ਮਹਾਕੁੰਭ ਨਗਰ, ਲਖਨਊ, (ਭਾਸ਼ਾ, ਨਾਸਿਰ)- ਸ਼ਨੀਵਾਰ ਨੂੰ ਦੁਨੀਆ ਦੇ ਸਭ ਤੋਂ ਵੱਡੇ ਅਧਿਆਤਮਕ ਸਮਾਗਮ ਮਹਾਕੁੰਭ ਮੇਲੇ ’ਚ ਪਹੁੰਚੇ 73 ਦੇਸ਼ਾਂ ਦੇ ਡਿਪਲੋਮੈਟਾਂ ਅਤੇ ਵਿਦੇਸ਼ੀ ਮਹਿਮਾਨਾਂ ਨੇ ਤ੍ਰਿਵੇਣੀ ਸੰਗਮ ਦਾ ਦੌਰਾ ਕੀਤਾ। ਇਸ ਦੌਰਾਨ ਕੁਝ ਡਿਪਲੋਮੈਟਾਂ ਨੇ ਸੰਗਮ ’ਚ ਆਸਥਾ ਦੀ ਡੁਬਕੀ ਵੀ ਲਗਾਈ।
ਮੁੱਖ ਮੰਤਰੀ ਯੋਗੀ ਆਦਿੱਤਿਆਨਾਥ ਨੇ ਇਨ੍ਹਾਂ ਡਿਪਲੋਮੈਟਾਂ ਦਾ ਸਵਾਗਤ ਕੀਤਾ ਅਤੇ ਉਨ੍ਹਾਂ ਨੂੰ ਮਹਾਕੁੰਭ ਦੀ ਮਹੱਤਤਾ ਬਾਰੇ ਜਾਣਕਾਰੀ ਦਿੱਤੀ। ਇਨ੍ਹਾਂ ਡਿਪਲੋਮੈਟਾਂ ਦਾ ਸਭ ਤੋਂ ਪਹਿਲਾਂ ਅਰੈਲ ਦੇ ਤ੍ਰਿਵੇਣੀ ਕੰਪਲੈਕਸ ’ਚ ਸਰਕਾਰ ਵੱਲੋਂ ਸਵਾਗਤ ਕੀਤਾ ਗਿਆ। ਉਥੋਂ ਸਾਰੇ ਡਿਪਲੋਮੈਟਾਂ ਨੂੰ ਇਕ ਕਿਸ਼ਤੀ ਰਾਹੀਂ ਪਵਿੱਤਰ ਤ੍ਰਿਵੇਣੀ ਸੰਗਮ ਦੇ ਦਰਸ਼ਨਾਂ ਲਈ ਲਿਜਾਇਆ ਗਿਆ।
ਕੁਝ ਦੇਸ਼ਾਂ ਦੇ ਡਿਪਲੋਮੈਟਾਂ ਨੇ ਵੀ ਸੰਗਮ ਵਿਖੇ ਪਵਿੱਤਰ ਇਸ਼ਨਾਨ ਕੀਤਾ ਅਤੇ ਗੰਗਾ ਜਲ ਪੀਤਾ। ਸੰਗਮ ’ਚ ਇਸ਼ਨਾਨ ਕਰਨ ਤੋਂ ਬਾਅਦ ਸਾਰੇ ਡਿਪਲੋਮੈਟਾਂ ਨੇ ਉੱਤਰ ਪ੍ਰਦੇਸ਼ ਦੀਆਂ ਟੂਰਿਜ਼ਮ ਬੱਸਾਂ ਰਾਹੀਂ ਅਕਸ਼ੈਵਤ ਕੋਰੀਡੋਰ ਅਤੇ ਵੱਡੇ ਹਨੂੰਮਾਨ ਮੰਦਰ ਦਾ ਦੌਰਾ ਕੀਤਾ। ਡਿਪਲੋਮੈਟਾਂ ਨੂੰ ਅਕਸ਼ੈਵਤ ਗਲਿਆਰੇ ’ਚ ਸਰਸਵਤੀ ਖੂਹ ਵੀ ਦਿਖਾਇਆ ਗਿਆ। ਕਈ ਦੇਸ਼ਾਂ ਦੇ ਡਿਪਲੋਮੈਟ ਭਾਰਤੀ ਸੰਸਕ੍ਰਿਤੀ ’ਚ ਦਰਿਆਵਾਂ ਅਤੇ ਰੁੱਖਾਂ ਦੀ ਪੂਜਾ ਦੀ ਪਰੰਪਰਾ ਅਤੇ ਉਨ੍ਹਾਂ ਦੇ ਅਧਿਆਤਮਕ ਮਹੱਤਵ ਤੋਂ ਬਹੁਤ ਪ੍ਰਭਾਵਿਤ ਹੋਏ।
ਪ੍ਰਯਾਗਰਾਜ ’ਚ ਡਿਪਲੋਮੈਟਾਂ ਦਾ ਸਵਾਗਤ ਕਰਦੇ ਹੋਏ ਮੁੱਖ ਮੰਤਰੀ ਯੋਗੀ ਆਦਿੱਤਿਆਨਾਥ ਨੇ ਕਿਹਾ ਕਿ ਇਹ ਦੌਰਾ ਯਕੀਨੀ ਤੌਰ ’ਤੇ ਸਾਰਿਆਂ ਲਈ ਯਾਦਗਾਰ ਸਾਬਤ ਹੋਵੇਗਾ । ਭਾਰਤ ’ਚ ਜਾਪਾਨੀ ਰਾਜਦੂਤ ਕੇਈਚੀ ਓਨੇ ਨੇ ਕਿਹਾ ਕਿ ਮੈਨੂੰ ਬਹੁਤ ਖੁਸ਼ੀ ਹੈ ਕਿ ਸੂਬਾ ਸਰਕਾਰ ਅਤੇ ਵਿਦੇਸ਼ ਮੰਤਰਾਲੇ ਨੇ ਡਿਪਲੋਮੈਟਾਂ ਲਈ ਇਸ ਦੌਰੇ ਦਾ ਪ੍ਰਬੰਧ ਕੀਤਾ। ਮਹਾਕੁੰਭ ਮੇਲਾ ਇਕ ਖਾਸ ਸਮਾਗਮ ਹੈ। ਮੈਂ ਇਥੇ ਆ ਕੇ ਹਿੰਦੂ ਸੱਭਿਆਚਾਰ ਨੂੰ ਸਮਝਣ ਲਈ ਬਹੁਤ ਉਤਸ਼ਾਹਿਤ ਸੀ। ਭਾਰਤ ’ਚ ਅਰਜਨਟੀਨਾ ਦੇ ਰਾਜਦੂਤ ਮਾਰੀਆਨੋ ਕੌਚੀਨੋ ਨੇ ਕਿਹਾ, ‘ਮੈਂ ਇਸ ਮਹੱਤਵਪੂਰਨ ਸਮਾਗਮ ’ਚ ਹਿੱਸਾ ਲੈ ਕੇ ਬਹੁਤ ਖੁਸ਼ ਹਾਂ, ਮੈਨੂੰ ਇਥੋਂ ਦੀਆਂ ਪਰੰਪਰਾਵਾਂ ਦੀ ਪਾਲਣਾ ਕਰ ਕੇ ਬਹੁਤ ਖੁਸ਼ੀ ਹੋ ਰਹੀ ਹੈ।’
ਭਾਰਤ ’ਚ ਲਿਥੁਆਨੀਆ ਦੀ ਰਾਜਦੂਤ ਡਾਇਨਾ ਮਿਕੀਵਿਜ਼ ਨੇ ਕਿਹਾ ਕਿ ਮੈਂ ਕਈ ਸਾਲਾਂ ਤੋਂ ਭਾਰਤ ਨਾਲ ਜੁੜੀ ਹੋਈ ਹਾਂ। ਮੈਂ ਹਮੇਸ਼ਾ ਇਥੇ ਆਉਣਾ ਚਾਹੁੰਦਾ ਸੀ ਪਰ ਕਦੇ ਵੀ ਕਿਸੇ ਕੁੰਭ ’ਚ ਸ਼ਾਮਲ ਹੋਣ ਦਾ ਮੌਕਾ ਨਹੀਂ ਮਿਲਿਆ। ਅੱਜ ਇਹ ਖਾਸ ਅਤੇ ਸ਼ੁਭ ਮੌਕਾ ਆ ਗਿਆ ਹੈ। ਇਹ ਮੇਰੇ ਲਈ ਖੁਸ਼ਕਿਸਮਤੀ ਦੀ ਗੱਲ ਹੈ ਕਿ ਮੈਂ ਭਾਰਤ ’ਚ ਹਾਂ। ਇਹ ਯਕੀਨੀ ਤੌਰ ’ਤੇ ਭਾਰਤੀ ਵਿਰਾਸਤ ਅਤੇ ਸੱਭਿਆਚਾਰ ਦੀ ਸ਼ਾਨ ਨੂੰ ਦਰਸਾਉਂਦਾ ਹੈ, ਜਿਸ ’ਤੇ ਮਾਣ ਹੈ।
ਸਰਕਾਰੀ ਬਿਆਨ ਅਨੁਸਾਰ, ਜਿਨ੍ਹਾਂ ਦੇਸ਼ਾਂ ਦੇ ਡਿਪਲੋਮੈਟਾਂ ਨੇ ਮਹਾਕੁੰਭ ’ਚ ਸ਼ਿਰਕਤ ਕੀਤੀ, ਉਨ੍ਹਾਂ ’ਚ ਅਮਰੀਕਾ, ਬ੍ਰਾਜ਼ੀਲ, ਦੱਖਣੀ ਅਫਰੀਕਾ, ਫਰਾਂਸ, ਰੂਸ, ਸਵਿਟਜ਼ਰਲੈਂਡ, ਜਾਪਾਨ, ਨਿਊਜ਼ੀਲੈਂਡ, ਜਰਮਨੀ, ਨੇਪਾਲ ਅਤੇ ਕੈਨੇਡਾ ਸ਼ਾਮਲ ਹਨ।
ਕੁੜੀ ਦੀ ਨਗਨ ਹਾਲਤ 'ਚ ਮਿਲੀ ਲਾ/ਸ਼ ਨੇ ਫੈਲਾਈ ਸਨਸਨੀ, ਪੂਰੇ ਪਿੰਡ 'ਚ ਦਹਿਸ਼ਤ ਦਾ ਮਾਹੌਲ
NEXT STORY 
