ਜਲੰਧਰ:(ਮਹੇਸ਼)-ਫਗਵਾੜਾ ਜੀ. ਟੀ. ਰੋਡ 'ਤੇ ਮਸ਼ਹੂਰ ਸ਼ਾਪਿੰਗ ਮਾਲ ਵੀਵਾ ਕੋਲਾਜ਼ ਵਿਚ ਬਣੇ ਹੈਂਗ ਆਊਟ ਨਾਮੀ ਬੀਅਰ ਬਾਰ 'ਚ ਦੋ ਧੜਿਆਂ 'ਚ ਹੋਏ ਵਿਵਾਦ ਦੌਰਾਨ ਚੱਲੀ ਗੋਲੀ 24 ਸਾਲ ਦੇ ਇਕ ਨੌਜਵਾਨ ਦੇ ਪੇਟ ਵਿਚ ਲੱਗਣ ਤੋਂ ਬਾਅਦ ਆਰ-ਆਰ ਹੋ ਗਈ। ਗੋਲੀ ਲੱਗਣ ਨਾਲ ਗੰਭੀਰ ਜ਼ਖਮੀ ਨੌਜਵਾਨ ਤਲਵਿੰਦਰ ਸਿੰਘ ਪੁੱਤਰ ਸੁਖਵਿੰਦਰ ਸਿੰਘ ਵਾਸੀ ਪਿੰਡ ਟੋਡਰਵਾਲ ਤਲਵੰਡੀ ਚੌਧਰੀਆਂ ਜ਼ਿਲਾ ਕਪੂਰਥਲਾ ਨੂੰ ਰਾਮਾ ਮੰਡੀ ਦੇ ਜੌਹਲ ਹਸਪਤਾਲ ਵਿਚ ਲਿਆਂਦਾ ਗਿਆ, ਜਿਥੇ ਡਾਕਟਰਾਂ ਨੇ ਉਸ ਦਾ ਤੁਰੰਤ ਆਪ੍ਰੇਸ਼ਨ ਕਰਨਾ ਹੀ ਠੀਕ ਸਮਝਿਆ।
ਹਸਪਤਾਲ ਪ੍ਰਮੁੱਖ ਡਾ. ਬੀ. ਐੱਸ. ਜੌਹਲ ਨੇ ਕਿਹਾ ਕਿ ਗੋਲੀ ਪੇਟ ਦੇ ਆਰ-ਪਾਰ ਹੋ ਜਾਣ ਦੇ ਬਾਅਦ ਤਲਵਿੰਦਰ ਦੀ ਸਥਿਤੀ ਅਜੇ ਨਾਜ਼ੁਕ ਬਣੀ ਹੋਈ ਹੈ। ਸ਼ਾਪਿੰਗ ਮਾਲ 'ਚ ਚੱਲੀ ਗੋਲੀ ਦੀ ਸੂਚਨਾ ਮਿਲਦੇ ਹੀ ਕਮਿਸ਼ਨਰੇਟ ਪੁਲਸ ਦੇ ਸੀਨੀਅਰ ਅਧਿਕਾਰੀ ਅਮਰੀਕ ਸਿੰਘ ਪਵਾਰ, ਗੁਰਮੀਤ ਸਿੰਘ, ਸੂਡਰਵਿਜੀ, ਹਰਸਿਮਰਤ ਸਿੰਘ ਛੇਤਰਾ, ਬਿਮਲਕਾਂਤ, ਐੱਸ. ਐੱਚ. ਓ. ਰਾਮਾ ਮੰਡੀ ਸੁਖਜੀਤ ਸਿੰਘ ਅਤੇ ਨੰਗਲ ਸ਼ਾਮ (ਦਕੋਹਾ) ਚੌਕੀ ਮੁਖੀ ਅਸ਼ਵਨੀ ਕੁਮਾਰ ਨੰਦਾ ਮੌਕੇ 'ਤੇ ਪੁੱਜੇ ਅਤੇ ਗੋਲੀ ਚੱਲਣ ਦੀ ਘਟਨਾ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਪਰ ਉਥੇ ਲੱਗੇ ਸੀ. ਸੀ. ਟੀ. ਵੀ. ਕੈਮਰੇ ਪੂਰੀ ਤਰ੍ਹਾਂ ਨਾਲ ਕੰਮ ਨਾ ਕਰਨ ਕਾਰਨ ਰਾਤ ਤੱਕ ਇਹ ਵੀ ਪਤਾ ਨਹੀਂ ਚੱਲ ਸਕਿਆ ਕਿ ਗੋਲੀ ਚੱਲਣ ਤੋਂ ਪਹਿਲਾਂ ਵਿਵਾਦ ਕਿਸ ਗੱਲ ਨੂੰ ਲੈ ਕੇ ਹੋਇਆ ਸੀ।
ਪੁਲਸ ਹੈਂਗ ਆਊਟ ਬੀਅਰ ਬਾਰ ਦੇ ਪ੍ਰਬੰਧਕਾਂ ਕੋਲੋਂ ਵੀ ਪੁੱਛਗਿੱਛ ਕਰ ਰਹੀ ਹੈ ਅਤੇ ਉਥੇ ਤਾਇਨਾਤ ਸਕਿਓਰਿਟੀ ਗਾਰਡ ਦੇ ਹੋਣ ਬਾਵਜੂਦ ਨੌਜਵਾਨ ਪਿਸਤੌਲ ਵਰਗੇ ਹਥਿਆਰ ਅੰਦਰ ਕਿਵੇਂ ਲੈ ਗਏ। ਹਾਲਾਂਕਿ ਸਕਿਓਰਿਟੀ ਗਾਰਡ ਵੱਲੋਂ ਅੰਦਰ ਜਾਣ ਵਾਲੇ ਹਰ ਇਕ ਦੀ ਤਲਾਸ਼ੀ ਵੀ ਲਈ ਜਾਂਦੀ ਹੈ। ਪੁਲਸ ਅਧਿਕਾਰੀਆਂ ਨੇ ਕਿਹਾ ਕਿ ਮਾਮਲੇ ਦੀ ਗਹਿਰਾਈ ਨਾਲ ਜਾਂਚ ਕੀਤੀ ਜਾ ਰਹੀ ਹੈ। ਤਲਵਿੰਦਰ ਦੇ ਹੋਸ਼ ਵਿਚ ਆਉਣ 'ਤੇ ਹੀ ਉਸ ਦੇ ਬਿਆਨ ਲੈਣ ਤੋਂ ਬਾਅਦ ਗੋਲੀ ਚਲਾਉਣ ਵਾਲੇ ਵਿਅਕਤੀ ਦਾ ਪਤਾ ਚੱਲ ਸਕੇਗਾ।
ਸਾਢੇ 12 ਕਰੋੜ ਦੀ ਹੈਰੋਇਨ ਸਮੇਤ 3 ਨਸ਼ਾ ਸਮੱਗਲਰ ਗ੍ਰਿਫਤਾਰ
NEXT STORY 
