ਨਵੀਂ ਦਿੱਲੀ - ਜੋਤਿਸ਼ ’ਚ ਨਿਆਂ ਦੇ ਕਾਰਕ ਦੇਵਤਾ ਸ਼ਨੀ ਦੇਵ 27 ਜੁਲਾਈ ਤੋਂ ਮੀਨ ਰਾਸ਼ੀ 'ਚ ਵਕਰੀ ਅਵਸਥਾ 'ਚ ਆ ਜਾਣਗੇ। ਸ਼ਨੀ 11 ਦਸੰਬਰ ਤੱਕ ਵਕਰੀ ਰਹਿਣਗੇ ਅਤੇ 138 ਦਿਨਾਂ ਦੀ ਸ਼ਨੀ ਦੀ ਇਸ ਵਕਰੀ ਅਵਸਥਾ ਦੌਰਾਨ ਪੂਰੀ ਦੁਨੀਆ ਵਿਚ ਡੂੰਘੀ ਭਾਵਨਾਤਮਕ ਅਤੇ ਮਾਨਸਿਕ ਤੀਬਰਤਾ ਦਾ ਦੌਰ ਰਹੇਗਾ ਕਿਉਂਕਿ ਮੀਨ ਜਲ ਤੱਤ ਦੀ ਰਾਸ਼ੀ ਹੈ, ਇਸ ਲਈ ਹੜ੍ਹ, ਮਾਨਸੂਨ ਦੀ ਬੇਨਿਯਮੀ, ਸਮੁੰਦਰ ਦੇ ਵਧਦੇ ਖ਼ਤਰੇ, ਸਮੁੰਦਰੀ ਵਿਘਨ ਜਾਂ ਵਾਤਾਵਰਣਿਕ ਅਸੰਤੁਲਨ ਵਰਗੇ ਜਲ ਤੱਤ ਨਾਲ ਜੁੜੇ ਮੁੱਦੇ ਇਸ ਦੌਰਾਨ ਮੁੱਖ ਤੌਰ ’ਤੇ ਉੱਠਣਗੇ।
ਇਸ ਦੇ ਨਾਲ ਹੀ ਗਲੋਬਲ ਪੱਧਰ ’ਤੇ ਭਰਮ, ਫੈਸਲੇ ਲੈਣ 'ਚ ਦੇਰੀ ਅਤੇ ਲੀਡਰਸ਼ਿਪ ਜਾਂ ਨੀਤੀਆਂ 'ਚ ਸਪੱਸ਼ਟਤਾ ਦੀ ਕਮੀ ਦੇਖਣ ਨੂੰ ਮਿਲ ਸਕਦੀ ਹੈ। ਇਸ ਦੇ ਨਾਲ ਹੀ ਮਾਨਸਿਕ ਸਿਹਤ, ਅਧਿਆਤਮਿਕਤਾ ਅਤੇ ਇਲਾਜ (ਹੀਲਿੰਗ) ’ਤੇ ਵਧੇਰੇ ਧਿਆਨ ਦਿੱਤਾ ਜਾਵੇਗਾ ਅਤੇ ਲੁਕੇ ਹੋਏ ਜਾਂ ਲੰਬੇ ਸਮੇਂ ਤੋਂ ਅਣਸੁਲਝੇ ਸੰਸਾਰਕ ਮੁੱਦੇ ਸੁਧਾਰ ਲਈ ਫਿਰ ਤੋਂ ਸਾਹਮਣੇ ਆ ਸਕਦੇ ਹਨ। ਵਕਰੀ ਸ਼ਨੀ ਦਾ ਸਾਰੀਆਂ 12 ਲਗਨਾਂ ਦੇ ਜਾਤਕਾਂ ’ਤੇ ਹੇਠ ਲਿਖਿਆ ਪ੍ਰਭਾਵ ਰਹੇਗਾ :
ਮੇਖ :- ਮੇਖ ਲਗਨ ਦੇ ਜਾਤਕਾਂ ਲਈ ਸ਼ਨੀ 10ਵੇਂ ਅਤੇ 11ਵੇਂ ਭਾਵ ਦੇ ਸੁਆਮੀ ਹਨ ਅਤੇ 12ਵੇਂ ਭਾਵ 'ਚ ਵਕਰੀ ਹਨ। ਇਸ ਕਾਰਨ ਲੰਬੇ ਸਮੇਂ ਤੋਂ ਉਡੀਕੇ ਜਾ ਰਹੇ ਪ੍ਰਮੋਸ਼ਨ ਜਾਂ ਅਪ੍ਰੇਜ਼ਲ 'ਚ ਦੇਰੀ ਹੋ ਸਕਦੀ ਹੈ। ਹਾਲਾਂਕਿ ਇਸ ਦੌਰਾਨ ਧਨ ਆਵੇਗਾ ਪਰ ਅਚਾਨਕ ਯਾਤਰਾ ਜਾਂ ਹਸਪਤਾਲ ਦੇ ਖ਼ਰਚਿਆਂ 'ਚ ਨਿਕਲ ਸਕਦਾ ਹੈ। ਤੁਸੀਂ ਮਾਨਸਿਕ ਤੌਰ ’ਤੇ ਥੱਕਿਆ ਹੋਇਆ ਮਹਿਸੂਸ ਕਰ ਸਕਦੇ ਹੋ, ਨੀਂਦ ਦਾ ਪੈਟਰਨ ਪ੍ਰਭਾਵਿਤ ਹੋ ਸਕਦਾ ਹੈ ਅਤੇ ਜ਼ਿਆਦਾ ਸੋਚਣ ਦੀ ਪ੍ਰਵਿਰਤੀ ਵਧ ਸਕਦੀ ਹੈ। ਇਹ ਅਧਿਆਤਮਿਕ ਵਿਕਾਸ, ਧਿਆਨ ਅਤੇ ਅਤੀਤ ਦੇ ਬੋਝ ਨੂੰ ਛੱਡਣ ਦਾ ਇਕ ਸ਼ਕਤੀਸ਼ਾਲੀ ਸਮਾਂ ਹੈ।
ਬ੍ਰਿਖ :- ਬ੍ਰਿਖ ਲਗਨ ਦੇ ਜਾਤਕਾਂ ਲਈ ਸ਼ਨੀ ਤੁਹਾਡੇ 9ਵੇਂ ਅਤੇ 10ਵੇਂ ਭਾਵ ਦੇ ਸੁਆਮੀ ਹਨ ਅਤੇ 11ਵੇਂ ਭਾਵ 'ਚ ਵਕਰੀ ਹੋਣਗੇ। ਇਸ ਨਾਲ ਆਰਥਿਕ ਲਾਭ, ਮਿੱਤਰਤਾ ਅਤੇ ਸਮਾਜਿਕ ਦਾਇਰੇ 'ਚ ਅਣਪਛਾਤੇ ਨਤੀਜੇ ਮਿਲ ਸਕਦੇ ਹਨ। ਇਹ ਸਮਾਂ ਤੁਹਾਨੂੰ ਤੁਰੰਤ ਲਾਭ ਦੀ ਬਜਾਏ ਸਥਾਈ ਸਫ਼ਲਤਾ ਬਣਾਉਣ ਵਿਚ ਮਦਦ ਕਰੇਗਾ। ਉਦੇਸ਼ਪੂਰਨ ਨੈੱਟਵਰਕਿੰਗ ਲੰਬੇ ਸਮੇਂ ਵਿਚ ਲਾਭਦਾਇਕ ਰਹੇਗੀ। ਸਖ਼ਤ ਮਿਹਨਤ ਦੇ ਬਾਵਜੂਦ ਉਮੀਦ ਮੁਤਾਬਕ ਉਤਸ਼ਾਹ ਜਾਂ ਸਹਿਯੋਗ ਸਮੇਂ ਸਿਰ ਨਹੀਂ ਮਿਲ ਸਕਦਾ। ਪੁਰਾਣੀਆਂ ਕੋਸ਼ਿਸ਼ਾਂ ਦਾ ਨਤੀਜਾ ਮਿਲ ਸਕਦਾ ਹੈ।
ਮਿਥੁਨ :- ਮਿਥੁਨ ਲਗਨ ਦੇ ਜਾਤਕਾਂ ਲਈ 8ਵੇਂ ਅਤੇ 9ਵੇਂ ਭਾਵ ਦੇ ਸੁਆਮੀ ਕਰੀਅਰ ਨਾਲ ਸਬੰਧਤ 10ਵੇਂ ਭਾਵ ਵਿਚ ਵਕਰੀ ਹੋਣਗੇ। ਇਸ ਨਾਲ ਕੰਮ ਦਾ ਦਬਾਅ ਵਧ ਸਕਦਾ ਹੈ ਅਤੇ ਸੀਨੀਅਰ ਅਧਿਕਾਰੀ ਤੁਹਾਡੇ ਸਬਰ ਦੀ ਪ੍ਰੀਖਿਆ ਲੈ ਸਕਦੇ ਹਨ। ਕਰੀਅਰ ਦੀ ਦਿਸ਼ਾ ’ਤੇ ਮੁੜ ਵਿਚਾਰ ਕਰਨ ਦੀ ਲੋੜ ਮਹਿਸੂਸ ਹੋ ਸਕਦੀ ਹੈ। ਪੁਰਾਣੇ ਪੇਸ਼ੇਵਰ ਮੁੱਦੇ ਫਿਰ ਸਾਹਮਣੇ ਆ ਸਕਦੇ ਹਨ। ਅਨੁਸ਼ਾਸਨ ਅਤੇ ਨਿਰੰਤਰਤਾ ’ਤੇ ਧਿਆਨ ਦਿਓ। ਇਹ ਸਮਾਂ ਤੁਹਾਡੇ ਪੇਸ਼ੇਵਰ ਜੀਵਨ ਨੂੰ ਲੰਬੇ ਸਮੇਂ ਦੀ ਸਥਿਰਤਾ ਲਈ ਮੁੜ ਗਠਿਤ ਕਰਨ ਦਾ ਹੈ। ਮੌਜੂਦਾ ਸਮੇਂ ਵਿਚ ਕੀਤੀ ਗਈ ਮਿਹਨਤ ਭਵਿੱਖ ਵਿਚ ਲਾਭ ਦੇਵੇਗੀ।
ਕਰਕ :- ਕਰਕ ਲਗਨ ਦੇ ਜਾਤਕਾਂ ਲਈ ਸ਼ਨੀ 7ਵੇਂ ਅਤੇ 8ਵੇਂ ਭਾਵ ਦੇ ਸੁਆਮੀ ਹਨ ਅਤੇ 9ਵੇਂ ਭਾਵ ਵਿਚ ਵਕਰੀ ਹੋਣਗੇ। ਵਕਰੀ ਸ਼ਨੀ ਦੇ ਪ੍ਰਭਾਵ ਨਾਲ ਯਾਤਰਾ, ਉੱਚ ਸਿੱਖਿਆ ਜਾਂ ਕਾਨੂੰਨੀ ਮਾਮਲਿਆਂ ਵਿਚ ਦੇਰੀ ਹੋ ਸਕਦੀ ਹੈ। ਪਿਤਾ ਜਾਂ ਗੁਰੂ ਸਮਾਨ ਵਿਅਕਤੀਆਂ ਨਾਲ ਸਬੰਧਾਂ ’ਤੇ ਧਿਆਨ ਦੇਣ ਦੀ ਲੋੜ ਹੋਵੇਗੀ। ਅਧਿਆਤਮਿਕ ਵਿਕਾਸ ਦੇ ਚੰਗੇ ਯੋਗ ਹਨ, ਪਰ ਇਸਦੇ ਲਈ ਅਨੁਸ਼ਾਸਨ ਜ਼ਰੂਰੀ ਹੋਵੇਗਾ। ਜੇਕਰ ਕੁਝ ਸਮੇਂ ਲਈ ਸਪੱਸ਼ਟਤਾ ਨਾ ਵੀ ਮਿਲੇ, ਤਾਂ ਵੀ ਪ੍ਰਕਿਰਿਆ ’ਤੇ ਵਿਸ਼ਵਾਸ ਬਣਾਈ ਰੱਖੋ। ਗੁਰੂ ਜਾਂ ਜੀਵਨ ਸਾਥੀ ਨਾਲ ਪੁਰਾਣੇ ਵਿਵਾਦ ਖ਼ਤਮ ਹੋ ਸਕਦੇ ਹਨ।
ਸਿੰਘ :- ਸਿੰਘ ਲਗਨ ਦੇ ਜਾਤਕਾਂ ਲਈ ਸ਼ਨੀ 6ਵੇਂ ਅਤੇ 7ਵੇਂ ਭਾਵ ਦੇ ਸੁਆਮੀ ਹਨ ਅਤੇ 8ਵੇਂ ਭਾਵ ਵਿਚ ਵਕਰੀ ਹੋਣਗੇ। ਇੱਥੇ ਵਕਰੀ ਸ਼ਨੀ ਦੇ ਪ੍ਰਭਾਵ ਨਾਲ ਸਾਂਝੇ ਧਨ, ਕਰਜ਼ੇ ਜਾਂ ਵਿਰਾਸਤ ਨਾਲ ਜੁੜੇ ਮਾਮਲਿਆਂ ਵਿਚ ਦੇਰੀ ਜਾਂ ਜਟਿਲਤਾ ਆ ਸਕਦੀ ਹੈ। ਸਿਹਤ ’ਤੇ ਵਿਸ਼ੇਸ਼ ਧਿਆਨ ਦੇਣ ਦੀ ਲੋੜ ਹੋਵੇਗੀ। ਜੋਖਮ ਭਰੇ ਫੈਸਲਿਆਂ ਅਤੇ ਗੁਪਤਤਾ ਨਾਲ ਜੁੜੇ ਮਾਮਲਿਆਂ ਵਿਚ ਸਾਵਧਾਨੀ ਰੱਖੋ। ਇਲਾਜ, ਖੋਜ ਅਤੇ ਜੀਵਨ ਦੇ ਡੂੰਘੇ ਸੱਚ ਨੂੰ ਸਮਝਣ ’ਤੇ ਧਿਆਨ ਦਿਓ। ਇਸ ਨਾਲ ਭਾਵਨਾਵਾਂ ਤੀਬਰ ਹੋਣਗੀਆਂ, ਪਰ ਪੈਂਡਿੰਗ ਵਿੱਤੀ ਜਾਂ ਰਿਸ਼ਤਿਆਂ ਨਾਲ ਜੁੜੇ ਮਾਮਲਿਆਂ ਦਾ ਹੱਲ ਵੀ ਸੰਭਵ ਹੈ।
ਕੰਨਿਆ :- ਕੰਨਿਆ ਲਗਨ ਦੇ ਜਾਤਕਾਂ ਲਈ ਸ਼ਨੀ 5ਵੇਂ ਅਤੇ 6ਵੇਂ ਭਾਵ ਦੇ ਸੁਆਮੀ ਹਨ ਅਤੇ 7ਵੇਂ ਭਾਵ ਵਿਚ ਵਕਰੀ ਹੋਣਗੇ। ਜੀਵਨ ਸਾਥੀ ਵਾਲੇ ਭਾਵ ਵਿਚ ਸ਼ਨੀ ਦੇ ਵਕਰੀ ਹੋਣ ਨਾਲ ਵਿਵਵਾਹਿਕ ਜੀਵਨ ਅਤੇ ਰਿਸ਼ਤਿਆਂ ਦੀ ਪ੍ਰੀਖਿਆ ਹੋ ਸਕਦੀ ਹੈ। ਗੱਲਬਾਤ ਵਿਚ ਕਮੀ, ਭਾਵਨਾਤਮਕ ਦੂਰੀ ਜਾਂ ਗਲਤਫਹਿਮੀਆਂ ਪੈਦਾ ਹੋ ਸਕਦੀਆਂ ਹਨ। ਪੁਰਾਣੇ ਰਿਸ਼ਤੇ ਸੁਧਾਰ ਲਈ ਫਿਰ ਸਾਹਮਣੇ ਆ ਸਕਦੇ ਹਨ। ਜਲਦਬਾਜ਼ੀ ਵਿਚ ਕੋਈ ਵੱਡਾ ਫੈਸਲਾ ਜਾਂ ਸਬੰਧ ਤੋੜਨ ਦਾ ਫੈਸਲਾ ਨਾ ਲਓ। ਸਬਰ, ਪਰਿਪੱਕਤਾ ਅਤੇ ਸਪੱਸ਼ਟ ਸੰਵਾਦ ਬਣਾਈ ਰੱਖੋ। ਇਸ ਸਮੇਂ ਭਾਈਵਾਲੀ ਵਿਚ ਜ਼ਿੰਮੇਵਾਰੀ ਨਿਭਾਉਣੀ ਜ਼ਰੂਰੀ ਹੋਵੇਗੀ।
ਤੁਲਾ :- ਤੁਲਾ ਲਗਨ ਦੇ ਜਾਤਕਾਂ ਲਈ ਸ਼ਨੀ ਚੌਥੇ ਅਤੇ 5ਵੇਂ ਭਾਵ ਦੇ ਸੁਆਮੀ ਹਨ ਅਤੇ 6ਵੇਂ ਭਾਵ ਵਿਚ ਵਕਰੀ ਹੋਣਗੇ। ਇਸ ਭਾਵ ਵਿਚ ਵਕਰੀ ਸ਼ਨੀ ਤੁਹਾਡੀ ਸਿਹਤ, ਰੁਟੀਨ ਅਤੇ ਵਿਵਾਦਾਂ ਨੂੰ ਪ੍ਰਭਾਵਿਤ ਕਰੇਗਾ। ਤਣਾਅ ਜਾਂ ਪਾਚਨ ਸੰਬੰਧੀ ਸਿਹਤ ਸਮੱਸਿਆਵਾਂ ਹੋ ਸਕਦੀਆਂ ਹਨ। ਕਾਨੂੰਨੀ ਮਾਮਲੇ, ਕਰਜ਼ੇ ਜਾਂ ਵਿਵਾਦ ਹੌਲੀ ਪੈ ਸਕਦੇ ਹਨ, ਪਰ ਉਨ੍ਹਾਂ ’ਤੇ ਧਿਆਨ ਦੇਣਾ ਜ਼ਰੂਰੀ ਰਹੇਗਾ। ਤੁਹਾਨੂੰ ਆਪਣੀ ਰੋਜ਼ਾਨਾ ਦੀ ਰੁਟੀਨ ਅਤੇ ਆਦਤਾਂ ਨੂੰ ਮੁੜ ਗਠਿਤ ਕਰਨਾ ਪੈ ਸਕਦਾ ਹੈ। ਫਿਟਨੈੱਸ ’ਤੇ ਕੰਮ ਕਰਨ ਲਈ ਇਹ ਚੰਗਾ ਸਮਾਂ ਹੈ। ਸਫ਼ਲਤਾ ਨਿਰੰਤਰ ਕੋਸ਼ਿਸ਼ਾਂ ਨਾਲ ਮਿਲੇਗੀ।
ਬ੍ਰਿਸ਼ਚਕ :- ਬ੍ਰਿਸ਼ਚਕ ਲਗਨ ਦੇ ਜਾਤਕਾਂ ਲਈ ਸ਼ਨੀ ਤੀਜੇ ਅਤੇ ਚੌਥੇ ਭਾਵ ਦੇ ਸੁਆਮੀ ਹਨ ਅਤੇ 5ਵੇਂ ਭਾਵ ਵਿਚ ਵਕਰੀ ਹੋਣਗੇ। ਪੰਜਵੇਂ ਭਾਵ ਵਿਚ ਵਕਰੀ ਸ਼ਨੀ ਰਚਨਾਤਮਕਤਾ, ਪ੍ਰੇਮ ਸਬੰਧ ਅਤੇ ਸੰਤਾਨ ਨਾਲ ਜੁੜੇ ਮਾਮਲਿਆਂ ਨੂੰ ਪ੍ਰਭਾਵਿਤ ਕਰ ਸਕਦੇ ਹਨ। ਭਾਵਨਾਵਾਂ ਨੂੰ ਪ੍ਰਗਟ ਕਰਨਾ ਮੁਸ਼ਕਲ ਲੱਗ ਸਕਦਾ ਹੈ। ਸੰਤਾਨ ਨਾਲ ਜੁੜੇ ਮਾਮਲਿਆਂ ਵਿਚ ਸਬਰ ਰੱਖਣਾ ਹੋਵੇਗਾ। ਸੱਟਾ ਨਿਵੇਸ਼ ਤੋਂ ਬਚੋ। ਜੀਵਨ ਵਿਚ ਖੁਸ਼ੀ ਅਤੇ ਸਹਿਜਤਾ ਘੱਟ ਮਹਿਸੂਸ ਹੋ ਸਕਦੀ ਹੈ। ਇਹ ਸਮਾਂ ਪ੍ਰੇਮ ਜੀਵਨ ਵਿਚ ਪਰਿਪੱਕਤਾ ਲਿਆਉਣ ਲਈ ਪ੍ਰੇਰਿਤ ਕਰੇਗਾ। ਪੁਰਾਣੇ ਰਚਨਾਤਮਕ ਵਿਚਾਰ ਜਾਂ ਯਤਨ ਫਿਰ ਤੋਂ ਜੀਵਤ ਹੋ ਸਕਦੇ ਹਨ।
ਧਨੁ :- ਧਨੁ ਲਗਨ ਦੇ ਜਾਤਕਾਂ ਲਈ ਸ਼ਨੀ ਦੂਜੇ ਅਤੇ ਤੀਜੇ ਭਾਵ ਦੇ ਸੁਆਮੀ ਹਨ ਅਤੇ ਚੌਥੇ ਭਾਵ ਵਿਚ ਵਕਰੀ ਹੋਣਗੇ। ਚੌਥੇ ਭਾਵ ਵਿਚ ਵਕਰੀ ਸ਼ਨੀ ਦੇ ਕਾਰਨ ਘਰੇਲੂ ਸ਼ਾਂਤੀ ਪ੍ਰਭਾਵਿਤ ਹੋ ਸਕਦੀ ਹੈ। ਜ਼ਮੀਨ ਅਤੇ ਜਾਇਦਾਦ ਨਾਲ ਜੁੜੇ ਮਾਮਲਿਆਂ ਵਿਚ ਦੇਰੀ ਹੋ ਸਕਦੀ ਹੈ। ਤੁਸੀਂ ਆਪਣੇ ਆਰਾਮਦਾਇਕ ਮਾਹੌਲ ਤੋਂ ਕੱਟੇ ਹੋਏ ਮਹਿਸੂਸ ਕਰ ਸਕਦੇ ਹੋ। ਮਾਤਾ ਅਤੇ ਘਰ ਨਾਲ ਜੁੜੇ ਮਾਮਲਿਆਂ ’ਤੇ ਧਿਆਨ ਦੇਣਾ ਹੋਵੇਗਾ। ਇਹ ਸਮਾਂ ਭਾਵਨਾਤਮਕ ਸਥਿਰਤਾ ਨੂੰ ਦੁਬਾਰਾ ਬਣਾਉਣ ਦਾ ਹੈ। ਜਾਇਦਾਦ ਨਾਲ ਜੁੜੇ ਫੈਸਲੇ ਜਲਦਬਾਜ਼ੀ ਵਿਚ ਨਾ ਲਓ। ਆਪਣੇ ਆਪ ਨੂੰ ਸਥਿਰ ਰੱਖਣ ਅਤੇ ਅੰਦਰੂਨੀ ਸ਼ਾਂਤੀ ਵਿਕਸਿਤ ਕਰਨ ’ਤੇ ਧਿਆਨ ਦਿਓ।
ਮਕਰ :- ਮਕਰ ਲਗਨ ਦੇ ਜਾਤਕਾਂ ਲਈ ਸ਼ਨੀ ਪਹਿਲੇ ਅਤੇ ਦੂਜੇ ਭਾਵ ਦੇ ਸੁਆਮੀ ਹਨ ਅਤੇ ਤੀਜੇ ਭਾਵ ਵਿਚ ਵਕਰੀ ਹੋਣਗੇ। ਇਸ ਭਾਵ ਵਿਚ ਸ਼ਨੀ ਦੇ ਵਕਰੀ ਹੋਣ ਨਾਲ ਸੰਚਾਰ, ਯਾਤਰਾਵਾਂ ਅਤੇ ਭੈਣ-ਭਰਾਵਾਂ ਨਾਲ ਸਬੰਧ ਪ੍ਰਭਾਵਿਤ ਹੋਣਗੇ। ਆਪਣੀ ਗੱਲ ਕਹਿਣ ਵਿਚ ਝਿਜਕ ਮਹਿਸੂਸ ਹੋ ਸਕਦੀ ਹੈ। ਛੋਟੀਆਂ ਯਾਤਰਾਵਾਂ ਵਿਚ ਦੇਰੀ ਹੋ ਸਕਦੀ ਹੈ। ਆਤਮ-ਵਿਸ਼ਵਾਸ ਵਿਚ ਉਤਾਰ-ਚੜ੍ਹਾਅ ਰਹੇਗਾ। ਕੋਸ਼ਿਸ਼ਾਂ ਦਾ ਨਤੀਜਾ ਮਿਲਣ ਵਿਚ ਸਮਾਂ ਲੱਗ ਸਕਦਾ ਹੈ। ਜ਼ਿਆਦਾ ਸੋਚਣ ਅਤੇ ਆਪਣੇ ਆਪ ’ਤੇ ਸ਼ੱਕ ਕਰਨ ਤੋਂ ਬਚੋ। ਇਹ ਸਮਾਂ ਆਪਣੇ ਹੁਨਰ ਅਤੇ ਸੰਵਾਦ ਸਮਰੱਥਾ ਨੂੰ ਬਿਹਤਰ ਬਣਾਉਣ ਦਾ ਹੈ।
ਕੁੰਭ :- ਕੁੰਭ ਲਗਨ ਦੇ ਜਾਤਕਾਂ ਲਈ ਸ਼ਨੀ ਲਗਨ ਅਤੇ 12ਵੇਂ ਭਾਵ ਦੇ ਸੁਆਮੀ ਹਨ ਅਤੇ ਦੂਜੇ ਭਾਵ ਵਿਚ ਵਕਰੀ ਹੋਣਗੇ। ਇਸ ਭਾਵ ਵਿਚ ਸ਼ਨੀ ਦੇ ਵਕਰੀ ਹੋਣ ਨਾਲ ਧਨ, ਪਰਿਵਾਰ ਅਤੇ ਬੋਲਚਾਲ ਪ੍ਰਭਾਵਿਤ ਹੋ ਸਕਦੀ ਹੈ। ਆਰਥਿਕ ਯੋਜਨਾ ਬਣਾਉਣੀ ਜ਼ਰੂਰੀ ਹੋਵੇਗੀ ਕਿਉਂਕਿ ਦੇਰੀ ਜਾਂ ਅਸਥਿਰਤਾ ਆ ਸਕਦੀ ਹੈ। ਬੇਲੋੜੇ ਖ਼ਰਚਿਆਂ ਤੋਂ ਬਚੋ। ਪਰਿਵਾਰਕ ਮਾਮਲਿਆਂ ’ਤੇ ਧਿਆਨ ਦੇਣਾ ਹੋਵੇਗਾ। ਵਿਵਾਦਾਂ ਤੋਂ ਬਚਣ ਲਈ ਸੋਚ-ਸਮਝ ਕੇ ਬੋਲੋ। ਇਹ ਸਮਾਂ ਆਰਥਿਕ ਅਨੁਸ਼ਾਸਨ ਅਤੇ ਸਥਿਰਤਾ ਵਿਕਸਿਤ ਕਰਨ ਦਾ ਹੈ। ਰੁਕਿਆ ਹੋਇਆ ਧਨ ਵਾਪਸ ਮਿਲ ਸਕਦਾ ਹੈ।
ਮੀਨ :- ਮੀਨ ਲਗਨ ਦੇ ਜਾਤਕਾਂ ਲਈ ਸ਼ਨੀ 11ਵੇਂ ਅਤੇ 12ਵੇਂ ਭਾਵ ਦੇ ਸੁਆਮੀ ਹਨ ਅਤੇ ਲਗਨ ਵਿਚ ਵਕਰੀ ਹੋਣਗੇ। ਇਹ ਸਮਾਂ ਅੰਦਰੋਂ ਆਪਣੇ ਆਪ ਨੂੰ ਹੋਰ ਮਜ਼ਬੂਤ ਬਣਾਉਣ ਦਾ ਹੈ। ਲਗਨ ਵਿਚ ਵਕਰੀ ਸ਼ਨੀ ਦੇ ਪ੍ਰਭਾਵ ਨਾਲ ਤੁਸੀਂ ਉਦਾਸ ਮਹਿਸੂਸ ਕਰ ਸਕਦੇ ਹੋ। ਜੀਵਨ ਹੌਲੀ ਜਾਂ ਸੀਮਤ ਮਹਿਸੂਸ ਹੋ ਸਕਦਾ ਹੈ। ਇਹ ਆਤਮ-ਪਰਿਵਰਤਨ ਦਾ ਬਹੁਤ ਸ਼ਕਤੀਸ਼ਾਲੀ ਸਮਾਂ ਹੈ। ਪੁਰਾਣੇ ਵਿਵਹਾਰ, ਡਰ ਅਤੇ ਅਸੁਰੱਖਿਆਵਾਂ ਇਲਾਜ (ਹੀਲਿੰਗ) ਲਈ ਸਾਹਮਣੇ ਆਉਣਗੀਆਂ। ਨਾਂਹਪੱਖੀ ਸੋਚ ਤੋਂ ਬਚੋ ਅਤੇ ਆਤਮ-ਅਨੁਸ਼ਾਸਨ, ਸਿਹਤ ਤੇ ਨਿੱਜੀ ਵਿਕਾਸ ’ਤੇ ਧਿਆਨ ਦਿਓ।
- ਗੌਰੀ ਜੈਨ
ਜੋਤਿਸ਼ ਅਤੇ ਵਾਸਤੂ ਐਕਸਪਰਟ
UNSC 'ਚ ਮੈਂਬਰਸ਼ਿਪ ਲਈ ਭਾਰਤ ਨੇ ਪੇਸ਼ ਕੀਤੀ ਉਮੀਦਵਾਰੀ
NEXT STORY 
