ਨਵੀਂ ਦਿੱਲੀ— ਪੋਂਜੀ ਸਕੀਮ ਘੁਟਾਲੇ 'ਚ ਇਨਫੋਰਸਮੈਂਟ ਡਾਇਰੈਕਟੋਰੇਟ (ਈ.ਡੀ.) ਨੇ ਸੋਮਵਾਰ ਨੂੰ ਵੱਡੀ ਕਾਰਵਾਈ ਕਰਦੇ ਹੋਏ ਤ੍ਰਿਣਮੂਲ ਕਾਂਗਰਸ ਦੇ ਸੰਸਦ ਮੈਂਬਰ ਕੇ.ਡੀ. ਸਿੰਘ ਦੀ ਕਰੀਬ 238 ਕਰੋੜ ਦੀ ਸੰਪਤੀ ਸੀਜ਼ (ਕੁਰਕ) ਕਰ ਲਈ ਹੈ। ਇਸ 'ਚ ਰਿਜ਼ੋਰਟ, ਸ਼ੋਅਰੂਮ ਅਤੇ ਬੈਂਕ ਖਾਤੇ ਵੀ ਸ਼ਾਮਲ ਹਨ। ਕੇ.ਡੀ. ਸਿੰਘ 'ਤੇ ਬੀਤੇ ਕਾਫੀ ਸਮੇਂ ਤੋਂ ਈ.ਡੀ. ਦੀ ਨਜ਼ਰ ਸੀ।
2016 'ਚ ਹੋਇਆ ਸੀ ਕੇਸ ਦਰਜ ਇਨਫੋਰਸਮੈਂਟ ਡਾਇਰੈਕਟੋਰੇਟ ਨੇ ਸੋਮਵਾਰ ਨੂੰ ਕੇ.ਡੀ. ਸਿੰਘ ਦੇ ਕੁਰਫੀ 'ਚ ਰਿਜ਼ੋਰਟ, ਚੰਡੀਗੜ੍ਹ 'ਚ ਸ਼ੋਅਰੂਮ, ਪੰਚਕੂਲਾ 'ਚ ਸੰਪਤੀ ਅਤੇ ਬੈਂਕ ਖਾਤਿਆਂ ਨੂੰ ਜ਼ਬਤ ਕੀਤਾ। ਜ਼ਿਕਰਯੋਗ ਹੈ ਕਿ ਕੇ.ਡੀ. ਸਿੰਘ ਦੀ ਕੰਪਨੀ ਅਲਕੇਮਿਸਟ ਇੰਫਰਾ ਰਿਐਲਿਟੀ ਲਿਮਟਿਡ 'ਤੇ ਈ.ਡੀ. ਨੇ ਸਤੰਬਰ 2016 'ਚ ਕੇਸ ਦਰਜ ਕੀਤਾ ਸੀ। ਇਹ ਮਾਮਲਾ ਪੀ.ਐੱਮ.ਐੱਲ.ਏ. ਦੇ ਅਧੀਨ ਦਰਜ ਕੀਤਾ ਗਿਆ ਸੀ। ਕੇ.ਡੀ. ਸਿੰਘ ਦੀ ਕੰਪਨੀ 'ਤੇ ਦੋਸ਼ ਸੀ ਕਿ ਇਸ ਕੰਪਨੀ ਨੇ ਲੋਕਾਂ ਨੂੰ ਕਰੀਬ 1900 ਕਰੋੜ ਦਾ ਚੂਨਾ ਲਗਾਇਆ ਸੀ। ਸੇਬੀ ਵਲੋਂ ਕੰਪਨੀ, ਇਸ ਦੇ ਡਾਇਰੈਕਟਰ ਅਤੇ ਸ਼ੇਅਰ ਹੋਲਡਰਜ਼ 'ਤੇ ਮਾਮਲਾ ਦਰਜ ਕੀਤਾ ਗਿਆ ਸੀ। ਇਸ ਤੋਂ ਪਹਿਲਾਂ ਵੀ ਤ੍ਰਿਣਮੂਲ ਕਾਂਗਰਸ ਦੇ ਕਈ ਨੇਤਾਵਾਂ ਦਾ ਨਾਂ ਸ਼ਾਰਦਾ ਚਿਟਫੰਡ ਘੁਟਾਲੇ 'ਚ ਆਇਆ ਸੀ। ਤ੍ਰਿਣਮੂਲ ਕਾਂਗਰਸ ਮੁਖੀ ਅਤੇ ਪੱਛਮੀ ਬੰਗਾਲ ਦੀ ਮੁੱਖ ਮੰਤਰੀ ਮਮਤਾ ਬੈਨਰਜੀ ਕਈ ਵਾਰ ਕੇਂਦਰ ਦੀ ਨਰਿੰਦਰ ਮੋਦੀ ਸਰਕਾਰ 'ਤੇ ਦੋਸ਼ ਲਗਾਉਂਦੀ ਰਹੀ ਹੈ ਕਿ ਸਰਕਾਰ ਜਾਂਚ ਏਜੰਸੀਆਂ ਦੀ ਗਲਤ ਵਰਤੋਂ ਕਰ ਰਹੀ ਹੈ। ਮਮਤਾ ਨੇ ਕਈ ਵਾਰ ਦੋਸ਼ ਲਗਾਇਆ ਕਿ ਕੇਂਦਰ ਸਰਕਾਰ ਏਜੰਸੀਆਂ ਦੀ ਗਲਤ ਵਰਤੋਂ ਕਰ ਕੇ ਵਿਰੋਧੀਆਂ ਨੂੰ ਧਮਕਾ ਰਹੀ ਹੈ।
ਜਾਣੋ ਕੌਣ ਹਨ ਕੇ.ਡੀ. ਸਿੰਘ
ਜ਼ਿਕਰਯੋਗ ਹੈ ਕਿ ਕੇ.ਡੀ. ਸਿੰਘ ਟੀ.ਐੱਮ.ਸੀ. 'ਚ ਆਉਣ ਤੋਂ ਪਹਿਲਾਂ ਝਾਰਖੰਡ ਮੁਕਤੀ ਮੋਰਚਾ ਦੇ ਮੈਂਬਰ ਸਨ। 2010 'ਚ ਰਾਜ ਸਭਾ ਸੰਸਦ ਮੈਂਬਰ ਚੁਣੇ ਜਾਣ ਤੋਂ ਬਾਅਦ ਉਨ੍ਹਾਂ ਨੇ ਟੀ.ਐੱਮ.ਸੀ. ਦਾ ਹੱਥ ਫੜ ਲਿਆ ਸੀ। ਟੀ.ਐੱਮ.ਸੀ. 'ਚ ਉਨ੍ਹਾਂ ਨੂੰ ਪੱਛਮੀ ਭਾਰਤ ਦੇ ਰਾਜਾਂ ਦੀ ਜ਼ਿੰਮੇਵਾਰੀ ਮਿਲੀ ਹੋਈ ਹੈ। ਇਨ੍ਹਾਂ 'ਚੋਂ ਪੰਜਾਬ, ਹਰਿਆਣਾ, ਹਿਮਾਚਲ ਪ੍ਰਦੇਸ਼, ਜੰਮੂ-ਕਸ਼ਮੀਰ ਅਤੇ ਚੰਡੀਗੜ੍ਹ ਦੀ ਜ਼ਿੰਮੇਵਾਰੀ ਅਹਿਮ ਹੈ। ਰਾਜ ਸਭਾ ਸੰਸਦ ਮੈਂਬਰ ਹੋਣ ਤੋਂ ਇਲਾਵਾ ਕੇ.ਡੀ. ਸਿੰਘ ਭਾਰਤੀ ਹਾਕੀ ਫੈਡਰੇਸ਼ਨ ਦੇ ਮੁਖੀ ਵੀ ਹਨ।
ਜਾਣੋ ਕੀ ਹੈ ਪੋਂਜੀ ਸਕੀਮ
ਪੋਂਜੀ ਸਕੀਮ, ਪਿਰਾਮਿਡ ਸਕੀਮ, ਮਲਟੀ ਲੇਵਲ ਮਾਰਕੀਟਿੰਗ ਜਾਂ ਫਿਰ ਨੈੱਟਵਰਕ ਮਾਰਕੀਟਿੰਗ ਸਿਸਟਮ ਇਹ ਅਜਿਹਾ ਧੰਦਾ ਜਾਂ ਬਿਜ਼ਨੈੱਸ ਹੈ, ਜਿਸ ਦੇ ਮਾਧਿਅਮ ਨਾਲ ਲੋਕਾਂ ਨੂੰ ਲੁੱਟਿਆ ਜਾਂਦਾ ਹੈ। ਇਸ 'ਚ ਨਿਵਸ਼ੇਕਾਂ ਨੂੰ ਭਾਰੀ ਰਿਟਰਨ (ਕਈ ਵਾਰ 100 ਫੀਸਦੀ ਤੱਕ) ਦਾ ਲਾਲਚ ਦੇ ਕੇ ਨਿਵੇਸ਼ ਕਰਵਾਇਆ ਜਾਂਦਾ ਹੈ। ਅਜਿਹੀ ਕੰਪਨੀਆਂ ਕੁਝ ਮਹੀਨਿਆਂ ਜਾਂ ਸਾਲਾਂ 'ਚ ਨਿਵੇਸ਼ਕਾਂ ਨੂੰ ਲੱਖਾਂ-ਕਰੋੜਾਂ ਦਾ ਚੂਨਾ ਲਗਾ ਕੇ ਫਰਾਰ ਹੋ ਜਾਂਦੀਆਂ ਹਨ। ਪੋਂਜੀ ਸਕੀਮ ਕਿਸੇ ਕੰਪਨੀ ਦੀ ਯੋਜਨਾ ਹੁੰਦੀ ਹੈ, ਜਿਸ 'ਚ ਲੋਕਾਂ ਨੇ ਆਪਣੇ ਪੈਸੇ ਉਸ 'ਚ ਨਿਵੇਸ਼ ਕਰਨੇ ਹੁੰਦੇ ਹਨ। ਉਸ ਤੋਂ ਬਾਅਦ ਉਸ ਨੂੰ ਹੋਰ ਵੀ ਲੋਕਾਂ ਨੂੰ ਉਸ ਕੰਪਨੀ ਨਾਲ ਜੋੜਨਾ ਹੁੰਦਾ ਹੈ, ਜਿਸ ਦੇ ਬਦਲੇ ਉਸ ਨੂੰ ਆਪਣਾ ਨਿਵੇਸ਼ ਵਿਆਜ਼ ਨਾਲ ਵਾਪਸ ਮਿਲਦਾ ਹੈ। ਪੋਂਜੀ ਸਕੀਮ 'ਚ ਰਿਟਰਨ 100 ਫੀਸਦੀ ਦੇ ਦਾਅਵੇ 'ਤੇ ਮਿਲਦਾ ਹੈ। ਅਜਿਹਾ ਇਸ ਲਈ ਕਿਉਂਕਿ ਨਵੇਂ ਜੁੜੇ ਮੈਂਬਰ ਦਾ ਪੈਸਾ ਪੁਰਾਣੇ ਜੁੜੇ ਮੈਂਬਰ ਕੋਲ ਜਾਂਦਾ ਹੈ ਅਤੇ ਇਹ ਸਿਲਸਿਲਾ ਚੱਲਦਾ ਰਹਿੰਦਾ ਹੈ। ਇਸ ਨਾਲ ਲੋਕ ਉਸ ਕੰਪਨੀ ਅਤੇ ਯੋਜਨਾ ਵੱਲ ਆਕਰਸ਼ਿਤ ਹੋ ਜਾਂਦੇ ਹਨ ਪਰ ਜਿਵੇਂ ਹੀ ਲੱਖਾਂ ਦੀ ਗਿਣਤੀ 'ਚ ਇਹ ਲੋਕ ਨਿਵੇਸ਼ ਕਰਨ ਲੱਗਦੇ ਹਨ ਤਾਂ ਇਹ ਅਚਾਨਕ ਗਾਇਬ ਹੋ ਜਾਂਦੇ ਹਨ। ਜਿਸ ਨਾਲ ਸ਼ੁਰੂਆਤੀ ਨਿਵੇਸ਼ਕਾਂ ਨੂੰ ਤਾਂ ਫਾਇਦਾ ਮਿਲਿਆ ਪਰ ਬਾਅਦ 'ਚ ਹੋਰ ਨਵੇਂ ਲੱਖ ਨਿਵੇਸ਼ਕਾਂ ਦੇ ਪੈਸੇ ਡੁੱਬ ਜਾਂਦੇ ਹਨ। ਇਸ ਲਈ ਪੋਂਜੀ ਸਕੀਮ ਨੂੰ ਧੋਖਾ ਅਤੇ ਘੁਟਾਲਾ ਕਹਿੰਦੇ ਹਨ।
ਅਯੁੱਧਿਆ ਮਾਮਲੇ ਨੂੰ ਜਲਦੀ ਹੱਲ ਕਰੇ ਕੋਰਟ : ਰਵੀਸ਼ੰਕਰ ਪ੍ਰਸਾਦ
NEXT STORY 
