ਜਲੰਧਰ (ਜਗਵੰਤ ਸਿੰਘ ਬਰਾੜ)- ਪੰਜਾਬ ਦੀਆਂ ਵਿਧਾਨ ਸਭਾ ਚੋਣਾਂ ਨੂੰ ਲੈ ਕੇ ਭਾਰਤੀ ਜਨਤਾ ਪਾਰਟੀ ਕਾਫ਼ੀ ਸਰਗਰਮ ਹੈ। ਭਾਜਪਾ ਪ੍ਰਧਾਨ ਨਿਤਿਨ ਨਬੀਨ ਸਪੱਸ਼ਟ ਕਰ ਚੁੱਕੇ ਹਨ ਕਿ ਭਾਜਪਾ ਪੰਜਾਬ ਵਿਚ ਇਕੱਲਿਆਂ ਹੀ 2027 ਦੀਆਂ ਚੋਣਾਂ ਲੜੇਗੀ। ਦੂਜੇ ਪਾਸੇ, ਆਮ ਆਦਮੀ ਪਾਰਟੀ ਦੇ 7 ਰਾਜ ਸਭਾ ਮੈਂਬਰ ਵੀ ਭਾਰਤੀ ਜਨਤਾ ਪਾਰਟੀ ਵਿਚ ਰਲੇਵਾਂ ਕਰ ਚੁੱਕੇ ਹਨ। ਇਸ ਸਭ ਵਿਚਾਲੇ ਭਾਰਤੀ ਜਨਤਾ ਪਾਰਟੀ ਪੰਜਾਬ ਦੇ ਉਪ ਪ੍ਰਧਾਨ ਫ਼ਤਿਹਜੰਗ ਸਿੰਘ ਬਾਜਵਾ ਨੇ ‘ਜਗ ਬਾਣੀ’ ਨਾਲ ਵਿਸ਼ੇਸ਼ ਗੱਲਬਾਤ ਦੌਰਾਨ ਪੰਜਾਬ ਦੇ ਕਈ ਅਹਿਮ ਮੁੱਦਿਆਂ ’ਤੇ ਗੱਲਬਾਤ ਕੀਤੀ। ਪੇਸ਼ ਹੈ ਇੰਟਰਵਿਊ ਦੇ ਮੁੱਖ ਅੰਸ਼-
ਰਾਘਵ ਚੱਢਾ ਸਣੇ 7 ਰਾਜ ਸਭਾ ਮੈਂਬਰ ਭਾਜਪਾ ਵਿਚ ਸ਼ਾਮਲ ਹੋਣ ਬਾਰੇ ਕੀ ਕਹੋਗੇ?
ਜਿਸ ਵੇਲੇ ਆਮ ਆਦਮੀ ਪਾਰਟੀ ਹੋਂਦ ਵਿਚ ਆਈ ਤਾਂ ਇਹ ਕਹਿੰਦੇ ਸੀ ਕਿ ਅਸੀਂ ਗੱਡੀਆਂ-ਕੋਠੀਆਂ ਨਹੀਂ ਲਵਾਂਗੇ, ਭ੍ਰਿਸ਼ਟਾਚਾਰ ਨੂੰ ਨੱਥ ਪਾਵਾਂਗੇ, ਪਰ ਜਦੋਂ ਪੰਜਾਬ ਦੇ ਲੋਕਾਂ ਨੇ ਇਨ੍ਹਾਂ ਨੂੰ ਸੱਤਾ ਦੇ ਦਿੱਤੀ ਤਾਂ ਇੱਥੇ ਭ੍ਰਿਸ਼ਟਾਚਾਰ ਸਿਖਰਾਂ ’ਤੇ ਪਹੁੰਚ ਗਿਆ। ਇਹ ਆਪਣੇ ਵਾਅਦਿਆਂ ’ਤੇ ਖਰੇ ਨਹੀਂ ਉਤਰ ਸਕੇ, ਜਿਸ ਮਗਰੋਂ ਇਨ੍ਹਾਂ ਰਾਜ ਸਭਾ ਮੈਂਬਰਾਂ ਦੇ ਪਾਰਟੀ ਨਾਲ ਵਖਰੇਵੇਂ ਸ਼ੁਰੂ ਹੋ ਗਏ। ਸੰਦੀਪ ਪਾਠਕ ਨੇ ਬੂਥ ਲੈਵਲ ’ਤੇ ਕਮੇਟੀਆਂ ਬਣਾਉਣ ਤੋਂ ਲੈ ਕੇ ਟਿਕਟਾਂ ਵੰਡਣ ਤਕ ਅਹਿਮ ਯੋਗਦਾਨ ਪਾਇਆ, ਪਰ ਇਨ੍ਹਾਂ ਨੇ ਉਨ੍ਹਾਂ ਨੂੰ ਵੀ ਅਣਗੌਲਿਆਂ ਕਰ ਦਿੱਤਾ। ਇਕ ਬੰਦੇ ਦੀ ਸੋਚ ਗਲਤ ਹੋ ਸਕਦੀ ਹੈ, ਸੱਤ ਬੰਦਿਆਂ ਦੀ ਨਹੀਂ। ਆਮ ਆਦਮੀ ਪਾਰਟੀ ਦੇ ਲੋਕ ਖ਼ੁਦ ਇਹ ਮਹਿਸੂਸ ਕਰ ਰਹੇ ਹਨ ਕਿ ਅਸੀਂ ਜੋ ਵਾਅਦੇ ਕੀਤੇ ਸੀ, ਉਹ ਪੂਰੇ ਨਹੀਂ ਕਰ ਸਕੇ।
ਹਰਭਜਨ ਸਿੰਘ ਸਮੇਤ ਹੋਰ ਸੰਸਦ ਮੈਂਬਰਾਂ ਦੇ ਘਰਾਂ ਦੇ ਬਾਹਰ ਹੋਏ ਪ੍ਰਦਰਸ਼ਨਾਂ ਬਾਰੇ ਕੀ ਕਹੋਗੇ?
ਇਹ ਤਾਨਾਸ਼ਾਹੀ ਭਰਿਆ ਰਵੱਈਆ ਹੈ। ਹੋਰ ਪਾਰਟੀਆਂ ਵਿਚ ਵੀ ਲੋਕ ਆਉਂਦੇ-ਜਾਂਦੇ ਹਨ, ਪਰ ਕਿਸੇ ਨੇ ਵੀ ਇਸ ਪੱਧਰ ਦੀਆਂ ਕੋਝੀਆਂ ਹਰਕਤਾਂ ਨਹੀਂ ਕੀਤੀਆਂ। ਇਹ ਸਭ ਕੁਝ ਕਰਨ ਦੀ ਬਜਾਏ ਪਾਰਟੀ ਨੂੰ ਸੋਚਣਾ ਚਾਹੀਦਾ ਸੀ ਕਿ ਸਾਡੇ 7 ਵੱਡੇ ਲੀਡਰ ਸਾਨੂੰ ਕਿਉਂ ਛੱਡ ਕੇ ਚਲੇ ਗਏ। ਇਨ੍ਹਾਂ ਨੇ ਆਪਣੇ ਅੰਦਰ ਝਾਤ ਮਾਰਨ ਦੀ ਬਜਾਏ ਸੰਸਦ ਮੈਂਬਰਾਂ ਦੇ ਘਰਾਂ ਦੇ ਬਾਹਰ ‘ਗੱਦਾਰ’ ਲਿਖ ਕੇ ਆਪਣੀ ਸੋਚ ਦਾ ਪ੍ਰਗਟਾਵਾ ਕੀਤਾ। ਆਪਣੀ ਖੇਡ ਸਦਕਾ ਪੂਰੀ ਦੁਨੀਆ ਵਿਚ ਨਾਂ ਰੌਸ਼ਨ ਕਰਨ ਵਾਲੇ ਹਰਭਜਨ ਸਿੰਘ ਦੇ ਘਰ ਦੇ ਬਾਹਰ ਗੱਦਾਰ ਲਿਖਣਾ ਕਿਵੇਂ ਜਾਇਜ਼ ਹੈ?
ਕੀ ਭਾਜਪਾ ‘ਆਪ੍ਰੇਸ਼ਨ ਲੋਟਸ’ ਤਹਿਤ ‘ਆਪ’ ਦੇ ਲੀਡਰਾਂ ਨੂੰ ਲਿਜਾ ਰਹੀ ਹੈ?
ਭਾਜਪਾ ਨੂੰ ਕੀ ਲੋੜ ਹੈ, ਇਹ ਸਾਡੀ ਸੋਚ ਨਹੀਂ ਹੈ। ਇਨ੍ਹਾਂ ਦੇ ਆਪਣੇ ਵਿਧਾਇਕ ਆਪਣੀ ਮਰਜ਼ੀ ਨਾਲ ਕਿਤੇ ਜਾਣਾ ਚਾਹੁਣ ਤਾਂ ਇਹ ਕਿਸੇ ਨੂੰ ਕਿਵੇਂ ਰੋਕ ਸਕਦੇ ਹਨ? ਇਹ ਕੋਈ ਇਕ ਵੀ ਅਜਿਹੀ ਮਿਸਾਲ ਦੇ ਦੇਣ ਕਿ ਭਾਜਪਾ ਨੇ ਇਨ੍ਹਾਂ ਦੇ ਕਿਸੇ ਵਿਧਾਇਕ ਨਾਲ ਵੀ ਸੰਪਰਕ ਕੀਤਾ ਹੋਵੇ ਜਾਂ ਪਾਰਟੀ ਵਿਚ ਆਉਣ ਲਈ ਕੋਈ ਪੇਸ਼ਕਸ਼ ਦਿੱਤੀ ਹੋਵੇ। ਆਮ ਆਦਮੀ ਪਾਰਟੀ ਆਪਣੀ ਲੀਹ ਤੋਂ ਲੱਥ ਚੁੱਕੀ ਹੈ। ਭਾਰਤੀ ਜਨਤਾ ਪਾਰਟੀ ਦਾ ਅਸੂਲ ਹੈ ਕਿ ਦੇਸ਼ ਸਭ ਤੋਂ ਪਹਿਲਾਂ ਹੈ, ਜਿਸ ਨੇ ਦੇਸ਼ ਦੀ ਸੇਵਾ ਕਰਨੀ ਹੈ, ਉਹ ਪਾਰਟੀ ਵਿਚ ਸ਼ਾਮਲ ਹੋ ਸਕਦਾ ਹੈ। ਸਾਨੂੰ ਤਾਨਾਸ਼ਾਹੀ ਕਿਰਦਾਰ ਦੇ ਬੰਦੇ ਨਹੀਂ ਚਾਹੀਦੇ। ਅੱਜ ਵੀ ਇਹ ਆਪਣੇ ਵਿਧਾਇਕਾਂ ਨੂੰ ਜਲੰਧਰ ਵਿਚ ਇਕੱਠੇ ਕਰ ਰਹੇ ਹਨ, ਆਖ਼ਿਰ ਘਬਰਾਹਟ ਕਿਸ ਚੀਜ਼ ਦੀ ਹੈ?
ਮਹਿਲਾ ਰਾਖਵਾਂਕਰਨ ਬਿੱਲ ਲੋਕ ਸਭਾ ਵਿਚ ਕਿਉਂ ਡਿੱਗਿਆ?
1952 ਤੋਂ 2010 ਤੱਕ ਕਾਂਗਰਸ ਸਰਕਾਰਾਂ ਵੇਲੇ ਔਰਤਾਂ ਦੀ ਪ੍ਰਤੀਨਿਧਤਾ ਸਿਰਫ਼ 4.4% ਤੋਂ 10% ਤੱਕ ਹੀ ਰਹੀ। ਮੋਦੀ ਜੀ ਦਾ ਸੁਪਨਾ ਔਰਤਾਂ ਨੂੰ ਬਰਾਬਰ ਦੀ ਤਾਕਤ ਦੇਣਾ ਹੈ। ਵਿਰੋਧੀ ਧਿਰ ਡੀਲਿਮੀਟੇਸ਼ਨ ਦਾ ਡਰ ਪੈਦਾ ਕਰ ਰਹੀ ਹੈ ਕਿ ਦੱਖਣੀ ਰਾਜਾਂ ਦੀਆਂ ਸੀਟਾਂ ਘਟ ਜਾਣਗੀਆਂ, ਜਦਕਿ ਗ੍ਰਹਿ ਮੰਤਰੀ ਨੇ ਸਾਫ਼ ਕੀਤਾ ਹੈ ਕਿ ਸਾਰੇ ਸੂਬਿਆਂ ਦੀਆਂ ਹੀ ਸੀਟਾਂ ਵਧਣਗੀਆਂ। ਵਿਰੋਧੀ ਧਿਰ ਨੇ ਸਿਰਫ਼ ਸੌੜੀ ਸੋਚ ਕਾਰਨ ਮਹਿਲਾ ਰਾਖਵਾਂਕਰਨ ਬਿੱਲ ਨੂੰ ਰੋਕਿਆ ਹੈ, ਜਿਸ ਦਾ ਨੁਕਸਾਨ ਉਨ੍ਹਾਂ ਨੂੰ ਸਹਿਣਾ ਪਵੇਗਾ।
ਕੀ ਡੀਲਿਮੀਟੇਸ਼ਨ ਬਿੱਲ ਵੱਖਰਾ ਨਹੀਂ ਸੀ ਲਿਆਂਦਾ ਜਾ ਸਕਦਾ?
ਜਦੋਂ ਸੰਸਦ ਵਿਚ ਸਪੱਸ਼ਟ ਕਰ ਦਿੱਤਾ ਗਿਆ ਕਿ ਸਾਰੇ ਸੂਬਿਆਂ ਵਿਚ ਹੀ ਸੀਟਾਂ ਵਧਣਗੀਆਂ, ਤਾਂ ਡੀਲਿਮੀਟੇਸ਼ਨ ਦਾ ਡਰ ਕਿੱਥੇ ਰਹਿ ਗਿਆ? ਅਸਲ ਵਿਚ ਵਿਰੋਧੀ ਧਿਰ ਚਾਹੁੰਦੀ ਹੀ ਨਹੀਂ ਕਿ ਭਾਜਪਾ ਇਸ ਬਿੱਲ ਦਾ ਲਾਹਾ ਲੈ ਸਕੇ, ਇਸੇ ਲਈ ਬਹਾਨੇ ਨਾਲ ਬਿੱਲ ਦਾ ਵਿਰੋਧ ਕੀਤਾ ਗਿਆ। ਜੇਕਰ ਜਨਸੰਖਿਆ ਜਾਂ ਕੋਈ ਹੋਰ ਮੁੱਦੇ ’ਤੇ ਖ਼ਦਸ਼ਾ ਸੀ ਤਾਂ ਉਸ ’ਤੇ ਸਦਨ ਵਿਚ ਚਰਚਾ ਹੋ ਸਕਦੀ ਸੀ, ਪਰ ਵਿਰੋਧੀਆਂ ਨੇ ਉਹ ਨਹੀਂ ਕੀਤਾ।
ਤੁਸੀਂ ਕਿੱਥੋਂ ਚੋਣ ਲੜੋਗੇ, ਬਟਾਲਾ ਜਾਂ ਕਾਦੀਆਂ?
ਬਟਾਲਾ, ਮੈਂ ਪਿਛਲੀ ਵਾਰ ਵੀ ਉੱਥੋਂ ਹੀ ਚੋਣ ਲੜਿਆ ਸੀ। ਬਾਕੀ ਫ਼ੈਸਲਾ ਪਾਰਟੀ ਨੇ ਲੈਣਾ ਹੁੰਦਾ ਹੈ, ਪਾਰਟੀ ਜਿੱਥੋਂ ਵੀ ਚਾਹੇਗੀ ਮੈਂ ਚੋਣ ਲੜਨ ਲਈ ਤਿਆਰ ਹਾਂ।
ਕੀ ਭਵਿੱਖ ਵਿਚ ਭਾਜਪਾ ਦਾ ਅਕਾਲੀ ਦਲ ਨਾਲ ਗੱਠਜੋੜ ਹੋਵੇਗਾ?
ਭਾਜਪਾ ਹੁਣ ਪਿੰਡਾਂ ਅਤੇ ਸ਼ਹਿਰਾਂ ਵਿਚ ਮਜ਼ਬੂਤ ਹੋ ਚੁੱਕੀ ਹੈ। ਅਸੀਂ ਸਿੱਖ ਕੌਮ ਲਈ ਬਹੁਤ ਕੰਮ ਕੀਤੇ ਹਨ, ਜਿਵੇਂ ‘ਵੀਰ ਬਾਲ ਦਿਵਸ’ ਮਨਾਉਣਾ। ਅਮਿਤ ਸ਼ਾਹ ਜੀ ਨੇ ਵੀ ਗੁਰੂ ਸਾਹਿਬਾਨ ਦੀ ਕੁਰਬਾਨੀ ਨੂੰ ਸਲਾਹਿਆ ਹੈ। ਲੋਕ ਹੁਣ ਭਾਜਪਾ ਨੂੰ ਇਕ ਮੌਕਾ ਦੇਣਾ ਚਾਹੁੰਦੇ ਹਨ; ਗੱਠਜੋੜ ਬਾਰੇ ਫ਼ੈਸਲਾ ਹਾਈਕਮਾਂਡ ਨੇ ਕਰਨਾ ਹੈ। ਸਾਡਾ ਮਕਸਦ ਪੰਜਾਬ ਦੇ ਮਾਣ ਨੂੰ ਬਹਾਲ ਕਰਨਾ ਹੈ। ਅਸੀਂ ਲੋਕਾਂ ਦੇ ਮੁੱਦੇ ਲੈ ਕੇ ਲੋਕਾਂ ਵਿਚ ਜਾਵਾਂਗੇ।
ਪੰਜਾਬ ਸਿਰ ਕਰਜ਼ੇ ਦੀ ਪੰਡ ਬਾਰੇ ਕੀ ਕਹੋਗੇ?
ਪੰਜਾਬ ਦੀ ਆਮਦਨ 1 ਲੱਖ 26 ਹਜ਼ਾਰ 400 ਕਰੋੜ ਰੁਪਏ ਹੈ ਅਤੇ ਖਰਚਾ 1 ਲੱਖ 66 ਹਜ਼ਾਰ ਕਰੋੜ ਰੁਪਏ ਦੇ ਕਰੀਬ ਹੈ, ਯਾਨੀ ਅਸੀਂ ਆਪਣੀ ਸਮਰੱਥਾ ਤੋਂ 40 ਹਜ਼ਾਰ ਕਰੋੜ ਵੱਧ ਖਰਚ ਰਹੇ ਹਾਂ। ਇਸੇ ਕਾਰਨ ਮੁਲਾਜ਼ਮਾਂ ਨੂੰ ਸਮੇਂ ਸਿਰ ਤਨਖ਼ਾਹਾਂ ਵੀ ਨਹੀਂ ਮਿਲ ਰਹੀਆਂ। 1992 ਵਿਚ ਪੰਜਾਬ ਸਿਰ 30 ਹਜ਼ਾਰ ਕਰੋੜ ਦੇ ਕਰੀਬ ਕਰਜ਼ਾ ਸੀ। ਉਦੋਂ ਤੋਂ ਲੈ ਕੇ 40 ਸਾਲ ਤਕ ਸਾਰੀਆਂ ਸਰਕਾਰਾਂ ਨੇ ਸਵਾ 2 ਲੱਖ ਕਰੋੜ ਦੇ ਕਰੀਬ ਕਰਜ਼ਾ ਲਿਆ, ਪਰ ਮੌਜੂਦਾ ਸਰਕਾਰ ਨੇ 5 ਸਾਲਾਂ ਵਿਚ ਹੀ ਇੰਨਾ ਕਰਜ਼ਾ ਚੜ੍ਹਾ ਦੇਣਾ ਹੈ ਜਿੰਨਾ ਪਿਛਲੇ 40 ਸਾਲਾਂ ਵਿਚ ਨਹੀਂ ਚੜ੍ਹਿਆ। ਇਨ੍ਹਾਂ ਨੇ ਇਕੱਲੇ ਅਪ੍ਰੈਲ ਮਹੀਨੇ ਵਿਚ 2800 ਕਰੋੜ ਦਾ ਕਰਜ਼ਾ ਲਿਆ ਹੈ। ਸਰਕਾਰਾਂ ਨਵੇਂ ਪ੍ਰਾਜੈਕਟ ਲਗਾਉਣ ਲਈ ਕਰਜ਼ਾ ਲੈਂਦੀਆਂ ਹੀ ਹਨ ਪਰ ਇਨ੍ਹਾਂ ਨੇ ਪੰਜਾਬ ਵਿਚ ਇਨਵੈਸਟਮੈਂਟ ਡਿਵੈੱਲਪਮੈਂਟ ਨਹੀਂ ਕੀਤੀ, ਜਿਸ ਕਾਰਨ ਕਰਜ਼ਾ ਮੋੜਨਾ ਔਖਾ ਹੈ ਤੇ ਇਹ ਵਧਦਾ ਹੀ ਜਾ ਰਿਹਾ ਹੈ।
ਕਦੇ ਵੀ ਪੰਜਾਬ ਨਾਲ ਧੱਕਾ ਨਹੀਂ ਕਰੇਗੀ ਭਾਜਪਾ
ਕੁਝ ਮਾਮਲਿਆਂ ਵਿਚ ਲੋਕਾਂ ਦੇ ਅੰਦਰ ਗਲਤ ਧਾਰਨਾ ਬਣਾ ਦਿੱਤੀ ਜਾਂਦੀ ਹੈ। ਬੀ. ਬੀ. ਐੱਮ. ਬੀ. ਬਾਰੇ ਹੁਕਮ ਇਹੋ ਹੈ ਕਿ ਉੱਪਰਲੀਆਂ 2 ਪੋਸਟਾਂ ’ਤੇ ਯੋਗ ਅਫ਼ਸਰਾਂ ਨੂੰ ਤਾਇਨਾਤ ਕੀਤਾ ਜਾ ਸਕਦਾ ਹੈ। ਇਸ ਦਾ ਮੰਤਵ ਇਹੋ ਹੈ ਕਿ ਚੰਗੇ ਅਫ਼ਸਰ ਮਿਸ-ਮੈਨੇਜਮੈਂਟ (ਜਿਵੇਂ ਹਾਲ ਹੀ ਵਿਚ ਹੜ੍ਹਾਂ ਵੇਲੇ ਹੋਈ) ਨੂੰ ਰੋਕ ਸਕਣ। ਇਸ ਦਾ ਮਤਲਬ ਇਹ ਨਹੀਂ ਕਿ ਹੁਣ ਪੰਜਾਬ ਦੇ ਅਫ਼ਸਰਾਂ ਨੂੰ ਇਨ੍ਹਾਂ ਅਹੁਦਿਆਂ ’ਤੇ ਤਾਇਨਾਤ ਨਹੀਂ ਕੀਤਾ ਜਾਵੇਗਾ। ਇਸ ਬਾਰੇ ਲੋਕਾਂ ਵਿਚ ਗਲਤ ਧਾਰਨਾ ਬਣਾਈ ਗਈ। ਪੰਜਾਬ ਯੂਨੀਵਰਸਿਟੀ ਦੇ ਮੁੱਦੇ ’ਤੇ ਵੀ ਅਜਿਹਾ ਹੀ ਹੋਇਆ ਸੀ, ਪਰ ਭਾਜਪਾ ਸਰਕਾਰ ਨੇ ਪੰਜਾਬ ਦੇ ਲੋਕਾਂ ਦੇ ਜਜ਼ਬਾਤਾਂ ਨੂੰ ਮੁੱਖ ਰੱਖਦਿਆਂ ਫ਼ੈਸਲਾ ਵਾਪਸ ਲੈ ਲਿਆ। ਭਾਜਪਾ ਕਦੇ ਵੀ ਪੰਜਾਬ ਨਾਲ ਧੱਕਾ ਨਹੀਂ ਕਰੇਗੀ।
ਪੰਜਾਬ : ਸਕੂਲ 'ਚ ਤੁਰੰਤ ਕੀਤੀ ਗਈ ਛੁੱਟੀ, ਇਸ ਕਾਰਣ ਲਿਆ ਗਿਆ ਫ਼ੈਸਲਾ
NEXT STORY 
