ਨਵੀਂ ਦਿੱਲੀ— ਫੇਸਬੁੱਕ ਡਾਟਾ ਲੀਕ 'ਤੇ ਵਿਵਾਦ ਦਰਮਿਆਨ ਭਾਜਪਾ ਅਤੇ ਕਾਂਗਰਸ 'ਚ ਟਵਿੱਟਰ ਵਾਰ ਛਿੜ ਗਿਆ ਹੈ। ਦੋਹਾਂ ਹੀ ਮੁੱਖ ਪਾਰਟੀਆਂ ਨੇ ਇਕ-ਦੂਜੇ 'ਤੇ ਜਨਤਾ ਦੀਆਂ ਜਾਣਕਾਰੀਆਂ ਨੂੰ ਬਿਨਾਂ ਦੱਸੇ ਸ਼ੇਅਰ ਕਰਨ ਦੇ ਦੋਸ਼ ਲਗਾਏ ਹਨ। ਇਕ ਦਿਨ ਪਹਿਲਾਂ ਕਾਂਗਰਸ ਪ੍ਰਧਾਨ ਰਾਹੁਲ ਗਾਂਧੀ ਨੇ ਟਵੀਟ ਕਰ ਕੇ ਨਮੋ ਐਪ ਦੇ ਸਹਾਰੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ 'ਤੇ ਹਮਲਾ ਬੋਲਿਆ ਸੀ। ਭਾਜਪਾ ਨੇ ਉਂਝ ਤਾਂ ਕੁਝ ਦੇਰ 'ਚ ਹੀ ਪਲਟਵਾਰ ਕਰ ਦਿੱਤਾ ਸੀ ਪਰ ਉਸੇ ਸਟਾਈਲ 'ਚ ਪਾਰਟੀ ਵੱਲੋਂ ਪੂਰੀ ਰਿਸਰਚ ਨਾਲ ਸੋਮਵਾਰ ਦੀ ਸਵੇਰ ਟਵੀਟ ਕੀਤਾ ਗਿਆ। ਭਾਜਪਾ ਦੀ ਆਈ.ਟੀ. ਟੀਮ ਦੇ ਹੈੱਡ ਅਮਿਤ ਮਾਲਵੀਏ ਨੇ ਟਵੀਟ ਕੀਤਾ,''Hi! ਮੇਰਾ ਨਾਂ ਰਾਹੁਲ ਗਾਂਧੀ ਹੈ। ਮੈਂ ਭਾਰਤ ਦੀ ਸਭ ਤੋਂ ਪੁਰਾਣੀ ਸਿਆਸੀ ਪਾਰਟੀ ਦਾ ਪ੍ਰਧਾਨ ਹਾਂ। ਜਦੋਂ ਤੁਸੀਂ ਸਾਡੇ ਅਧਿਕਾਰਤ ਐਪ 'ਚ ਸਾਈਨਅੱਪ ਕਰਦੇ ਹੋ ਤਾਂ ਮੈਂ ਤੁਹਾਡੇ ਸਾਰੇ ਡਾਟਾ ਨੂੰ ਸਿੰਗਾਪੁਰ 'ਚ ਆਪਣੇ ਦੋਸਤਾਂ ਨੂੰ ਦੇ ਦਿੰਦਾ ਹਾਂ।'' ਇੰਨਾ ਹੀ ਨਹੀਂ, ਭਾਜਪਾ ਨੇ ਦੋਸ਼ ਲਗਾਇਆ ਹੈ ਕਿ ਕਾਂਗਰਸ ਪਾਰਟੀ ਦਾ ਇਕ ਕਦਮ ਅੱਗੇ ਵਧ ਕੇ ਤੁਹਾਡੇ ਡਾਟੇ ਨੂੰ ਕਿਸੇ ਵੀ ਅਣਜਾਣ ਸ਼ਖਸ ਨੂੰ ਦੇ ਸਕਦੀ ਹੈ, ਇਸ 'ਚ ਅਣਪਛਾਤੇ ਵੈਂਡਰਜ਼, ਅਣਪਛਾਤੇ ਵਾਲੰਟੀਅਰਜ਼ ਅਤੇ ਅਜਿਹੇ ਹੀ ਕਿਸੇ ਸਮੂਹ ਨੂੰ ਇਹ ਜਾਣਕਾਰੀ ਦਿੱਤੀ ਜਾ ਰਹੀ ਹੈ। ਅਮਿਤ ਮਾਲਵੀਏ ਨੇ ਆਪਣੀਆਂ ਗੱਲਾਂ ਨੂੰ ਪੂਰਾ ਕਰਨ ਲਈ ਕੁਝ ਤਸਵੀਰਾਂ ਵੀ ਸ਼ੇਅਰ ਕੀਤੀਆਂ ਹਨ।
ਭਾਜਪਾ ਨੇ ਵੀ ਅਮਿਤ ਮਾਲਵੀਏ ਵੱਲੋਂ ਕੀਤੇ ਗਏ ਇਨ੍ਹਾਂ ਸਿਲਸਿਲੇਵਾਰ ਟਵੀਟਸ ਨੂੰ ਰੀਟਵੀਟ ਕੀਤਾ ਹੈ। ਕਾਂਗਰਸ ਪਾਰਟੀ ਦੀ ਵੈੱਬਸਾਈਟ 'ਤੇ ਦਿੱਤੀ ਗਈ ਕਥਿਤ ਪ੍ਰਾਈਵੇਸੀ ਪਾਲਿਸੀ ਨੂੰ ਰੇਖਾਂਕਿਤ ਕਰਦੇ ਹੋਏ ਮਾਲਵੀਏ ਨੇ ਲਿਖਿਆ,''ਜਦੋਂ ਕਾਂਗਰਸ ਕਹਿੰਦੀ ਹੈ ਕਿ ਉਹ ਤੁਹਾਡੇ ਡਾਟਾ ਨੂੰ ਲਾਈਕ-ਮਾਇੰਡੇਡ ਗਰੁੱਪਜ਼ ਨੂੰ ਸ਼ੇਅਰ ਕਰੇਗੀ ਤਾਂ ਚਿੰਤਾ ਵਧ ਜਾਂਦੀ ਹੈ। ਮਾਓਵਾਦੀਆਂ, ਪੱਥਰਬਾਜ਼ਾਂ, ਭਾਰਤ ਦੇ ਟੁੱਕੜੇ ਗੈਂਗ, ਚੀਨੀ ਦੂਤਘਰ ਤੋਂ ਲੈ ਕੇ ਦੁਨੀਆ ਭਰ 'ਚ ਮਸ਼ਹੂਰ ਕੈਂਬ੍ਰਿਜ ਐਨਾਲਿਟਿਕਾ (ਸੀ.ਏ.) ਵਰਗਿਆਂ ਤੱਕ ਵੀ ਤੁਹਾਡੀ ਜਾਣਕਾਰੀ ਪੁੱਜ ਸਕਦੀ ਹੈ। ਇਹ ਖੇਤਰ ਕਾਫੀ ਵਿਆਪਕ ਅਤੇ ਪੂਰੀ ਤਰ੍ਹਾਂ ਨਾਲ ਖੁੱਲਿਆ ਹੈ।'' ਆਈ.ਟੀ. ਹੈੱਡ ਨੇ ਅੱਗੇ ਕਿਹਾ,''ਸੋਨੀਆ ਗਾਂਧੀ ਦੇ ਸਾਰੇ ਪਾਵਰ ਕੋਈ ਜਵਾਬਦੇਹੀ ਨਹੀਂ, ਸਿਧਾਂਤ 'ਤੇ ਕੰਮ ਕਰਦੇ ਹੋਏ ਕਾਂਗਰਸ ਤੁਹਾਡਾ ਸਾਰਾ ਡਾਟਾ ਲਵੇਗੀ ਅਤੇ ਦੁਨੀਆ ਭਰ 'ਚ ਇਸ ਨੂੰ ਕੈਂਬ੍ਰਿਜ ਐਨਾਲਿਟਿਕਾ ਵਰਗੇ ਸੰਗਠਨਾਂ ਨਾਲ ਸ਼ੇਅਰ ਕਰੇਗੀ ਪਰ ਇਸ ਦੀ ਜ਼ਿੰਮੇਵਾਰੀ ਵੀ ਨਹੀਂ ਲਵੇਗੀ। ਉਨ੍ਹਾਂ ਦੀ ਆਪਣੀ ਨੀਤੀ ਹੀ ਅਜਿਹਾ ਕਹਿੰਦੀ ਹੈ।'' ਜ਼ਿਕਰਯੋਗ ਹੈ ਕਿ ਇਸ ਤੋਂ ਪਹਿਲਾਂ ਕਾਂਗਰਸ ਨੇ ਨਮੋ ਐਪ ਦੀ ਮਦਦ ਨਾਲ ਭਾਰਤੀਆਂ ਦੇ ਨਿੱਜੀ ਡਾਟਾ ਨੂੰ ਲੀਕ ਕਰਨ ਦਾ ਦੋਸ਼ ਲਗਾਇਆ ਸੀ। ਸੋਸ਼ਲ ਮੀਡੀਆ #DeleteNaMoApp 'ਤੇ ਕੈਂਪੇਨ ਵੀ ਚਲਾਇਆ ਗਿਆ। ਐਤਵਾਰ ਨੂੰ ਰਾਹੁਲ ਗਾਂਧੀ ਨੇ ਤੰਜ਼ ਕੱਸਦੇ ਹੋਏ ਕਿਹਾ ਸੀ ਕਿ ਮੈਂ ਨਰਿੰਦਰ ਮੋਦੀ, ਤੁਹਾਡਾ ਸਾਰਾ ਡਾਟਾ ਅਮਰੀਕੀ ਕੰਪਨੀਆਂ ਦੇ ਆਪਣੇ ਦੋਸਤਾਂ ਨੂੰ ਦਿੰਦਾ ਹਾਂ।
ਰਾਹੁਲ ਨੂੰ ਫਿਰ ਨਮੋ ਐਪ 'ਤੇ ਸਾਧਿਆ ਨਿਸ਼ਾਨਾ
ਰਾਹੁਲ ਗਾਂਧੀ ਨੇ ਸੋਮਵਾਰ ਨੂੰ ਵੀ ਨਮੋ ਐਪ ਨੂੰ ਲੈ ਕੇ ਗੰਭੀਰ ਦੋਸ਼ ਲਗਾਏ। ਉਨ੍ਹਾਂ ਨੇ ਟਵੀਟ ਕਰ ਕੇ ਕਿਹਾ ਕਿ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦਾ ਨਮੋ ਐਪ ਗੁਪਤ ਰੂਪ ਨਾਲ ਆਡੀਓ, ਵੀਡੀਓ, ਤੁਹਾਡੇ ਦੋਸਤਾਂ ਅਤੇ ਪਰਿਵਾਰ ਦੇ ਸੰਪਰਕ ਰਿਕਾਰਡ ਕਰ ਲੈਂਦਾ ਹੈ ਅਤੇ ਇੱਥੇ ਤੱਕ ਕਿ ਜੀ.ਪੀ.ਐੱਸ. ਰਾਹੀਂ ਤੁਹਾਡੀ ਲੋਕੇਸ਼ਨ ਨੂੰ ਵੀ ਟਰੈਕ ਕਰ ਲੈਂਦਾ ਹੈ। ਉਨ੍ਹਾਂ ਨੇ ਅੱਗੇ ਕਿਹਾ,''ਉਹ ਬਿਗ ਬੌਸ ਹਨ, ਜਿਨ੍ਹਾਂ ਨੂੰ ਭਾਰਤੀਆਂ ਦੀ ਹੀ ਜਾਸੂਸੀ ਕਰਨਾ ਪਸੰਦ ਹੈ। ਹੁਣ ਉਹ ਸਾਡੇ ਬੱਚਿਆਂ ਦਾ ਡਾਟਾ ਚਾਹੁੰਦੇ ਹਨ।'' ਰਾਹੁਲ ਨੇ ਕਿਹਾ ਕਿ 13 ਲੱਖ ਐੱਨ.ਸੀ.ਸੀ. ਕੈਡੇਟਸ ਨੂੰ ਐਪ ਡਾਊਨਲੋਡ ਕਰਨ ਲਈ ਮਜ਼ਬੂਰ ਕੀਤਾ ਜਾ ਰਿਹਾ ਹੈ।
ਟ੍ਰੇਨ ਤੋਂ ਬਾਹਰ ਲੱਤਾਂ ਲਟਕਾ ਕੇ ਬੈਠੇ 2 ਨੌਜਵਾਨਾਂ ਸਮੇਤ 4 ਹਾਦਸੇ ਦਾ ਸ਼ਿਕਾਰ
NEXT STORY 
