ਫਰੀਦਕੋਟ ਤੋਂ ਮੁੜ ਸਾਧੂ ਸਿੰਘ ਲੜਨਗੇ 'ਆਪ' ਲਈ ਚੋਣ, ਫਸਵਾਂ ਹੋਵੇਗਾ ਮੁਕਾਬਲਾ (ਵੀਡੀਓ)

Edited By Gurminder Singh,
Updated: 31 Oct, 2018 12:38 PM

ਫਰੀਦਕੋਟ : ਆਮ ਆਦਮੀ ਪਾਰਟੀ ਵਲੋਂ ਪਹਿਲ ਕਰਦੇ ਹੋਏ 2019 ਦੀਆਂ ਲੋਕ ਸਭਾ ਚੋਣਾਂ ਲਈ ਫਰੀਦਕੋਟ ਤੋਂ ਪਾਰਟੀ ਦੇ ਸਥਾਨਕ ਮੈਂਬਰ ਪਾਰਲੀਮੈਂਟ ਪ੍ਰੋ. ਸਾਧੂ ਸਿੰਘ ਨੂੰ ਚੋਣ ਮੈਦਾਨ ਵਿਚ ਉਤਾਰਨ ਦਾ ਐਲਾਨ ਕੀਤਾ ਹੈ। ਇਸ ਸੀਟ 'ਤੇ ਪਿਛਲੀਆਂ ਚੋਣਾਂ ਦੌਰਾਨ ਆਮ ਆਦਮੀ ਪਾਰਟੀ ਦੇ ਉਮੀਦਵਾਰ ਪ੍ਰੋ. ਸਾਧੂ ਸਿੰਘ ਨੇ ਅਕਾਲੀ ਦਲ ਦੀ ਪਰਮਜੀਤ ਕੌਰ ਗੁਲਸ਼ਨ ਨੂੰ 1,72,516 ਵੋਟਾਂ ਦੇ ਫਰਕ ਨਾਲ ਹਰਾਇਆ ਸੀ। 'ਆਪ' ਉਮੀਦਵਾਰ ਸਾਧੂ ਸਿੰਘ ਨੂੰ 4,50,751 ਵੋਟਾਂ ਹਾਸਲ ਹੋਈਆਂ ਸਨ ਜਦਿਕ ਅਕਾਲੀ ਦਲ ਦੀ ਉਮੀਦਵਾਰ ਪਰਮਜੀਤ ਕੌਰ ਗੁਲਸ਼ਨ ਨੂੰ 2,78,235 ਵੋਟਾਂ ਹਾਸਲ ਹੋਈਆਂ। ਕਾਂਗਰਸ ਇਸ ਚੋਣ ਵਿਚ ਤੀਜੇ ਨੰਬਰ 'ਤੇ ਰਹੀ ਸੀ ਤੇ ਉਸਨੂੰ 2,51,222 ਵੋਟਾਂ ਹਾਸਲ ਹੋਈਆਂ ਸਨ।

ਇਹ ਪਹਿਲਾਂ ਮੌਕਾ ਸੀ ਜਦੋਂ ਕਿਸੇ ਨਵੀਂ ਪਾਰਟੀ ਦੇ ਉਮੀਦਵਾਰ ਨੂੰ ਫਰੀਦਕੋਟ ਦੇ ਵੋਟਰਾਂ ਨੇ ਚੁਣ ਕੇ ਸੰਸਦ ਵਿਚ ਭੇਜਿਆ ਹੋਵੇ। ਇਹ ਸੀਟ ਅਕਾਲੀ ਦਲ ਦੇ ਪ੍ਰਭਾਵ ਵਾਲੀ ਮੰਨੀ ਜਾ ਰਹੀ ਹੈ ਤੇ 1977 ਤੋਂ ਬਾਅਦ ਇਸ ਸੀਟ 'ਤੇ ਹੋਈਆਂ 11 ਚੋਣਾਂ ਵਿਚ ਅਕਾਲੀ ਦਲ ਦਾ ਉਮੀਦਵਾਰ 6 ਵਾਰ ਚੋਣ ਜਿੱਤਿਆ ਹੈ, ਜਦੋਂਕਿ ਇਕ ਵਾਰ ਇਹ ਸੀਟ ਅਕਾਲੀ ਦਲ ਅੰਮ੍ਰਿਤਸਰ ਨੇ ਜਿੱਤੀ ਸੀ। ਕਾਂਗਰਸ ਇਸ ਸੀਟ 'ਤੇ ਸਿਰਫ 3 ਵਾਰ ਚੋਣ ਜਿੱਤ ਚੁੱਕੀ ਹੈ। ਇਥੇ ਖਾਸ ਗੱਲ ਇਹ ਵੀ ਹੈ ਕਿ 2004 ਦੀਆਂ ਚੋਣਾਂ ਵਿਚ ਸੁਖਬੀਰ ਖੁਦ ਹੀ ਇਸ ਸੀਟ ਤੋਂ ਚੋਣ ਲੜ ਕੇ ਸੰਸਦ ਵਿਚ ਪਹੁੰਚੇ ਸਨ ਤੇ 2009 ਵਿਚ ਅਕਾਲੀ ਦਲ ਦੀ ਪਰਮਜੀਤ ਕੌਰ ਗੁਲਸ਼ਨ ਇਸ ਸੀਟ ਤੋਂ ਚੋਣ ਜਿੱਤੀ ਸੀ।

'ਆਪ' ਦੀ ਸਥਿਤੀ ਕਮਜ਼ੋਰ, ਕਾਂਗਰਸ ਤੇ ਅਕਾਲੀ ਮਜ਼ਬੂਤ ਹੋਏ
2014 ਦੀਆਂ ਚੋਣਾਂ ਵਿਚ ਉਮੀਦ ਤੋਂ ਉਲਟ ਨਤੀਜੇ ਦੇਣ ਵਾਲੇ ਇਸ ਸੀਟ ਦੇ ਵੋਟਰਾਂ ਨੇ 2017 ਦੀਆਂ ਵਿਧਾਨ ਸਭਾ ਚੋਣਾਂ ਵਿਚ ਅਚਾਨਕ ਆਪਣਾ ਰੁਖ ਬਦਲ ਲਿਆ ਅਤੇ 2017 ਦੀਆਂ ਵਿਧਾਨ ਸਭਾ ਚੋਣਾਂ ਦੌਰਾਨ ਆਮ ਆਦਮੀ ਪਾਰਟੀ ਦੀ ਸਥਿਤੀ ਕਾਫੀ ਕਮਜ਼ੋਰ ਹੋ ਗਈ ਹੈ। 2014 ਦੀਆਂ ਚੋਣਾਂ ਵਿਚ 'ਆਪ' ਨੇ ਇਸ ਸੀਟ ਦੇ ਤਹਿਤ ਆਉਂਦੀ ਨਿਹਾਲ ਸਿੰਘ ਵਾਲਾ, ਬਾਘਾਪੁਰਾਣਾ, ਮੋਗਾ, ਧਰਮਕੋਟ, ਫਰੀਦਕੋਟ, ਕੋਟਕਪੂਰਾ ਤੇ ਜੈਤੋ ਵਿਧਾਨ ਸਭਾ ਸੀਟਾਂ 'ਤੇ ਲੀਡ ਬਣਾਈ ਸੀ ਜਦੋਂਕਿ 2017 ਦੀਆਂ ਵਿਧਾਨ ਸਭਾ ਚੋਣਾਂ ਵਿਚ ਇਹ ਲੀਡ ਨਿਹਾਲ ਸਿੰਘ ਵਾਲਾ, ਕੋਟਕਪੂਰਾ ਤੇ ਜੈਤੋ ਤੱਕ ਹੀ ਸਿਮਟ ਕੇ ਰਹਿ ਗਈ, ਜਦੋਂਕਿ ਕਾਂਗਰਸ ਨੇ ਬਾਘਾਪੁਰਾਣਾ, ਮੋਗਾ, ਧਰਮਕੋਟ ਤੇ ਫਰੀਦਕੋਟ ਸੀਟਾਂ ਦੇ ਨਾਲ ਰਾਮਪੁਰਾ ਫੂਲ ਤੇ ਗਿੱਦੜਬਾਹਾ ਸੀਟਾਂ 'ਤੇ ਲੀਡ ਬਣਾ ਲਈ। ਇਸ ਦੌਰਾਨ ਆਮ ਆਦਮੀ ਪਾਰਟੀ ਦੀ ਸਥਿਤੀ ਵੋਟਾਂ ਦੇ ਲਿਹਾਜ਼ ਤੋਂ ਵੀ ਕਮਜ਼ੋਰ ਹੋਈ ਹੈ। 'ਆਪ' ਨੂੰ 2017 ਦੀਆਂ ਚੋਣਾਂ ਵਿਚ ਇਸ ਸੀਟ ਦੇ ਤਹਿਤ ਆਉਂਦੀਆਂ ਵਿਧਾਨ ਸਭਾ ਸੀਟਾਂ 'ਤੇ 3,84,078 ਵੋਟਾਂ ਹਾਸਲ ਹੋਈਆਂ ਜੋ ਕਿ 2017 ਵਿਚ ਹਾਸਲ ਹੋਈਆਂ 4,50,751 ਵੋਟਾਂ ਦੇ ਮੁਕਾਬਲੇ 66673 ਵੋਟਾਂ ਘੱਟ ਹਨ, ਜਦੋਂਕਿ ਇਸ ਦੌਰਾਨ ਕਾਂਗਰਸ ਦੀਆਂ ਵੋਟਾਂ ਵਿਚ ਜ਼ਬਰਦਸਤ ਵਾਧਾ ਹੋਇਆ ਹੈ। ਕਾਂਗਰਸ ਨੂੰ ਵਿਧਾਨ ਸਭਾ ਚੋਣਾਂ ਦੌਰਾਨ 4,46,474 ਵੋਟਾਂ ਹਾਸਲ ਹੋਈਆਂ ਜੋ ਕਿ 2014 ਵਿਚ ਹਾਸਲ ਹੋਈਆਂ 251222 ਵੋਟਾਂ ਦੇ ਮੁਕਾਬਲੇ 195252 ਵੋਟਾਂ ਜ਼ਿਆਦਾ ਹਨ। ਇਸ ਦੌਰਾਨ ਅਕਾਲੀ ਦਲ ਨੂੰ ਵੀ ਇਸ ਸੀਟ 'ਤੇ 76259 ਵੋਟਾਂ ਦਾ ਫਾਇਦਾ ਹੋਇਆ ਹੈ। ਅਕਾਲੀ ਦਲ ਨੂੰ 2014 ਵਿਚ ਇਸ ਸੀਟ 'ਤੇ 2,78,235 ਵੋਟਾਂ ਹਾਸਲ ਹੋਈਆਂ ਸਨ ਜੋ ਕਿ 2017 ਵਿਚ ਵੱਧ ਕੇ 3,54,494 ਵੋਟਾਂ ਹੋ ਗਈਆਂ ਹਨ। ਭਾਵੇਂ ਅਕਾਲੀ ਦਲ ਨੂੰ ਇਕ ਵੀ ਵਿਧਾਨ ਸਭਾ ਸੀਟ 'ਤੇ ਲੀਡ ਹਾਸਲ ਨਹੀਂ ਹੋ ਸਕੀ। ਫਿਰ ਵੀ ਮੰਨਿਆ ਜਾ ਰਿਹਾ ਹੈ ਕਿ ਅਗਲੀਆਂ ਚੋਣਾਂ ਤੱਕ ਆਮ ਆਦਮੀ ਪਾਰਟੀ ਦੀ ਸਥਿਤੀ ਕਮਜ਼ੋਰ ਹੋਣ ਕਾਰਨ ਸਿੱਧਾ ਮੁਕਾਬਲਾ ਅਕਾਲੀ ਦਲ ਤੇ ਕਾਂਗਰਸ ਦਰਮਿਆਨ ਹੋ ਸਕਦਾ ਹੈ।

ਫਰੀਦਕੋਟ	'ਆਪ' ਦੀਆਂ ਵੋਟਾਂ	ਕਾਂਗਰਸ ਦੀਆਂ ਵੋਟਾਂ	ਅਕਾਲੀ ਦਲ ਦੀਆਂ ਵੋਟਾਂ
	2014 2017	2014 2017	2014 2017
ਨਿਹਾਲ ਸਿੰਘ ਵਾਲਾ	17752 39739	24661 34865	75173 67313
ਬਾਘਾਪੁਰਾਣਾ	27747 48668	29075 41283	60833 41418
ਮੋਗਾ	24384 52357	22758 36583	72558 50593
ਧਰਮਕੋਟ	25186 63238	33892 41020	51891 34615
ਗਿੱਦੜਬਾਹਾ	51308 63500	48372 47288	14072 25334
ਫਰੀਦਕੋਟ	21561 51026	24021 32612	53168 39367
ਕੋਟਕਪੂਰਾ	27047 37326	26195 33895	47247 47401
ਜੈਤੋ	24017 35351	29110 33064	45531 45344
ਰਾਮਪੁਰਾ ਫੂਲ	39168 55269	39872 44884	30159 32693