ਇੰਟਰਨੈੱਟ ਜੋ ਕਿ ਅਜੋਕੇ ਸਮੇਂ ਦੁਨੀਆ ਦੀ ਇਕ ਮੁੱਖ ਜਰੂਰਤ ਹੈ ਤੇ ਬਿਨਾਂ ਸ਼ੱਕ ਅੱਜ ਇੰਟਰਨੈਟ ਨਾਲ ਜੁੜੀਆਂ ਵੱਖ ਵੱਖ ਸੋਸ਼ਲ ਵੈਬਸਾਈਟਾਂ ਦੇ ਅਵਿਸ਼ਕਾਰ ਸਦਕਾ ਦੁਨੀਆ ਇਕ ਗਲੋਬਲ ਵਿਲੇਜ ਦੀ ਸੂਰਤ ਵਿੱਚ ਬਦਲ ਕੇ ਰਹਿ ਗਈ ਹੈ ਤੇ ਅੱਜ ਇੰਟਰਨੈੱਟ ਦੇ ਜਰੀਏ ਵੱਖ-ਵੱਖ ਐਪਸ ਰਾਹੀਂ ਸੂਚਨਾ ਦਾ ਅਦਾਨ-ਪ੍ਰਦਾਨ ਬੇਹੱਦ ਸਰਲ ਤੇ ਆਸਾਨ ਹੋ ਗਿਆ ਹੈ ਪਰ ਅਸੀਂ ਸਾਰੇ ਇਸ ਗੱਲ ਤੋਂ ਵੀ ਸਹਿਜੇ ਹੀ ਜਾਣੂੰ ਹਾਂ ਕਿ ਜਿੱਥੇ ਫੁੱਲ ਨੇ ਉੱਥੇ ਕੰਢੇ ਨੇ ਤੇ ਜਿੱਥੇ ਦੁੱਖ ਨੇ ਉਥੇ ਸੁੱਖ ਨੇ ਤੇ ਇਵੇਂ ਹੀ ਜਿਥੇ ਮੁਸ਼ਕਿਲਾਂ ਨੇ ਉਥੇ ਆਸਾਨੀਆਂ ਹੋਇਆ ਕਰਦੀਆਂ ਨੇ ਪਰ ਇਹ ਫੈਸਲਾ ਸਾਡੇ ਵਿਵੇਕ ਤੇ ਨਿਰਭਰ ਕਰਦਾ ਹੈ ਕਿ ਅਸੀਂ ਕਿਹੋ ਜਿਹੀ ਸਥਿਤੀ ਵਿਚ ਕਿਸ ਤਰ੍ਹਾਂ ਦਾ ਵਿਵਹਾਰ ਕਰਨਾ ਹੈ ਤੇ ਆਪਣੇ ਆਪ ਨੂੰ ਤੇ ਸਮੁੱਚੇ ਸਮਾਜ ਨੂੰ ਬੁਰਾਈਆਂ ਤੋਂ ਆਪਣੇ ਦਾਮਨ ਨੂੰ ਪਾਕ ਨੂੰ ਕਿਸ ਤਰ੍ਹਾਂ ਰੱਖਣ ਚ ਸਫਲ ਰਹਿੰਦੇ ਹਾਂ।
ਬੇਸ਼ੱਕ ਅੱਜ ਇੰਟਰਨੈੱਟ ਨੇ ਮਨੁੱਖੀ ਜੀਵਨ ਨੂੰ ਆਸਾਨ ਬਣਾਉਣ ਵਿੱਚ ਕੋਈ ਕੋਰ ਕਸਰ ਨਹੀਂ ਛੱਡੀ ਪਰ ਇਸ ਦੇ ਨਾਲ ਹੀ ਇੰਟਰਨੈੱਟ ਦੀਆਂ ਅਲਗ-ਅਲਗ ਐਪਸ ਦੇ ਜਰੀਏ ਸਮਾਜ ਉਪਰ ਜੋ ਮਾੜੇ ਪ੍ਰਭਾਵ ਪੈ ਰਹੇ ਹਨ ਉਨ੍ਹਾਂ ਤੋਂ ਵੀ ਇਨਕਾਰ ਨਹੀਂ ਕੀਤਾ ਜਾ ਸਕਦਾ। ਅੱਜ ਵੱਟਸ ਐਪ ਫੇਸਬੁੱਕ ਟਵਿਟਰ ਆਦਿ ਚਲਾਉਣ ਵਾਲਿਆਂ ਦੇ ਜਿਥੇ ਜੀਵਨ ਦੇ ਅਨਮੋਲ ਸਮੇਂ ਦੀ ਬਰਬਾਦੀ ਹੋ ਰਹੀ ਹੈ ਉੱਥੇ ਹੀ ਇਸ ਦੇ ਲਗਾਤਾਰ ਇਸਤੇਮਾਲ ਨਾਲ ਲੋਕ ਤਰ੍ਹਾਂ ਤਰ੍ਹਾਂ ਦੀਆਂ ਬੀਮਾਰੀਆਂ ਸਮੇਤ ਗੰਭੀਰ ਕਿਸਮ ਦੇ ਮਨੋਰੋਗਾਂ ਦਾ ਸ਼ਿਕਾਰ ਹੋ ਰਹੇ ਹਨ। ਕੁਝ ਸਮੇਂ ਤੋਂ ਬਲਿਊ ਵ੍ਹੇਲ ਅਤੇ ਪਬ-ਜੀ ਆਦਿ ਗੇਮਾਂ ਦਾ ਜਾਦੂ ਜਿਸ ਪ੍ਰਕਾਰ ਅੱਜ ਹਰ ਬੱਚੇ ਵੱਡੇ ਦੇ ਸਿਰ ਚੜ੍ਹ ਬੋਲ ਰਿਹਾ ਹੈ। ਇਹਨਾਂ ਗੇਮਾਂ ਨੂੰ ਲੈ ਕੇ ਬੱਚੇ ਕਿਸ ਖਤਰਨਾਕ ਹੱਦ ਤੱਕ ਪਾਗਲ ਵਿਖਾਈ ਦੇ ਰਹੇ ਹਨ ਇਸ ਦੀ ਗੰਭੀਰਤਾ ਇਸੇ ਤੋਂ ਹੀ ਲਗਾਈ ਜਾ ਸਕਦੀ ਹੈ ਕਿ ਬਲਿਊ ਵ੍ਹੇਲ ਗੇਮ ਨੇ ਕਈ ਬੱਚਿਆਂ ਦੀ ਕੀਮਤੀ ਜਾਨਾਂ ਤੱਕ ਲੈ ਲਈਆਂ ਹਨ। ਹਾਲ ਹੀ ਵਿੱਚ ਜਿਸ ਤਰ੍ਹਾਂ ਨਾਲ ਟਿਕ-ਟੋਕ ਐਪ ਨੂੰ ਲੈ ਕੇ ਮਦਰਾਸ ਹਾਈ ਕੋਰਟ ਦੀ ਮਦੁਰੈ ਬੈਂਚ ਨੇ ਆਪਣਾ ਸਖਤ ਰੁਖ ਅਖਤਿਆਰ ਇਸ ਤੇ ਪਾਬੰਦੀ ਲਗਾਈ ਹੈ ਤੇ ਕੇਂਦਰ ਸਰਕਾਰ ਨੂੰ ਟਿਕ-ਟਾਕ ਦੇ ਸੰਦਰਭ ਵਿੱਚ ਨਿਰਦੇਸ਼ ਦਿੱਤੇ ਹਨ। ਕੋਰਟ ਦੇ ਉਕਤ ਸੰਗਿਆਣ ਲੈਣ ਦੀ ਜਿੰਨੀ ਵੀ ਤਾਅਰੀਫ ਕੀਤੀ ਜਾਏ ਘੱਟ ਹੈ ਇਹ ਕਿ ਕੋਰਟ ਨੇ ਸਪੱਸ਼ਟ ਸ਼ਬਦਾਂ ਵਿੱਚ ਕਿਹਾ ਹੈ ਕਿ ਉਹ ਟਿਕ ਟਾਕ ਐਪ ਦੀ ਡਾਊਨਲੋਡਿੰਗ 'ਤੇ ਬੈਨ ਲਗਾਏ।ਇਸ ਦੇ ਨਾਲ ਹੀ ਕੋਰਟ ਨੇ ਕਰਦਿਆਂ ਆਖਿਆ ਹੈ ਕਿ ਉਹ ਟਿਕ ਟਾਕ 'ਤੇ ਬਣੇ ਵੀਡੀਓ ਦਾ ਪ੍ਰਸਾਰਨ ਨਾ ਕਰੇ। ਜਦੋਂ ਕਿ ਵਿਚੋਂ ਖਬਰਾਂ ਇਹ ਵੀ ਨਿਕਲ ਕੇ ਸਾਹਮਣੇ ਆ ਰਹੀਆਂ ਨੇ ਕਿ ਟਿਕ ਟਾਕ ਦੇ ਵੀਡੀਓਜ਼ 'ਚ ਅਸ਼ਲੀਲ ਸਮੱਗਰੀ ਦੀ ਭਰਮਾਰ ਤੋਂ ਬਾਅਦ ਇਹ ਆਦੇਸ਼ ਦਿੱਤੇ ਗਏ ਹਨ। ਜਿਕਰਯੋਗ ਹੈ ਕਿ ਉਕਤ ਮਾਮਲੇ ਵਿਚ ਜਸਟਿਸ ਐੱਸ.ਐੱਸ. ਸੁੰਦਰ ਨੇ ਮੀਡੀਆ ਨੂੰ ਨਿਰਦੇਸ਼ ਜਾਰੀ ਕਰਦੇ ਹੋਏ ਕਿਹਾ ਕਿ ਉਹ ਟਿਕ ਟਾਕ 'ਤੇ ਬਣੇ ਵੀਡੀਓ ਦਾ ਪ੍ਰਸਾਰਨ ਨਾ ਕਰੇ, ਕਿਉਂਕਿ ਇਸ ਐਪ ਭਾਵ ਟਿਕ ਟਾਕ ਰਾਹੀਂ ਬੱਚਿਆਂ ਤੱਕ ਬਾ-ਆਸਾਨੀ ਪੋਰਨਗ੍ਰਾਫੀ ਅਤੇ ਇਤਰਾਜ਼ਯੋਗ ਸਮੱਗਰੀ ਪਰੋਸੀ ਜਾ ਰਹੀ ਹੈ ਨਾਲ ਹੀ ਕੋਰਟ ਨੇ ਕੇਂਦਰ ਸਰਕਾਰ ਤੋਂ ਇਹ ਵੀ ਪੁੱਛਿਆ ਹੈ ਕਿ ਸਰਕਾਰ ਨੂੰ ਜਵਾਬ ਦੇਣਾ ਹੋਵੇਗਾ ਕਿ ਕੀ ਉਹ ਅਜਿਹਾ ਕੋਈ ਕਾਨੂੰਨ ਲਿਆਉਣ 'ਤੇ ਵਿਚਾਰ ਕਰੇਗੀ, ਜਿੱਦਾਂ ਕਿ ਅਮਰੀਕਾ ਆਦਿ ਦੀਆਂ ਸਰਕਾਰਾਂ ਨੇ ਬੱਚਿਆਂ ਨੂੰ ਸਾਈਬਰ ਕ੍ਰਾਈਮ ਦਾ ਸ਼ਿਕਾਰ ਬਣਨ ਤੋਂ ਬਚਾਉਣ ਲਈ ਚਿਲਡਰਨ ਆਨਲਾਈਨ ਪ੍ਰਿਵੇਸੀ ਪ੍ਰੋਟੈਕਸ਼ਨ ਐਕਟ ਦੇ ਅਧੀਨ ਲਿਆਉਣ ਦਾ ਕੰਮ ਕੀਤਾ ਹੈ।
ਇਥੇ ਜਿਕਰਯੋਗ ਹੈ ਕਿ ਪਿਛਲੇ ਕੁਝ ਸਮੇਂ ਤੋਂ ਲੋਕਾਂ 'ਚ ਨੌਜਵਾਨ ਮੁੰਡੇ ਕੁੜੀਆਂ ਵਿਚ ਟਿਕ ਟਾਕ ਐਪ ਦਾ ਜਨੂੰਨ ਪਾਗਲਪਨ ਦੀ ਹੱਦ ਤਕ ਸਿਰ ਚੜ੍ਹ ਕੇ ਬੋਲ ਰਿਹਾ ਹੈ । ਮੁੰਡੇ ਕੁੜੀਆਂ ਦੀ ਛੱਡੋ ਹੁਣ ਤਾਂ ਬਜ਼ੁਰਗ ਵੀ ਇਸ ਐਪ ਦੇ ਕਰੇਜੀ ਵਿਖਾਈ ਦੇ ਰਹੇ ਹਨ। ਪਰ ਵਧੇਰੇ ਸ਼ਰਾਰਤੀ ਅਨਸਰਾਂ ਵਲੋਂ ਪਿਛਲੇ ਕੁਝ ਸਮੇਂ ਤੋਂ ਉਕਤ ਐਪ ਦਾ ਬੇਹੱਦ ਆਪਤੀਜਨਕ ਤੇ ਸ਼ਰਮਨਾਕ ਹੱਦ ਤੱਕ ਗਲਤ ਇਸਤੇਮਾਲ ਹੋਣਾ ਸ਼ੁਰੂ ਹੋ ਗਿਆ । ਜਿਸ ਦੇ ਫਲਸਰੂਪ ਉਕਤ ਐਪ ਰਾਹੀਂ ਧੜੱਲੇ ਨਾਲ ਅਸ਼ਲੀਲ ਚੀਜ਼ਾਂ ਪਰੋਸੀਆਂ ਜਾ ਰਹੀਆਂ ਹਨ। ਕਿਉਂਕਿ ਅੱਜ ਕਲ ਬੱਚਿਆਂ ਦੇ ਹੱਥ ਵਿੱਚ ਮੋਬਾਇਲ ਆਮ ਵੇਖੇ ਜਾ ਸਕਦੇ ਹਨ ਤੇ ਇਹੋ ਵਜ੍ਹਾ ਹੈ ਕਿ ਐਪ ਇਸ ਉਕਤ ਐਪ ਦੇ ਫਲਸਰੂਪ ਬੱਚਿਆਂ ਦੇ ਕਿਰਦਾਰ ਅਤੇ ਭਵਿੱਖ ਤੇ ਜਿਸ ਪ੍ਰਕਾਰ ਕੋਰਟ ਨੇ ਟਿਕ ਟਾਕ ਬੈਨ ਕਰਨ ਦੇ ਨਿਰਦੇਸ਼ ਦਿੱਤੇ ਹਨ। ਅਜਿਹੀ ਹੀ ਕਾਰਵਾਈ ਅੱਜ ਉਹਨਾਂ ਪੇਡ ਟਰੋਲਰਾਂ ਵਿਰੁੱਧ ਵੀ ਲੋੜੀਂਦੀ ਹੈ ਜੋ ਕਿ ਰਾਜਨੀਤਕ ਪਾਰਟੀਆਂ ਦੁਆਰਾ ਆਪਣੇ ਸੋੜੇ ਹਿੱਤਾਂ ਦੀ ਪੂਰਤੀ ਲਈ ਫੋਜਾਂ ਵਾਂਗ ਆਪਣੇ ਮੁਖਾਲਫਾਂ ਵਿਰੁੱਧ ਖੜ੍ਹੇ ਕੀਤੇ ਜਾਂਦੇ ਹਨ ਤੇ ਜਿਸ ਦੇ ਫਲਸਰੂਪ ਹੱਕ ਸੱਚ ਦੀਆਂ ਉਨ੍ਹਾਂ ਆਵਾਜ਼ਾਂ ਨੂੰ ਟਰ੍ਰੋਲਰਾਂ ਰਾਹੀਂ ਮਾਨਸਿਕ ਪੀੜਾ ਦੇ ਕੇ ਦਬਾਉਣ ਦੀ ਕੋਸ਼ਿਸ਼ ਕੀਤੀ ਜਾਂਦੀ ਹੈ। ਕਿਉਂਕਿ ਜੋ ਵੀ ਹਾਕਮ ਲੀਡਰਸ਼ਿਪ ਦੀਆਂ ਬੇਨਿਯਮੀਆਂ ਨੂੰ ਉਜਾਗਰ ਕਰਨ ਦੀ ਕੋਸ਼ਿਸ਼ ਕਰਦੇ ਹਨ ਬਹੁਤ ਹੀ ਬੇਸ਼ਰਮੀ ਨਾਲ ਅੱਜ ਉਨ੍ਹਾਂ ਆਵਾਜ਼ਾਂ ਨੂੰ ਦਬਾ ਕੇ ਜਮਹੂਰੀ ਕਦਰਾਂ ਕੀਮਤਾਂ ਦਾ ਘਾਣ ਕੀਤਾ ਜਾ ਰਿਹਾ ਹੈ। ਇਸ ਸੱਭ ਦੀ ਜਾਣਕਾਰੀ ਹੋਣ ਦੇ ਬਾਵਜੂਦ ਟਰੋਲਰਾਂ ਦੇ ਵਿਰੁੱਧ ਸਰਕਾਰਾਂ ਇਹਨਾਂ ਟਰੋਲਰਾਂ ਵਿਰੁੱਧ ਬਣਦੀ ਕਾਰਵਾਈ ਕਰਨ ਦੀ ਬਜਾਏ ਇਕ ਮੂਕਦਰਸ਼ਕ ਬਣ ਕੇ ਤਮਾਸ਼ਬੀਨ ਬਣੀਆਂ ਨਜ਼ਰ ਆਂਦੀਆਂ ਹਨ। ਉਕਤ ਟਰੋਲਰਾਂ ਦੇ ਸੰਦਰਭ ਵਿੱਚ ਕੋਰਟਾਂ ਨੂੰ ਚਾਹੀਦਾ ਹੈ ਕਿ ਪਬਲਿਕ ਅਧਿਕਾਰਾਂ ਦੀ ਰਾਖੀ ਹਿੱਤ ਅਜਿਹੇ ਟਰੋਲਰਾਂ ਵਿਰੁੱਧ ਵੀ ਸਰਕਾਰਾਂ ਨੂੰ ਤੁਰੰਤ ਕਾਰਵਾਈ ਕਰਨ ਦੇ ਨਿਰਦੇਸ਼ ਦੇਣੇ ਚਾਹੀਦੇ ਹਨ ਤਾਂ ਜੋ ਇਹਨਾਂ ਫੇਕ ਆਈਡੀਆਂ ਵਾਲੇ ਟਰੋਲਰਾਂ ਜੋ ਕਿ ਅਕਸਰ ਹੱਕ ਸੱਚ ਦੀ ਅਲਖ ਜਗਾਉਣ ਵਾਲਿਆਂ ਲਈ ਬੇਹੱਦ ਭੱਦੀ ਸ਼ਬਦਾਵਲੀ ਦੇ ਨਾਲ ਨਾਲ ਗਾਲੀਗਲੋਚ ਤੱਕ ਕਰਦੇ ਹਨ ਤੇ ਅਕਸਰ ਧਮਕੀਆਂ ਦੇਣ ਤੋਂ ਵੀ ਗੁਰੇਜ ਨਹੀਂ ਕਰਦੇ ਵਿਰੁੱਧ ਇਕ ਅਜਿਹੀ ਮਿਸਾਲੀ ਕਾਰਵਾਈ ਅੰਜਾਮ ਦਿੱਤੀ ਜਾਣੀ ਚਾਹੀਦੀ ਹੈ ਜਿਸ ਦੇ ਨਤੀਜੇ ਵਜੋਂ ਹੱਕ ਸੱਚ ਦੀਆਂ ਆਵਾਜ਼ਾਂ ਉਠਾਉਣ ਵਾਲਿਆਂ ਦੇ ਆਤਮ ਵਿਸ਼ਵਾਸ ਵਿੱਚ ਵਾਧਾ ਹੋਵੇ ਤਾਂ ਕਿ ਜਮਹੂਰੀ ਕਦਰਾਂ ਕੀਮਤਾਂ ਦੀ ਸੁਰੱਖਿਆ ਨੂੰ ਯਕੀਨੀ ਬਣਾਇਆ ਜਾਵੇ।
ਮੁਹੰਮਦ ਅੱਬਾਸ ਧਾਲੀਵਾਲ
ਮਲੇਰਕੋਟਲਾ ।
ਸੰਪਰਕ. 9855259650
ਅਚਾਨਕ ਜਿਹੇ ਮੁਲਾਕਾਤ ਹੋ ਗਈ
NEXT STORY 
