ਇਹ ਹੈਰਾਨੀ ਭਰੀ ਗੱਲ ਹੈ ਕਿ ਕੁਦਰਤ ਨੇ ਮਨੁੱਖ ਨੂੰ ਦੇਹ, ਬੁੱਧੀ ਤੇ ਮਨ ਦੇ ਮਾਮਲੇ ਵਿਚ ਹੋਰਨਾਂ ਜੀਵਾਂ ਦੇ ਮੁਕਾਬਲੇ ਸਭ ਤੋਂ ਸ਼ਕਤੀਸ਼ਾਲੀ ਜੀਵ ਬਣਾਇਆ ਹੈ ਤਾਂ ਸਭ ਤੋਂ ਜ਼ਿਆਦਾ ਆਲਸੀ ਭਾਵਨਾ ਵੀ ਪ੍ਰਦਾਨ ਕੀਤੀ ਹੈ। ਜ਼ਿਆਦਾਤਰ ਲੋਕ ਆਪਣੇ ਤੇ ਪਰਿਵਾਰ ਦੇ ਸਵਾਰਥ ਪੂਰੇ ਕਰਨ ਤੋਂ ਬਾਅਦ ਆਰਾਮ ਕਰਨਾ ਚਾਹੁੰਦੇ ਹਨ ਅਤੇ ਪਰਮਾਰਥ ਉਨ੍ਹਾਂ ਨੂੰ ਵਿਅਰਥ ਦਾ ਵਿਸ਼ਾ ਲਗਦਾ ਹੈ, ਜਦੋਂਕਿ ਪੁਰਸ਼ਾਰਥ ਦੀ ਭਾਵਨਾ ਨਿਰਸਵਾਰਥ ਕਰਮ ਨਾਲ ਹੀ ਸਾਬਿਤ ਹੁੰਦੀ ਹੈ। ਉਸ ਤੋਂ ਵੀ ਜ਼ਿਆਦਾ ਜ਼ਰੂਰੀ ਗੱਲ ਇਹ ਹੈ ਕਿ ਜਿਸ ਦੇਹ ਨਾਲ ਮਨੁੱਖ ਸੰਸਾਰ ਵਿਚ ਭੋਗ ਕਰਦਾ ਹੈ, ਉਸ ਦੀ ਹੀ ਉਹ ਅਹਿਮੀਅਤ ਨਹੀਂ ਸਮਝਦਾ। ਉਹ ਭੋਗਾਂ ਨਾਲ ਉਸ ਦਾ ਨਾਸ਼ ਕਰਦਾ ਹੈ, ਜਿਸ ਨਾਲ ਆਖਰੀ ਸਮੇਂ 'ਚ ਉਸ ਨੂੰ ਰੋਗ ਲੱਗ ਜਾਂਦੇ ਹਨ ਜੋ ਉਸ ਦੇ ਮਰਨ ਤਕ ਨਾਲ ਰਹਿੰਦੇ ਹਨ।
ਯੋਗ ਸਾਧਨਾ, ਧਿਆਨ, ਭਜਨ ਤੇ ਬਾਗਾਂ ਦੀ ਸੈਰ ਕਰਨ ਨਾਲ ਦੇਹ ਤੇ ਮਨ ਨੂੰ ਜੋ ਨਵਾਂਪਨ ਮਿਲਦਾ ਹੈ, ਉਸ ਦੀ ਜਾਣਕਾਰੀ ਜ਼ਿਆਦਾਤਰ ਵਿਅਕਤੀਆਂ ਨੂੰ ਨਹੀਂ ਹੁੰਦੀ। ਸੱਚ ਗੱਲ ਤਾਂ ਇਹ ਹੈ ਕਿ ਸਰੀਰ ਤੇ ਮਨ ਨੂੰ ਸਿੱਧੇ ਤੌਰ 'ਤੇ ਪ੍ਰਸੰਨ ਕਰਨ ਵਾਲੇ ਵਿਸ਼ੇ ਮਨੁੱਖ ਨੂੰ ਆਕਰਸ਼ਿਤ ਕਰਦੇ ਹਨ ਅਤੇ ਉਹ ਇਨ੍ਹਾਂ ਵਿਚ ਸਰਗਰਮ ਹੋ ਕੇ ਜੀਵਨ ਭਰ ਪ੍ਰਸੰਨ ਰਹਿਣ ਦੀ ਵਿਅਰਥ ਕੋਸ਼ਿਸ਼ ਕਰਦਾ ਹੈ। ਉਹ ਆਪਣੀ ਇਸ ਸਰਗਰਮੀ ਨੂੰ ਪੁਰਸ਼ਾਰਥ ਸਮਝਦਾ ਹੈ, ਜਦੋਂਕਿ ਅਸਿੱਧੇ ਤੌਰ 'ਤੇ ਫਾਇਦਾ ਦੇਣ ਵਾਲੇ ਯੋਗ ਆਸਣ, ਧਿਆਨ, ਭਜਨ ਤੇ ਸਵੇਰੇ ਬਾਗਾਂ ਵਿਚ ਘੁੰਮਣਾ ਉਸ ਨੂੰ ਵਿਅਰਥ ਦੀ ਕਿਰਿਆ ਲਗਦੀ ਹੈ। ਸਿੱਧੀ ਗੱਲ ਕਹੀਏ ਤਾਂ ਇਸ ਅਸਿੱਧੇ ਫਾਇਦੇ ਲਈ ਬਿਨਾਂ ਸਵਾਰਥ ਦੀ ਭਾਵਨਾ ਦੇ ਇਨ੍ਹਾਂ ਕੰਮਾਂ ਵਿਚ ਲੱਗਣਾ ਹੀ ਪੁਰਸ਼ਾਰਥ ਕਿਹਾ ਜਾ ਸਕਦਾ ਹੈ।
ਪੁਰਸ਼ਾਰਥ ਕਰਨਾ ਮਨੁੱਖ ਦਾ ਧਰਮ ਹੈ ਅਤੇ ਇਸ ਦੇ ਲਈ ਜ਼ਰੂਰੀ ਹੈ ਕਿ ਸੱਚਾਈ ਦੇ ਰਸਤੇ 'ਤੇ ਚੱਲਿਆ ਜਾਵੇ। ਅੱਜਕਲ ਜਲਦੀ ਅਮੀਰ ਬਣਨ ਲਈ ਲੋਕ ਝੂਠ ਦਾ ਸਹਾਰਾ ਲੈ ਰਹੇ ਹਨ। ਉਨ੍ਹਾਂ ਨੂੰ ਕਾਮਯਾਬੀ ਮਿਲ ਜਾਂਦੀ ਹੈ ਪਰ ਉਨ੍ਹਾਂ ਨੂੰ ਇਸ ਦਾ ਮਾੜਾ ਨਤੀਜਾ ਵੀ ਭੁਗਤਣਾ ਪੈਂਦਾ ਹੈ। ਇਹੋ ਕਾਰਨ ਹੈ ਕਿ ਗਿਆਨੀ ਲੋਕ ਕਦੇ ਵੀ ਅਜਿਹੇ ਗਲਤ ਕੰਮ ਵਿਚ ਮਨ ਨਹੀਂ ਲਗਾਉਂਦੇ ਜਿਸ ਦਾ ਬਾਅਦ 'ਚ ਮਾੜਾ ਨਤੀਜਾ ਭੁਗਤਣਾ ਪਵੇ।
ਫਾਇਦੇਮੰਦ ਹੈ ਸੂਰਜ ਨਮਸਕਾਰ ਕਰਨਾ
NEXT STORY 
