ਟੋਰਾਂਟੋ-(ਹੀਰਾ ਰੰਧਾਵਾ)-ਟੋਰਾਂਟੋ ਦੇ ਸ਼ਹਿਰ ਬਰੈਂਪਟਨ ਦੇ ਰੋਜ਼ ਥੀਏਟਰ 'ਚ ਬੀਤੇ ਦਿਨੀਂ ਨੋਰਾ ਰਿਚਰਡਜ਼ ਨੂੰ ਸਮਰਪਿਤ ਪੰਜਾਬੀ ਰੰਗਮੰਚ ਦੀ 100ਵੀਂ ਵਰੇਗੰਢ 'ਤੇ ਮਸ਼ਾਲ ਆਰਟਸ ਵਲੋਂ ਇਕ ਨਾਟਕ ਮੇਲੇ ਦਾ ਆਯੋਜਨ ਕੀਤਾ ਗਿਆ, ਜਿਸ 'ਚ ਸਥਾਨਕ ਟੀਮਾਂ ਵੱਲੋਂ ਵਧੀਆ ਨਾਟਕ ਪੇਸ਼ਕਾਰੀਆਂ ਕੀਤੀਆਂ ਗਈਆਂ। ਪਹਿਲਾਂ ਨਾਟਕ ਸਰਬਜੀਤ ਅਰੋੜਾ ਵਲੋਂ ਨਿਰਦੇਸ਼ਿਤ ਪਾਲੀ ਭੁਪਿੰਦਰ ਦਾ ਲਿਖਿਆ 'ਪੰਜ ਡਾਲਰ ਦਾ ਨੋਟ' ਸੀ, ਜਿਹੜਾ ਪੰਜਾਬੀ ਆਰਟਸ ਐਸੋਸੀਏਸ਼ਨ ਵਲੋਂ ਖ਼ੇਡਿਆ ਗਿਆ। ਇਹ ਨਾਟਕ ਪੰਜਾਬੀ ਮਾਪਿਆਂ ਦੇ ਕੈਨੇਡਾ 'ਚ ਆਉਣ 'ਤੇ ਉਹਨਾਂ ਦੀ ਔਲਾਦ ਦੀਆਂ ਮਜ਼ਬੂਰੀਆਂ ਨੂੰ ਦਰਸਾਉਂਦਾ ਸੀ। ਇਸ ਨਾਟਕ 'ਚ ਜਗਵਿੰਦਰ ਜੱਜ ਦੀ ਭੂਮਿਕਾ ਹਮੇਸ਼ਾ ਦੀ ਤਰ੍ਹਾਂ ਸ਼ਲਾਘਾਯੋਗ ਸੀ, ਜਿਸ ਦੇ ਨਾਲ ਬਾਕੀ ਕਲਾਕਾਰਾਂ ਨੇ ਵੀ ਬਹੁਤ ਵਧੀਆ ਭੂਮਿਕਾਵਾਂ ਨਿਭਾਈਆਂ।
ਦੂਜਾ ਨਾਟਕ 'ਹੈਟਸ-ਅੱਪ' (ਹੈਰੀਟੇਜ਼ ਆਰਟਸ ਐਂਡ ਥੀਏਟਰ ਸੁਸਾਇਟੀ ਆਫ਼ ਯੂਨਾਈਟਡ ਪ੍ਰੋਡਕਸ਼ਨਜ਼) ਵਲੋਂ ਭਾਅਜੀ ਗੁਰਸ਼ਰਨ ਸਿੰਘ ਹੋਰਾਂ ਦਾ ਲਿਖਿਆ ਸੀ, ਜੋ ਹੀਰਾ ਰੰਧਾਵਾ ਦੀ ਨਿਰਦੇਸ਼ਨਾਂ ਹੇਠ ਪੇਸ਼ ਕੀਤਾ ਗਿਆ। ਇਹ ਸੰਗੀਤਕ ਨਾਟਕ ਅੰਗਰੇਜ਼ਾਂ ਵਲੋਂ ਭਾਰਤ ਨੂੰ ਗੁਲਾਮ ਬਣਾਉਣ ਤੋਂ ਲੈ ਕੇ ਉਨ੍ਹਾਂ 'ਚ ਮਜ਼ਹਬੀ ਬਖੇੜੇ ਪਾਉਣ, ਬੱਬਰ ਅਕਾਲੀ ਲਹਿਰ ਵਲੋਂ ਟੋਡੀ ਟਾਊਟਾਂ ਨੂੰ ਸੋਧਾ ਲਾਉਣ, ਅਮਰੀਕਾ 'ਚ ਭਾਰਤੀਆਂ ਨਾਲ ਵਿਤਕਰੇ ਤੇ ਗ਼ਦਰ ਲਹਿਰ ਦੀ ਸਥਾਪਨਾ ਤੋਂ ਲੈ ਕੇ ਸ਼ਹੀਦ ਭਗਤ ਸਿੰਘ, ਰਾਜਗੁਰੂ, ਸੁਖਦੇਵ ਵਲੋਂ ਅਸੈਂਬਲੀ 'ਚ ਬੰਬ ਸੁੱਟਣ ਤੇ ਉਨ੍ਹਾਂ 'ਤੇ ਚੱਲ ਰਹੇ ਮੁਕੱਦਮੇ ਦੀਆਂ ਘਟਨਾਵਾਂ ਨੂੰ ਰੂਪਮਾਨ ਕਰਦਾ ਸੀ। 'ਤੇ ਚੱਲੇ ਮੁਕੱਦਮੇ ਦੀਆਂ ਘਟਨਾਵਾਂ ਨੂੰ ਰੂਪਮਾਨ ਕਰਦਾ ਸੀ। ਤੀਜਾ ਨਾਟਕ ਕਾਮੇਡੀ ਸੀ, ਜੋ ਪਾਕਿਸਤਾਨੀ ਭਾਈਚਾਰੇ ਦੀ ਟੀਮ ਵਲੋਂ ਜ਼ਫਰ ਸ਼ਾਹ ਦੀ ਨਿਰਦੇਸ਼ਨਾਂ ਹੇਠ ਖੇਡਿਆ ਗਿਆ, ਜਿਸ ਨੇ ਲੋਕਾਂ ਦਾ ਖੂਬ ਮਨੋਰੰਜਨ ਕੀਤਾ। ਇਸ 'ਚ ਗੁਰਬੀਰ ਗੋਗੋ, ਮਿਸਟਰ ਚੀਮਾ ਤੇ ਜਫ਼ਰ ਸ਼ਾਹ ਦੀਆਂ ਭੂਮਿਕਾਵਾਂ ਸ਼ਲਾਘਾਯੋਗ ਸਨ। ਪ੍ਰੋਗਰਾਮ ਦਾ ਆਖਰੀ ਨਾਟਕ ਨਾਹਰ ਔਜਲਾ ਵਲੋਂ ਚੇਤਨਾ ਮੰਚ ਦੀ ਟੀਮ ਵਲੋਂ 'ਸੁਪਰ ਵੀਜ਼ਾ' ਸੀ, ਜੋ ਕੈਨੇਡਾ 'ਚ ਸੁਪਰ ਵੀਜ਼ੇ 'ਤੇ ਆਏ ਮਾਪਿਆਂ ਦੇ ਦੁਖਾਂਤ ਨੂੰ ਦਰਸਾਉਂਦਾ ਸੀ, ਜਿਨ੍ਹਾਂ ਨੂੰ ਆਪਣੀ ਨੂੰ ਵਲੋਂ ਵਾਰ-ਵਾਰ ਤਾਅਨੇ ਮਿਹਨੇ ਸਹਿਣੇ ਪੈਂਦੇ ਹਨ ਤੇ ਆਖਿਰ ਉਹ ਵਾਪਸ ਭਾਰਤ ਜਾਣ ਦਾ ਫੈਸਲਾ ਕਰਦੇ ਹਨ। ਨਾਟਕ ਵਿੱਚ ਹਲਕੀ-ਫੁਲਕੀ ਕਾਮੇਡੀ ਨਾਟਕ ਨੂੰ ਅੱਗੇ ਤੋਰਦੀ ਹੈ।
ਇਸ ਨਾਟਕ ਮੇਲੇ ਦੇ ਦੌਰਾਨ ਜਿੰਦ ਧਾਰੀਵਾਲ ਵਲੋਂ ਆਪਣੇ ਗੀਤ ਸੁਣਾ ਕੇ ਚੰਗਾ ਰੰਗ ਬੰਨ੍ਹਿਆ ਗਿਆ। ਸਟੇਜ ਸੰਚਾਲਨਾਂ ਸਤਿੰਦਰ ਚਾਹਲ ਤੇ ਜਸਵਿੰਦਰ ਬੱਬੂ ਨੇ ਕੀਤੀ। ਇਸ ਮੌਕੇ ਚੇਤਨਾ ਪ੍ਰਕਾਸ਼ਨ ਲੁਧਿਆਣਾ ਵਲੋਂ ਪੁਸਤਕ ਪ੍ਰਦਰਸ਼ਨੀ ਲਗਾਈ ਗਈ, ਜਿਥੋਂ ਦਰਸ਼ਕਾਂ ਨੇ ਬਹੁਤ ਸਾਰੀਆਂ ਪੁਸਤਕਾਂ ਖਰੀਦੀਆਂ। ਕੁਲ ਮਿਲਾ ਕੇ ਇਸ ਸਫ਼ਲ ਨਾਟਕ ਮੇਲੇ ਨੂੰ ਦਰਸ਼ਕਾਂ ਨੇ ਭਰਵਾਂ ਹੁੰਗਾਰਾ ਦਿੱਤਾ। ਜ਼ਿਕਰਯੋਗ ਹੈ ਕਿ ਇਨ੍ਹੀਂ ਦਿਨਂ ਜੀਟੀਏ 'ਚ ਨਾਟਕਾਂ ਦੀ ਇਕ ਲਹਿਰ ਚੱਲ ਰਹੀ ਹੈ, ਜਿਸ ਅਧੀਨ ਰੰਗਮੰਚ ਪ੍ਰੇਮੀਆਂ ਨੂੰ ਬਹੁਤ ਸਾਰੇ ਮਿਆਰੀ ਤੇ ਉਨ੍ਹਾਂ ਦੀਆਂ ਦੁੱਖ ਤਕਲੀਫਾਂ 'ਤੇ ਆਧਾਰਿਤ ਨਾਟਕ ਦਰਸ਼ਕਾਂ ਨੂੰ ਵੇਖਣ ਨੂੰ ਮਿਲ ਰਹੇ ਹਨ। ਹਰ ਮਹੀਨੇ ਕੋਈ ਨਾ ਕੋਈ ਨਾਟਕ ਹੁੰਦਾ ਹੀ ਰਹਿੰਦਾ ਹੈ। ਪੰਜਾਬੀ ਰੰਗਮੰਚ ਦਾ ਭਵਿੱਖ ਟੋਰਾਂਟੋ ਖ਼ੇਤਰ 'ਚ ਕਾਫ਼ੀ ਉਜਵੱਲ ਹੈ।
ਆਈ. ਐੱਸ. ਦੀ ਕੈਦ ਵਿਚ ਕੈਂਟਲੀ ਦੇ ਪਰਿਵਾਰ ਨੇ ਕੀਤੀ ਦੁਬਾਰਾ ਸੰਪਰਕ ਦੀ ਅਪੀਲ
NEXT STORY 
