ਜਲੰਧਰ (ਖੁਰਾਣਾ)— ਕੁਝ ਸਾਲ ਪਹਿਲਾਂ ਤੱਕ ਜਲੰਧਰ ਨੂੰ ਪੰਜਾਬ ਦਾ ਸਭ ਤੋਂ ਖੂਬਸੂਰਤ ਸ਼ਹਿਰ ਮੰਨਿਆ ਜਾਂਦਾ ਸੀ ਅਤੇ ਸਾਬਕਾ ਪ੍ਰਧਾਨ ਮੰਤਰੀ ਡਾ. ਮਨਮੋਹਨ ਸਿੰਘ ਨੇ ਵੀ ਆਪਣੇ ਭਾਸ਼ਣ 'ਚ ਮੰਨਿਆ ਸੀ ਕਿ ਜਲੰਧਰ ਪੰਜਾਬ ਦਾ ਸਭ ਤੋਂ ਸਾਫ-ਸੁਥਰਾ ਅਤੇ ਖੂਬਸੂਰਤ ਸ਼ਹਿਰ ਹੈ। ਉਨ੍ਹਾਂ ਦੇ ਇਸ ਕਥਨ ਤੋਂ ਬਾਅਦ ਜਲੰਧਰ ਨੂੰ ਸ਼ਾਇਦ ਕਿਸੇ ਦੀ ਨਜ਼ਰ ਹੀ ਲੱਗ ਗਈ ਅਤੇ ਸਫਾਈ ਦੇ ਮਾਮਲੇ 'ਚ ਇਹ ਸ਼ਹਿਰ ਲਗਾਤਾਰ ਪਛੜਦਾ ਚਲਾ ਗਿਆ। ਇਸ ਵਾਰ ਕੇਂਦਰ ਸਰਕਾਰ ਦੇ ਸ਼ਹਿਰੀ ਵਿਕਾਸ ਮੰਤਰਾਲਾ ਨੇ ਦੇਸ਼ ਦੇ ਸਾਰੇ ਸ਼ਹਿਰਾਂ 'ਚ ਜੋ ਸਵੱਛਤਾ ਸਰਵੇਖਣ ਕਰਵਾਇਆ ਸੀ, ਉਸ ਦੇ ਨਤੀਜੇ ਬੀਤੇ ਦਿਨ ਐਲਾਨ ਹੋਏ, ਜਿਸ 'ਚ ਜਲੰਧਰ ਸ਼ਹਿਰ ਨੂੰ 166ਵੀਂ ਰੈਕਿੰਗ ਮਿਲੀ। ਪੰਜਾਬ ਦੀ ਗੱਲ ਕਰੀਏ ਤਾਂ ਇਸ ਦਾ ਬਠਿੰਡਾ ਸ਼ਹਿਰ ਸੂਬੇ ਦੇ ਸ਼ਹਿਰਾਂ ਦੀ ਸੂਚੀ 'ਚ ਟਾਪ 'ਤੇ ਹੈ। ਸਫਾਈ ਦੇ ਮਾਮਲੇ 'ਚ ਜਲੰਧਰ ਨਾ ਸਿਰਫ ਬਠਿੰਡਾ, ਸਗੋਂ ਪਟਿਆਲਾ, ਮੁਕਤਸਰ, ਮੋਹਾਲੀ ਅਤੇ ਲੁਧਿਆਣਾ ਨਾਲੋਂ ਵੀ ਪਿੱਛੇ ਹੈ।
ਜ਼ਿਕਰਯੋਗ ਹੈ ਕਿ ਜਲੰਧਰ ਸ਼ਹਿਰ ਦੀ ਆਬਾਦੀ ਅੱਜ ਭਾਵੇਂ 12 ਲੱਖ ਤੋਂ ਵੱਧ ਹੋ ਚੁੱਕੀ ਹੈ ਪਰ ਸ਼ਹਿਰ 'ਚੋਂ ਹਰ ਰੋਜ਼ ਨਿਕਲਣ ਵਾਲੇ 500 ਟਨ ਤੋਂ ਵੱਧ ਕੂੜੇ ਨੂੰ ਟਿਕਾਣੇ ਲਗਾਉਣ ਦਾ ਕੋਈ ਇੰਤਜ਼ਾਮ ਨਿਗਮ ਕੋਲ ਨਹੀਂ ਹੈ। ਅੱਜ ਤੋਂ 20 ਸਾਲ ਪਹਿਲਾਂ ਵਰਿਆਣਾ ਪਿੰਡ 'ਚ ਕੂੜੇ ਤੋਂ ਖਾਦ ਬਣਾਉਣ ਦਾ ਕਾਰਖਾਨਾ ਲੱਗਾ ਪਰ ਉਹ ਵੀ ਸਫਲ ਨਹੀਂ ਹੋਇਆ, ਉਸ ਤੋਂ ਬਾਅਦ ਜਿੰਦਲ ਕੰਪਨੀ ਨੇ ਕੂੜੇ ਤੋਂ ਬਿਜਲੀ ਬਣਾਉਣ ਦਾ ਪਲਾਂਟ ਲਗਾਉਣ ਦਾ ਟੈਂਡਰ ਲਾਇਆ, ਕਾਫੀ ਸਮੇਂ ਤੱਕ ਨਿਗਮ ਦਾ ਕੂੜਾ ਚੁੱਕਿਆ ਵੀ ਗਿਆ ਪਰ ਪਲਾਂਟ ਲਗਾਉਣ ਨੂੰ ਲੈ ਕੇ ਸਿਆਸੀ ਵਿਰੋਧ ਕਾਰਨ ਜਿੰਦਲ ਕੰਪਨੀ ਨੂੰ ਕੰਮ ਛੱਡ ਕੇ ਜਾਣਾ ਪਿਆ। ਅੱਜ ਜਲੰਧਰ 'ਚ ਇਕ ਕਿਲੋ ਕੂੜਾ ਨਿਗਮ ਕੋਲੋਂ ਪ੍ਰੋਸੈੱਸ ਨਹੀਂ ਹੋ ਰਿਹਾ ਅਤੇ ਸਾਰਾ ਕੂੜਾ ਵਰਿਆਣਾ ਡੰਪ 'ਤੇ ਜਾ ਰਿਹਾ ਹੈ, ਜਿੱਥੇ ਇਸ ਸਮੇਂ 10 ਲੱਖ ਟਨ ਕੂੜੇ ਦੇ ਪਹਾੜ ਖੜ੍ਹੇ ਹੋ ਚੁੱਕੇ ਹਨ। ਹਰ ਰੋਜ਼ ਨਿਕਲਣ ਵਾਲੇ ਕੂੜੇ ਨੂੰ ਲੈ ਕੇ ਨਿਗਮ ਵਾਰ-ਵਾਰ ਪਲਾਨਿੰਗ ਬਣਾਉਂਦਾ ਰਹਿੰਦਾ ਹੈ ਪਰ ਨਿਗਮ ਦੀ ਕੋਈ ਵੀ ਕੋਸ਼ਿਸ਼ ਅਜੇ ਤੱਕ ਸਿਰੇ ਨਹੀਂ ਚੜ੍ਹੀ, ਜਿਸ ਕਾਰਨ ਹਰ ਵਾਰ ਕੌਮੀ ਪੱਧਰ 'ਤੇ ਹੋਣ ਵਾਲੇ ਸਵੱਛਤਾ ਸਰਵੇਖਣ ਦੀ ਰੈਂਕਿੰਗ 'ਚ ਪਛੜ ਜਾਂਦਾ ਹੈ।
ਸਵੱਛਤਾ ਸਰਵੇਖਣ 2019 ਦੇ ਮੁੱਖ ਅੰਸ਼
ਵਿਸ਼ਵ ਦਾ ਸਭ ਤੋਂ ਵੱਡਾ ਸਵੱਛਤਾ ਸਰਵੇਖਣ
4237 ਸ਼ਹਿਰ ਕਵਰ ਹੋਏ
ਪੂਰੀ ਤਰ੍ਹਾਂ ਡਿਜੀਟਲ ਅਤੇ ਪੇਪਰਲੈੱਸ ਸਰਵੇ
ਸ਼ਹਿਰਾਂ ਵਲੋਂ 4.5 ਲੱਖ ਦਸਤਾਵੇਜ਼ ਅਪਲੋਡ ਕੀਤੇ ਗਏ
ਵੱਖ-ਵੱਖ ਖੇਤਰ ਤੋਂ 41 ਲੱਖ ਤਸਵੀਰਾਂ ਖਿੱਚੀਆਂ ਗਈਆਂ
64 ਲੱਖ ਨਾਗਰਿਕਾਂ ਨੇ ਸਿਟੀਜ਼ਨ ਫੀਡਬੈਕ ਦਿੱਤੀ
ਸੋਸ਼ਲ ਮੀਡੀਆ 'ਚ 4 ਕਰੋੜ ਲੋਕਾਂ ਤੱਕ ਪਹੁੰਚ
2018 ਦੇ ਮੁਕਾਬਲੇ ਸੁਧਰੀ ਰੈਂਕਿੰਗ
ਜਲੰਧਰ ਨਿਗਮ ਪ੍ਰਸ਼ਾਸਨ ਸਿਰਫ ਇਸ ਗੱਲ 'ਤੇ ਤਸੱਲੀ ਕਰ ਸਕਦਾ ਹੈ ਕਿ 2018 ਦੇ ਮੁਕਾਬਲੇ ਇਸਦੀ ਸਵੱਛਤਾ ਰੈਂਕਿੰਗ 'ਚ ਵੀ ਸੁਧਾਰ ਹੋਇਆ ਹੈ। ਪਿਛਲੇ ਸਾਲ ਜਲੰਧਰ ਨਗਰ ਨਿਗਮ ਨੂੰ 251ਵੀਂ ਰੈਂਕਿੰਗ ਮਿਲੀ ਸੀ। ਪਿਛਲੇ ਸਾਲ ਵੀ ਬਠਿੰਡਾ ਨੇ ਪੰਜਾਬ ਦੇ ਸ਼ਹਿਰਾਂ 'ਚ ਟਾਪ ਕੀਤਾ ਸੀ ਅਤੇ ਇਸ ਵਾਰ ਵੀ ਬਾਜ਼ੀ ਇਸੇ ਸ਼ਹਿਰ ਨੇ ਮਾਰੀ।
ਟ੍ਰੀਟਮੈਂਟ ਪਲਾਂਟ ਨਾ ਹੋਣ ਕਾਰਨ ਕੱਟੇ ਗਏ ਨੰਬਰ
ਜਨਵਰੀ 2019 'ਚ ਹੋਏ ਸਵੱਛਤਾ ਸਰਵੇਖਣ 'ਚ ਵਧੀਆ ਰੈਂਕਿੰਗ ਹਾਸਲ ਕਰਨ ਲਈ ਜਲੰਧਰ ਨਿਗਮ ਦੇ ਸੈਨੀਟੇਸ਼ਨ ਵਿਭਾਗ ਨਾਲ ਜੁੜੇ ਅਧਿਕਾਰੀਆਂ ਨੇ ਕਾਫੀ ਕੋਸ਼ਿਸ਼ਾਂ ਕੀਤੀਆਂ ਅਤੇ ਜੋੜ ਤੋੜ ਲਾ ਕੇ ਸ਼ਹਿਰ ਨੂੰ ਓ. ਡੀ. ਐੱਫ. ਵੀ ਐਲਾਨ ਕਰਵਾ ਲਿਆ ਪਰ ਸਭ ਤੋਂ ਵੱਧ ਨੰਬਰ ਸ਼ਹਿਰ 'ਚ ਸਾਲਿਡ ਵੇਸਟ ਟ੍ਰੀਟਮੈਂਟ ਪਲਾਂਟ ਨਾ ਹੋਣ ਕਾਰਨ ਕੱਟੇ ਗਏ। ਸੈਗਰੀਗੇਸ਼ਨ ਭਾਵ ਗਿੱਲੇ ਕੂੜੇ ਅਤੇ ਸੁੱਕੇ ਕੂੜੇ ਨੂੰ ਵੱਖਰੋ-ਵੱਖਰਾ ਕਰਨ ਲਈ ਨਿਗਮ ਨੇ ਭਾਵੇਂ ਕਈ ਮੁਹਿੰਮਾਂ ਚਲਾਈਆਂ ਪਰ ਇਹ ਸਾਰੀਆਂ ਖਾਨਾਪੂਰਤੀ ਸਾਬਿਤ ਹੋਈਆਂ। ਸਿਟੀਜ਼ਨ ਫੀਡਬੈਕ ਦਿਖਾਉਣ ਲਈ ਨਿਗਮ ਨੇ ਲੋਕਾਂ ਕੋਲੋਂ ਸਵੱਛਤਾ ਐਪ ਡਾਊਨਲੋਡ ਕਰਵਾਏ ਪਰ ਉਹ ਮੁਹਿੰਮ ਵੀ ਖਾਨਾਪੂਰਤੀ ਬਣ ਗਈ ਕਿਉਂਕਿ ਜ਼ਿਆਦਾਤਰ ਲੋਕਾਂ ਨੇ ਉਸ ਐਪ ਦਾ ਇਸਤੇਮਾਲ ਹੀ ਨਹੀਂ ਕੀਤਾ, ਜਿਸ ਨੇ ਐਪ 'ਤੇ ਸ਼ਿਕਾਇਤ ਵੀ ਕੀਤੀ। ਉਸਨੂੰ ਵੀ ਖਾਸ ਰਿਸਪਾਂਸ ਨਹੀਂ ਮਿਲਿਆ। ਮਸ਼ੀਨਰੀ ਦੀ ਕਮੀ ਕਾਰਨ ਵੀ ਨਿਗਮ ਮੁੱਖ ਸੜਕਾਂ 'ਤੇ ਖੁੱਲ੍ਹੇ ਵਿਚ ਪਏ ਡੰਪ ਸਥਾਨਾਂ ਦਾ ਹੱਲ ਨਹੀਂ ਕੱਢ ਸਕਿਆ। ਇਨ੍ਹਾਂ ਕਾਰਨਾਂ ਕਾਰਨ ਨਿਗਮ ਨੂੰ 5000 'ਚੋਂ ਠੀਕ ਅੱਧੇ ਭਾਵ 2499.85 ਅੰਕ ਮਿਲੇ।
ਸੰਗਰੂਰ ਜੇਲ ਦੇ ਹਿਰਾਸਤੀ ਦੀ ਹਸਪਤਾਲ 'ਚ ਹੋਈ ਮੌਤ ਬਣੀ ਬੁਝਾਰਤ
NEXT STORY 
