ਲੁਧਿਆਣਾ, (ਪੰਕਜ)- ਮਹਾਨਗਰ ਵਿਚ ਸ਼ਰਾਬ ਦੇ ਮੁੱਲ ਵਿਚ ਵਾਧੇ ਦੀ ਬਦੌਲਤ ਨਾਜਾਇਜ਼ ਸ਼ਰਾਬ ਦੀ ਸਮੱਗਲਿੰਗ ਪੂਰੇ ਜ਼ੋਬਨ 'ਤੇ ਹੈ। ਇਸ ਖੇਡ ਵਿਚ ਸ਼ਾਮਲ ਵੱਡੇ ਖਿਡਾਰੀ ਜਿੱਥੇ ਪਰਦੇ ਪਿੱਛੇ ਰਹਿ ਕੇ ਸਮੱਗਲਰਾਂ ਰਾਹੀਂ ਠੇਕੇਦਾਰਾਂ ਨੂੰ ਆਰਥਿਕ ਨੁਕਸਾਨ ਪਹੁੰਚਾਉਂਦੇ ਹੋਏ ਆਪਣੀਆਂ ਜੇਬਾਂ ਭਰਨ ਵਿਚ ਜੁਟੇ ਹਨ, ਉਥੇ ਨਸ਼ਾ ਸਮੱਗਲਿੰਗ ਰੋਕਣ ਲਈ ਬਣਾਈ ਐਂਟੀ ਨਾਰਕੋਟਿਕਸ ਸੈੱਲ ਦੀ ਵਰਕਿੰਗ ਟੀਮ ਨੂੰ ਲੈ ਕੇ ਵਿਭਾਗ ਵਿਚ ਚੱਲ ਰਹੀ ਗੁਫਤਗੂ ਚੰਡੀਗੜ੍ਹ ਪੁਲਸ ਮੁੱਖ ਦਫਤਰ ਵਿਚ ਵੀ ਪੁੱਜਣ ਦੀ ਚਰਚਾ ਹੈ।
ਨਸ਼ਾ ਸਮੱਗਲਰਾਂ ਨੂੰ ਕਾਬੂ ਕਰਨ ਲਈ ਸਰਗਰਮ ਸੈੱਲ ਦੀ ਕਾਰਵਾਈ ਹੈਰਾਨ ਕਰ ਦੇਣ ਵਾਲੀ ਹੈ। ਤਾਜ਼ਾ ਕੇਸ ਸੈੱਲ ਵੱਲੋਂ 29 ਸਤੰਬਰ ਨੂੰ ਫੋਕਲ ਪੁਆਇੰਟ ਇਲਾਕੇ ਵਿਚ ਸਥਿਤ ਇਕ ਫੈਕਟਰੀ ਤੋਂ ਬਰਾਮਦ ਕੀਤੀਆਂ 317 ਸ਼ਰਾਬ ਦੀਆਂ ਪੇਟੀਆਂ ਨਾਲ ਜੁੜਿਆ ਹੋਇਆ ਹੈ। ਇਸ ਖੇਡ ਵਿਚ ਸੈੱਲ ਵੱਲੋਂ ਇਕ ਦੋਸ਼ੀ ਨੂੰ ਕਾਬੂ ਕਰ ਕੇ ਉਸ ਦੇ ਕਬਜ਼ੇ ਵਿਚੋਂ ਇੰਨੀ ਵੱਡੀ ਖੇਪ ਦੀ ਬਰਾਮਦਗੀ ਦਿਖਾਉਣਾ ਜਿੱਥੇ ਵਿਭਾਗ ਵਿਚ ਚਰਚਾ ਦਾ ਵਿਸ਼ਾ ਬਣਿਆ ਹੋਇਆ ਹੈ, ਉੱਥੇ ਸੈੱਲ ਵੱਲੋਂ ਥਾਣਾ ਫੋਕਲ ਪੁਆਇੰਟ ਵਿਚ ਇਸ ਸਬੰਧੀ ਕੇਸ ਦਰਜ ਕਰਵਾ ਦਿੱਤਾ ਗਿਆ ਪਰ ਬਰਾਮਦ ਸ਼ਰਾਬ ਦੀ ਖੇਪ ਸਬੰਧੀ ਥਾਣੇ ਦੇ ਮੁਲਾਜ਼ਮਾਂ ਤੋਂ ਲੈ ਕੇ ਮੁਖੀ ਤੱਕ ਨੂੰ ਕੋਈ ਜਾਣਕਾਰੀ ਨਹੀਂ ਹੈ।
ਉਧਰ, ਇਸ ਕੇਸ ਵਿਚ ਸਭ ਤੋਂ ਹੈਰਾਨ ਦੇਣ ਵਾਲੀ ਗੱਲ ਇਕ ਸਮੱਗਲਰ ਤੋਂ 317 ਪੇਟੀਆਂ ਸ਼ਰਾਬ ਦੀ ਬਰਾਮਦਗੀ ਦਿਖਾਉਣਾ ਹੈ, ਜੋ ਕਿ ਅਸੰਭਵ ਲਗਦਾ ਹੈ। ਇੰਨੀ ਵੱਡੀ ਮਾਤਰਾ ਵਿਚ ਸ਼ਰਾਬ ਦੂਜੇ ਸ਼ਹਿਰ ਤੋਂ ਇਕੱਲੇ ਲੈ ਕੇ ਆਉਣਾ ਅਤੇ ਇਕੱਲੇ ਹੀ ਵੇਚਣ ਦੀ ਦਲੇਰੀ ਦਿਖਾਉਣ ਵਾਲੇ ਸਮੱਗਲਰ ਨੇ ਇੰਨੀਆਂ ਪੇਟੀਆਂ ਬਿਨਾਂ ਕਿਸੇ ਦੀ ਮਦਦ ਤੋਂ ਕਿਵੇਂ ਵਾਹਨ ਵਿਚੋਂ ਉਤਾਰੀਆਂ ਹੋਣਗੀਆਂ। ਇਸ ਸਬੰਧੀ ਆਮ ਆਦਮੀ ਵੀ ਸੋਚਣ ਲਈ ਮਜਬੂਰ ਹੋ ਜਾਵੇਗਾ।
7 ਹਜ਼ਾਰ ਦੇ ਕਰੀਬ ਸ਼ਰਾਬ ਦੀਆਂ ਬੋਤਲਾਂ ਨੂੰ ਅੱਗੇ ਰਿਟੇਲ ਵਿਚ ਗਾਹਕਾਂ ਨੂੰ ਇਕ-ਇਕ ਬੋਤਲ ਦੇ ਕੇ ਖਪਾਉਣ ਵਿਚ ਕਈ ਦਿਨ ਚਾਹੀਦੇ ਹਨ, ਜਦੋਂਕਿ ਪੁਲਸ ਦਾ ਦਾਅਵਾ ਸੀ ਕਿ ਦੋਸ਼ੀ ਨੂੰ 15 ਪੇਟੀਆਂ ਲਿਆਉਂਦੇ ਫੜਿਆ ਗਿਆ ਸੀ ਅਤੇ ਬਾਅਦ ਵਿਚ ਉਸ ਦੀ ਨਿਸ਼ਾਨਦੇਹੀ 'ਤੇ 302 ਪੇਟੀਆਂ ਬਰਾਮਦ ਹੋਈਆਂ। ਕੋਈ ਵੀ ਸਮੱਗਲਰ ਜੋ ਇਕੱਲਾ ਸਮੱਗਲਿੰਗ ਕਰਦਾ ਹੋਵੇਗਾ, ਪਹਿਲਾਂ ਸਮਰੱਥਾ ਮੁਤਾਬਕ ਸ਼ਰਾਬ ਦੀ ਖੇਪ ਨੂੰ ਵੇਚ ਕੇ ਫਿਰ ਅਗਲੀ ਖੇਪ ਲਿਆਉਣ ਦਾ ਖਤਰਾ ਸਹੇਗਾ, ਨਾ ਕਿ ਇਕੱਲੇ ਆਪਣੇ ਜ਼ੋਰ 'ਤੇ ਫੈਕਟਰੀ ਵਿਚ ਠੇਕਾ ਖੋਲ੍ਹਣ ਦੀ ਗਲਤੀ ਕਰੇਗਾ। ਇਸ ਤੋਂ ਸਾਫ ਹੈ ਕਿ ਪੁਲਸ ਟੀਮ ਨੇ ਨਾ ਤਾਂ ਉਸ ਦੇ ਸਾਥੀਆਂ ਬਾਰੇ ਪੁੱਛਗਿੱਛ ਕੀਤੀ ਅਤੇ ਨਾ ਹੀ ਇੰਨੀ ਵੱਡੀ ਮਾਤਰਾ ਵਿਚ ਸ਼ਰਾਬ ਦੀ ਖੇਪ ਕਿਸ ਠੇਕੇਦਾਰ ਤੋਂ ਲੈ ਕੇ ਆਇਆ, ਸਬੰਧੀ ਜਾਣਕਾਰੀ ਲਈ।
ਹੜਤਾਲ ਦੌਰਾਨ ਸੇਵਾ ਕੇਂਦਰਾਂ 'ਚ ਠੱਪ ਰਹੀਆਂ ਸੇਵਾਵਾਂ
NEXT STORY 
