ਜਲੰਧਰ (ਬਿਊਰੋ) - ਹਰਿਆਣਾ ਦੀ ਸਿਆਸਤ ਤੋਂ ਲੈ ਕੇ ਅਦਾਕਾਰੀ ਤੱਕ ਆਪਣੀ ਵੱਖਰੀ ਪਛਾਣ ਕਾਇਮ ਕਰਨ ਵਾਲੀ ਸੋਨਾਲੀ ਫੋਗਾਟ ਨੇ ਛੋਟੀ ਉਮਰ ਵਿਚ ਲੋਕਪ੍ਰਿਯਤਾ ਦਾ ਵੱਡਾ ਮੁਕਾਮ ਤਾਂ ਹਾਸਲ ਕੀਤਾ ਪਰ ਘੱਟ ਉਮਰ ਵਿਚ ਇਸ ਦੁਨੀਆ ਨੂੰ ਅਲਵਿਦਾ ਕਹਿ ਦਿੱਤਾ। ਹਰਿਆਣਾ ਦੇ ਇਕ ਛੋਟੇ ਜਿਹੇ ਪਿੰਡ ਤੋਂ ਨਿਕਲ ਕੇ ਸੋਨਾਲੀ ਨੇ ਮੁੰਬਈ ਤੱਕ ਦਾ ਸਫਰ ਤੈਅ ਕੀਤਾ। ਸੋਨਾਲੀ 'ਬਿੱਗ ਬੌਸ 14' ਦਾ ਹਿੱਸਾ ਰਹੀ ਅਤੇ ਬਾਲੀਵੁੱਡ ਫ਼ਿਲਮਾਂ ਵਿਚ ਵੀ ਨਜ਼ਰ ਆਈ। ਪੰਜਾਬੀ, ਹਰਿਆਣਵੀ ਅਤੇ ਹਿੰਦੀ ਮਿਊਜ਼ਿਕ ਐਲਬਮ ਵਿਚ ਮਾਡਲ ਦੇ ਰੂਪ ਵਿਚ ਕੰਮ ਕੀਤਾ। ਇਕ ਦਿਲੇਰ ਮਹਿਲਾ ਹੋਣ ਦੇ ਨਾਲ-ਨਾਲ ਸੋਨਾਲੀ ਇਕ ਰਾਜਨੇਤਾ, ਇਕ ਮਾਡਲ, ਟਿਕ ਟੌਕ ਸਟਾਰ, ਅਭਿਨੇਤਰੀ ਰਹਿਣ ਤੋਂ ਇਲਾਵਾ ਇੰਸਟਾਗ੍ਰਾਮ ’ਤੇ ਖੂਬ ਪਾਪੁਲਰ ਰਹੀ। ਸੋਨਾਲੀ ਨੇ 2019 ਵਿਚ ਆਦਮਪੁਰ ਵਿਧਾਨ ਸਭਾ ਸੀਟ ਤੋਂ ਚੋਣ ਵੀ ਲੜੀ। ਲੰਬੇ ਸਮੇਂ ਤੱਕ ਸਿਆਸਤ ਵਿਚ ਸਰਗਰਮ ਰਹੀ ਸੋਨਾਲੀ ਹੁਣ ਇਸ ਦੁਨੀਆ ਵਿਚ ਨਹੀਂ ਹੈ।
ਜ਼ਿਕਰਯੋਗ ਹੈ ਕਿ ਸੋਨਾਲੀ ਫੋਗਾਟ ਦਾ ਜਨਮ 21 ਸਤੰਬਰ 1979 ਨੂੰ ਫਤੇਹਾਬਾਦ ਜ਼ਿਲੇ ਦੇ ਪਿੰਡ ਭੂਥਨਕਲਾਂ ਵਿਚ ਹੋਇਆ। ਉਨ੍ਹਾਂ ਪਿੰਡ ਦੇ ਸਰਕਾਰੀ ਸਕੂਲ ਤੋਂ ਆਪਣੀ ਮੁੱਢਲੀ ਸਿੱਖਿਆ ਪੂਰੀ ਕਰਨ ਤੋਂ ਬਾਅਦ ਆਰਟਸ ਵਿਚ ਗ੍ਰੈਜੁਏਸ਼ਨ ਕੀਤੀ। ਕਾਲਜ ਸਮੇਂ ਤੋਂ ਹੀ ਸੋਨਾਲੀ ਨੂੰ ਅਦਾਕਾਰੀ ਦਾ ਸ਼ੌਕ ਸੀ। 2006 ਵਿਚ ਉਨ੍ਹਾਂ ਨੂੰ ਦੂਰਦਰਸ਼ਨ ਵਿਚ ਹਰਿਆਣਵੀ ਐਂਕਰ ਦੇ ਰੂਪ ਵਿਚ ਬ੍ਰੇਕ ਮਿਲਿਆ।ਇਸ ਤੋਂ ਬਾਅਦ ਸੋਨਾਲੀ ਨੇ ਪਿੱਛੇ ਮੁੜ ਕੇ ਨਹੀਂ ਦੇਖਿਆ। ਕੁਝ ਟੀ. ਵੀ. ਸੀਰੀਅਲਾਂ ਵਿਚ ਕੰਮ ਕੀਤਾ ਅਤੇ 2008 ਵਿਚ 29 ਸਾਲ ਦੀ ਉਮਰ ਵਿਚ ਸੋਨਾਲੀ ਭਾਜਪਾ ਵਿਚ ਆ ਗਈ। ਸੋਨਾਲੀ ਦਾ ਵਿਆਹ ਹਿਸਾਰ ਦੇ ਇਕ ਜ਼ਿੰਮੀਦਾਰ ਪਰਿਵਾਰ ਵਿਚ ਸੰਜੇ ਫੋਗਾਟ ਨਾਲ ਹੋਇਆ। ਸੰਜੇ ਫੋਗਾਟ ਦੀ ਸਾਲ 2016 ਵਿਚ ਮੌਤ ਹੋ ਗਈ ਸੀ। ਸੰਜੇ ਸਿੰਘ ਦੀ ਮੌਤ ਰਹੱਸਮਈ ਹਾਲਾਤ ਵਿਚ ਹੋਈ ਸੀ। ਸੋਨਾਲੀ ਦੇ ਪੇਕੇ ਪਰਿਵਾਰ ਵਿਚ ਉਨ੍ਹਾਂ ਦੇ ਮਾਤਾ-ਪਿਤਾ ਤੋਂ ਇਲਾਵਾ 2 ਭਰਾ ਅਤੇ 2 ਭੈਣਾਂ ਹਨ।
ਉਸ ਦੇ ਸਹੁਰੇ ਵਿਚ ਜੇਠ-ਜੇਠਾਣੀ ਤੋਂ ਇਲਾਵਾ ਹੋਰ ਪਰਿਵਾਰਕ ਮੈਂਬਰ ਹਨ। ਹੁਣ ਸੋਨਾਲੀ ਪਿਛਲੇ ਲਗਭਗ 3 ਸਾਲ ਤੋਂ ਪੁਰੀ ਤਰ੍ਹਾਂ ਆਦਮਪੁਰ ਵਿਧਾਨ ਸਭਾ ਵਿਚ ਸਰਗਰਮ ਸੀ। ਹੁਣ ਸ਼ੂਟਿੰਗ ਵਿਚ ਘੱਟ ਹੀ ਇੰਟਰਸਟ ਰੱਖਦੀ ਸੀ ਅਤੇ ਆਪਣੀ ਬੇਟੀ ਯਸ਼ੋਧਰਾ ਨਾਲ ਆਪਣੇ ਫਾਰਮਹਾਊਸ ’ਚ ਰਹਿੰਦੀ ਸੀ। ਉਨ੍ਹਾਂ ਦੇ ਇਸ ਤਰ੍ਹਾਂ ਅਚਾਨਕ ਇਸ ਉਮਰ ਵਿਚ ਦਿਹਾਂਤ ਨਾਲ ਹਰ ਕੋਈ ਹੈਰਾਨ ਹੈ ਅਤੇ ਭਾਵੇਂ ਉਨ੍ਹਾਂ ਦੀ ਮੌਤ ਦਾ ਕਾਰਨ ਦਿਲ ਦਾ ਦੌਰਾ ਦੱਸਿਆ ਜਾ ਰਿਹਾ ਹੈ ਪਰ ਉਨ੍ਹਾਂ ਦੀ ਮੌਤ ਦੇ ਕਾਰਨਾਂ ਨੂੰ ਲੈ ਕੇ ਸੂਬੇ ਵਿਚ ਕਈ ਤਰ੍ਹਾਂ ਦੇ ਸਵਾਲ ਜ਼ਰੂਰ ਉੱਠਣੇ ਸ਼ੁਰੂ ਹੋ ਗਏ ਹਨ।
ਸੋਨਾਲੀ ਦਾ ਸਿਆਸਤ ’ਚ ਵੀ ਰਿਹਾ ਲੰਬਾ ਤਜਰਬਾ
ਸੋਨਾਲੀ ਫੋਗਾਟ ਨੇ ਸਾਲ 2008 ਵਿਚ ਸਿਆਸਤ ਵਿਚ ਕਦਮ ਰੱਖਿਆ। ਸੋਨਾਲੀ ਫੋਗਾਟ ਨੂੰ ਸਾਲ 2019 ਦੀਆ ਵਿਧਾਨ ਸਭਾ ਚੋਣਾਂ ਵਿਚ ਭਾਜਪਾ ਨੇ ਆਦਮਪੁਰ ਵਰਗੀ ਹਾਟ ਸੀਟ ਤੋਂ ਟਿਕਟ ਦੇ ਦਿੱਤੀ। ਆਦਮਪੁਰ ਵਿਚ ਹੋਈਆਂ ਵਿਧਾਨ ਸਭਾ ਚੋਣਾਂ ਵਿਚ ਕਾਂਗਰਸ ਦੇ ਉਮੀਦਵਾਰ ਕੁਲਦੀਪ ਬਿਸ਼ਨੋਈ ਨੇ ਸੋਨਾਲੀ ਫੋਗਾਟ ਨੂੰ ਲਗਭਗ 29,471 ਵੋਟਾਂ ਦੇ ਫਰਕ ਨਾਲ ਹਰਾਇਆ ਪਰ ਇਸ ਚੋਣ ਤੋਂ ਬਾਅਦ ਸੋਨਾਲੀ ਸਿਆਸਤ ਦੀਆਂ ਸੁਰਖੀਆਂ ਵਿਚ ਆਈ ਅਤੇ ਉਹ ਚੋਣ ਹਾਰਨ ਤੋਂ ਬਾਅਦ ਵੀ ਇਸ ਖੇਤਰ ਵਿਚ ਸਿਆਸੀ ਰੂਪ ਨਾਲ ਲਗਾਤਾਰ ਸਰਗਰਮ ਰਹੀ।
ਵਿਵਾਦਾਂ ਨਾਲ ਵੀ ਰਿਹਾ ਹੈ ਪੁਰਾਣਾ ਨਾਤਾ
ਸੋਨਾਲੀ ਫੋਗਾਟ ਦਾ ਵਿਵਾਦਾਂ ਨਾਲ ਵੀ ਪੁਰਾਣਾ ਨਾਤਾ ਰਿਹਾ ਹੈ। ਸੋਨਾਲੀ ਫੋਗਾਟ ਨੇ ਸਾਲ 2021 ਵਿਚ 'ਬਿੱਗ ਬੌਸ' ਸੀਜ਼ਨ 14 ਵਿਚ ਸ਼ਮੂਲੀਅਤ ਕੀਤੀ। ਇਸ ਦੌਰਾਨ 'ਬਿੱਗ ਬੌਸ' ਦੀ ਕੰਟੈਸਟੈਂਟ ਰਹੀ ਰੂਬੀਨਾ ਸਮੇਤ ਕਈ ਮੁਕਾਬਲੇਬਾਜ਼ਾਂ ਦੇ ਨਾਲ ਉਨ੍ਹਾਂ ਦੇ ਵਿਵਾਦ ਵੀ ਸਾਹਮਣੇ ਆਏ। ਉਥੇ ਹੀ ਇਸ ਤੋਂ ਪਹਿਲਾਂ 5 ਜੂਨ 2020 ਨੂੰ ਸੋਨਾਲੀ ਫੋਗਾਟ ਨੇ ਮਾਰਕੀਟ ਕਮੇਟੀ ਦੇ ਸਕੱਤਰ ਸੁਲਤਾਨ ਸਿੰਘ ਨੂੰ ਜਨਤਕ ਜਗ੍ਹਾ ’ਤੇ ਸੈਂਡਲ ਨਾਲ ਬੁਰੀ ਤਰ੍ਹਾਂ ਕੁੱਟਿਆ ਸੀ। ਇਸ ਮਾਰਕੁੱਟ ਦਾ ਵੀਡੀਓ ਸੋਸ਼ਲ ਮੀਡੀਆ ’ਤੇ ਖੂਬ ਵਾਇਰਲ ਹੋਇਆ ਸੀ ਅਤੇ ਇਸ ’ਤੇ ਸੋਨਾਲੀ ਨੇ ਕਿਹਾ ਸੀ ਕਿ ਉਕਤ ਅਧਿਕਾਰੀ ਨੇ ਔਰਤਾਂ ਨੂੰ ਲੈ ਕੇ ਇਤਰਾਜ਼ਯੋਗ ਟਿੱਪਣੀ ਕੀਤੀ ਸੀ। ਇਸੇ ਤਰ੍ਹਾਂ 8 ਅਕਤੂਬਰ 2019 ਨੂੰ ਆਦਮਪੁਰ ਵਿਧਾਨ ਸਭਾ ਖੇਤਰ ਦੇ ਪਿੰਡ ਬਾਲਸਮੰਦ ਵਿਚ ਇਕ ਸਿਆਸੀ ਰੈਲੀ ਦਾ ਆਯੋਜਨ ਕੀਤਾ ਗਿਆ ਸੀ ਤਾਂ ਉਸ ਸਮੇਂ ਵੀ ਇਕ ਨਾਅਰੇ ਨੂੰ ਲੈ ਕੇ ਸੋਨਾਲੀ ਫੋਗਾਟ ਵਿਵਾਦਾਂ ਵਿਚ ਆਈ ਸੀ ਪਰ ਬਾਅਦ ਵਿਚ ਉਨ੍ਹਾਂ ਸਪੱਸ਼ਟ ਕੀਤਾ ਸੀ ਕਿ ਉਨ੍ਹਾਂ ਦੇ ਕਹਿਣ ਦਾ ਉਹ ਅਰਥ ਨਹੀਂ ਸੀ ਜਿਵੇਂ ਅਰਥ ਕੱਢਿਆ ਗਿਆ। ਕੁਲ ਮਿਲਾ ਕੇ ਸੋਨਾਲੀ ਫੋਗਾਟ ਲੋਕਪ੍ਰਿਯਤਾ ਦੀਆਂ ਬੁਲੰਦੀਆਂ ਨੂੰ ਛੂਹਣ ਦੇ ਨਾਲ-ਨਾਲ ਵਿਵਾਦਾਂ ਵਿਚ ਵੀ ਰਹੀ।
ਖੁੱਲ੍ਹੇ ਮਨ ਤੇ ਬਹਾਦੁਰੀ ਨਾਲ ਰੱਖਦੀ ਸੀ ਆਪਣੀ ਗੱਲ
ਵਿਸ਼ੇਸ਼ ਗੱਲ ਇਹ ਹੈ ਕਿ ਸੋਨਾਲੀ ਫੋਗਾਟ ਜਨਤਕ ਮੰਚਾਂ ਤੋਂ ਲੈ ਕੇ ਸੋਸ਼ਲ ਮੀਡੀਆ ’ਤੇ ਆਪਣੀ ਗੱਲ ਬੜੇ ਖੁੱਲ੍ਹੇ ਮਨ ਅਤੇ ਬਹਾਦੁਰੀ ਨਾਲ ਰੱਖਦੀ ਸੀ। ਜਦੋਂ ਮਾਰਕੀਟ ਕਮੇਟੀ ਦੇ ਸਕੱਤਰ ਦੇ ਨਾਲ ਉਨ੍ਹਾਂ ਦਾ ਵਿਵਾਦ ਹੋਇਆ ਉਦੋਂ ਵੀ ਉਨ੍ਹਾਂ ਆਪਣਾ ਪੱਖ ਬਹੁਤ ਦਲੇਰੀ ਨਾਲ ਰੱਖਿਆ ਸੀ। ਅਜੇ ਹਾਲ ਹੀ ਵਿਚ ਕੁਲਦੀਪ ਬਿਸ਼ਨੋਈ ਨੇ ਆਦਮਪੁਰ ਸੀਟ ਤੋਂ ਅਸਤੀਫਾ ਦਿੱਤਾ ਅਤੇ ਉਹ ਭਾਜਪਾ ਵਿਚ ਸ਼ਾਮਲ ਹੋ ਗਏ ਉਦੋਂ ਵੀ ਉਨ੍ਹਾਂ ਤਿੱਖੀਆਂ ਟਿੱਪਣੀਆਂ ਨਾਲ ਖੂਬ ਤੰਜ ਕੱਸੇ ਸਨ। ਸੋਨਾਲੀ ਫੋਗਾਟ ਹਮੇਸ਼ਾ ਤੋਂ ਹੀ ਆਦਮਪੁਰ ਸੀਟ ਤੋਂ ਭਾਜਪਾ ਦੀ ਟਿਕਟ ਦਾ ਦਾਅਵਾ ਪ੍ਰਗਟਾਉਂਦੀ ਰਹੀ ਹੈ। ਅਜਿਹੇ ਵਿਚ ਉਦੋਂ ਸੋਨਾਲੀ ਨੇ ਸਖਤ ਤੇਵਰ ਦਿਖਾਉਂਦੇ ਹੋਏ ਸੋਸ਼ਲ ਮੀਡੀਆ ’ਤੇ ਲਿਖਿਆ ਸੀ ਕਿ ਜਦੋਂ ਸ਼ੇਰਨੀ 2 ਕਦਮ ਪਿੱਛੇ ਹੱਟਦੀ ਹੈ ਤਾਂ ਹੋਰ ਜ਼ਿਆਦਾ ਖੁੰਖਾਰ ਹੋ ਜਾਂਦੀ ਹੈ।
ਇਸ ਤਰ੍ਹਾਂ ਦੇ ਟਵੀਟ ਸੋਨਾਲੀ ਸੋਸ਼ਲ ਮੀਡੀਆ ’ਤੇ ਅਕਸਰ ਕਰਦੀ ਰਹਿੰਦੀ ਸੀ। ਇਸ ਤੋਂ ਇਲਾਵਾ ਸੋਸ਼ਲ ਮੀਡੀਆ ਦੇ ਵੱਖ-ਵੱਖ ਪਲੇਟਫਾਰਮਸ ’ਤੇ ਆਪਣੀ ਗੱਲ ਰੱਖਣ ਤੋਂ ਇਲਾਵਾ ਸੋਨਾਲੀ ਆਪਣੇ ਹਮਾਇਤੀਆਂ ਅਤੇ ਵਿਰੋਧੀਆਂ ਦੀਆਂ ਗੱਲਾਂ ਦਾ ਵੀ ਖੁੱਲੇ ਮਨ ਨਾਲ ਜਵਾਬ ਦਿੰਦੀ ਸੀ। ਸੋਨਾਲੀ ਨੂੰ ਪਹਾੜਾਂ ’ਤੇ ਘੁੰਮਣਾ, ਘੁੜਸਵਾਰੀ ਕਰਨਾ ਅਤੇ ਡਰਾਈਵਿੰਗ ਕਰਨਾ ਕਾਫੀ ਪਸੰਦ ਸੀ। ਉਨ੍ਹਾਂ ਪਤੀ ਦੇ ਦਿਹਾਂਤ ਤੋਂ ਬਾਅਦ ਨਾ ਸਿਰਫ ਖੁਦ ਹਿੰਮਤ ਨਾਲ ਕੰਮ ਲਿਆ ਸਗੋਂ ਆਪਣੀ ਬੇਟੀ ਯਸ਼ੋਧਰਾ ਨੂੰ ਵੀ ਮਾਂ ਅਤੇ ਪਿਤਾ ਦਾ ਸਨੇਹ ਦਿੱਤਾ।
ਇੰਸਟਾਗ੍ਰਾਮ ’ਤੇ ਰੀਲਸ ਨੂੰ ਲੈ ਕੇ ਹੋਈ ਮਸ਼ਹੂਰ
ਟਿਕ ਟੌਕ ਤੋਂ ਬਾਅਦ ਇੰਸਟਾਗ੍ਰਾਮ ’ਤੇ ਮਸ਼ਹੂਰ ਹੋਈ ਸੋਨਾਲੀ ਫੋਗਾਟ ਸੋਸ਼ਲ ਮੀਡੀਆ ’ਤੇ ਵੀ ਇਕ ਮਸ਼ਹੂਰ ਚਿਹਰਾ ਰਹੀ। ਖਾਸ ਗੱਲ ਇਹ ਹੈ ਕਿ ਸਿਆਸਤ ਵਿਚ ਹੋਣ ਦੇ ਬਾਵਜੂਦ ਸੋਨਾਲੀ ਅਕਸਰ ਆਪਣੀ ਡਾਂਸ, ਡਾਇਲਾਗ, ਰੂਟੀਨ ਵਰਕ ਅਤੇ ਮਨੋਰੰਜਨ ਨਾਲ ਜੁੜੇ ਹੋਏ ਵੀਡੀਓ ਅਤੇ ਰੀਲਸ ਲਈ ਜ਼ਿਆਦਾ ਪਛਾਣ ਬਣਾਉਣ ਵਿਚ ਕਾਮਯਾਬ ਹੋਈ। ਸੋਨਾਲੀ ਨੇ ਸਭ ਤੋਂ ਪਹਿਲਾਂ ਟਿਕ ਟੌਕ ਐਪ ’ਤੇ ਵੀਡੀਓਜ਼ ਬਣਾਉਣੀਆਂ ਸ਼ੁਰੂ ਕੀਤੀਆਂ। ਟਿਕ ਟੌਕ ’ਤੇ ਪਾਬੰਦੀ ਲੱਗ ਗਈ ਤਾਂ ਸੋਨਾਲੀ ਇਸ ਤੋਂ ਬਾਅਦ ਫੇਸਬੁੱਕ ਅਤੇ ਇੰਸਟਾਗ੍ਰਾਮ ’ਤੇ ਸਰਗਰਮ ਹੋ ਗਈ। ਸੋਨਾਲੀ ਨਿਯਮਿਤ ਰੂਪ ਨਾਲ ਇੰਸਟਾਗ੍ਰਾਮ ’ਤੇ ਰੀਲਸ ਪਾਉਂਦੀ ਸੀ। ਉਨ੍ਹਾਂ ਦੇ ਇੰਸਟਾਗ੍ਰਾਮ ਦੇ ਆਫੀਸ਼ੀਅਲ ਅਕਾਊਂਟ ਨੂੰ ਲਗਭਗ 8.88 ਲੱਖ ਲੋਕ ਫਾਲੋ ਕਰਦੇ ਹਨ। ਹੁਣ ਤੱਕ ਸੋਨਾਲੀ ਇੰਸਟਾਗ੍ਰਾਮ ’ਤੇ 1661 ਪੋਸਟ ਪਾ ਚੁੱਕੀ ਹੈ, ਜਿਨ੍ਹਾਂ ਵਿਚ ਵਧੇਰੇ ਗਿਣਤੀ ਰੀਲਸ ਦੀ ਹੈ। ਇਸੇ ਤਰ੍ਹਾਂ ਫੇਸਬੁੱਕ ’ਤੇ ਸੋਨਾਲੀ ਦੇ 2.81 ਲੱਖ ਫਾਲੋਅਰਸ ਹਨ। ਫੇਸਬੁੱਕ ’ਤੇ ਵੀ ਸੋਨਾਲੀ ਨਿਯਮਿਤ ਰੂਪ ਨਾਲ ਵੀਡੀਓ ਅਤੇ ਹੋਰ ਪੋਸਟ ਪਾਉਂਦੀ ਸੀ, ਜਦਕਿ ਟਵਿੱਟਰ ’ਤੇ ਸੋਨਾਲੀ ਇੰਸਟਾ ਅਤੇ ਫੇਸਬੁੱਕ ਦੀ ਤੁਲਨਾ ਵਿਚ ਵਧ ਸਰਗਰਮ ਨਹੀਂ ਸੀ। ਟਵਿੱਟਰ ’ਤੇ ਸੋਨਾਲੀ ਨੂੰ 7,849 ਲੋਕ ਫਾਲੋ ਕਰਦੇ ਹਨ।
ਬਿਹਾਰ ’ਚ RJD ਦੇ 3 ਨੇਤਾਵਾਂ ਦੇ ਟਿਕਾਣਿਆਂ ’ਤੇ CBI ਦਾ ਛਾਪਾ, ਜਾਣੋ ਕੀ ਹੈ ਮਾਮਲਾ
NEXT STORY 
