ਵਿਸ਼ਵ ਭਰ ਵਿੱਚ ਮੌਜੂਦਾ ਲੋਕਤੰਤਰ ਦੀ ਨੀਂਹ ਮੰਨੇ ਜਾਣ ਵਾਲੇ ਗ੍ਰੇਟ ਬ੍ਰਿਟੇਨ ਦੇ ਅਗਲੇ ਪ੍ਰਧਾਨ ਮੰਤਰੀ ਦੇ ਅਹੁਦੇ ਲਈ ਕੰਜ਼ਰਵੇਟਿਵ ਪਾਰਟੀ ਦੀਆਂ ਅੰਦਰੂਨੀ ਚੋਣਾਂ ਦੇ ਸ਼ੁਰੂਆਤੀ ਦੌਰ ਵਿੱਚ ਪਛੜਨ ਤੋਂ ਬਾਅਦ 47 ਸਾਲਾ ਲਿਜ਼ ਟਰੱਸ ਆਖ਼ਰਕਾਰ ਪ੍ਰਧਾਨ ਮੰਤਰੀ ਚੁਣੀ ਗਈ ਹੈ। ਉਹ ਬ੍ਰਿਟੇਨ ਦੀ 6ਵੀਂ ਪ੍ਰਧਾਨ ਮੰਤਰੀ ਹੈ ਜੋ ਪਿਛਲੇ 4 ਸਾਲਾਂ ਵਿੱਚ ਚੁਣੀ ਗਈ ਹੈ ਤੇ ਬ੍ਰਿਟਿਸ਼ ਲੋਕਤੰਤਰ ਦੀ 56ਵੀਂ ਪ੍ਰਧਾਨ ਮੰਤਰੀ। ਉਹ ਮਾਰਗਰੇਟ ਥੈਚਰ ਅਤੇ ਟਰੇਸਾ ਮੇਅ ਤੋਂ ਬਾਅਦ ਬ੍ਰਿਟੇਨ ਦੀ ਤੀਜੀ ਮਹਿਲਾ ਪ੍ਰਧਾਨ ਮੰਤਰੀ ਹੈ, ਜਿਸਨੂੰ "ਆਇਰਨ ਲੇਡੀ" ਵਜੋਂ ਜਾਣਿਆ ਜਾਂਦਾ ਹੈ ਜੋ ਸਦਾ ਆਪਣੇ ਹੱਕਾਂ ਲਈ ਲੜੀ ਅਤੇ ਕਦੇ ਹਾਰ ਨਹੀਂ ਮੰਨੀ। ਲਿਜ਼ ਟਰਸ ਦੇ ਪਿਤਾ ਗਣਿਤ ਦੇ ਪ੍ਰੋਫ਼ੈਸਰ ਸਨ ਅਤੇ ਉਸਦੀ ਮਾਂ ਇੱਕ ਨਰਸ ਸੀ। ਆਪਣੀ ਪੜ੍ਹਾਈ ਪੂਰੀ ਕਰਨ ਤੋਂ ਬਾਅਦ, ਉਸਨੇ ਕੁਝ ਸਮਾਂ ਅਕਾਊਂਟੈਂਟ ਵਜੋਂ ਵੀ ਕੰਮ ਕੀਤਾ ਅਤੇ ਫਿਰ ਰਾਜਨੀਤੀ ਵਿੱਚ ਪ੍ਰਵੇਸ਼ ਕੀਤਾ।
ਇਹ ਚੋਣਾਂ ਗ੍ਰੇਟ ਬ੍ਰਿਟੇਨ ਦੀ ਪੁਰਾਣੀ ਕੰਜ਼ਰਵੇਟਿਵ ਪਾਰਟੀ ਸਰਕਾਰ ਦੇ ਪ੍ਰਧਾਨ ਮੰਤਰੀ ਬੋਰਿਸ ਜਾਨਸਨ ਦੇ ਅਸਤੀਫ਼ੇ ਕਾਰਨ ਹੋਈਆਂ ਸਨ। ਬੋਰਿਸ ਜਾਨਸਨ ਦੀ ਸਾਬਕਾ ਸਰਕਾਰ ਵਿੱਚ ਵਿਦੇਸ਼ ਮੰਤਰੀ ਰਹਿ ਚੁੱਕੀ ਲਿਜ਼ ਟਰੱਸ ਨੇ ਜਾਨਸਨ ਸਰਕਾਰ ਦੌਰਾਨ ਵਿੱਤ ਮੰਤਰੀ ਰਹੇ ਰਿਸ਼ੀ ਸੁਨਕ ਨੂੰ ਕਰੀਬ 21 ਹਜ਼ਾਰ ਵੋਟਾਂ ਦੇ ਵੱਡੇ ਫ਼ਰਕ ਨਾਲ ਹਰਾਇਆ। ਹਾਲਾਂਕਿ ਰਿਸ਼ੀ ਸੁਨਕ ਸ਼ੁਰੂਆਤੀ ਦੌਰ 'ਚ ਲਿਜ਼ ਟਰੱਸ ਨੂੰ ਪਛਾੜ ਰਹੇ ਸਨ।
ਇਹ ਕਹਿਣਾ ਔਖਾ ਹੈ ਕਿ ਬ੍ਰਿਟੇਨ ਦੇ ਲੋਕਾਂ ਨੂੰ ਰਿਸ਼ੀ ਸੁਨਕ ਦੀ ਬੋਰਿਸ ਜਾਨਸਨ ਨਾਲ "ਧੋਖਾਧੜੀ" ਪਸੰਦ ਨਹੀਂ ਆਈ ਜਾਂ ਉਸ ਦੇ ਰੀਤੀ-ਰਿਵਾਜ਼, ਰੰਗ ਰੂਪ, ਉਸ ਦਾ ਭਾਰਤੀ ਦੇਸੀ ਹੋਣਾ ਤੇ ਇਕ ਅੰਗਰੇਜ਼ੀ ਦੇਸ਼ ਦਾ ਪ੍ਰਧਾਨ ਮੰਤਰੀ ਬਣਨ ਦਾ ਭਵਿੱਖ ਰਾਸ ਨਹੀਂ ਆਇਆ। ਬੋਰਿਸ ਜਾਨਸਨ ਨੂੰ ਰਿਸ਼ੀ ਸੁਨਕ ਨੇ ਆਪਣਾ "ਰਾਜਨੀਤਿਕ ਗੁਰੂ" ਦੱਸਿਆ ਸੀ, ਜਿਸ ਨੂੰ ਸੁਨਕ ਦੇ ਵਿਰੋਧੀਆਂ ਨੇ ਬੋਰਿਸ ਦਾ ਵਿਸ਼ਵਾਸਘਾਤੀ ਕਿਹਾ ਕਿਉਂਕਿ ਸੁਨਕ ਅਜਿਹਾ ਕਰਨ ਵਾਲਾ ਪਹਿਲਾ ਵਿਅਕਤੀ ਸੀ। ਅਸਤੀਫ਼ਾ ਦੇ ਕੇ ਬਰਤਾਨਵੀ ਸਿਆਸਤ ਵਿੱਚ ਧਮਾਕਾ ਮਚ ਗਿਆ। ਇੰਗਲੈਂਡ ਦੇ ਇਤਿਹਾਸ ਵਿੱਚ, 13ਵੀਂ ਸਦੀ ਵਿੱਚ ਲੋਕਤੰਤਰ ਦੀ ਸ਼ੁਰੂਆਤ ਤੋਂ, ਸਿਰਫ ਬ੍ਰਿਟਿਸ਼ ਮੂਲ ਦੇ ਲੋਕ ਹੀ ਪ੍ਰਧਾਨ ਮੰਤਰੀ ਬਣੇ ਹਨ। ਹਾਲਾਂਕਿ ਸੁਨਕ ਸੁਭਾਅ ਤੋਂ ਬ੍ਰਿਟਿਸ਼ ਨਾਗਰਿਕ ਹੈ, ਪਰ ਸਿਰਫ਼ ਬ੍ਰਿਟੇਨ ਵਿੱਚ ਪੈਦਾ ਹੋਏ ਲੋਕ ਹੀ ਪ੍ਰਧਾਨ ਮੰਤਰੀ ਬਣੇ ਹਨ। ਇਸ ਲਈ, ਬ੍ਰਿਟਿਸ਼ ਲੋਕਾਂ ਦੇ ਮਨਾਂ ਵਿੱਚ ਬਣੀ ਇਹ ਮਾਮੂਲੀ ਜਿਹੀ ਧਾਰਨਾ ਵੀ ਉਨ੍ਹਾਂ ਦੀ ਵਿਰੋਧੀ ਬਣ ਗਈ। ਸਭ ਨੂੰ ਇਹ ਵੀ ਪਤਾ ਹੈ ਕਿ ਇੰਗਲੈਂਡ ਦੀ ਮਹਾਰਾਣੀ ਵੀ ਨਕਸਲੀ ਵਿਤਕਰੇ ਲਈ ਪਹਿਚਾਣੀ ਜਾਂਦੀ ਹੈ, ਹੋ ਸਕਦਾ ਹੈ, ਰਿਸ਼ੀ ਦੀ ਚੜ੍ਹਤ ਨੂੰ ਦੇਖਦੇ ਹੋਏ ਅੰਦਰੋਂ ਹੀ ਕੋਈ ਰਾਜਨੀਤੀ ਖੇਡ ਖੇਡੀ ਹੋਵੇਗੀ ਤੇ ਉਸ ਨੂੰ ਪਾਸੇ ਕਰ ਦਿੱਤਾ ਹੋਵੇਗਾ।
ਰਿਸ਼ੀ ਸੁਨਕ ਭਾਰਤੀ ਮੂਲ ਦੇ ਬ੍ਰਿਟਿਸ਼ ਨਾਗਰਿਕ ਅਤੇ ਵਿਸ਼ਵ ਪੱਧਰੀ ਅਰਥ ਸ਼ਾਸਤਰੀ ਹਨ। 1980 ਵਿੱਚ ਜਨਮੇ, ਸੁਨਕ ਨੇ ਆਕਸਫੋਰਡ ਅਤੇ ਸਟੈਨਫੋਰਡ ਯੂਨੀਵਰਸਿਟੀਆਂ ਵਿੱਚ ਪੜ੍ਹਾਈ ਕੀਤੀ। 2009 ਵਿੱਚ, ਉਸਨੇ ਐਨਆਰ ਨਰਾਇਣ ਮੂਰਤੀ ਅਤੇ ਇਨਫੋਸਿਸ ਦੇ ਸੰਸਥਾਪਕ ਸੁਧਾ ਮੂਰਤੀ ਦੀ ਧੀ ਅਕਸ਼ਾ ਮੂਰਤੀ ਨਾਲ ਵਿਆਹ ਕਰਵਾ ਲਿਆ। ਉਹ 2015 ਵਿੱਚ ਹਾਊਸ ਆਫ ਕਾਮਨਜ਼ ਲਈ ਚੁਣੇ ਗਏ ਸਨ ਅਤੇ 2020 ਵਿੱਚ ਦੇਸ਼ ਦੇ ਵਿੱਤ ਮੰਤਰੀ ਬਣੇ ਸਨ। ਪ੍ਰਧਾਨ ਮੰਤਰੀ ਦੇ ਅਹੁਦੇ ਲਈ ਸੁਨਕ ਦੀ ਉਮੀਦਵਾਰੀ ਮਹੱਤਵਪੂਰਨ ਸੀ ਕਿਉਂਕਿ ਭਾਰਤੀ ਯਹੂਦੀਆਂ ਤੋਂ ਬਾਅਦ ਕੰਜ਼ਰਵੇਟਿਵ ਪਾਰਟੀ ਦੇ ਸਭ ਤੋਂ ਵੱਡੇ ਘੱਟ ਗਿਣਤੀ ਸਮਰਥਕ ਹਨ।
ਆਕਸਫੋਰਡ ਯੂਨੀਵਰਸਿਟੀ ਦੀ ਨੇਹਾ ਸ਼ਾਹ ਦੇ ਅਨੁਸਾਰ, ਭਾਰਤੀ ਦੋ ਸਮੇਂ ਵਿੱਚ ਵੱਡੀ ਗਿਣਤੀ ਵਿੱਚ ਇੰਗਲੈਂਡ ਪਹੁੰਚੇ: ਪਹਿਲਾ, 1940-1950 ਦੇ ਦਹਾਕੇ ਦੌਰਾਨ ਜਦੋਂ ਇੰਗਲੈਂਡ ਨੂੰ ਕਾਮਿਆਂ ਦੀ ਲੋੜ ਸੀ; ਅਤੇ ਦੂਜਾ, 1970 ਦੇ ਦਹਾਕੇ ਦੌਰਾਨ ਜਦੋਂ ਉਨ੍ਹਾਂ ਨੂੰ ਪੂਰਬੀ ਅਫ਼ਰੀਕੀ ਦੇਸ਼ਾਂ ਕੀਨੀਆ, ਯੂਗਾਂਡਾ ਅਤੇ ਤਨਜ਼ਾਨੀਆ ਤੋਂ ਕੱਢ ਦਿੱਤਾ ਗਿਆ ਸੀ।
ਪਹਿਲੀ ਪੀਰੀਅਡ (1940-50ਵਿਆਂ) ਵਿੱਚ ਇੰਗਲੈਂਡ ਪਹੁੰਚਣ ਵਾਲੇ ਭਾਰਤੀਆਂ ਨੇ ਮਜ਼ਦੂਰ ਅੰਦੋਲਨਾਂ ਵਿੱਚ ਹਿੱਸਾ ਲਿਆ ਅਤੇ ਰੰਗਭੇਦ ਦਾ ਵਿਰੋਧ ਕੀਤਾ; ਉਹ ਲੇਬਰ ਪਾਰਟੀ ਦੇ ਵੱਧ ਤੋਂ ਵੱਧ ਸਮਰਥਕ ਬਣ ਗਏ। 1970 ਦੇ ਦਹਾਕੇ ਦੌਰਾਨ ਬਰਤਾਨੀਆ ਪਹੁੰਚੇ ਵੱਡੀ ਗਿਣਤੀ ਭਾਰਤੀ ਕੰਜ਼ਰਵੇਟਿਵ ਪਾਰਟੀ ਦੇ ਸਮਰਥਕ ਬਣ ਗਏ।ਰਿਸ਼ੀ ਸੁਨਕ, ਸਾਬਕਾ ਗ੍ਰਹਿ ਮੰਤਰੀ ਪ੍ਰੀਤੀ ਪਟੇਲ ਅਤੇ ਅਟਾਰਨੀ ਜਨਰਲ ਸੁਏਲਾ ਬ੍ਰੇਵਰਮੈਨ 1970 ਦੇ ਦਹਾਕੇ ਵਿੱਚ ਇੰਗਲੈਂਡ ਆਏ ਭਾਰਤੀਆਂ ਦੇ ਪੁੱਤਰ ਅਤੇ ਧੀਆਂ ਹਨ।
ਨੇਹਾ ਸ਼ਾਹ ਅਨੁਸਾਰ ਇਨ੍ਹਾਂ ਭਾਰਤੀਆਂ ਦੇ ਬਜ਼ੁਰਗਾਂ ਨੂੰ ਕੀਨੀਆ, ਯੁਗਾਂਡਾ ਅਤੇ ਤਨਜ਼ਾਨੀਆ ਵਿਚ ਬ੍ਰਿਟਿਸ਼ ਸਰਕਾਰ ਦੀ ਸਰਪ੍ਰਸਤੀ ਮਿਲੀ, ਜਿਸ ਕਾਰਨ ਉਨ੍ਹਾਂ ਨੇ ਆਰਥਿਕ ਅਤੇ ਰਾਜਨੀਤਿਕ ਤਰੱਕੀ ਕੀਤੀ। ਇਸ ਕਾਰਨ ਉਹ ਜ਼ਿਆਦਾਤਰ ਕੰਜ਼ਰਵੇਟਿਵ ਪਾਰਟੀ ਦੇ ਸਮਰਥਕ ਹਨ। ਕੰਜ਼ਰਵੇਟਿਵ ਪਾਰਟੀ ਸਖ਼ਤ ਇਮੀਗ੍ਰੇਸ਼ਨ ਕਾਨੂੰਨਾਂ ਵਿੱਚ ਵਿਸ਼ਵਾਸ ਰੱਖਦੀ ਹੈ। ਇਸ ਸਭ ਦੇ ਬਾਵਜੂਦ ਪ੍ਰਧਾਨ ਮੰਤਰੀ ਵਜੋਂ ਟਰੱਸ ਦੀ ਚੋਣ ਇਸ ਗੱਲ ਦਾ ਪ੍ਰਮਾਣ ਹੈ ਕਿ ਇੰਗਲੈਂਡ ਦੀਆਂ ਸਿਆਸੀ ਪਾਰਟੀਆਂ ਵਿੱਚ ਅੰਦਰੂਨੀ ਲੋਕਤੰਤਰ ਕਾਇਮ ਹੈ ਅਤੇ ਨੇਤਾਵਾਂ ਦੀ ਚੋਣ ਦਾ ਕੰਮ ਪਾਰਦਰਸ਼ਤਾ ਨਾਲ ਕੀਤਾ ਜਾਂਦਾ ਹੈ।
ਬਰਤਾਨੀਆ ਦਾ ਇੱਕ ਵੱਡਾ ਉਦਾਰਵਾਦੀ ਵਰਗ ਅਤੇ ਖ਼ਾਸ ਕਰਕੇ ਕੰਜ਼ਰਵੇਟਿਵ ਪਾਰਟੀ, ਦੇਸ਼ ਦੀ ਆਰਥਿਕਤਾ ਬਾਰੇ ਆਪਣੀਆਂ ਨੀਤੀਆਂ ਅਤੇ ਯੋਜਨਾਵਾਂ ਨਾਲ ਉਸਦਾ ਸਮਰਥਨ ਕਰ ਰਹੀ ਸੀ। ਹਾਲਾਂਕਿ, ਸਾਬਕਾ ਪ੍ਰਧਾਨ ਮੰਤਰੀ ਬੋਰਿਸ ਜਾਨਸਨ ਉਨ੍ਹਾਂ ਦੇ ਸਭ ਤੋਂ ਵੱਡੇ ਵਿਰੋਧੀ ਵਜੋਂ ਉਭਰੇ ਅਤੇ ਰਿਸ਼ੀ ਸੁਨਕ ਨੂੰ ਉਨ੍ਹਾਂ ਦੀ ਸਰਕਾਰ ਦੇ ਪਤਨ ਲਈ ਜ਼ਿੰਮੇਵਾਰ ਠਹਿਰਾਇਆ। ਬੋਰਿਸ ਜਾਨਸਨ ਦੀ ਸਰਕਾਰ ਵੀ ਕਈ ਪਾਸਿਆਂ ਤੋਂ ਗੰਭੀਰ ਘਪਲਿਆਂ ਵਿੱਚ ਉਲਝੀ ਰਹੀ ਹੈ ਤੇ ਉਹ ਖ਼ੁਦ ਵੀ ਕਈ ਘਰੇਲੂ ਪਾਰਟੀਆਂ ਦੇ ਕਾਰਨ ਕੋਵਿਡ ਦੇ ਨਿਯਮਾਂ ਦੀ ਉਲੰਘਣਾ ਕਰਕੇ ਘਿਰੇ ਰਹੇ ਹਨ ਪਰ ਰੂਸ-ਯੂਕਰੇਨ ਯੁੱਧ ਨੂੰ ਵੀ ਬ੍ਰਿਟੇਨ ਦੀ ਮੰਦੀ ਅਤੇ ਵਿੱਤੀ ਸੰਕਟ ਦਾ ਮੁੱਖ ਕਾਰਨ ਮੰਨਿਆ ਜਾਂਦਾ ਹੈ।
ਬ੍ਰਿਟੇਨ ਇਨ੍ਹੀਂ ਦਿਨੀਂ ਗੰਭੀਰ ਵਿੱਤੀ ਸੰਕਟ ਦੀ ਕਗਾਰ 'ਤੇ ਖੜ੍ਹਾ ਹੈ, ਬੋਰਿਸ ਜਾਨਸਨ ਨੂੰ ਅਸਤੀਫ਼ਾ ਦੇਣਾ ਪਿਆ। ਲਿਜ਼ ਟਰੱਸ ਨੇ ਰਿਸ਼ੀ ਸੁਨਕ ਦੀਆਂ ਯੋਜਨਾਵਾਂ ਲਈ ਆਪਣੇ ਦਰਵਾਜ਼ੇ ਪੂਰੀ ਤਰ੍ਹਾਂ ਨਹੀਂ ਖੋਲ੍ਹੇ ਹਨ, ਹਾਲਾਂਕਿ ਉਸਨੇ ਦਾਅਵਾ ਕੀਤਾ ਹੈ ਕਿ ਉਹ ਦੇਸ਼ ਦੇ ਵਿੱਤੀ ਸੰਕਟ ਨੂੰ ਹੱਲ ਕਰਨ ਲਈ ਤੁਰੰਤ ਪ੍ਰਭਾਵ ਨਾਲ ਕੰਮ ਕਰਨਾ ਸ਼ੁਰੂ ਕਰ ਦੇਵੇਗੀ। ਲਿਜ਼ ਟਰੱਸ ਕੋਲ ਦਹਾਕਿਆਂ ਦਾ ਸਿਆਸੀ ਤਜਰਬਾ ਹੈ ਪਰ ਬ੍ਰਿਟੇਨ ਦੇ ਆਪਣੇ ਮਾਹਿਰਾਂ ਨੇ ਅਗਲੇ ਦੋ ਸਾਲਾਂ ਦੌਰਾਨ ਦੇਸ਼ ਵਿੱਚ ਗੰਭੀਰ ਮੰਦੀ ਅਤੇ ਆਰਥਿਕ ਸੰਕਟ ਦੀ ਸੰਭਾਵਨਾ ਦੀ ਚਿਤਾਵਨੀ ਦਿੱਤੀ ਹੈ। ਬ੍ਰਿਟੇਨ 'ਚ ਇਸ ਸਾਲ ਮਹਿੰਗਾਈ ਦਰ ਵੀ 13 ਫ਼ੀਸਦੀ ਤੱਕ ਪਹੁੰਚਣ ਦੀ ਉਮੀਦ ਹੈ।
ਰਿਸ਼ੀ ਸੁਨਕ ਨੇ ਜਿੱਥੇ ਕੰਜ਼ਰਵੇਟਿਵ ਪਾਰਟੀ ਨੂੰ ਇਕ ਪਰਿਵਾਰ ਕਰਾਰ ਦਿੱਤਾ ਹੈ ਅਤੇ ਲਿਜ਼ ਟਰੱਸ ਨੂੰ ਪੂਰਾ ਸਮਰਥਨ ਦਿੱਤਾ ਹੈ, ਉੱਥੇ ਇਹ ਦੇਖਣਾ ਬਾਕੀ ਹੈ ਕਿ ਲਿਜ਼ ਟਰੱਸ ਆਪਣੇ ਦਮ 'ਤੇ ਦੇਸ਼ ਦੇ ਵਿੱਤੀ ਸੰਕਟ 'ਤੇ ਕਿਸ ਹੱਦ ਤੱਕ ਕਾਬੂ ਪਾਉਂਦੀ ਹੈ ਜਾਂ ਪਹਿਲਾਂ ਰਹਿ ਚੁਕੇ ਪ੍ਰਧਾਨ ਮੰਤਰੀਆਂ ਦੀ ਤਰ੍ਹਾਂ ਉਸ ਦੀ ਕਾਰਗੁਜ਼ਾਰੀ ਕਾਰਨ ਉਸ ਦੀ ਆਪਣੀ ਹੀ ਪਾਰਟੀ ਉਸ ਨੂੰ ਲਾਂਭੇ ਕਰਨ ਲਈ ਤਤਪਰ ਹੋ ਜਾਵੇਗੀ, ਜੋ ਸਮਾਂ ਹੀ ਦੱਸ ਸਕਦਾ ਹੈ।
ਇੰਗਲੈਂਡ ਵਿੱਚ 12 ਸਾਲਾਂ ਤੋਂ ਸੱਤਾਧਾਰੀ ਕੰਜ਼ਰਵੇਟਿਵ ਪਾਰਟੀ ਦੀ ਨਵੀਂ ਪ੍ਰਧਾਨ ਮੰਤਰੀ ਲਿਜ਼ ਟਰੱਸ ਨੂੰ ਕਈ ਆਰਥਿਕ ਚੁਣੌਤੀਆਂ ਦਾ ਸਾਹਮਣਾ ਕਰਨਾ ਪਵੇਗਾ। ਦੇਸ਼ ਵਿਚ ਮਹਿੰਗਾਈ 40 ਸਾਲਾਂ ਵਿਚ ਸਭ ਤੋਂ ਉੱਚੀ ਪੱਧਰ 'ਤੇ ਹੈ, ਦੇਸ਼ ਵਿਚ ਮੌਜੂਦਾ ਟੈਕਸਾਂ ਵਿਚ ਕਟੌਤੀ ਕਰਨ ਅਤੇ ਬਿਜਲੀ ਦੇ ਬਿੱਲਾਂ ਦੇ ਬਕਾਏ ਨੂੰ ਅਲਾਟ ਕਰਨ ਲਈ ਸਰਕਾਰੀ ਫੰਡਾਂ ਵਿਚ 80 ਬਿਲੀਅਨ ਪੌਂਡ ਦੇ ਘਾਟੇ ਨੂੰ ਪੂਰਾ ਕਰਨਾ ਵੀ ਉਸ ਲਈ ਇਕ ਵੱਡੀ ਪ੍ਰੀਖਿਆ ਹੋਵੇਗੀ। ਯੂਕਰੇਨ ਯੁੱਧ ਦੇ ਸਬੰਧ ਵਿਚ ਵੀ ਉਹ ਯੂਕਰੇਨ ਦੀ ਹਰ ਪੱਧਰ 'ਤੇ ਮਦਦ ਕਰਨ ਦੀ ਨੀਤੀ ਜਾਰੀ ਰੱਖੇਗੀ। ਹਾਲਾਂਕਿ ਅਗਲੇ ਚਾਰ ਮਹੀਨੇ ਉਨ੍ਹਾਂ ਦੀ ਸਰਕਾਰ ਦੀ ਕਾਰਗੁਜ਼ਾਰੀ ਨੂੰ ਪਰਖਣ ਲਈ ਬਹੁਤ ਮਹੱਤਵਪੂਰਨ ਸਾਬਤ ਹੋ ਸਕਦੇ ਹਨ। ਇਹ ਚਾਰ ਮਹੀਨੇ ਉਸ ਦੇ ਸੱਤਾ ਵਿਚ ਰਹਿਣ ਜਾਂ ਸੱਤਾ ਤੋਂ ਕਿਨਾਰਾਂ ਕਰਨ ਦੇ ਸੰਕੇਤ ਦੇ ਸਕਦੇ ਹਨ।
ਇਕ ਹੋਰ ਮੁੱਦਾ ਇਹ ਹੈ ਕਿ ਸਾਰੇ ਕੰਜ਼ਰਵੇਟਿਵ ਬ੍ਰਿਟੇਨ ਨੂੰ ਬਾਕੀ ਯੂਰਪ ਤੋਂ ਵੱਖ ਰੱਖਣਾ ਚਾਹੁੰਦੇ ਹਨ ਅਤੇ ਲਿਜ਼ ਟਰੱਸ ਦੀ ਸੋਚ ਹੀ ਉਹਨਾਂ ਨਾਲ ਸਹਿਮਤੀ ਪ੍ਰਗਟਾਉਂਦੀ ਹੈ, ਹਾਲਾਂਕਿ ਬੋਰਿਸ ਜਾਨਸਨ ਅਮਰੀਕਾ ਦੇ ਸਮਰਥਕ ਸਨ, ਲਿਜ਼ ਟਰੱਸ ਦਾ ਕਹਿਣਾ ਹੈ, ਕਿ "ਸਾਨੂੰ ਆਪਣੇ ਦੇਸ਼ ਨੂੰ ਨਾ ਸਿਰਫ਼ ਯੂਰਪ ਤੋਂ, ਸਗੋਂ ਅਮਰੀਕਾ ਦੇ ਪਰਛਾਵੇਂ ਤੋਂ ਵੀ ਦੂਰ ਰੱਖ ਕੇ ਉਸ ਦੀ ਵੱਖਰੀ ਤਸਵੀਰ ਬਣਾਉਣੀ ਚਾਹੀਦੀ ਹੈ।" ਜਿਸ ਨੂੰ ਕਮਿਊਨਿਸਟ ਪਾਰਟੀ ਦੇ ਮੈਂਬਰਾਂ ਨੇ ਵੀ ਹਾਂ ਵਿਚ ਨਾਹਰਾ ਮਾਰਦੇ ਹੋਏ ਉਸ ਨਾਲ ਸਹਿਮਤੀ ਪ੍ਰਗਟਾਈ ਹੈ।
ਸੁਰਜੀਤ ਸਿੰਘ ਫਲੋਰਾ
ਨੋਟ ਇਹ ਲੇਖਕ ਦੇ ਨਿੱਜੀ ਵਿਚਾਰ ਹਨ।
ਭਾਰਤੀ 'ਚ ਅੰਧ-ਵਿਸ਼ਵਾਸ ਦਾ ਮੌਜੂਦਾ ਦੌਰ ਅਤੇ ਇਸ ਤੋਂ ਮੁਕਤੀ ਦਾ ਰਾਹ
NEXT STORY 
