ਨੈਸ਼ਨਲ ਡੈਸਕ - ਬੁੰਦੇਲਖੰਡ ਦਾ ਪੰਨਾ ਜ਼ਿਲ੍ਹਾ ਹੀਰਿਆਂ ਦੀਆਂ ਖਾਣਾਂ ਲਈ ਦੁਨੀਆ ਭਰ 'ਚ ਮਸ਼ਹੂਰ ਹੈ ਪਰ ਬਹੁਤ ਘੱਟ ਲੋਕ ਜਾਣਦੇ ਹਨ ਕਿ ਇੱਥੋਂ ਦੀ ਕੇਨ ਨਦੀ ਆਪਣੇ ਅੰਦਰ ਇਕ ਹੋਰ ਅਨਮੋਲ ਖ਼ਜ਼ਾਨਾ ਛੁਪਾਈ ਬੈਠੀ ਹੈ। ਇਹ ਖ਼ਜ਼ਾਨਾ ਹੈ 'ਸ਼ਜਰ ਪੱਥਰ', ਜੋ ਕਿ ਇਕ ਦੁਰਲੱਭ ਅਤੇ ਕੀਮਤੀ ਰਤਨ ਮੰਨਿਆ ਜਾਂਦਾ ਹੈ।
ਸ਼ਜਰ ਪੱਥਰ ਦੀ ਸਭ ਤੋਂ ਵੱਡੀ ਖਾਸੀਅਤ ਇਸ ਦੀ ਬਣਾਵਟ ਹੈ। ਇਹ ਪੱਥਰ ਲੱਖਾਂ ਸਾਲ ਪੁਰਾਣੇ ਜੀਵਾਸ਼ਮਾਂ ਤੋਂ ਬਣਿਆ ਹੁੰਦਾ ਹੈ। ਜਦੋਂ ਇਸ ਪੱਥਰ ਨੂੰ ਕੱਟਿਆ ਜਾਂ ਤਰਾਸ਼ਿਆ ਜਾਂਦਾ ਹੈ, ਤਾਂ ਇਸ ਦੇ ਅੰਦਰ ਕੁਦਰਤੀ ਤੌਰ 'ਤੇ ਰੁੱਖਾਂ, ਪੱਤਿਆਂ ਜਾਂ ਸ਼ੈਵਾਲ ਵਰਗੀਆਂ ਆਕ੍ਰਿਤੀਆਂ ਦਿਖਾਈ ਦਿੰਦੀਆਂ ਹਨ। ਇਨ੍ਹਾਂ ਸੁੰਦਰ ਆਕ੍ਰਿਤੀਆਂ ਕਾਰਨ ਹੀ ਇਸ ਨੂੰ 'ਨੇਚਰ ਦੀ ਪੇਂਟਿੰਗ' ਵੀ ਕਿਹਾ ਜਾਂਦਾ ਹੈ।
ਇਸ ਪੱਥਰ ਦੀ ਮਹੱਤਤਾ ਦਾ ਅੰਦਾਜ਼ਾ ਇਸ ਗੱਲ ਤੋਂ ਲਗਾਇਆ ਜਾ ਸਕਦਾ ਹੈ ਕਿ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਇਸ ਪੱਥਰ ਤੋਂ ਬਣਿਆ ਇਕ ਖ਼ਾਸ ਤੋਹਫ਼ਾ ਸਾਊਦੀ ਅਰਬ ਦੇ ਪ੍ਰਿੰਸ ਨੂੰ ਭੇਂਟ ਕੀਤਾ ਸੀ। ਇਸ ਤੋਂ ਇਲਾਵਾ, G-20 ਵਰਗੇ ਵੱਡੇ ਅੰਤਰਰਾਸ਼ਟਰੀ ਪ੍ਰੋਗਰਾਮਾਂ 'ਚ ਵੀ ਇਸ ਦੀ ਪ੍ਰਦਰਸ਼ਨੀ ਲਗਾਈ ਜਾ ਚੁੱਕੀ ਹੈ। ਸਰਕਾਰ ਨੇ ਇਸ ਨੂੰ 'ਵਨ ਡਿਸਟ੍ਰਿਕਟ ਵਨ ਪ੍ਰੋਡਕਟ' (ODOP) ਯੋਜਨਾ 'ਚ ਵੀ ਸ਼ਾਮਲ ਕੀਤਾ ਹੈ।
ਕੇਨ ਨਦੀ ਦੇ ਗੋਤਾਖੋਰ ਹਜ਼ਾਰਾਂ ਪੱਥਰਾਂ 'ਚੋਂ ਬੜੀ ਮੁਸ਼ਕਲ ਨਾਲ ਇਨ੍ਹਾਂ ਸ਼ਜਰ ਪੱਥਰਾਂ ਦੀ ਪਛਾਣ ਕਰਦੇ ਹਨ। ਇਨ੍ਹਾਂ ਪੱਥਰਾਂ ਤੋਂ ਬਣੀਆਂ ਮੁੰਦਰੀਆਂ, ਹਾਰ ਅਤੇ ਵਾਲੀਆਂ ਦੀ ਦੇਸ਼ ਦੇ ਨਾਲ-ਨਾਲ ਵਿਦੇਸ਼ਾਂ ਵਿੱਚ ਵੀ ਭਾਰੀ ਮੰਗ ਹੈ। ਇੱਕ-ਇੱਕ ਨਗ ਦੀ ਕੀਮਤ ਹਜ਼ਾਰਾਂ ਤੋਂ ਲੈ ਕੇ ਲੱਖਾਂ ਰੁਪਏ ਤੱਕ ਹੋ ਸਕਦੀ ਹੈ।
ਜਿੱਥੇ ਇਹ ਪੱਥਰ ਭਾਰਤ ਦਾ ਮਾਣ ਵਧਾ ਰਿਹਾ ਹੈ, ਉੱਥੇ ਹੀ ਹੁਣ ਇਸ 'ਤੇ ਖ਼ਤਰੇ ਦੇ ਬੱਦਲ ਵੀ ਮੰਡਰਾ ਰਹੇ ਹਨ। ਕੇਨ ਨਦੀ 'ਚ ਹੋ ਰਹੀ ਨਾਜਾਇਜ਼ ਮਾਈਨਿੰਗ ਅਤੇ ਮਸ਼ੀਨਾਂ ਰਾਹੀਂ ਰੇਤ ਕੱਢਣ ਕਾਰਨ ਨਦੀ ਦਾ ਕੁਦਰਤੀ ਸੰਤੁਲਨ ਵਿਗੜ ਰਿਹਾ ਹੈ। ਸਥਾਨਕ ਲੋਕਾਂ ਦਾ ਕਹਿਣਾ ਹੈ ਕਿ ਜੇਕਰ ਇਸ ਵੱਲ ਜਲਦੀ ਧਿਆਨ ਨਾ ਦਿੱਤਾ ਗਿਆ, ਤਾਂ ਆਉਣ ਵਾਲੇ ਸਮੇਂ 'ਚ ਇਹ ਅਨਮੋਲ ਪੱਥਰ ਹਮੇਸ਼ਾ ਲਈ ਖ਼ਤਮ ਹੋ ਸਕਦਾ ਹੈ।
ਗੈਸ ਸਿਲੰਡਰ Blast: 3 ਲੋਕਾਂ ਦੀ ਮੌਤ, ਧਮਾਕੇ ਦੀ ਗੂੰਜ ਨਾਲ ਕੰਬਿਆ ਆਂਧਰਾ ਪ੍ਰਦੇਸ਼ ਦਾ ਇਹ ਇਲਾਕਾ
NEXT STORY 
