ਹੁਸ਼ਿਆਰਪੁਰ/ਦਸੂਹਾ- 24 ਸਾਲ ਪਹਿਲਾਂ ਅੱਜ ਦੇ ਦਿਨ 26 ਜੁਲਾਈ 1999 ਨੂੰ ਭਾਰਤ ਨੇ ਕਾਰਗਿਲ 'ਤੇ ਜੰਗ ਜਿੱਤੀ ਸੀ। ਇਸ ਦਿਨ ਨੂੰ ਹਰ ਸਾਲ ਵਿਜੇ ਦਿਵਸ ਵਜੋਂ ਮਨਾਇਆ ਜਾਂਦਾ ਹੈ। ਲਗਭਗ ਦੋ ਮਹੀਨੇ ਤੱਕ ਚੱਲੀ ਕਾਰਗਿਲ ਜੰਗ ਭਾਰਤੀ ਫ਼ੌਜ ਦੀ ਦਲੇਰੀ ਅਤੇ ਬਹਾਦਰੀ ਦੀ ਅਜਿਹੀ ਮਿਸਾਲ ਹੈ, ਜਿਸ 'ਤੇ ਹਰ ਦੇਸ਼ ਵਾਸੀ ਨੂੰ ਮਾਣ ਹੋਣਾ ਚਾਹੀਦਾ ਹੈ। ਕਾਰਗਿਲ ਵਾਰ ਲਗਭਗ 18,000 ਫੁੱਟ ਦੀ ਉੱਚਾਈ 'ਤੇ ਲੜੀ ਗਈ ਸੀ। ਇਸ ਜੰਗ ਵਿੱਚ ਦੇਸ਼ ਨੇ 527 ਬਹਾਦਰ ਯੋਧੇ ਗੁਆਏ ਸਨ। ਉੱਥੇ ਹੀ 1300 ਤੋਂ ਜ਼ਿਆਦਾ ਜ਼ਖ਼ਮੀ ਹੋਏ ਹਨ।
ਸ਼ਹੀਦ ਰਾਜੇਸ਼ 1995 'ਚ 16 ਡੋਗਰਾ ਰੈਜੀਮੈਂਟ 'ਚ ਭਰਤੀ ਹੋਇਆ ਸੀ
ਦਸੂਹਾ ਵਿਧਾਨ ਸਭਾ ਦੇ ਤਲਵਾੜਾ ਬਲਾਕ ਦੇ ਪਿੰਡ ਰੇਪੁਰ ਦੇ ਸ਼ਹੀਦ ਨੌਜਵਾਨ ਰਾਜੇਸ਼ ਕੁਮਾਰ ਦੇਸ਼ ਦੀ ਸੇਵਾ ਕਰਨ ਲਈ 1995 ਵਿੱਚ ਭਾਰਤੀ ਫ਼ੌਜ ਵਿੱਚ 16 ਡੋਗਰਾ ਰੈਜੀਮੈਂਟ 'ਚ ਤਾਇਨਾਤ ਹੋਇਆ ਸੀ। ਰਾਜੇਸ਼ ਨੇ ਫ਼ੌਜ ਵਿੱਚ ਆਪਣੀ 4 ਸਾਲ ਦੀ ਸੇਵਾ ਦੌਰਾਨ 1999 ਵਿੱਚ ਕਾਰਗਿਲ ਯੁੱਧ ਵਿੱਚ ਦੇਸ਼ ਲਈ ਆਪਣੀ ਜਾਨ ਕੁਰਬਾਨ ਕਰ ਦਿੱਤੀ ਸੀ। ਪਿੰਡ ਵਿੱਚ ਜਵਾਨ ਰਾਜੇਸ਼ ਕੁਮਾਰ ਦਾ ਸ਼ਹੀਦੀ ਗੇਟ ਅੱਜ ਵੀ ਇਲਾਕੇ ਦੇ ਲੋਕਾਂ ਨੂੰ ਮਾਣ ਮਹਿਸੂਸ ਕਰਾਉਂਦਾ ਹੈ। 5 ਭੈਣਾਂ ਦੇ ਭਰਾ ਅਤੇ ਮਾਂ ਦੇ ਇਕਲੌਤੇ ਪੁੱਤ ਦੀ ਇਸ ਕੁਰਬਾਨੀ ਨੂੰ 24 ਸਾਲ ਬਾਅਦ ਵੀ ਯਾਦ ਕਰਕੇ ਇਸ ਮਾਂ ਦਾ ਸੀਨਾ ਮਾਣ ਨਾਲ ਚੌੜਾ ਹੋ ਜਾਂਦਾ ਹੈ। ਸ਼ਹੀਦ ਰਾਜੇਸ਼ ਕੁਮਾਰ ਦੀ ਮਾਂ ਮਹਿੰਦਰ ਕੌਰ ਨੇ ਦੱਸਿਆ ਕਿ ਰਾਜੇਸ਼ ਉਨ੍ਹਾਂ ਦਾ ਇਕਲੌਤਾ ਪੁੱਤਰ ਸੀ। ਉਹ ਵੀ ਫ਼ੌਜ ਵਿਚ ਭਰਤੀ ਹੋਣਾ ਚਾਹੁੰਦਾ ਸੀ ਕਿਉਂਕਿ ਉਸ ਦਾ ਚਾਚਾ ਫ਼ੌਜ ਵਿਚ ਸੀ ਪਰ ਸਾਡਾ ਪੂਰਾ ਪਰਿਵਾਰ ਇਸ ਲਈ ਤਿਆਰ ਨਹੀਂ ਸੀ। ਉਸ ਦੀ ਜ਼ਿੱਦ ਦੇ ਅੱਗੇ ਸਾਡੀ ਇਕ ਨਾ ਚੱਲੀ ਅਤੇ ਉਹ ਫ਼ੌਜ ਵਿੱਚ ਭਰਤੀ ਹੋ ਗਿਆ।
ਇਹ ਵੀ ਪੜ੍ਹੋ- ਆਖਿਰ ‘ਬਲਿਊ’ ਰੌਸ਼ਨੀ ਵਾਲੇ ਪੱਬ ’ਤੇ ਇੰਨੇ ਮਿਹਰਬਾਨ ਕਿਉਂ ਹਨ ਸਰਕਾਰੀ ਵਿਭਾਗ?
ਬੇਟੇ ਦੀ ਯੂਨਿਟ ਦੀ ਤਾਇਨਾਤੀ ਵੀ ਕਾਰਗਿਲ 'ਤੇ ਕੀਤੀ ਗਈ
ਕੁਝ ਸਾਲਾਂ ਬਾਅਦ ਕਾਰਗਿਲ ਦਾ ਯੁੱਧ ਸ਼ੁਰੂ ਹੋਇਆ। ਬੇਟੇ ਦੀ ਯੂਨਿਟ ਦੀ ਤਾਇਨਾਤੀ ਵੀ ਕਾਰਗਿਲ ਵਿੱਚ ਕਰ ਦਿੱਤੀ ਗਈ ਸੀ। ਜੰਗ ਤੋਂ ਕੁਝ ਦਿਨ ਬਾਅਦ ਦੋ ਫੌਜੀ ਸਾਡੇ ਘਰ ਆਏ ਅਤੇ ਪੁੱਤਰ ਦੇ ਹਾਦਸੇ ਬਾਰੇ ਦੱਸਿਆ। ਹੌਲੀ-ਹੌਲੀ ਘਰ ਵਿਚ ਪਿੰਡ ਦੇ ਲੋਕਾਂ ਦਾ ਇਕੱਠ ਹੋਣਾ ਕੁਝ ਹੱਦ ਤੱਕ ਉਸ ਦੇ ਸ਼ਹੀਦ ਹੋ ਜਾਣ ਦੀ ਸਮਝ ਆ ਗਈ। ਅਗਲੇ ਹੀ ਦਿਨ ਬੇਟੇ ਦੀ ਮ੍ਰਿਤਕ ਦੇਹ ਤਿਰੰਗੇ ਵਿੱਚ ਲਿਪਟੀ ਘਰ ਪਹੁੰਚੀ। ਉਨ੍ਹਾਂ ਦੱਸਿਆ ਕਿ ਰਾਜੇਸ਼ ਦੇ ਪਿਤਾ ਦੀ ਮੌਤ ਮਗਰੋਂ ਰਾਜੇਸ਼ ਹੀ ਉਸ ਦਾ ਇਕੋ ਇਕ ਸਹਾਰਾ ਸੀ।
ਲੋਹੜੀ ਦੇ ਤਿਉਹਾਰ 'ਤੇ ਹੋਈ ਸੀ ਪੁੱਤ ਦੀ ਆਖਰੀ ਮੁਲਾਕਾਤ
ਉਨ੍ਹਾਂ ਦੱਸਿਆ ਕਿ ਆਖਰੀ ਵਾਰ ਰਾਜੇਸ਼ ਲੋਹੜੀ ਦੇ ਤਿਉਹਾਰ 'ਤੇ ਇਕ ਦਿਨ ਦੀ ਛੁੱਟੀ 'ਤੇ ਆਇਆ ਸੀ। ਉਸ ਸਮੇਂ ਘਰ ਵਿੱਚ ਖ਼ੁਸ਼ੀ ਦਾ ਮਾਹੌਲ ਸੀ। ਰਾਜੇਸ਼ ਦੀਆਂ ਪੰਜ ਭੈਣਾਂ ਨੇ ਮਿਲ ਕੇ ਰਾਜੇਸ਼ ਦਾ ਵਿਆਹ ਕਰਨ ਲਈ ਇਕ ਰਿਸ਼ਤਾ ਲੱਭਿਆ ਸੀ। ਸਾਰਾ ਪਰਿਵਾਰ ਇੰਤਜ਼ਾਰ ਕਰ ਰਿਹਾ ਸੀ ਕਿ ਜਦੋਂ ਰਾਜੇਸ਼ ਦੀ ਅਗਲੀ ਛੁੱਟੀ 'ਤੇ ਆਵੇਗਾ ਤਾਂ ਉਸ ਦਾ ਵਿਆਹ ਕਰਨਗੇ ਪਰ ਰੱਬ ਨੂੰ ਕੁਝ ਹੋਰ ਹੀ ਮਨਜ਼ੂਰ ਸੀ। ਖ਼ਬਰ ਆਈ ਕਿ ਰਾਜੇਸ਼ ਜੰਗ ਵਿੱਚ ਸ਼ਹੀਦ ਹੋ ਗਿਆ ਹੈ।
ਇਹ ਵੀ ਪੜ੍ਹੋ- ਚੰਗੇ ਭਵਿੱਖ ਲਈ ਦੁਬਈ ਗਿਆ ਸੁਲਤਾਨਪੁਰ ਲੋਧੀ ਦਾ ਵਿਅਕਤੀ ਹੋਇਆ ਲਾਪਤਾ, ਮਾਂ ਦਾ ਰੋ-ਰੋ ਹੋਇਆ ਬੁਰਾ ਹਾਲ
ਪੁੱਤ ਨੂੰ ਅੱਜ ਵੀ ਜ਼ਿੰਦਾ ਮੰਨਦੀ ਹੈ ਮਾਂ
ਸ਼ਹੀਦ ਰਾਜੇਸ਼ ਦੀ ਮਾਂ ਮਹਿੰਦਰ ਕੌਰ ਅੱਜ ਵੀ ਮੰਨਦੀ ਹੈ ਕਿ ਉਨ੍ਹਾਂ ਦਾ ਪੁੱਤਰ ਜ਼ਿੰਦਾ ਹੈ ਅਤੇ ਉਨ੍ਹਾਂ ਦੇ ਨਾਲ ਹੈ। ਮਾਂ ਹਰ ਰੋਜ਼ ਪੁੱਤਰ ਦੇ ਕਮਰੇ ਵਿਚ ਜਾਂਦੀ ਹੈ ਅਤੇ ਤਿੰਨ ਵਾਰ ਦਾ ਖਾਣਾ ਰੱਖਣ ਦੇ ਨਾਲ-ਨਾਲ ਉਸ ਦਾ ਬਿਸਤਰਾ ਸਾਫ਼ ਕਰਦੀ ਹੈ। ਉਸ ਦੀ ਵਰਦੀ, ਜੁੱਤੀ, ਸਭ ਕੁਝ ਹਰ ਰੋਜ਼ ਸਾਫ਼ ਕਰਕੇ ਤਿਆਰ ਕਰਦੀ ਹੈ। ਇਸ ਦੇ ਨਾਲ ਹੀ ਗਰਮੀਆਂ ਅਤੇ ਸਰਦੀਆਂ ਦੇ ਮੌਸਮ ਅਨੁਸਾਰ ਕਮਰੇ ਵਿੱਚ ਹਰ ਉਹ ਸਹੂਲਤ ਪ੍ਰਦਾਨ ਕੀਤੀ ਜਾਂਦੀ ਹੈ ਜੋ ਇਕ ਰਹਿਣ ਵਾਲੇ ਵਿਅਕਤੀ ਲਈ ਜ਼ਰੂਰੀ ਹੋਵੇ।
ਰਾਜੇਸ਼ ਦੇ ਕਮਰੇ ਨੂੰ ਮਦਿੰਰ ਵਾਂਗ ਸਜਾਇਆ
ਮਾਂ ਨੇ ਆਪਣੇ ਬੇਟੇ ਨੂੰ ਖ਼ੁਦ ਦੀਆਂ ਨਜ਼ਰਾਂ ਵਿਚ ਜ਼ਿੰਦਾ ਰੱਖਣ ਲਈ ਰਾਜੇਸ਼ ਦੇ ਕਮਰੇ ਨੂੰ ਮੰਦਿਰ ਵਾਂਗ ਸਜਾਇਆ ਹੈ ਜਿੱਥੇ ਮਾਂ ਵੱਲੋਂ ਦੋ ਵਾਰ ਪੂਜਾ ਕਰਨ ਤੋਂ ਬਾਅਦ ਪੁੱਤਰ ਦੀ ਫੋਟੋ 'ਤੇ ਰੋਜ਼ਾਨਾ ਤਿਲਕ ਲਗਾਇਆ ਜਾ ਰਿਹਾ ਹੈ। ਇਹ ਸਾਰਾ ਪ੍ਰੋਗਰਾਮ ਬੇਟੇ ਦੀ ਸ਼ਹਾਦਤ ਤੋਂ ਕੁਝ ਦਿਨ ਬਾਅਦ ਹੀ ਸ਼ੁਰੂ ਕੀਤਾ ਗਿਆ ਸੀ।
ਅੱਜ ਵੀ ਭਾਰਤੀ ਫ਼ੌਜ ਉਨ੍ਹਾਂ ਦਾ ਰੱਖਦੀ ਹੈ ਖਿਆਲ
ਮਹਿੰਦਰ ਕੌਰ ਨੇ ਦੱਸਿਆ ਕਿ ਉਨ੍ਹਾਂ ਦੇ ਪੁੱਤਰ ਦੀ ਸ਼ਹਾਦਤ ਤੋਂ ਬਾਅਦ ਸਰਕਾਰ ਨੇ ਉਨ੍ਹਾਂ ਨਾਲ ਕੀਤੇ ਸਾਰੇ ਵਾਅਦੇ ਪੂਰੇ ਕੀਤੇ ਹਨ। ਅੱਜ ਵੀ ਭਾਰਤੀ ਫ਼ੌਜ ਉਨ੍ਹਾਂ ਨੂੰ ਫੋਨ ਕਰਕੇ ਹਾਲ-ਚਾਲ ਪੁੱਛ ਰਹੀ ਹੈ।
ਮਾਂ ਦੀ ਪੰਜਾਬ ਸਰਕਾਰ ਤੋਂ ਗੁ਼ਜ਼ਾਰਿਸ਼
ਮਹਿੰਦਰ ਕੌਰ ਨੇ ਦੱਸਿਆ ਕਿ ਉਨ੍ਹਾਂ ਦੀਆਂ ਪੰਜ ਬੇਟੀਆਂ ਦਾ ਵਿਆਹ ਹੋ ਚੁੱਕਾ ਹੈ। ਸਭ ਤੋਂ ਛੋਟੀ ਧੀ ਉਨ੍ਹਾਂ ਕੋਲ ਰਹਿੰਦੀ ਸੀ ਅਤੇ ਉਨ੍ਹਾਂ ਦੀ ਦੇਖਭਾਲ ਕਰਦੀ ਸੀ। ਧੀ ਸਰਕਾਰੀ ਨੌਕਰੀ ਕਰਦੀ ਹੈ। ਪਹਿਲਾਂ ਉਹ ਨੇੜੇ ਹੀ ਡਿਊਟੀ ਕਰਕੇ ਆਉਂਦੀ ਸੀ ਪਰ ਉਸ ਦੀ ਬਦਲੀ ਕਿਸੇ ਹੋਰ ਜ਼ਿਲ੍ਹੇ ਵਿੱਚ ਹੋਣ ਕਾਰਨ ਅੱਜ ਉਹ ਪਿਛਲੇ ਦੋ ਸਾਲਾਂ ਤੋਂ ਘਰ ਵਿੱਚ ਇਕੱਲੀ ਰਹਿ ਰਹੀ ਹੈ। ਉਨ੍ਹਾਂ ਨੇ ਪੰਜਾਬ ਸਰਕਾਰ ਨੂੰ ਬੇਨਤੀ ਕੀਤੀ ਹੈ ਕਿ ਹੁਣ ਉਨ੍ਹਾਂ ਦੀ ਧੀ ਹੀ ਸਹਾਰਾ ਹੈ। ਇਸ ਲਈ ਉਹ ਮੰਗ ਕਰਦੇ ਹਨ ਕਿ ਬੇਟੀ ਦਾ ਤਬਾਦਲਾ ਨੇੜੇ-ਤੇੜੇ ਕਰ ਦਿੱਤਾ ਜਾਵੇ, ਤਾਂ ਜੋ ਉਹ ਉਨ੍ਹਾਂ ਦੀ ਦੇਖਭਾਲ ਕਰ ਸਕੇ।
ਇਹ ਵੀ ਪੜ੍ਹੋ- ਕਾਂਗਰਸ ਲਈ ਸੰਕਟ ਦੀ ਘੜੀ! ਸਾਬਕਾ ਮੰਤਰੀ ਤੇ ਸਾਬਕਾ ਵਿਧਾਇਕ ਭਾਜਪਾ 'ਚ ਜਾਣ ਲਈ ਲੱਭ ਰਹੇ ਰਾਹ
ਜਗਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:-
https://play.google.com/store/apps/details?id=com.jagbani&hl=en&pli=1
For IOS:-
https://apps.apple.com/in/app/id538323711
ਨੋਟ : ਇਸ ਖ਼ਬਰ ਬਾਰੇ ਕੀ ਹੈ ਤੁਹਾਡੀ ਰਾਏ, ਕੁਮੈਂਟ ਕਰਕੇ ਦਿਓ ਜਵਾਬ
ਅੰਮ੍ਰਿਤਸਰ ਪਹੁੰਚੇ ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਕੀਤੇ ਵੱਡੇ ਐਲਾਨ, ਆਖੀਆਂ ਇਹ ਗੱਲਾਂ
NEXT STORY 
