ਇਕ ਦਿਨ ਇਕ ਔਰਤ ਆਪਣੇ ਘਰ ਦੇ ਬਾਹਰ ਆਈ ਅਤੇ ਉਸ ਨੇ 3 ਸੰਤਾਂ ਨੂੰ ਉਥੇ ਖੜ੍ਹੇ ਦੇਖਿਆ। ਉਹ ਉਨ੍ਹਾਂ ਨੂੰ ਜਾਣਦੀ ਨਹੀਂ ਸੀ। ਔਰਤ ਨੇ ਕਿਹਾ,''ਕਿਰਪਾ ਕਰ ਕੇ ਅੰਦਰ ਆਓ ਅਤੇ ਭੋਜਨ ਕਰੋ।'' ਸੰਤ ਬੋਲੇ,''ਕੀ ਤੇਰਾ ਪਤੀ ਘਰ ਵਿਚ ਹੀ ਹੈ?'' ਔਰਤ ਬੋਲੀ,''ਨਹੀਂ, ਉਹ ਅਜੇ ਬਾਹਰ ਗਏ ਹਨ।'' ਸੰਤ ਬੋਲੇ,''ਅਸੀਂ ਤਾਂ ਹੀ ਅੰਦਰ ਆਵਾਂਗੇ ਜਦੋਂ ਉਹ ਘਰ ਵਿਚ ਹੋਵੇ।'' ਸ਼ਾਮ ਨੂੰ ਔਰਤ ਦਾ ਪਤੀ ਘਰ ਆਇਆ ਅਤੇ ਔਰਤ ਨੇ ਉਸ ਨੂੰ ਇਹ ਸਭ ਦੱਸਿਆ।
ਔਰਤ ਦੇ ਪਤੀ ਨੇ ਕਿਹਾ,''ਜਾ ਅਤੇ ਸੰਤਾਂ ਨੂੰ ਕਹਿ ਕਿ ਮੈਂ ਘਰ ਆ ਗਿਆ ਹਾਂ। ਉਨ੍ਹਾਂ ਨੂੰ ਆਦਰ ਨਾਲ ਅੰਦਰ ਬੁਲਾ ਲਿਆ।''
ਔਰਤ ਬਾਹਰ ਗਈ ਅਤੇ ਉਨ੍ਹਾਂ ਨੂੰ ਅੰਦਰ ਆਉਣ ਲਈ ਕਿਹਾ। ਸੰਤ ਬੋਲੇ,''ਅਸੀਂ ਸਾਰੇ ਕਿਸੇ ਵੀ ਘਰ ਵਿਚ ਇਕੱਠੇ ਨਹੀਂ ਜਾਂਦੇ।'' ''ਪਰ ਕਿਉਂ?'' ਔਰਤ ਨੇ ਪੁੱਛਿਆ। ਉਨ੍ਹਾਂ ਵਿਚੋਂ ਇਕ ਸੰਤ ਨੇ ਕਿਹਾ,''ਮੇਰਾ ਨਾਂ ਧਨ ਹੈ।'' ਫਿਰ ਦੂਜੇ ਸੰਤਾਂ ਵੱਲ ਇਸ਼ਾਰਾ ਕਰ ਕੇ ਉਸ ਨੇ ਕਿਹਾ,''ਇਨ੍ਹਾਂ ਦੋਵਾਂ ਦੇ ਨਾਂ ਸਫਲਤਾ ਤੇ ਪ੍ਰੇਮ ਹਨ। ਸਾਡੇ ਵਿਚੋਂ ਇਕੋ ਅੰਦਰ ਆ ਸਕਦਾ ਹੈ। ਤੁਸੀਂ ਘਰ ਦੇ ਹੋਰਨਾਂ ਮੈਂਬਰਾਂ ਨੂੰ ਮਿਲ ਕੇ ਤੈਅ ਕਰ ਲਵੋ ਕਿ ਅੰਦਰ ਆਉਣ ਦਾ ਸੱਦਾ ਕਿਸ ਨੂੰ ਦੇਣਾ ਹੈ।'' ਔਰਤ ਨੇ ਅੰਦਰ ਜਾ ਕੇ ਆਪਣੇ ਪਤੀ ਨੂੰ ਇਹ ਸਭ ਦੱਸਿਆ। ਉਸ ਦਾ ਪਤੀ ਬਹੁਤ ਪ੍ਰਸੰਨ ਹੋਇਆ ਅਤੇ ਬੋਲਿਆ,''ਜੇ ਅਜਿਹਾ ਹੈ ਤਾਂ ਸਾਨੂੰ ਧਨ ਨੂੰ ਅੰਦਰ ਆਉਣ ਲਈ ਕਹਿਣਾ ਚਾਹੀਦਾ ਹੈ। ਸਾਡਾ ਘਰ ਖੁਸ਼ੀਆਂ ਨਾਲ ਭਰ ਜਾਵੇਗਾ।''
ਪਰ ਉਸ ਦੀ ਪਤਨੀ ਨੇ ਕਿਹਾ,''ਮੈਨੂੰ ਲਗਦਾ ਹੈ ਕਿ ਸਾਨੂੰ ਸਫਲਤਾ ਨੂੰ ਅੰਦਰ ਆਉਣ ਲਈ ਕਹਿਣਾ ਚਾਹੀਦਾ ਹੈ।'' ਉਨ੍ਹਾਂ ਦੀ ਬੇਟੀ ਦੂਜੇ ਕਮਰੇ ਵਿਚ ਇਹ ਸਭ ਸੁਣ ਰਹੀ ਸੀ। ਉਹ ਉਨ੍ਹਾਂ ਕੋਲ ਆਈ ਅਤੇ ਕਹਿਣ ਲੱਗੀ,''ਮੈਨੂੰ ਲਗਦਾ ਹੈ ਕਿ ਸਾਨੂੰ ਪ੍ਰੇਮ ਨੂੰ ਅੰਦਰ ਬੁਲਾਉਣਾ ਚਾਹੀਦਾ ਹੈ। ਪ੍ਰੇਮ ਨਾਲੋਂ ਵਧ ਕੇ ਕੁਝ ਵੀ ਨਹੀਂ।'' ''ਤੂੰ ਠੀਕ ਕਹਿੰਦੀ ਏਂ, ਸਾਨੂੰ ਪ੍ਰੇਮ ਨੂੰ ਹੀ ਬੁਲਾਉਣਾ ਚਾਹੀਦਾ ਹੈ,'' ਉਸ ਦੇ ਮਾਤਾ-ਪਿਤਾ ਨੇ ਕਿਹਾ। ਔਰਤ ਘਰ ਦੇ ਬਾਹਰ ਗਈ ਅਤੇ ਸੰਤਾਂ ਨੂੰ ਪੁੱਛਣ ਲੱਗੀ,''ਤੁਹਾਡੇ ਵਿਚੋਂ ਜਿਨ੍ਹਾਂ ਦਾ ਨਾਂ ਪ੍ਰੇਮ ਹੈ, ਉਹ ਕਿਰਪਾ ਕਰ ਕੇ ਘਰ ਵਿਚ ਦਾਖਲ ਹੋ ਕੇ ਭੋਜਨ ਗ੍ਰਹਿਣ ਕਰੇ।'' ਪ੍ਰੇਮ ਘਰ ਵੱਲ ਵਧਣ ਲੱਗੇ। ਬਾਕੀ 2 ਸੰਤ ਵੀ ਉਨ੍ਹਾਂ ਦੇ ਪਿੱਛੇ ਤੁਰਨ ਲੱਗੇ। ਔਰਤ ਨੇ ਹੈਰਾਨੀ ਨਾਲ ਉਨ੍ਹਾਂ ਦੋਵਾਂ ਨੂੰ ਪੁੱਛਿਆ,''ਮੈਂ ਤਾਂ ਸਿਰਫ ਪ੍ਰੇਮ ਨੂੰ ਹੀ ਅੰਦਰ ਆਉਣ ਲਈ ਕਿਹਾ ਸੀ। ਤੁਸੀਂ ਦੋਵੇਂ ਵੀ ਨਾਲ ਅੰਦਰ ਕਿਉਂ ਜਾ ਰਹੇ ਹੋ?''
ਉਨ੍ਹਾਂ ਵਿਚੋਂ ਇਕ ਨੇ ਕਿਹਾ,''ਜੇ ਤੁਸੀਂ ਧਨ ਤੇ ਸਫਲਤਾ ਵਿਚੋਂ ਕਿਸੇ ਇਕ ਨੂੰ ਸੱਦਾ ਦਿੱਤਾ ਹੁੰਦਾ ਤਾਂ ਸਿਰਫ ਉਹੋ ਅੰਦਰ ਜਾਂਦਾ। ਤੁਸੀਂ ਪ੍ਰੇਮ ਨੂੰ ਸੱਦਾ ਦਿੱਤਾ ਹੈ। ਪ੍ਰੇਮ ਕਦੇ ਇਕੱਲਾ ਨਹੀਂ ਜਾਂਦਾ। ਪ੍ਰੇਮ ਜਿਥੇ-ਜਿਥੇ ਜਾਂਦਾ ਹੈ, ਧਨ ਤੇ ਸਫਲਤਾ ਉਸ ਦੇ ਪਿੱਛੇ ਜਾਂਦੇ ਹਨ।''
ਸੰਤੁਸ਼ਟੀ ਦਾ ਪੁਰਸਕਾਰ
NEXT STORY 
