ਰਹੇ ਚੋਣ ਕਰਮੀਆਂ ਨੂੰ ਨੋਟਿਸ ਜਾਰੀ
NEXT STORY 
