ਇਮਰਾਨ ਨੇ ਬੜੇ ਜੋਸ਼ ਨਾਲ ਇਕ ਕਾਰੋਬਾਰ ਸ਼ੁਰੂ ਕੀਤਾ ਪਰ 5-6 ਮਹੀਨਿਆਂ ਬਾਅਦ ਵੱਡੇ ਘਾਟੇ ਕਾਰਨ ਉਸ ਨੂੰ ਆਪਣਾ ਕਾਰੋਬਾਰ ਬੰਦ ਕਰਨਾ ਪਿਆ। ਇਸ ਕਾਰਨ ਉਹ ਬਹੁਤ ਉਦਾਸ ਰਹਿਣ ਲੱਗਾ ਅਤੇ ਕਾਫੀ ਸਮਾਂ ਬੀਤ ਜਾਣ ਤੋਂ ਬਾਅਦ ਵੀ ਉਸ ਨੇ ਕੋਈ ਹੋਰ ਕੰਮ ਸ਼ੁਰੂ ਨਹੀਂ ਕੀਤਾ।
ਇਮਰਾਨ ਦੀ ਇਸ ਪ੍ਰੇਸ਼ਾਨੀ ਦਾ ਪਤਾ ਪ੍ਰੋਫੈਸਰ ਕ੍ਰਿਸ਼ਨਨ ਨੂੰ ਲੱਗਾ ਜੋ ਪਹਿਲਾਂ ਕਦੇ ਉਸ ਨੂੰ ਪੜ੍ਹਾ ਚੁੱਕੇ ਸਨ। ਉਨ੍ਹਾਂ ਇਕ ਦਿਨ ਉਸ ਨੂੰ ਆਪਣੇ ਘਰ ਸੱਦਿਆ ਅਤੇ ਪੁੱਛਿਆ,''ਕੀ ਗੱਲ ਹੈ, ਅੱਜਕਲ ਤੂੰ ਬੜਾ ਪ੍ਰੇਸ਼ਾਨ ਰਹਿੰਦਾ ਏਂ?''
''ਜੀ ਕੁਝ ਨਹੀਂ, ਬਸ ਮੈਂ ਇਕ ਕੰਮ ਸ਼ੁਰੂ ਕੀਤਾ ਸੀ ਪਰ ਮੈਂ ਜਿਸ ਤਰ੍ਹਾਂ ਚਾਹੁੰਦਾ ਸੀ, ਉਸ ਤਰ੍ਹਾਂ ਦਾ ਨਤੀਜਾ ਨਹੀਂ ਆਇਆ ਅਤੇ ਮੈਨੂੰ ਕੰਮ ਬੰਦ ਕਰਨਾ ਪਿਆ। ਇਸ ਲਈ ਥੋੜ੍ਹਾ ਪ੍ਰੇਸ਼ਾਨ ਹਾਂ'' ਇਮਰਾਨ ਨੇ ਕਿਹਾ।
ਪ੍ਰੋਫੈਸਰ ਬੋਲੇ,''ਇਹ ਤਾਂ ਹੁੰਦਾ ਹੀ ਰਹਿੰਦਾ ਹੈ, ਇਸ ਵਿਚ ਨਿਰਾਸ਼ ਹੋਣ ਦੀ ਕੀ ਲੋੜ ਹੈ?''
ਇਮਰਾਨ ਖਿਝ ਕੇ ਬੋਲਿਆ,''ਪਰ ਮੈਂ ਇੰਨੀ ਜ਼ਿਆਦਾ ਮਿਹਨਤ ਕੀਤੀ ਸੀ, ਫਿਰ ਮੈਂ ਅਸਫਲ ਕਿਵੇਂ ਹੋ ਸਕਦਾ ਹਾਂ?''
ਪ੍ਰੋਫੈਸਰ ਕੁਝ ਦੇਰ ਸ਼ਾਂਤ ਰਹੇ, ਫਿਰ ਬੋਲੇ,''ਇਮਰਾਨ, ਮੇਰੇ ਨਾਲ ਆ। ਟਮਾਟਰਾਂ ਦੇ ਇਸ ਮੁਰਝਾਏ ਹੋਏ ਬੂਟੇ ਨੂੰ ਦੇਖ।''
ਇਮਰਾਨ ਬੋਲਿਆ,''ਇਹ ਤਾਂ ਬੇਕਾਰ ਹੋ ਚੁੱਕਾ ਹੈ, ਇਸ ਨੂੰ ਦੇਖਣ ਦਾ ਕੀ ਫਾਇਦਾ?''
ਪ੍ਰੋਫੈਸਰ ਬੋਲੇ,''ਮੈਂ ਜਦੋਂ ਇਸ ਨੂੰ ਬੀਜਿਆ ਸੀ ਤਾਂ ਹਰੇਕ ਉਹ ਚੀਜ਼ ਦਿੱਤੀ ਜੋ ਇਸ ਦੇ ਲਈ ਸਹੀ ਹੋਵੇ। ਮੈਂ ਇਸ ਨੂੰ ਪਾਣੀ ਦਿੱਤਾ, ਖਾਦ ਪਾਈ, ਕੀਟਨਾਸ਼ਕਾਂ ਦਾ ਛਿੜਕਾਅ ਕੀਤਾ ਪਰ ਫਿਰ ਵੀ ਇਹ ਮੁਰਝਾ ਗਿਆ।''
ਇਮਰਾਨ ਬੋਲਿਆ,''ਤਾਂ ਕੀ?''
ਪ੍ਰੋਫੈਸਰ ਨੇ ਸਮਝਾਇਆ,''ਭਾਵੇਂ ਤੂੰ ਕਿੰਨੀ ਵੀ ਕੋਸ਼ਿਸ਼ ਕਰੇਂ ਪਰ ਅਖੀਰ ਵਿਚ ਜੋ ਹੁੰਦਾ ਹੈ, ਉਸ ਨੂੰ ਤੈਅ ਨਹੀਂ ਕਰ ਸਕਦਾ। ਬਸ ਉਨ੍ਹਾਂ ਹੀ ਚੀਜ਼ਾਂ 'ਤੇ ਕੰਟਰੋਲ ਕਰ ਸਕਦਾ ਏਂ ਜੋ ਤੇਰੇ ਹੱਥਾਂ ਵਿਚ ਹਨ। ਬਾਕੀ ਚੀਜ਼ਾਂ ਤੈਨੂੰ ਰੱਬ ਦੇ ਭਰੋਸੇ ਛੱਡ ਦੇਣੀਆਂ ਚਾਹੀਦੀਆਂ ਹਨ।''
ਇਮਰਾਨ ਬੋਲਿਆ,''ਤਾਂ ਫਿਰ ਜੇ ਕਾਮਯਾਬੀ ਦੀ ਗਾਰੰਟੀ ਨਹੀਂ ਹੈ ਤਾਂ ਕੋਸ਼ਿਸ਼ ਕਰਨ ਦਾ ਕੀ ਫਾਇਦਾ?''
ਪ੍ਰੋਫੈਸਰ ਬੋਲੇ,''ਬਹੁਤ ਸਾਰੇ ਲੋਕ ਬਸ ਇਸੇ ਬਹਾਨੇ ਦਾ ਸਹਾਰਾ ਲੈ ਕੇ ਆਪਣੀ ਜ਼ਿੰਦਗੀ ਵਿਚ ਕੁਝ ਵੱਡਾ ਕਰਨ ਦੀ ਕੋਸ਼ਿਸ਼ ਨਹੀਂ ਕਰਦੇ।''
ਇਮਰਾਨ ਬਾਹਰ ਜਾਣ ਲੱਗਾ ਤਾਂ ਪ੍ਰੋਫੈਸਰ ਬੋਲੇ,''ਰੁਕ, ਜਾਣ ਤੋਂ ਪਹਿਲਾਂ ਜ਼ਰਾ ਇਸ ਦਰਵਾਜ਼ੇ ਨੂੰ ਖੋਲ ਕੇ ਤਾਂ ਦੇਖ।''
ਪ੍ਰੋਫੈਸਰ ਨੇ ਇਕ ਦਰਵਾਜ਼ੇ ਵੱਲ ਇਸ਼ਾਰਾ ਕੀਤਾ। ਇਮਰਾਨ ਨੇ ਦਰਵਾਜ਼ਾ ਖੋਲ੍ਹਿਆ। ਸਾਹਮਣੇ ਵੱਡੇ-ਵੱਡੇ ਲਾਲ ਟਮਾਟਰਾਂ ਦਾ ਢੇਰ ਪਿਆ ਹੋਇਆ ਸੀ।
''ਇਹ ਕਿਥੋਂ ਆ ਗਏ?'' ਇਮਰਾਨ ਨੇ ਹੈਰਾਨੀ ਨਾਲ ਪੁੱਛਿਆ।
ਪ੍ਰੋਫੈਸਰ ਕਹਿਣ ਲੱਗੇ,''ਬੇਸ਼ੱਕ ਟਮਾਟਰਾਂ ਦੇ ਸਾਰੇ ਬੂਟੇ ਨਹੀਂ ਮੁਰਝਾਏ ਸਨ। ਜੇ ਤੂੰ ਲਗਾਤਾਰ ਸਹੀ ਚੀਜ਼ਾਂ ਕਰਦਾ ਰਹੇਂ ਤਾਂ ਸਫਲਤਾ ਹਾਸਲ ਕਰਨ ਦਾ ਤੇਰਾ ਮੌਕਾ ਬਹੁਤ ਵਧ ਜਾਂਦਾ ਹੈ।''
ਇਮਰਾਨ ਹੁਣ ਸਫਲਤਾ ਦਾ ਪਾਠ ਪੜ੍ਹ ਚੁੱਕਾ ਸੀ। ਉਹ ਸਮਝ ਗਿਆ ਕਿ ਉਸ ਨੇ ਹੁਣ ਕੀ ਕਰਨਾ ਹੈ। ਉਹ ਨਵੇਂ ਜੋਸ਼ ਨਾਲ ਬਾਹਰ ਨਿਕਲ ਪਿਆ।
ਫੈਸਲਾ ਲੈਣ ਤੋਂ ਪਹਿਲਾਂ ਸਾਨੂੰ ਜ਼ਰੂਰ ਸੋਚਣਾ ਚਾਹੀਦਾ ਹੈ
NEXT STORY 
